#📙 നോവൽ - കാശിയുടെ പെണ്ണ് 💐💐 🔻 പാർട്ട്_ 72 ✍️രചന - ജിഫ്ന നിസാർ 💥 ഫോൺ പോലും ഓഫ് ചെയ്തു വെച്ച വിരസത നിറഞ്ഞ രണ്ടാമത്തെ പകൽ.. ചെയ്യാനൊന്നുമില്ലാതെ.. അല്ല.. അങ്ങനല്ല.. ചെയ്തു തീർക്കാൻ ഇപ്പഴാണ് ഒരുപാട് കാര്യങ്ങളുള്ളത്. പക്ഷേ രണ്ടു ദിവസം താൻ പുറം ലോകത്തുണ്ടെന്ന് ആരെയും അറിയിക്കാതെ.. ഒന്നും ചെയ്യാനുള്ള അനുവാദമില്ലാതെ കഴിച്ചു കൂട്ടിയിരിക്കുന്നു. ഒരുപാട് നാളുകൾക്ക് ശേഷം ആദ്യമായാണ് അങ്ങനൊന്നും ചെയ്യാതെ അവൻ വീട്ടിൽ അടങ്ങി നിൽക്കുന്നത്. ഈ രണ്ടു ദിവസവും തിളച്ചു മറിയുന്ന ഉള്ളിലെ ആകുലതകളെ ഒന്നടക്കി പിടിക്കാൻ അവൻ പെട്ട പാട്. വെറുതെ വിടില്ലെന്ന് വാശിയുള്ളത് പോലെ ഓർമകൾ നാല് പാടും നിന്നും അവനെ വളഞ്ഞിട്ട് വേട്ടയാടി.. യാതൊരു കരുണയുമില്ലാതെ ആക്രമിച്ചു. സാധാരണ ശിവയെ വിളിക്കുമ്പോൾ.. അതുമല്ലെങ്കിൽ അവൻ തന്നെ വന്നിട്ട് കാണുമ്പോൾ കുറച്ചൊരു ആശ്വാസം കിട്ടാറുണ്ട്. ഇപ്രാവശ്യം അതിനും വയ്യ. അവനെയൊന്ന് വിളിക്കാനുള്ള തോന്നൽ ഉള്ളിൽ അതി ശക്തമായി തന്നെയുണ്ട്. പക്ഷേ രക്ഷപ്പെടുത്തി കൊണ്ട് വന്നവർക്ക് കൊടുത്തു പോയ ആ വാക്ക്. അത് പാലിക്കേണ്ടത് തന്നെയാണ്. അതവന് നിർബന്ധം തന്നെയാണ്. ആരെന്നോ എന്തിനെന്നോ അറിയില്ലേലും വാക്ക് കൊടുത്തത് പാലിക്കുക തന്നെ വേണമല്ലോ. ഇത് പോലൊരു പാലിക്കപ്പെടേണ്ട വാക്കിന്റെ അറ്റവും മുറുകെ പിടിച്ചു കൊണ്ടൊരുത്തി കൂടിയുണ്ട്. കാത്തിരിക്കുന്നു. ആ ഓർമയിൽ പോലും വല്ലാതെ തുടിച്ച നെഞ്ചിന് മേൽ കൈകൾ ചേർത്തമർത്തി കൊണ്ടവൻ വീണ്ടും പുറത്തേക്ക് നോക്കിയിരുന്നു. താൻ ജയിലിൽ ആയതൊക്കെ അവളും അറിഞ്ഞു കാണും.. ഇനിയെങ്ങനെ രക്ഷപ്പെട്ടു പോകുമെന്നോർത്തു കൊണ്ടവൾ വല്ലാതെ വേദനിച്ചും കാണും.. ഒരിറ്റ് സ്നേഹം പകർന്നു കൊടുക്കാൻ തനിക്കു പറ്റുന്നില്ല.. പക്ഷേ വേദനകൾ ആവോളം കൊടുക്കുന്നുണ്ട്. ആ മുറിയിലിരുന്നാൽ അൽപ്പം തുറന്നിട്ട ജനലിൽ കൂടി പുറത്തെക്കുള്ള ഗേറ്റ് കാണാം. അതും അടച്ചു പൂട്ടി കൊണ്ട് തന്നെയാണ്. കാശി നാഥൻ ഇപ്പോഴും ജയിലിൽ തന്നെ ആണല്ലോ.. പല്ല് കടിച്ചു കൊണ്ടതോർക്കേ അവന്റെ മനസ്സിൽ മഹേഷിന്റെ മുഖമുണ്ടായിരുന്നു. വിടില്ല നിന്നെ ഞാൻ.. എന്നെ പെടുത്തി കളഞ്ഞത് ഞാൻ ചിലപ്പോൾ മറന്നേക്കും. പക്ഷേ അവളെ.. അവളെ നീ അതിന്റെ പേരിൽ വേദനിപ്പിച്ചത് മറക്കാൻ കാശി നാഥൻ ഇനിയൊന്നു കൂടി ജനിക്കേണ്ടി വരും.. കാശിയുടെ കൈകളാ ജനൽ കമ്പിയിൽ മുറുകി... 