വിദ്യാർഥികളിൽ സൈബർ സുരക്ഷ നൈപുണ്യവും അവബോധവും വർദ്ധിപ്പിക്കാൻ ലക്ഷ്യമിട്ട് കേരള പോലീസ് സൈബർഡോമും, സംസ്‌ഥാനത്തെ സ്‌റ്റുഡൻസ് പോലീസ് കേഡറ്റ് പദ്ധതിയിൽ ഉൾപ്പെട്ട സർക്കാർ വിദ്യാലയങ്ങളും സംയുക്തമായി നടപ്പിലാക്കുന്ന സൈബർ ബോധവൽക്കരണ പദ്ധതിയാണ് kid glove. ഇൻ്റർനെറ്റ് എന്ന സാങ്കേതികവിദ്യയുടെ സഹായത്തോടുകൂടി ലോകം ഇന്ന് ചുരുങ്ങി നമ്മുടെ കൈവെള്ളയിൽ എത്തിയിരിക്കുകയാണ്. നിത്യജീവിതത്തിലെ വിവിധ ആവശ്യങ്ങൾക്കായി ഇൻ്റർനെറ്റ് വ്യാപകമായി ഉപയോഗിക്കുന്നുണ്ട്. ഈ കാലഘട്ടത്തിൽ ചെറിയ ക്ലാസിലെ കുട്ടികൾ പോലും ഇൻ്റർനെറ്റിൻ്റെ സൗകര്യം ഉപയോഗിച്ചാണ് തങ്ങളുടെ പഠനപ്രക്രിയ മുന്നോട്ടുകൊണ്ടുപോകുന്നത്. പക്ഷേ ഇന്റർനെറ്റിന്റെ ഈ അനന്ത സാധ്യതകൾ ഉപയോഗപ്പെടുത്തി മനുഷ്യസമൂഹം മുന്നോട്ടു കുതിക്കുന്നതിനോടൊപ്പം തന്നെ ഇന്റർനെറ്റിന്റെ മറ്റൊരു വശം കൂടെ നമ്മൾ കാണേണ്ടതുണ്ട്, പലപ്പോഴും കെണി ഒരുക്കി കാത്തിരിക്കുന്ന ഒരു വിഭാഗം ആൾക്കാരും ഇതിനകത്തുണ്ട്. ഈ കാലഘട്ടത്തിൽ സൈബർ സുരക്ഷയെ കുറിച്ചുള്ള അവബോധം കുട്ടികൾക്കുണ്ടാകേണ്ടത് അത്യാവശ്യമാണ്. സൈബർ ലോകത്ത് നിന്നും കുട്ടികൾക്ക് അഭിമുഖീകരിക്കേണ്ടിവരുന്ന ചെറിയ മുറിവുകൾ പോലും അവരുടെ ജീവിതത്തിൽ ഉടനീളം അവരെ വേട്ടയാടുന്ന ഒന്നായി മാറിക്കൊണ്ടിരിക്കും. ഇത്തരം പ്രശ്‌നങ്ങൾക്കുള്ള പരിഹാരമായി 'സൈബർ സുരക്ഷാ അവബോധം വിദ്യാർത്ഥികളിലേക്ക് എത്തിക്കുക' എന്ന ലക്ഷ്യം മുൻനിർത്തിക്കൊണ്ട് വിദ്യാലയങ്ങളിൽ വൈവിധ്യമാർന്ന പ്രവർത്തനങ്ങളും പുതുമായർന്ന മത്സരങ്ങളും അണിനിരത്തുന്ന പ്രവർത്തനമാണ് Kid glove. സൈബർ സുരക്ഷാ പ്രതിഞ്ജ, സൈബർ സുരക്ഷ അടിസ്ഥാനമാക്കി ചിത്രരചന, കാർട്ടൂൺ രചന, അനുഭവക്കുറിപ്പ്, പരസ്യവാചകം തയ്യാറാക്കൽ, സൈബർ സുരക്ഷാ ഡയറി തയ്യാറാക്കൽ എന്നീ മത്സരങ്ങൾ സംഘടിപ്പിക്കുന്നതിനോടൊപ്പം, സൈബർ സുരക്ഷാ ബോധവൽക്കരണ മത്സരങ്ങളും ഉൾപ്പെടുത്തി കുട്ടികളിൽ സൈബർ അവബോധം ഉണർത്തുന്ന കേരളാ പോലീസിൻ്റെ Kid glove എന്ന കർമ്മ പദ്ധതി നടന്നുവരുന്നത്. #keralapolice #കേരളാപോലീസ്