🍃🍃🌼🍃🍃 બાળ ચરીત્ર...          વળી એક સમયે શ્રીઅમદાવાદમાં રામપ્રતાપભાઇના શરીરે થોડીક તાવની કસર થયેલી હતી, એવા થકા ઢોલિયા ઉપર સૂતેલા હતા. તે સમયે મૂર્તિમાન કાળ આવ્યો. તેને દેખીને પોતાની ભ્રકુટી ચઢાવીને અતિ રીસના ભર્યા બોલ્યા જે, હે દુષ્ટમતિવાળા ! હમણાં તું અહીંથી નાસી જા. નહીં તો હું તારો નાશ કરી નાખીશ અને હું તારો લીધો નહીં આવું. એમ કહીને ચડપ બેઠા એટલે તે કાળ મહાત્રાસ પામીને પગે લાગીને ગયો. ત્યાર પછી પોતાના પુત્રને પોતાની સમીપે બેસાડીને કહ્યું જે, મારે દશમના દિવસે આ પંચભૌતિક દેહનો ત્યાગ કરીને અક્ષરધામમાં જવું છે, કારણ કે અમારા ભાઇ ઘનશ્યામ મહારાજના ભેગી અમારી તિથિ આવે અને તમારે બે ખર્ચ કરવાં ન પડે. તેટલા માટે તમારે જે કંઈ પુણ્યદાન કરવું હોય તે કરો અને સેવકરામ શાસ્ત્રીને બોલાવીને ભાગવતની સપ્તાહ બેસાડો. અમો તમારા ઉપર બહુ રાજી છીએ. એવી રીતે પ્રસન્ન થઇને બોલતા હતા. ત્યારે પોતાના દાદાનો વિશ્વાસ લાવીને કેટલીક ગૌરી ગાયો તથા કપિલા ગાયો મંગાવીને ભારે ભારે વસ્ત્ર ઘરેણાં પહેરાવીને જરિયાની ઓછાડે સહિત સારા પવિત્ર બ્રાહ્મણોને દાન આપતા હતા. ત્યાર પછી અત્યારે જે સ્થળે રંગમહેલ છે તે જગ્યાએ પોતે રહેતા હતા. ત્યાં એક મોટો મંડપ રચાવીને સપ્તાહ બેસાડીને તે કથા સાંભળવા માટે પોતે અનશન વ્રત લઈને તત્પર થઈને બેઠા અને પોતાના સમીપે પોતાના પુત્રને બેસાડયા અને સદ્ગુરૂ વાસુદેવાનંદ સ્વામી, મહાનુભાવાનંદ સ્વામી, તદ્રુપાનંદ સ્વામી, પાર્ષદ ભગુજી તથા દામોદર ભગત એ આદિક કેટલાક મોટા મોટા સંત હરિભક્તો આવીને તે કથામાં બેસતા હતા. તે જ્યારે છ દિવસ થયા તે વખતે ઘનશ્યામ મહારાજ ભારે વસ્ત્રઘરેણાં પહેરીને પ્રથમ આવીને બેઠા હતા. તે કેટલાક જનને પ્રત્યક્ષ દર્શન થતાં હતાં. પછી આખા શહેરમાં એમ વાત ચાલી જે સ્વામિનારાયણના મોટાભાઇએ ભાગવતની સપ્તાહ બેસાડી છે અને દશમના દિવસે દેહ મૂકવાનું કહે છે. તે વાત જાણીને એક હિન્દુસ્તાની ગરાસીયો ભદ્રકાલીમાં નોકર રહેલો હતો તે ભાઈની પાસે આવીને પગે લાગીને બોલ્યો જે, તમો ભગવાનના મોટાભાઈ છો અને આજે છ દિવસ અન્ન ખાધે થયા. માટે મને કાંઇક ચમત્કાર જણાવો તો તમે ભગવાનના મોટાભાઇ ખરા. તેવું સાંભળીને ભાઇ અંતર્યામીપણે જાણીને બોલ્યા જે, તમો મલ્લ કુસ્તીમાં બહુ પ્રવિણ છો અને મહા કાંડા બળીયા પણ છો. માટે આ મારા હાથનું કાંડું તમો પકડો અને હું છોડાવી દઉં. એમ કહીને પોતાના જમણા હાથનું કાંડુ તેના હાથમાં આપીને બોલ્યા જે, ખબરદાર, હોંશિયારીથી પકડજો. તેવું સાંભળીને પોતામાં જેટલું બળ હતું તે સામટું ભેગું કરીને મહાજોરથી તે કાંડુ ઝાલ્યું એટલે ભાઇ ચડપ દઇને મૂકાવી દેતા હતા. તે આશ્ચર્ય જોઇને ગરાસીયો ભાઇનો બહુ મહિમા સમજી આનંદ પામતો હતો. અતિનિર્માની થઈને પગે લાગતો હતો. પછી બીજે દિવસે કથાની સમાપ્તી થઇ ત્યારે પૂજાની વિધિ કરીને સેવકરામ શાસ્ત્રીની સારી રીતે વસ્ત્ર-ઘરેણાં સહિત પૂજા કરીને, ભગવાનની આરતી ઉતારીને સર્વે બ્રાહ્મણોને દક્ષિણાઓ આપતા હતા. ત્યાર પછી દાદા ગાયનું છાંણ મંગાવીને ચોકો કરાવીને પોતે ગંગાજળ વડે સ્નાન કરતા હતા. સ્વામિનારાયણ સ્વામિનારાયણ કરતા તે ચોકામાં જઈને બેઠા અને એમ બોલ્યા જે, આ ઘનશ્યામ ભૈયા માતાપિતા સહિત અનંત બડે બડે વિમાન લેકર આયેં હૈં, તો મેં જાતા હું. એમ કહીને સર્વે સંત હરિભક્તોને નમસ્કાર કરીને દેહ ત્યાગ કરતા હતા. તે સમયે શ્રીજી મહારાજનાં હજારો માણસોને વિમાન સહિત પ્રત્યક્ષ દર્શન થયાં અને આકાશમાંથી ચંદન-પુષ્પની વૃષ્ટી થતી હતી.                       🍃🍃🌼🍃🍃 #🦋😊 𝗝𝗮𝘆 𝘀𝘄𝗮𝗺𝗶𝗻𝗮𝗿𝗮𝘆𝗮𝗻 🤗 #અનાદિમુક્તરાજ શ્રી અબજીબાપા ##જય સ્વામિનારાયણ #🙏 સ્વામિનારાયણ મંદિર #✋ જય સ્વામીનારાયણ