नागपूरच्या कलाकारांसाठी सुवर्णसंधी ! पाटील ग्रुप आणणार दोन मोठे चित्रपट प्रोजेक्ट मुंबई-नागपुरात लवकरच सुरू होणार चित्रीकरण गजानन ढाकुलकर, प्रतिनिधी बिनधास्त न्यूज मिडीया नागपूर/ हिंगणा : (दि १९ एप्रिल) शहरातील कला, संस्कृती आणि चित्रपट क्षेत्रासाठी एक मोठी आनंदाची बातमी समोर आली आहे. पाटील ग्रुपकडून लवकरच दोन मोठे चित्रपट प्रोजेक्ट सुरू केले जाणार आहेत, ज्यामध्ये हिंदी चित्रपट "कुंती राघव" तसेच मराठी चित्रपट "कस्तुरी" यांचा समावेश आहे. या दोन्ही चित्रपटांचे चित्रीकरण लवकरच मुंबई आणि नागपूर येथे सुरू होणार आहे. याबाबतची अधिकृत माहिती निर्माता व कलाकार गणेश पाटील यांनी त्यांच्या नव्या कार्यालयात 201 कृष्ण कुंज रेसिडेन्सी, वासुदेव नगर मेट्रो स्टेशन जवळ आयोजित विशेष बैठकीत दिली. गणेश पाटील यांनी सांगितले की, या दोन्ही चित्रपटांच्या माध्यमातून नागपूरसह विदर्भातील प्रतिभावान कलाकार, तंत्रज्ञ आणि नवोदित युवकांना मोठे व्यासपीठ उपलब्ध करून देण्याचा प्रयत्न केला जाणार आहे. नागपुरात वाढत असलेल्या चित्रपट क्षेत्राच्या संधी लक्षात घेता हा प्रोजेक्ट शहरासाठी अत्यंत महत्त्वाचा मानला जात आहे. मुंबई सारख्या मोठ्या चित्रपट नगरीसोबत नागपुरात शूटिंग होणार असल्याने स्थानिक कलाकारांना थेट मोठ्या प्रोडक्शन हाऊस बरोबर काम करण्याची संधी मिळणार आहे. या विशेष प्रसंगी मराठी चित्रपट "प्रेमासाठी वाटेल ते" मधील कलाकार प्रकाश मेंडुले तसेच सामाजिक कार्यकर्ते गजानन ढाकुलकर उपस्थित होते. सर्वांनी गणेश पाटील यांना नव्या प्रोजेक्ट्ससाठी शुभेच्छा देत चित्रपटांच्या यशासाठी शुभकामना व्यक्त केल्या. उल्लेखनीय म्हणजे, गणेश पाटील यांचा याआधी "तू तिथे असावे" हा चित्रपट प्रदर्शित झाला होता. या चित्रपटामध्ये त्यांनी नागपूर शहरातील अनेक स्थानिक कलाकारांना संधी देऊन अभिनय क्षेत्रात नवी ओळख निर्माण करून दिली होती. त्यामुळे आज नागपूरमधील अनेक युवा कलाकार त्यांच्याकडून मोठ्या अपेक्षा बाळगून आहेत. चित्रपट निर्मिती सोबतच गणेश पाटील हे संगीत क्षेत्रातही सक्रिय आहेत. त्यांचे अनेक गाण्यांचे अल्बम प्रदर्शित झाले असून त्यामध्ये त्यांनी स्वतःचा आवाज दिला आहे. कला क्षेत्रातील त्यांची जिद्द आणि नवोदितांना पुढे आणण्याची भूमिका यामुळे ते सातत्याने चर्चेत असतात. अलीकडेच त्यांच्या नव्या कार्यालयाचे उद्घाटन पार पडले, जिथे शहरातील अनेक मान्यवरांनी उपस्थित राहून त्यांना शुभेच्छा दिल्या. यावेळी गजानन ढाकुलकर यांनीही त्यांचे अभिनंदन करत नागपूरच्या कलाकारांना पुढे नेण्याचे त्यांचे कार्य कौतुकास्पद असल्याचे सांगितले. आता सर्वांचे लक्ष या आगामी "कुंती राघव" आणि "कस्तुरी" या दोन्ही चित्रपटांकडे लागले असून, यामुळे नागपूरच्या चित्रपट क्षेत्राला नवी दिशा मिळेल, अशी अपेक्षा व्यक्त केली जात आहे.