💥💥 നീ.. നീ എന്താ മഹി പറഞ്ഞേ...? " ചോദ്യത്തോടൊപ്പം തന്നെ അശോകന്റെ കൈകൾ ഫോണിൽ മുറുകി. നിമിഷങ്ങൾ കൊണ്ടയാൾ വിയർത്തു കുളിച്ചു. ഹൃദയം ക്രമാതീതമായി മിടിച്ചു കൊണ്ടിരിക്കുന്നു. കണ്ണുകൾ ഒരുവേള മുകളിലെ ബാൽകണിയിൽ ആ ലോകത്തിലൊന്നും അല്ലെന്ന പോലെയിരിക്കുന്ന കാർത്തുവിന് നേരെ നീണ്ടു. അപ്പോൾ മുതൽ വല്ലാത്തൊരു ഭയമായിരുന്നു അയാളിൽ നിറഞ്ഞതത്രയും. താനീ ചെയ്ത് കൂട്ടിയതൊക്കെയും വെറുതെ ആയി പോയോ എന്നായിരുന്നു ആശങ്ക മുഴുവനും. കാരണം മഹേഷ്‌ പറഞ്ഞതിപ്പോ അതാണ്. അവൻ.. കാശിനാഥൻ പുറത്ത് വന്നെന്ന്. കാശി നാഥന്റെ ജീവന് വിലയിട്ട് കൊണ്ട് താൻ നടത്തുന്ന ഈ കല്യാണത്തിന് ഇനി ആയുസ്സില്ലെന്ന് കൂടിയല്ലേ മഹേഷ്‌ ഇപ്പൊ തന്നോട് പറഞ്ഞത്. "അങ്കിളിന് ചെവി കേൾക്കുന്നില്ലേ.." മഹേഷിന്റെ ശബ്ദത്തിലൊരു നീരസമുണ്ടോ..? ഉണ്ടെന്ന് മനസ്സിലായിട്ടും അശോകന്റെ മനസ് പക്ഷേ അതിലൊന്നും ഉടക്കി പോയില്ല. കാശി നാഥൻ തിരികെ വന്നിരിക്കുന്നു. അതിനർത്ഥം... വീണ്ടും അയാളുടെ കണ്ണുകൾ കാർത്തുവിന് നേരെ തന്നെയാണ് നീണ്ടത്. അവിടെ ഇരുന്നാൽ പോലും തിരിച്ചറിയാൻ കഴിയുന്നുണ്ട് അവളുടെ മുഖത്തുള്ള ആ തീവ്രമായ സങ്കടം. അങ്ങനെയെങ്കിൽ അവനിറങ്ങിയത് അവളറിഞ്ഞില്ല എന്ന് തന്നെ വേണം കരുതാൻ. ഈ കല്യാണം മുടക്കാൻ വേണ്ടി നീയെന്ത് ബുദ്ധിമോശം കാണിച്ചാലും അതിന് പകരം അനുഭവിക്കേണ്ടി വരുന്നത് കാശിയാവും എന്ന് താൻ കൊടുത്ത സ്ട്രിക്ട് വാണിങ്.. അതെല്ലാം കൊണ്ട് കൂടിയാണ് ഒരു വാക്കോ നോക്കോ എതിര് പറയാതെ അവളൊതുങ്ങി നിൽക്കുന്നതും. അല്ലായെങ്കിൽ തന്റെ മകൾ ഒരിക്കലും ഇത് പോലെ സ്വയം തോറ്റു മടങ്ങില്ലെന്നും അയാൾക്കുറപ്പുണ്ട്. ഇത്രയും സ്നേഹിക്കാൻ മാത്രം അവളെന്ത് തേങ്ങയാണാവോ അവനിൽ കണ്ടത്..? പല്ല് കടിച്ചു കൊണ്ടയാൾ ഞൊടിഞ്ഞു.. അങ്കിൾ..." അത്യാവശ്യം