தங்களது வீடுகளில் பலரும் மணி ப்ளாண்ட் வளர்ப்பார்கள். இதை வீட்டில் வளர்ப்பதன் மூலம் செல்வம் செழிக்கும் என்று நம்பப்படுகிறது. அதனால்தான் இப்போது பல வீடுகளிலும் அலுவலகங்களிலும் மணி பிளான்ட் செடிகள் காணப்படுகின்றன. இந்தச் செடியை மண்ணில் மட்டுமல்ல, நீரிலும் எளிதாக வளர்க்கலாம்.
தற்போது கோடைக்காலம் என்பதால் பலரது வீடுகளில் இந்த செடி மஞ்சள் நிறத்திலும், காய்ந்த இலைகளாக ஆகிவிடுகிறது. முறையான பராமரிப்பு எடுக்கப்படாவிட்டால், செடி முற்றிலும் காய்ந்துவிடும் அபாயம் உள்ளது. அதனால் இதை எப்படி பாதுகாத்து பராமரித்து வளர்ப்பது என்று தெரிந்துகொள்ளலாம் வாங்க.
மணி பிளான்ட் இலைகள் மஞ்சள் நிறமாக மாறுவதற்குப் பல காரணங்கள் உள்ளன. இந்தப் பிரச்சனைக்கு முக்கியமாக அதிகப்படியான சூரிய ஒளி அல்லது போதிய வெளிச்சமின்மையே காரணமாகும். மணி பிளான்ட் செடிக்கு நேரடி சூரிய ஒளி தேவையில்லை. அது மறைமுகமான ஒளியில் நன்றாக வளரும். நீண்ட நேரம் வெயிலில் வைத்தால், இலைகள் கருகி மஞ்சள் அல்லது பழுப்பு நிறமாக மாறிவிடும். மேலும், செடிக்குத் தேவையான ஊட்டச்சத்துக்கள் கிடைக்காவிட்டால், இலைகள் வாடிவிடும்.
இது போன்ற நேரங்களில், நீங்கள் வீட்டிலேயே மிகக் குறைந்த செலவில் ஒரு இயற்கை உரத்தைத் தயாரித்துப் பயன்படுத்தலாம். வாழைத்தோல்களைக் கொண்டு தயாரிக்கப்படும் இந்த உரம், மணி பிளான்ட் செடிக்கு மிகவும் நன்மை பயக்கும். வாழைத்தோல்களில் பொட்டாசியம், பாஸ்பரஸ் மற்றும் கால்சியம் போன்ற முக்கியமான ஊட்டச்சத்துக்கள் உள்ளன. இவை செடி வேகமாக வளரவும், இலைகள் பச்சை நிறமாக மாறவும் உதவுகின்றன. மஞ்சள் நிறமாக மாறும் இலைகளை மீண்டும் ஆரோக்கியமாக்குவதில் இந்த இயற்கை உரம் குறிப்பாகப் பயனுள்ளதாக இருக்கிறது.
இந்த உரத்தைத் தயாரிப்பதும் மிகவும் எளிது. முதலில், ஒன்று அல்லது இரண்டு வாழைப்பழத் தோல்களைச் சிறு துண்டுகளாக நறுக்கிக்கொள்ளுங்கள். பிறகு அவற்றை ஒரு ஜாடி அல்லது பாட்டிலில் போட்டு, அதில் ஒரு லிட்டர் தண்ணீர் ஊற்றவும். பின்னர் அதை மூடி, 2 முதல் 3 நாட்களுக்குக் குளிர்ச்சியான இடத்தில் வைக்கவும். இப்படி வைத்தால், வாழைப்பழத் தோல்களில் உள்ள ஊட்டச்சத்துக்கள் தண்ணீருடன் கலந்துவிடும். பிறகு அந்தத் தண்ணீரை வடிகட்டி, மணி பிளான்ட் செடியின் வேர்களுக்கு அருகில் ஊற்றவும்.
இந்தத் தண்ணீரை இலைகளின் மீது நேரடியாக ஊற்றக்கூடாது. இதை வேர்களுக்கு அருகில் மட்டுமே பயன்படுத்த வேண்டும். மேலும், இதை 7 முதல் 10 நாட்களுக்கு ஒரு முறை மட்டுமே பயன்படுத்த வேண்டும். அதிகமாகப் பயன்படுத்துவது செடிக்குத் தீங்கு விளைவிக்கும். மீதமுள்ள வாழைத்தோல்களைத் தூக்கி எறிவதற்குப் பதிலாக, அவற்றை உரமாக மாற்றலாம் அல்லது மற்ற செடிகளின் மண்ணில் நடலாம். இவற்றுடன், மணி பிளான்ட் செடியை ஆரோக்கியமாக வைத்திருக்க சில சிறிய முன்னெச்சரிக்கை நடவடிக்கைகளையும் எடுக்கவேண்டும்.
செடியை முற்றிலும் இருண்ட இடத்தில் வைக்கக்கூடாது. அதற்கு அதிகமாகத் தண்ணீர் ஊற்றுவதும் நல்லதல்ல. அதிகப்படியான தண்ணீர் இருந்தால், வேர்கள் அழுகிவிடும்.இந்த எளிய வீட்டுக் குறிப்புகளைப் பின்பற்றினால், உங்கள் மணி பிளான்ட் மீண்டும் பசுமையாகவும் அடர்த்தியாகவும் வளரும். இலைகள் மஞ்சள் நிறமாக மாறும் பிரச்சனையும் குறையும். #🤔 Unknown Facts
