*1. ప్రశ్న: ఇండియాలో వేల ఏళ్ల క్రితం కట్టిన కోటలు/దేవాలయాలు ఇప్పటికీ బలంగా ఉన్నాయి. కానీ ఇప్పుడు కట్టిన బిల్డింగులు 100 ఏళ్ళలోపే కుప్పకూలుతున్నాయి. అంత గొప్ప ఇంజనీర్లు ఇప్పుడెందుకు లేరు? జవాబు: మీ ప్రశ్నలో 'survivorship bias' ఉంది. అంటే, మీరు ఇప్పటికీ దృఢంగా ఉన్న కొన్ని పాతకట్టడాలను చూసి, “పాత నిర్మాణాలన్నీ గొప్పవి, Old is Gold' అని నిర్ణయానికి వచ్చారు. నిజానికి, చాలా పాత దేవాలయాలు, కోటలు, భవనాలు ఎన్నో కూలిపోయాయి. "అవి ఎందుకు కూలిపోయాయి?" అని అడక్కుండా, వాటిలో ఇప్పటికీ బలంగా ఉన్న బృహదీశ్వరాలయం, హంపి, కోణార్క్, ఎర్రకోట లాంటి అత్యుత్తమ కట్టడాలను, ఇటీవల కట్టిన మామూలు భవనాలతో పోలుస్తూ, పక్షపాత వైఖరితో నన్ను ప్రశ్న అడిగారు. ఆ నిర్మాణాలు ప్రజల మౌలిక సదుపాయాల కోసం కట్టినవి కావు. అవి రాజులు తమ వ్యక్తిగత భద్రత, కీర్తి, ప్రతిష్ట, అభిరుచి, ఉద్దేశం, లక్ష్యం, స్వార్థం లేదా మత పరమైన ఉద్దేశంతో ప్రజాధనం వెచ్చించి, పరిమితులు లేని బడ్జెట్'తో కట్టినవి. నిజానికి, ఆ కట్టడాలను నిర్మించిన ఇంజనీర్లు, ఇప్పటి ఇంజనీర్ల కన్నా గొప్పవారేం కాదు. ఇప్పుడున్న పరిజ్ఞానంతో, అవే కట్టడాలను అంతకన్నా ఎంతో మెరుగ్గా నిర్మించే సామర్థ్యమున్న ఇంజనీర్లు ఇప్పుడు మనకున్నారు.* *చెక్కు చెదరని ప్రాచీన కట్టడాలకు సంబంధించిన టెక్నాలజీ ఏమాటో ఇపుడు చూద్దాం*. *2. ప్రశ్న: ప్రాచీన కట్టడాలు ఏళ్ళ తరబడి వాతావరణ పరిస్థితులను తట్టుకోడానికి ఏ టెక్నాలజీ వాడేవారు? జవాబు: పైన నేను మొదటి ప్రశ్నకు జవాబులో చెప్పినట్టుగా*, *ప్రాచీన కట్టడాలు చాలా వరకూ కూలిపోయాయి. రాజులు ప్రత్యేక శ్రద్ధ తీసుకుని కట్టిన కొన్ని మాత్రమే కాలానికి ఎదురొడ్డి నిలబడ్డాయి*. *దానికోసం అప్పటి నిర్మాణాల్లో ఒక రకమైన డంగు సున్నం (lime mortar) వాడేవారు. ఆ సున్నానికి, రాళ్ల మధ్య కాలక్రమంలో ఏర్పడే పగుళ్లను స్వయంగా పూడ్చుకోడం (self-healing), తేమను లోపల బంధించకుండా బయటకు వదలడం, శతాబ్దాలు గడిచే కొద్దీ మరింత గట్టిపడ్డం, వత్తిడిని తట్టుకోడం, భూకంపాలు వచ్చినా స్థిరంగా ఉండడం లాంటి ఎన్నో అద్భుత గుణాలున్నాయి*. *డంగు సున్నం ను ఎలా తయారుచేస్తారంటే*. *సముద్రపు గుల్లలు/ శంఖాలు/ అల్చిప్పలను పెద్దపెద్ద బట్టీలలో (Kilns) కాలిస్తే, అందులోంచి కార్బన్ డై ఆక్సైడ్ (CO2) బయటకుపోయి, పొడిసున్నం (quick lime) మిగులుతుంది. దానికి కొంచెం నీళ్లు కలిపితే, బుసబుసలాడుతూ పేస్టులా మారుతుంది. (తమలపాకుల్లో వాడేది ఇదే). దానికి కొంత ఇసుక, బెల్లం, కరక్కాయ, గుడ్లు కలిపి గానుగలో తిప్పితే 'డంగు సున్నం' వస్తుంది. అంతేకాకుండా, ప్రతి కట్టడానికి ఒక ప్రత్యేక శైలి, డిజైను ఉండేది*. *దాని గురించి కింద 3వ ప్రశ్నకు జవాబుగా వివరించాను...