ഒച്ചയിട്ട് കൊണ്ട് മഹേഷ്‌ വിളിക്കുമ്പോൾ ഒന്നു ശ്വാസമെടുത്തു കൊണ്ട് അമർത്തി മൂളി. "അവനെ.. കാശിയെ ഇറക്കി കൊണ്ട് പോയത് ആരാണെന്ന് നിനക്ക് വിവരം വല്ലതും കിട്ടിയോ മഹി.." ശാന്തമായിരുന്നു അശോകന്റെ സ്വരം. പക്ഷേ അതിലൊരു വന്യത നിറഞ്ഞു നിന്നിരുന്നു. അത് മഹേഷിനും മനസ്സിലായി. അതോടെ അവന്റെ സ്വരമൽപ്പം മൃദുവായി. 'ഇല്ല.. അവനിറങ്ങിയെന്ന് എന്നെ എനിക്ക് വേണ്ടപ്പെട്ട ഒരാൾ വിളിച്ചു പറഞ്ഞതാ. അപ്പോൾ തന്നെ ഞാൻ സ്റ്റേഷനിൽ പോയി.. അന്വേഷിച്ചു..അറിഞ്ഞത് സത്യം തന്നെ.. പക്ഷേ... " മഹേഷ്‌ ഒരു നിമിഷം നിർത്തി. പക്ഷേ.." അവൻ നിർത്തിയത് അശോകൻ എടുത്തു ചോദിച്ചു "പക്ഷേ കാശിനാഥൻ പുറത്തിറങ്ങിയത് ഇന്നല്ല അങ്കിൾ.... മഹേഷിന്റെ ശബ്ദം വല്ലാതെ പതിഞ്ഞു പോയി. "എന്ത്.. അശോകൻ ശബ്ദമുയർത്തി. "അത്... അവൻ.. അവനിറങ്ങിയിട്ട് ഇന്നേക്ക് രണ്ടു ദിവസമായെന്ന്.." വല്ലാത്തൊരു പരുങ്ങലോടെ മഹേഷ്‌ അത് പറഞ്ഞമ്പോൾ അശോകൻ നടുക്കത്തോടെ കണ്ണുകൾ ഇറുകെ അടച്ചു. രണ്ടു ദിവസം.. കാശി നാഥൻ പുറത്തിറങ്ങിയിട്ട് രണ്ടു ദിവസം കഴിഞ്ഞു പോയിരിക്കുന്നു. ചെയ്യാത്ത തെറ്റിനാണ് അവൻ ജയിലിൽ പോയതെന്ന് നൂറു ശതമാനം അയാൾക്കുറപ്പുണ്ട്. ഡ്രൈവിംഗ് ജോലിയേ സ്വന്തം പ്രാണൻ പോലെ സ്നേഹിക്കുന്ന അവനൊരിക്കലും ആ ബസ്സിൽ വെച്ചെങ്ങനെ ഒരു ചെറ്റത്തരം കാണിക്കില്ലെന്നും അശോകനറിയാം. തന്നെ ആരോ ചതിച്ചതാണെന്ന് അവനും ഉറപ്പാവും. എന്നിട്ടും പുറത്തിറങ്ങിയിട്ട് തന്നെ പോലും കാണാൻ വരാതെ.... ഒന്ന് വിളിക്കാതെ അവനീ രണ്ടു ദിവസം അടങ്ങി ഇരുന്നെങ്കിൽ.. അതിനർത്ഥം. അവനെന്തോ കാര്യമായിട്ട് തന്നെ പ്ലാൻ ചെയ്യുന്നുണ്ട് എന്ന് തന്നെയല്ലേ.? വിയർത്തു നനഞ്ഞു നെറ്റിയിൽ അശോകൻ പതിയെ വിരലോടിച്ചു. അയാളിൽ വല്ലാതെ ടെൻഷൻ കൂടുന്നുണ്ട്. രണ്ടു ദിവസം മാത്രമാണ് ഇനി കല്യാണത്തിന് അവശേഷിക്കുന്നത്. ടൗണിലെ അറിയാപ്പെടുന്ന ഓഡിട്ടോറിയം തന്നെ ബുക്ക് ചെയ്ത് അതിനുള്ള കാര്യങ്ങളെല്ലാം ചെയ്തു കഴിഞ്ഞു. വേണ്ടപ്പെട്ട എല്ലാവരെയും ക്ഷണിക്കുകയും ചെയ്തു. കാർത്തു സഹകരിച്ചിലല്ലേലും കല്യാണത്തിന് വേണ്ടുന്ന വസ്ത്രങ്ങളും