Simon
ബിജെപിക്കും, ആർഎസ്എസിനും, ഇന്ത്യാ ഗവൺമെന്റിനും ഒരുമിച്ച് അയക്കുന്ന ഒരു തുറന്ന കത്ത്
പ്രിയപ്പെട്ട അമ്പാനേ, സുഖമല്ലേ?
അടുത്ത കാലത്തായി നിങ്ങളുടെ പണി വളരെ മോശമാണ്. അലക്ഷ്യമാണ്. ശ്രദ്ധയില്ല.
നിങ്ങൾ ഒരു കാലത്ത് എന്തായിരുന്നു! എൺപത് വർഷത്തെ പരിശീലനം. അച്ചടക്കം. ആസൂത്രണം. ഒരു രാജ്യത്തിന്റെ മൊത്തം ചിന്താഗതി മാറ്റിയെടുത്ത ടീം.
ആ ടീമാണ് ഇപ്പോൾ ഒരു ചോദ്യപേപ്പർ സൂക്ഷിക്കാൻ പറ്റാതെ നിൽക്കുന്നത്.
അതുകൊണ്ട് ഞാൻ സൗജന്യമായി കുറച്ച് നിർദ്ദേശങ്ങൾ എഴുതുകയാണ്. ദയവായി വായിക്കണം.
-----------------------------------------------------------------
നിർദ്ദേശം ഒന്ന്: ജഡ്ജിയെ തിരഞ്ഞെടുക്കുമ്പോൾ
മെയ് പതിനഞ്ചിന് സുപ്രീം കോടതിയിൽ ഒരു പരാമർശം വന്നു. ജോലിയില്ലാത്ത ചെറുപ്പക്കാരെക്കുറിച്ച്. - പാറ്റകൾ.
ഇവിടെയാണ് നിങ്ങൾക്ക് പിഴച്ചത് അമ്പാനേ.
നിങ്ങൾ പഠിപ്പുള്ള ഒരാളെ ആ കസേരയിൽ ഇരുത്തി.
അതാണ് പ്രശ്നം. പഠിപ്പുള്ളവർ വലിയ വാക്കുകൾ ഉപയോഗിക്കും. ഉപമകൾ പറയും. സാഹിത്യം കാണിക്കും.
മന്ത്രിമാരെ തിരഞ്ഞെടുക്കുമ്പോൾ നിങ്ങൾക്ക് ഈ തെറ്റ് ഒരിക്കലും വരാറില്ലല്ലോ
അവിടെ നിങ്ങൾ വളരെ ശ്രദ്ധയുള്ളവരാണ്. ഒരു ഡിഗ്രി പോലും അബദ്ധത്തിൽ കടന്നുകൂടാതെ നോക്കും.
പിന്നെ എന്തുപറ്റി?
ഇതൊക്കെ ശ്രദ്ധിക്കണ്ടേ അമ്പാനേ?
-----------------------------------------------------------------
നിർദ്ദേശം രണ്ട്: ഒരു അലമാര
പത്തു വർഷം. 152 പേപ്പർ ചോർച്ച.
നിങ്ങൾ പുതിയ ഇന്ത്യ ഉണ്ടാക്കാൻ ഇറങ്ങിയവരാണ്. കശ്മീർ മുതൽ കന്യാകുമാരി വരെ "ശൗചാലയം" പണിതവരാണ്. പന്ത്രണ്ട് കോടി എണ്ണം എന്നാണ് കണക്ക്.
പന്ത്രണ്ട് കോടി "ശൗചാലയം" പണിയാൻ കഴിഞ്ഞ ടീമിന്...
പൂട്ട് ശരിയായി പ്രവർത്തിക്കുന്ന ഒരു അലമാര ഉണ്ടാക്കാൻ പറ്റിയില്ല.
എൺപത് വർഷത്തെ ശാഖ. അച്ചടക്കം. കൃത്യനിഷ്ഠ. സർജിക്കൽ സ്ട്രൈക്ക് വരെ ചെയ്യുന്ന ആസൂത്രണശേഷി.
എന്നിട്ട് ഒരു കവർ ഒട്ടിച്ചുവെക്കാൻ പറ്റുന്നില്ല.
ഇത്രയും കാലം നിങ്ങളെ ഒരു കള്ള വോട്ട് പോലും ഇല്ലാതെ ജയിപ്പിച്ച ഇലക്ഷൻ കമ്മീഷനെ നോക്കി പഠിക്കണ്ടേ അമ്പാനേ?
-----------------------------------------------------------------
നിർദ്ദേശം മൂന്ന്: സ്വിച്ച് ഓഫ് ചെയ്യാൻ മറന്നു
ഇത് എന്നെ ഏറ്റവും വേദനിപ്പിച്ച ഭാഗമാണ്.
ഡിജിറ്റൽ ഇന്ത്യയുടെ ഭാഗമായി 2016 മുതൽ ആകെ 920 തവണയാണ് ഇന്റർനെറ്റ് ഓഫ് ആക്കി വെച്ചത്
ഇത്രയും പരിശീലനം. ഇത്രയും സാങ്കേതികവിദ്യ. ലോകത്തിലെ ഒന്നാം നമ്പർ.
എന്നിട്ട് ജൂലൈ ഇരുപതിന് ഡൽഹിയിൽ എന്ത് സംഭവിച്ചു?
നിങ്ങൾ ഇന്റർനെറ്റ് ഓഫ് ചെയ്യാൻ ഏൽപ്പിച്ച ആൾ, അദ്ദേഹത്തിന്റെ കർത്തവ്യം മറന്നു പോലീസിന്റെ ഡ്രസ്സിട്ട് പിള്ളേരെ തല്ലാൻ പോയി.
ലാത്തിയടിയുടെ വീഡിയോ രാജ്യം മുഴുവൻ കണ്ടു. അതും തത്സമയം.
നാണംകെടുത്തിയല്ലോ അമ്പാനേ.....
-----------------------------------------------------------------
നിർദ്ദേശം നാല്: ഇത് ഗൗരവമായി എടുക്കണം
ഇനി പറയുന്നത് തമാശയല്ല. ഇത് നിങ്ങളുടെ നന്മയ്ക്കുവേണ്ടിയാണ്.
ഈ രാജ്യത്തെ തകർക്കാൻ ആഗ്രഹിക്കുന്ന സംഘടനകൾ പുറത്തുണ്ട്. അവർക്ക് പദ്ധതിയുണ്ട്. ബജറ്റുണ്ട്. അവർക്ക് ചെയ്യേണ്ട ഒരു ലിസ്റ്റുണ്ട്.
ആ ലിസ്റ്റ് ഇതാണ്:
☑️ അയൽക്കാരെ പരസ്പരം മതം നോക്കി സംശയിപ്പിക്കുക, അതുവഴി ഒരു വർഗീയ കലാപം ഉണ്ടാക്കുക.
☑️ പത്രസ്വാതന്ത്ര്യം നിലപിച്ച് രാജ്യത്തിലെ ജനങ്ങളെ അന്ധമാക്കുക.
☑️ ഒരു രാത്രി കൊണ്ട് രാജ്യത്തിന്റെ സമ്പദ്വ്യവസ്ഥ നിശ്ചലമാക്കുക.
☑️ ഒരു തലമുറയുടെ ഭാവി തകർക്കുക.
☑️ ദക്ഷിണേന്ത്യയെയും ഉത്തരേന്ത്യയെയും പരസ്പരം ശത്രുക്കളാക്കുക — ഒരു രാജ്യത്തെ അകത്തുനിന്ന് പിളർത്താൻ ഇതിലും എളുപ്പമുള്ള വഴിയില്ല.
☑️ സ്വന്തം നാട്ടിലെ ജനങ്ങളുടെ പൗരത്വം എടുത്തു കളയുക.
☑️ പിള്ളേർ ചോദ്യം ചോദിക്കുമ്പോൾ കണ്ണീർവാതകം കൊണ്ട് ഉത്തരം പറയുക.
ഇതൊക്കെ അവരുടെ ജോലിയാണ് അമ്പാനേ.
ഒരു രൂപ പോലും വാങ്ങാതെ. ഓവർടൈം പണിയെടുത്, നിങ്ങൾ എന്തിനാണ് അത് സൗജന്യമായി ചെയ്തുകൊടുക്കുന്നത്?
ഇങ്ങനെ പോയാൽ ജനങ്ങൾക്ക് ഒരു ചെറിയ ആശയക്കുഴപ്പം വരും അമ്പാനേ.
-----------------------------------------------------------------
നിർദ്ദേശം ആറ്: പാറ്റയുടെ ജീവശാസ്ത്രം
ഇനി ഏറ്റവും പ്രധാനപ്പെട്ട ഭാഗം.
നിങ്ങൾ പന്ത്രണ്ട് കോടി "ശൗചാലയം" പണിതു. സ്വച്ഛ് ഭാരത്. ശുചിത്വ ഭാരതം. നല്ല കാര്യം.
എന്നിട്ടും പാറ്റകൾ പെരുകി.
എന്തുകൊണ്ടാണെന്ന് അറിയാമോ?
പാറ്റകൾ "ശൗചാലയം" കണ്ടല്ല പെരുകുന്നത് അമ്പാനേ.
പാറ്റ പെരുകുന്നത് വേറൊരു തരം അഴുക്ക് കണ്ടാണ്.
ജോലിയില്ലാത്ത അഴുക്ക്. കമ്പനി പൂട്ടിയ അഴുക്ക്. പന്ത്രണ്ട് മണിക്കൂർ പണിയെടുത്താലും ജീവിക്കാൻ തികയാത്ത ശമ്പളത്തിന്റെ അഴുക്ക്. പരീക്ഷ എഴുതിയാൽ ഫലം വരുമോ എന്നറിയാത്ത അഴുക്ക്. നാളെ എന്താകും എന്ന് ഒരു ഉറപ്പുമില്ലാത്ത അഴുക്ക്.
