#📙 നോവൽ ..ഗംഗേ... ഉമ വിളിച്ചതും ഗംഗ ഞെട്ടലോടെ മുഖമുയർത്തി. ദാ ഈ ചായ കുടിയ്ക്ക്... അവർ പറഞ്ഞതും അവൾ ചായ വാങ്ങി കൈയിൽ പിടിച്ചു. മോള് വിഷമിയ്ക്കുവൊന്നും വേണ്ട കേട്ടോ. ഈ ചായ കുടിച്ചിട്ട് കുളിച്ച് വേഷമൊക്കെ മാറ്... രാത്രിയായാൽ നല്ല തണുപ്പാ.. മോളുടെ വീട് എവിടെയാണ്. എന്റെ വീട് എറണാകുളത്താണ്.. അവൾ പതിയെ ചുണ്ടനക്കി. ഇവിടുന്ന് ഒരുപാട് ദൂരം ഉണ്ടല്ലോ മോളെ... ഹ്മ്.. അവൾ ഒന്നും മൂളി. ഇത്രയും ദൂരത്തുന്ന് ഏട്ടനെ എങ്ങനെ കണ്ടുമുട്ടി... മാളു പതിയെ അമ്മയോട് പിറു പിറുക്കുന്നത് ഗംഗ കേട്ടു.. അവളുടെ മുഖം വീണ്ടും താണു പോയി.. അമ്മേ... എനിക്ക് വിശക്കുന്നു എന്തെങ്കിലും കഴിക്കാൻ എടുത്തു വെയ്ക്ക്. അനന്തന്റെ ശബ്ദം കേട്ട് ഗംഗ എഴുന്നേറ്റു. അവൾ നോക്കിയപ്പോൾ തോർത്തുകൊണ്ട് അവന്റെ തല തോർത്തി ഇറങ്ങി വരുന്നുണ്ട്. ആള് കുളി കഴിഞ്ഞെന്ന് അവൾക്ക് മനസ്സിലായി. ഒരു വെള്ള ബനിയനും കാവി കൈലിയും ആണ് വേഷം. മാളു,, ഇങ്ങു വന്നേടി.. ഗംഗയെ അനന്തന്റെ മുറി കാണിച്ചു കൊടുക്ക്,,, ഈ കുട്ടി പോയി കുളിച്ചിട്ട് വരട്ടെ.ചൂട്വെള്ളം വെയ്ക്കണോ കൊച്ചേ കുളിയ്ക്കാന് വേണ്ട.... ചൂട് വെള്ളം വേണ്ടമ്മേ. തണുപ്പ് കൂടുതലുണ്ട് കെട്ടോ. അനന്ത ഗംഗയെ മുറിയിലേക്ക് കൊണ്ട് പോടാ.. ഉമ പറയുന്നത് കേട്ടതും ഗംഗ ദയനീയമായി അനന്തനെ നോക്കി. അവൻ ഒന്നും പറയാതെ കൊണ്ട് ടിവി ഓൺ ചെയ്യുകയാണ്. വാ ചേച്ചി.. മാളു ഗംഗയുടെ കൈത്തണ്ടയിൽ പിടിച്ചു അവൾ തന്റെ ബാഗും എടുത്ത് മാളുവിന്റെ ഒപ്പം ഒരു മുറിയിലേക്ക് കയറി പോയി. ഇതാണ് കെട്ടോ ചേട്ടന്റെ മുറി.. ദേ അവിടെ ബാത്റൂം ഉണ്ട്. ചേച്ചി കേറി കുളിച്ചിട്ട് വാ.. ചേച്ചിയുടെ ബാഗ് ഒക്കെ ഈ അലമാരിയിൽ വെച്ചോളൂ ട്ടോ. മാളു പറഞ്ഞതും ഗംഗ തല കുലുക്കി. കുറച്ചുസമയം റസ്റ്റ് എടുത്തിട്ട് വാ ചേച്ചി.നമ്മൾക്ക് ഭക്ഷണമൊക്കെ കഴിക്കാം. കതക് ചാരി ഇട്ടിട്ട് മാളു പുറത്തേക്കിറങ്ങി പോയി. ഗംഗ ആ മുറിയിൽ ആകമാനം ഒന്നു നോക്കി. ഒരു സ്റ്റീലിന്റെ അലമാരയും, ഡബിൾ കോട്ടിന്റെ കട്ടിലും, തടികൊണ്ടുള്ള മേശയും പ്ലാസ്റ്റിക് കസേരയും ആ മുറിയിൽ കിടപ്പുണ്ട്. ഒരു ജനാലയിൽ നിന്നും ഭിത്തിയിലേക്ക് ആണി അടിച്ചിട്ട് പ്ലാസ്റ്റിക് വള്ളി കൊണ്ട് ചെറിയൊരു അഴ കെട്ടിയിട്ടുണ്ട്. അതിൽനിന്ന് അനന്തന്റെ രണ്ടുമൂന്ന് ബനിയനും അണ്ടർവെയേഴ്സും ഒക്കെ മടക്കി ഇട്ടിരിക്കുകയാണ്. ഒപ്പം രണ്ട് കാവി കൈലിയും. ചുവരില് ഏതോ ജ്വല്ലറിയുടെ കലണ്ടർ കിടപ്പുണ്ട്. അതിൽ എന്തൊക്കെയോ കുത്തിക്കുറിച്ചു വെച്ചിരിക്കുന്നത് ഗംഗ കണ്ടു.. ഒരുപാട് വലിപ്പം ഒന്നുമില്ലെങ്കിലും അടുക്കും ചിട്ടയുമുള്ള ചെറിയൊരു മുറിയായിരുന്നു അത്. മേശമേൽ രണ്ടുമൂന്നു ഡയറികളും നോട്ട് ബുക്കുകളും ഒക്കെ ഇരിക്കുന്നത് ഗംഗ ശ്രദ്ധിച്ചു. ഫോണിൽ ആരോടോ ഉറക്കെ സംസാരിച്ചുകൊണ്ട് അനന്തൻ വാതിൽ തുറന്ന് അകത്തേക്ക് കയറി വന്നു. മേശമേലിരുന്ന് ഒരു നോട്ട്ബുക്ക് എടുത്തിട്ട് ആരോടോ എന്തൊക്കെയോ പറയുന്നുണ്ട്. പച്ചപ്പയർ 15 കിലോ, തക്കാളിപ്പഴം 15, പച്ചമുളക് രണ്ട്, ക്യാരറ്റ് ബീറ്റ് റൂട്ട് 5... ഇങ്ങനെയൊക്കെ അവൻ എഴുതുന്നത് ഗംഗ കണ്ടു. അവൾ അനങ്ങാതെ ഒരു മൂലയിൽ നിൽക്കുകയാണ്. ഫോൺ കട്ടാക്കിയ ശേഷം അനന്തൻ ഒന്നൂടെ ബുക്ക് എഴുതിയതൊക്കെ വായിച്ച് നോക്കിയിട്ട് അത് മടക്കിവെച്ചു. വീണ്ടും എഴുന്നേറ്റ് നേർക്ക് വന്നു. ഞാനറിയുന്ന ഒരു കോൺവെന്റ് ഉണ്ട്. ഇവിടെയല്ലാ, കമ്പംമേട്ടിൽ ആണത്. അവിടുത്തെ സിസ്റ്റർമാരെ എനിക്ക് പരിചയമുണ്ട്. ഞാൻ അവരോട് ഒന്ന് സംസാരിക്കാം. എന്നിട്ട് തന്നെ അവിടെ ആക്കാം. അതുവരെ ഇവിടെ നിന്നാൽ മതി. വേറെ ഒരു കാരണവും എനിക്ക് പറയാനില്ലായിരുന്നു. അതുകൊണ്ടാണ് അങ്ങനെ പറഞ്ഞത്, താൻ മറ്റൊന്നും ഓർക്കണ്ട കേട്ടോ. അവൻ ശബ്ദം താഴ്ത്തി ഗംഗയോട് പറഞ്ഞപ്പോൾ അവൾ തല കുലുക്കി.. തനിക്ക് വേഷം മാറാൻ തുണി ഒക്കെ ഉണ്ടോ. ഹ്മ്.. എന്നെതെങ്കിലും ചോദിച്ചാൽ വാ തുറന്നു പറയാൻ അറിയത്തില്ലേ നിനക്ക്.. പെട്ടെന്ന് അനന്തന്റെ ഭാവം മാറിയതും ഗംഗ ഒന്നു ഭയന്ന് പോയി. എന്റെ കയ്യിൽ രണ്ടു മൂന്നു ജോഡി ഡ്രസ്സ് ഉണ്ട്. ഹ്മ്... നീ പഠിച്ചതിന്റെ സർട്ടിഫിക്കറ്റ് ഒക്കെ ഉണ്ടോ. ഒണ്ട്.... ആഹ്.. എന്നാൽ കുഴപ്പമില്ല, ഞാന് ലീനമ്മയോട് ഒന്ന് സംസാരിക്കാം.. അതാരാണ് എന്ന അർത്ഥത്തിൽ അവൾ അനന്തനെ നോക്കി. ലീനാമ്മ കോൺവെന്റിലെ ഇൻചാർജ് ആണ്. നിന്റെ സർട്ടിഫിക്കറ്റ്ന്റെ ഫോട്ടോ എടുത്തിട്ട് എന്റെ ഫോണിലേക്ക് ഒന്ന് അയയ്ക്കണം കേട്ടോ. അയക്കാം.. ആഹ്, എങ്കിൽ ചെന്ന് കുളിക്ക്. അമ്മ അവിടെ ഭക്ഷണം എടുത്തു വെക്കുന്നുണ്ട്. പറഞ്ഞുകൊണ്ട് അവൻ വീണ്ടും മുറിവിട്ട് ഇറങ്ങിപ്പോയി.. ബാഗ് തുറന്നു ഗംഗ ഒരു ടോപ്പും പലാസോ പാന്റും എടുത്തു. അത് തോളത്തിട്ടു