ആഭരണങ്ങളും പോലും വീട്ടിലെത്തി. മഹേഷിന് സമ്മാനിക്കാൻ വേണ്ട വില കൂടിയ കാറും ബുക്ക് ചെയ്ത് കാത്തിരിക്കുന്ന തനിക്കീ വാർത്ത വല്ലാത്ത ഷോക്ക് തന്നെയാണ്. കാശിയോട് കാര്യമായ വിരോധങ്ങളൊന്നും തന്നെ ഇല്ലെങ്കിൽ പോലും കാർത്തുവിന്റെയും മഹേഷിന്റെയും കല്യാണം കഴിക്കുന്നത് വരെയെങ്കിലും അവനകത്തു കിടക്കട്ടെ എന്ന് കരുതിയത്.. മറ്റൊന്നും കൊണ്ടല്ല.. സ്നേഹിക്കുന്നവർക്ക് വേണ്ടി കാശി നാഥൻ എടുക്കുന്ന നിലപാട് തനിക്കറിയാം എന്നത് കൊണ്ട് കൂടിയാണ്. തന്നോട് ഇനിയെത്ര കടപ്പാട് ഉണ്ടെങ്കിൽ കൂടിയും കാർത്തുവിനെ അവന് വേണമെന്ന് തോന്നിയാൽ അവനവളെ നേടി എടുക്കുക തന്നെ ചെയ്യും. അതിനിടയിൽ വന്നു ചേരുന്ന ഏതിനെയും നേരിടാൻ വേണ്ടുന്ന ധൈര്യവും കഴിവും അവനാവോളം ഉണ്ട് താനും.. അത് തനിക്കല്ലാതെ മാറ്റാർക്കറിയാം. ആ വീര്യവും ചൊടിയും താൻ നേരിട്ടറിഞ്ഞ എത്രയോ സന്ദർഭങ്ങൾ കഴിഞ്ഞു പോയിരിക്കുന്നു.. മഹി... വിളിക്കുമ്പോൾ അശോകന്റെ ശബ്ദം ചെറുതായി വിറച്ചു. കൈ കരുത്തു കൊണ്ടൊന്നും ഈ കാര്യത്തിൽ ചെയ്യാൻ കഴിയില്ലെന്ന് അയാൾക്കറിയാം. പക്ഷേ കാശിക്ക് കാർത്തുവിനെ കൊടുക്കുന്നതിനെ കുറിച്ചും അയാൾക്കോർക്കാൻ കഴിയുന്നില്ല. "അവൻ ആര് പണി കൊടുത്തിട്ടാണ് ജയിലിൽ പോയതെന്ന് ഇത് വരെയും നമ്മൾക്ക് കണ്ട് പിടിക്കാൻ പറ്റിയിട്ടില്ല.. പക്ഷേ അവനെ ആരാണ് ജാമ്യത്തിലിറക്കി കൊണ്ട് പോയതെന്ന് അറിഞ്ഞേ തീരൂ.." ഒട്ടൊരു വാശി പോലെ അശോകന്റെ സ്വരം. "ഞാൻ അന്വേഷിച്ചു നോക്കാം അങ്കിൾ.. കണ്ട് പിടിച്ചേ പറ്റൂ..എനിക്ക് തോന്നുന്നു കാശി നാഥന് നമ്മൾ അറിയാത്ത ഒരു സ്ട്രോങ്ങ്‌ എതിരാളി കൂടി ഉണ്ടെന്ന്.. അങ്കിളിന്റെ കൂടെ നടന്നു കൊണ്ടവൻ അത് പോലെയുള്ള പെർഫോമൻസ് അല്ലായിരുന്നോ.." കാശിയോടുള്ള വെറുപ്പോടെയാണ് മഹേഷ്‌ അത് പറഞ്ഞതെങ്കിലും അശോകന് അവനാ പറഞ്ഞത് നെഞ്ചിൽ തന്നെ കൊണ്ടൂ. കാശിക്കൊരു പ്രബലനായ ശത്രു ഉണ്ടെങ്കിൽ അത് തീർച്ചയായും തനിക്കു വേണ്ടി ഉണ്ടായതാണ്. തനിക്ക് വേണ്ടി അവനുണ്ടാക്കിയതാണ്. അല്ലാതെ ശത്രുക്കളെ സമ്പാദിക്കേണ്ട യാതൊന്നും അവൻ ഇത് വരെയും ചെയ്തിട്ടില്ല.. ചെയ്യുന്നില്ല. അശോകൻ തലയൊന്ന് കുടഞ്ഞു. അങ്കിൾ.." വീണ്ടും മഹേഷിന്റെ ആശങ്ക നിറഞ്ഞ വിളി.. "പറഞ്ഞോടാ.." "കാശി നാഥൻ പുറത്തുണ്ടെന്ന് യാതൊരു കാരണവശാലും കാർത്തു അറിയാതെ നോക്കണം.. അവളുടെ ഫോൺ ഇപ്പോഴും അങ്കിളിന്റെ ഫോണുമായി കണക്ട് അല്ലേ.." മഹേഷ്‌ ചോദിച്ചപ്പോൾ അശോകൻ അമർത്തി മൂളി. കാശിയെ അവൾ ഫോണിൽ കൊണ്ടാക്ട് ചെയ്യാൻ ശ്രമിച്ചാൽ പോലും അത് താൻ അറിയും എന്നവളെ അറിയിക്കാൻ വേണ്ടി അങ്ങനെ ചെയ്യാൻ മഹേഷ്‌ തന്നെയാണ് അയാളോട് പറഞ്ഞഞ്ഞിരുന്നത്.. "പിന്നെ.. ഏത് നിമിഷവും ഇനി കാശി നാഥൻ അങ്കിളിനെ വിളിച്ചേക്കും. കർശനമായിട്ട് തന്നെ ഗെറ്റ് ഔട്ട്‌ അടിച്ചേക്കണം. പഴയ സെന്റിമെന്റൽ ഇപ്പോഴും അവനോട് ഉണ്ടെന്നവൻ മനസ്സിലാക്കിയ പിന്നെ തീർന്നു..അവനതിൽ പിടിച്ചു കയറി വെറുതെ സീൻ..." എനിക്കറിയാം മഹി..നീ വെച്ചേക്ക് " അവനാ പറഞ്ഞത് ഇഷ്ടമായില്ല എന്നൊരു കടുപ്പത്തിൽ അശോകൻ പറഞ്ഞു. "പിന്നെ വീടിനടുത്തു കുറച്ചു കൂടി പ്രോട്ടക്ഷൻ വേണ്ടി വന്നേക്കും. അത് ഞാൻ നോക്കി കൊള്ളാം.. അങ്കിൾ ടെൻഷൻ ആവൊന്നും വേണ്ട.. എല്ലാം നമ്മൾ കരുതിയത് പോലെ തന്നെ നടക്കും.. അവനല്ല.. അവന്റെ അപ്പൻ വന്നാലും.." മതി മഹി.. ഞാൻ നിന്നെ വിളിച്ചോളാം.. " മഹേഷ്‌ ആവേശത്തിൽ പറഞ്ഞു കൊണ്ടിരിക്കെ തന്നെ അത്രയും പറഞ്ഞിട്ട് അശോകൻ ഫോൺ കട്ട് ചെയ്തു. വലിഞ്ഞു മുറുകിയ മുഖത്തോടെ അയാളോരിക്കൽ കൂടി മുകളിലേക്ക് നോക്കി. കാർത്തു എഴുന്നേറ്റ് പോയിരിക്കുന്നു. ഫോൺ തിരികെ പോക്കറ്റിമെക്കിട്ട് കൊണ്ടയാൾ വീണ്ടും എന്തൊക്കെയോ പ്ലാൻ ചെയ്തു കൊണ്ടാ മുറ്റത്തു നീളത്തിൽ നടന്നു തുടങ്ങി.. എന്ത് വേണമെന്ന് അയാളുടെ ചിന്തകളിൽ പ്ലാൻ തെളിയുന്നതിനനുസരിച്ചു കൊണ്ടാ മുഖം തിളക്കം വെച്ച് തുടങ്ങിയിരിക്കുന്നു.. വീണ്ടും നോട്ടം കാർത്തുവിന്റെ മുറിയുടെ നേരെയാണ്.. അമർത്തിയ ചുവടുകളോടെ അയാൾ കയറി പോയതും അവളുടെ മുറിയിലേക്കാണ്.. തുടരും.. അമർത്തി ഒന്നങ്ങാട്ട് കൊടുക്ക്.. ആ പെണ്ണിനെ ഇങ്ങനെ ഇഞ്ചിഞ്ചായി കൊല്ലുന്നതിലും ഭേദം അതാണ്‌.. അല്ല പിന്നെ.. ഇങ്ങനുണ്ടോ 😬 റിവ്യൂ ഇട്ടിട്ട് പോണേ.. സ്നേഹത്തോടെ jif💐 #📔 കഥ #💞 പ്രണയകഥകൾ