* *3. ప్రశ్న: పాత కట్టడాలు వందల ఏళ్లకు పైగా చెక్కు చెదరకుండా ఉండడానికి ఎలాంటి డిజైన్లు వాడేవారు* *జవాబు: గోల్కొండ, ఎర్రకోట, హంపి, చైనా వాల్ లాంటి కట్టడాల మన్నిక కోసం, పైన 2వ ప్రశ్నకు జవాబుగా నేను చెప్పిన డంగు సున్నంను వాటి నిర్మాణంలో వాడేవారు*. *అలాగే వాటి డిజైన్ కూడా ప్రత్యేకంగా ఉండేది. భారీ గ్రానైట్ రాళ్లను పజిల్ ముక్కలు ఒక దాన్లో ఒకటి అమరి పోయినట్టు tongue & groove పద్ధతిలో చెక్కేవారు. దానివల్ల, భూకంపాల వేళ, అవి ఒకదానితో ఒకటి కొద్దిగా కదులుతూ ఒత్తిడిని పంచుకుంటాయి. భూకంపం, ఆగిపోయాక తిరిగి యథాస్థితికి వస్తాయి*. *తంజావూరు బృహదీశ్వర ఆలయం నిర్మాణంలో అయితే: కింద shock absorber లా పని చేసే ఇసుక పొరలు, దానిమీద భారీరాళ్లతో ప్లాట్‌ఫారమ్ కట్టారు. ఆలయ గోపురానికి రూఫ్ లేకుండా, బోర్లించిన కప్పు ఆకారంలో 80 టన్నుల బరువున్న ఒకే ఒక్క భారీ రాయిని (ఏకశిలను) అమర్చారు. దానివల్ల కిందున్న రాళ్లపై విపరీతమైన ఒత్తిడి పడి, మధ్యలో ఎలాంటి సిమెంట్ లేకపోయినా రాళ్లు కదలకుండా స్థిరంగా ఉంటాయి*. *నిర్మాణంలో లోతైన రాతి పునాదులు, మందం పాటి గోడలు, విశాలమైన రాతి బ్లాకులు, గ్రానైట్ స్తంభాలను ఉపయోగించే వారు. తుప్పు పగుళ్ళకు కారణమైన ఇనుప రాడ్లను వీలైనంత వరకు వాడేవారు కాదు. అందుకే, ఆ కట్టడాలు ఇప్పటికీ చెక్కుచెదరకుండా ఉన్నాయి.* *- డాక్టర్ VSN మూర్తి , IZIT* *డా. మూర్తి గారు, ఇండియా లోని పురాతన కట్టడాల గురించి మీరు చాలా సశాస్త్రీయమైన వివరణ ఇచ్చారు, అభినందనలు*. *చాలా మంది మీరన్నట్టు పక్షపాత ధోరణితో.. గతమంతా, వర్తమానం కన్నా గొప్పదని స్వమతాభినంతో మాట్లాడుతుంటారు. (అయితే గతంలో ఏమీ లేదని మనం అనలేము). కొందరు శాస్త్ర విజ్ఞానం, సాంకేతిక పరిజ్ఞానం కాల క్రమేణా మెరుగవుతోందని, అది సహజ పరిణామం అని గుర్తించకుండా.. గతంలో ఋషులు అతీబద్రియ శక్తులతో ఉండేవారని, అందుకే ఇప్పటికన్నా వారి పరిజ్ఞానం ఎక్కువని నమ్ముతారు. ప్రచారం చేస్తారు. అలాంటి వారి మాటలను సీరియస్ గా తీసుకోవాల్సిన అవసరం లేదు.* *'ఎంచి చూడగ మంచి అన్నది గతమున కొంచమేనోయ్.. మందగించక మున్ముందుకడుగు వేయవోయ్' అన్న గురజాడ గేయం సర్వదా స్మరణీయం*.. *గురజాడ గతంలో ఏమీ లేదని అనలేదు..* *కొంచమేనోయ్ అన్నాడు. అభ్యుదయ భావానికీ, చాందస వాదానికీ ఇక్కడే తేడా* #మన సంప్రదాయాలు సమాచారం