#✝ಯೇಸು ವಾಕ್ಯಗಳು📖 #📚 ಬೈಬಲ್✝️ #📖ಬೈಬಲ್ ನುಡಿಗಳು✝ #✝️ Jesus #the fest of Assumption mother mary ಮಾತೆ* (ಕಾರ್ಮೆಲ್ ಮಾತೆಯ ಕೃಪೆಯ ಸಂಕೇತ) ಯೇಸುವನ್ನು ಹೆತ್ತ ಪವಿತ್ರ ಕನ್ಯೆ ಮರಿಯಮ್ಮ ತಮ್ಮ ಐಹಿಕ ಜೀವನವನ್ನು ಪೂರ್ಣಗೊಳಿಸಿದ ಬಳಿಕ, ದೇವರು ಅವರನ್ನು ಶರೀರ ಸಮೇತ ಸ್ವರ್ಗಕ್ಕೆ ಬರಮಾಡಿಕೊಂಡು, ಸ್ವರ್ಗದ ರಾಣಿಯಾಗಿ ಕಿರೀಟ ತೊಡಿಸಿ ಗೌರವಿಸಿದರೆಂದು ಕಥೋಲಿಕ ಸಂಪ್ರದಾಯವು ನಂಬುತ್ತದೆ. ಆರ್ದ್ರ ಅಂತಃಕರಣದ ಮಾತೆ ಮರಿಯಮ್ಮನವರನ್ನು ಬಂಗಾರದ ಕಿರೀಟ ಧರಿಸಿ, ಚಿನ್ನದ ಉತ್ತರೀಯ (ಶಾಲು) ಹೊದ್ದು, ತೋಳಲ್ಲಿ ಕಂದ ಯೇಸುವನ್ನು ಹಿಡಿದಿರುವ ರೂಪದಲ್ಲಿ ಚಿತ್ರಗಳಲ್ಲಿಯೂ, ಶಿಲ್ಪರೂಪದಲ್ಲಿಯೂ ಬಳಕೆಗೆ ತಂದವರು ಇಸ್ರೇಲಿನ ಕಾರ್ಮೆಲ್ ಬೆಟ್ಟದ ಗುಹೆಗಳಲ್ಲಿ ತಪೋಧ್ಯಾನದಲ್ಲಿ ನಿರತರಾಗಿದ್ದ ಕಾರ್ಮೆಲ್ ಸಂನ್ಯಾಸಿಗಳು. ಸಂಪ್ರದಾಯದ ಪ್ರಕಾರ, ಕ್ರಿ.ಶ. ೧೨೫೧ರಲ್ಲಿ ಚಳಿಗಾಲದ ಒಂದು ದಿನ ಸಂತ ಸೈಮನ್ ಸ್ಟಾಕ್ ಅವರಿಗೆ ಕಾರ್ಮೆಲ್ ಮಾತೆ ದರ್ಶನ ನೀಡಿ, ವಿಶೇಷ ರಕ್ಷಣೆ ಮತ್ತು ಮಾತೃಪ್ರೀತಿಯ ಸಂಕೇತವಾಗಿ ತಮ್ಮ ಉತ್ತರೀಯವನ್ನು ಅವರ ಮೇಲೆ ಹೊದಿಸಿದರು. ಅದ್ಭುತವೆಂದರೆ, ಸ್ವರ್ಗೀಯ ವೈಭವವನ್ನು ಸೂಚಿಸುತ್ತಿದ್ದ ಬಂಗಾರದ ಉತ್ತರೀಯವು ಸೈಮನ್ ಅವರ ಮೈಮೇಲೆ ಬಂದಾಗ ಕಂದು ಬಣ್ಣದ ಉಣ್ಣೆಯ ಉತ್ತರೀಯವಾಗಿ ಪರಿವರ್ತನೆಯಾಯಿತು. ಅದು ಕಾರ್ಮೆಲ್ ಸಂನ್ಯಾಸಿಗಳ ಸರಳತೆ, ತ್ಯಾಗ ಮತ್ತು ದೇವಸೇವೆಯ ಜೀವನದ ಸಂಕೇತವಾಗಿತ್ತು. ಸೈಮನ್ ಸ್ಟಾಕ್ ಅವರು ಆ ಉತ್ತರೀಯವನ್ನು ಮಡಚಿ ತಲೆ ತೂರಿಸಬಹುದಾದ ರೀತಿಯಲ್ಲಿ ಧರಿಸಿದರು. ನಂತರ ಇತರ ಸಂನ್ಯಾಸಿಗಳೂ ಅದರಿಂದ ಒಂದೊಂದು ಅಂಗುಲ ಕತ್ತರಿಸಿಕೊಂಡು ಆ ಸಣ್ಣ ಪದಕಗಳನ್ನು ಎದೆ ಮತ್ತು ಬೆನ್ನಿನ ಮೇಲೆ ಬೀಳುವಂತೆ ದಾರದಲ್ಲಿ ಧರಿಸಲು ಆರಂಭಿಸಿದರು. ಕಾಲಕ್ರಮೇಣ ಇದೇ ಸ್ಕಾಪುಲರ್ (Scapular) ಎಂಬ ಹೆಸರಿನಿಂದ ವಿಶ್ವಾದ್ಯಂತ ಪ್ರಸಿದ್ಧಿಯಾಯಿತು. ಕನ್ನಡದಲ್ಲಿ ಇದನ್ನು ಇಂದಿಗೂ ಪ್ರೀತಿಯಿಂದ "ಉತ್ತರಿಕೆ" ಎಂದು ಕರೆಯಲಾಗುತ್ತದೆ. ಜಪಸರ ಮಾತೆ, ಆರೋಗ್ಯ ಮಾತೆ, ನಿರ್ಮಲ ಮಾತೆ, ಬಡವರ ಮಾತೆ, ಕಾಣಿಕೆ ಮಾತೆ ಎಂಬ ಅನೇಕ ಪ್ರೀತಿಯ ಹೆಸರುಗಳಿಂದ ಗೌರವಿಸುವ ಮರಿಯಮ್ಮ, "ಉತ್ತರಿಕೆ ಮಾತೆ" ಎಂಬ ಹೆಸರಿನಿಂದಲೂ ಕೋಟ್ಯಾಂತರ ಭಕ್ತರ ಹೃದಯದಲ್ಲಿ ವಿಶೇಷ ಸ್ಥಾನವನ್ನು ಪಡೆದಿದ್ದಾರೆ. – ಸಿಎಂಜೆ