കൊണ്ട് അവൾ കുളിക്കുവാനായി കയറി. സന്തൂർ സോപ്പിന്റെ മണം ആയിരുന്നു ആ ബാത്‌റൂമിൽ. പാതി മുക്കാലും തീർന്ന ഒരു സന്തൂർ സോപ്പും, ചകിരിയും ഇരിപ്പുണ്ട്. കരി നീല നിറമുള്ള ബക്കറ്റിലേക്ക് ടാപ് തുറന്നു അവൾ വെള്ളം നിറച്ചു. ശേഷം ഇട്ടിരുന്ന വേഷം മാറ്റി. സ്റ്റീലിന്റെ ഒരു കമ്പി കണക്ട് ചെയ്തു വെച്ചിട്ടുണ്ടായിരുന്നു മാറിയ വേഷമൊക്കെ ഇടുവാനായി. അതിലേക്ക് അവൾ എല്ലാം ഇട്ടിട്ടു തല മുടി അഴിച്ചു. പെട്ടെന്നാണ് ഡോറിൽ ആരോ തട്ടിയത്.. ഗംഗ ടാപ്പ് ഓഫ് ചെയ്തതും മാളുവിന്റെ ശബ്ദം കേട്ടു. ചേച്ചി... എന്തോ... കുളിക്കാൻ തുടങ്ങിയോ... ഇല്ല... എന്താ മാളു.. എണ്ണ വയ്ക്കണ്ടേ...ഇതാ എണ്ണ ഞാൻ ഡ്രസ്സ് മാറിയിരുന്നു.. ആണോ.... അമ്മ പറഞ്ഞു കട്ടികൂടിയ വെള്ളം ആയതുകൊണ്ട് അല്പം എണ്ണ തിരുമ്മിയിട്ട് കുളിക്കാന്. ഒരുപാട് വെള്ളം ഒഴിക്കില്ല പെട്ടെന്ന് കുളിച്ചിറങ്ങിക്കോളാം. അവൾ മറുപടി പറഞ്ഞു. ആഹ് എങ്കിൽ ശരി ചേച്ചി . ഒത്തിരി വെള്ളം കോരി ഒഴിക്കല്ലേ. ഒന്നൂടെ അവളെ ഓർമ്മിപ്പിച്ചിട്ട് മാളു പോയി. ചുവരിൽ ചെറിയൊരു പ്ലാസ്റ്റിക് കണ്ണാടിയും അനന്തിന്റെ ഷേവിങ് ഐറ്റംസ് ഒക്കെ ഉണ്ടായിരുന്നു. ആ മങ്ങിയ ചെറിയ കണ്ണാടിയിലൂടെ ഗംഗ അവളുടെ മുഖം ഒന്നു നോക്കി. ഇത് താൻ തന്നെ ആണോന്ന് അവൾ അത്ഭുതപ്പെട്ടു പോയി. കണ്ണൊക്കെ കുഴിഞ്ഞു കവിളുകൾ ഒട്ടി ആകെ കൂടെ ഒരു കോലം. ഇത്തിരി നേരം അവൾ തന്റെ മുഖത്തേക്ക് നോക്കി നിന്നു. വീണ്ടും അനന്തന്റെ ശബ്ദം.. മുൻപത്തെപ്പോലെ തന്നെ പച്ചക്കറികളുടെ ലിസ്റ്റ് ആണ് ആള് ഫോണിലൂടെ പറയുന്നതെന്ന് അവൾക്ക് മനസ്സിലായി. ഗംഗ ബക്കറ്റിൽ നിന്നും ഒരു കപ്പ് വെള്ളം കോരി അവളുടെ ദേഹത്തേക്ക് ഒഴിച്ചു. ഒപ്പം അവളുടെ വലിയൊരു നിലവിളിയും അവിടുന്ന് ഉയർന്നു വന്നു. എന്താടി എന്ന് ചോദിച്ചുകൊണ്ട് അനന്തൻ വന്നിട്ട് ബാത്റൂമിന്റെ ഡോറിൽ ആഞ്ഞു തട്ടി. ഭയങ്കര തണുപ്പ്... ഹ്ഹ്ഹ്.. അവൾ ശ്വാസം എടുത്തു വലിച്ചുകൊണ്ട് പറഞ്ഞു. ശീലമില്ലാത്തതുകൊണ്ടാണ്.... പെട്ടെന്ന് കുളിച്ചിട്ട് ഇറങ്ങിക്കോ. അവന്റെ ശബ്ദം അല്പം ശാന്തമായി. ഗംഗ ഒന്നും മൂളി എങ്കിലും തണുത്ത് വിറച്ചതുകൊണ്ട് അവളുടെ ശബ്ദം പുറത്തേക്ക് വന്നില്ല. കഥ കൊള്ളാമോ ആവോ.... തുടങ്ങിയതല്ലേ ഉള്ളൂ ല്ലേ.. അഭിപ്രായമൊന്നും പറയാറായിട്ടില്ലന്ന് അറിയാം.. എന്നാലും ചോദിച്ചുന്നെ ഒള്ളു തുടരും