ആ അഴുക്ക് നിങ്ങൾ വൃത്തിയാക്കിയില്ല.
പിന്നെ ഒരു കാര്യം കൂടി. ആരെയെങ്കിലും അപമാനിക്കണമെങ്കിൽ പെരുകാത്ത ഒരു സാധനത്തിന്റെ പേരിടണം.
ലൈറ്റ് ഇടുമ്പോൾ ഒരെണ്ണം ഓടുന്നത് കാണാം. തിരിഞ്ഞു നോക്കുമ്പോൾ ഇരുപതെണ്ണം.
നിങ്ങൾ ആ വാക്ക് പറഞ്ഞു. അഞ്ചു ദിവസം കൊണ്ട് രണ്ടു കോടി.
ബയോളജി പഠിക്കണമായിരുന്നു അമ്പാനേ.
ഇപ്പോൾ അവർ ജന്തർ മന്തറിൽ ഇരിക്കുന്നു. ചവിട്ടിയിട്ടും പോകുന്നില്ല. ലാത്തിയടിച്ചിട്ടും പോകുന്നില്ല. കണ്ണീർവാതകം അടിച്ചിട്ടും പോകുന്നില്ല.
ഇതൊക്കെ ശ്രദ്ധിക്കണ്ടേ അമ്പാനേ?
-----------------------------------------------------------------
അവസാനമായി — ഒരു അഭിനന്ദനം
ഇത്രയും പറഞ്ഞത് നിങ്ങളെ കുറ്റപ്പെടുത്താനല്ല അമ്പാനേ.
കാരണം നിങ്ങൾ ചെയ്ത ഒരു കാര്യമുണ്ട്. അത് ശരിക്കും വലിയ കാര്യമാണ്. ഞാൻ അത് സമ്മതിക്കുന്നു.
സ്കൂളിൽ ആദ്യമായി പഠിപ്പിക്കുന്ന ഒരു വാചകമുണ്ട്. എല്ലാവർക്കും ഓർമ്മയുണ്ടാകും.
"ഇന്ത്യ എന്റെ രാജ്യമാണ്. എല്ലാ ഇന്ത്യക്കാരും എന്റെ സഹോദരീസഹോദരന്മാരാണ്."
നിങ്ങൾ അതെടുത്തു. പോസ്റ്റ്മോർട്ടം ചെയ്തു. അകത്തെ സാധനം മാറ്റി. തിരിച്ചു തുന്നി.
ഇപ്പോൾ അത് ഇങ്ങനെയാണ്:
"ഇന്ത്യ എന്റെ രാജ്യമാണ്. എന്റെ പട്ടികയിലുള്ളവർ മാത്രം എന്റെ സഹോദരീസഹോദരന്മാരാണ്."
നൂറ്റിനാൽപ്പത് കോടി മനുഷ്യർ സ്കൂളിൽ പഠിച്ച ഒരു വാചകം. അത് അവരുടെ തലയ്ക്കുള്ളിൽ കയറി മാറ്റിയെഴുതുക.
അത് വലിയ പണിയാണ്. ഒരു ദിവസം കൊണ്ട് നടക്കില്ല. വർഷങ്ങൾ വേണം. ക്ഷമ വേണം. ആസൂത്രണം വേണം.
നിങ്ങൾ അത് ചെയ്തു.
അതുകൊണ്ടാണ് ഇപ്പോഴത്തെ അവസ്ഥ കാണുമ്പോൾ എനിക്ക് വിഷമം വരുന്നത്.
ഇത്രയും വലിയ കാര്യം ചെയ്ത നിങ്ങൾക്ക്, ജന്തർ മന്തറിൽ ഇരിക്കുന്ന കുറച്ച് പിള്ളേരെ കൈകാര്യം ചെയ്യാൻ പറ്റുന്നില്ലേ?
ഒരു അലമാരയ്ക്ക് പൂട്ടിടാൻ പറ്റുന്നില്ലേ?
എനിക്ക് ഇപ്പോഴും നിങ്ങളിൽ വിശ്വാസമുണ്ട്.
ഒന്ന് ശ്രദ്ധിച്ചാൽ മതി.
സ്നേഹത്തോടെ, രംഗണ്ണൻ
.
.
.
. #🗳️ രാഷ്ട്രീയം #🔵 യുഡിഎഫ് #💪🏻 സിപിഐഎം #🔴 എൽഡിഎഫ് #🔶 BJP
സഖാവ് വിഷ്ണു കണ്ണൂർ 🚩#🔵 യുഡിഎഫ് #🔴 എൽഡിഎഫ് #💪🏻 സിപിഐഎം #🗳️ രാഷ്ട്രീയം