#🧘‍♀️ସ୍ଵାସ୍ଥ୍ୟ ଟିପ୍ପଣୀ📝 #🌱ଘରୋଇ ଆୟୁର୍ବେଦିକ ଟିପ୍ସ🍃 #🍀 ମନସୁନ Skin Care 🌿 #🩺ଡାକ୍ତରଙ୍କ ପରାମର୍ଶ🥼 #🤸Monsoon ହେଲଥକେୟାର ଟିପ୍ସ⛹️‍♀️ ଆଈମା ସ୍ୱାସ୍ଥ୍ୟ କଥା – ୧୦୭* _ବର୍ଷା ଦିନେ କେମିତି ମଶା, ମାଛି, ରୋଗ ଓ ପୋକ ଦାଉରୁ ନିଜକୁ ତଥା ଖାଦ୍ୟ ସାମଗ୍ରୀଗୁଡ଼ିକୁ ଦେଶୀ ଉପାୟରେ ସୁରକ୍ଷିତ ରଖିବା?_ ବହୁ ବର୍ଷ ପରେ ଗାଁରୁ ଆଈମା ସହରକୁ ଆସିଥିଲେ। ଆମ ଘରେ ଖୁସିର ମାହୋଲ। ଗାଁ ମାଟିର ସୁଗନ୍ଧ ସହିତ ଆଈମା ଆଣିଥିଲେ ଅନେକ ପ୍ରକାରର ହାତ ତିଆରି ଖାଦ୍ୟ — ଲଡ଼ୁ, ପିଠା ଓ ଘରୋଇ ସୁଆଦିଆ ଜିନିଷ। ବର୍ଷା ଦିନ ଥିବାରୁ ଘରେ ମାଛି ଟିକେ ଅଧିକ ଥିଲେ। ଆଈମା ଅତ୍ୟନ୍ତ ସତର୍କତାର ସହିତ ଖାଦ୍ୟ ପରିବେଷଣ କରୁଥିଲେ। କିନ୍ତୁ ମୋ ଭଉଣୀ ଖାଇବାର କିଛି ଅଂଶ ଖୋଲା ଛାଡ଼ି ଚାଲିଗଲା। କିଛି ସମୟ ପରେ ମାଛି ସେହି ଖାଦ୍ୟ ଉପରେ ବସିଲେ। ଆଈମା କହିଲେ, "ବାପା, ବର୍ଷା ଦିନେ ଖାଦ୍ୟକୁ ଖୋଲା ରଖିବା ବହୁତ ବିପଦଜନକ। ମାଛି କେବଳ ହଇଜା ନୁହେଁ, ଅନେକ ରୋଗର ଜୀବାଣୁ ବୋହି ଆଣିଥାଏ।" ମୁଁ ଆଈମାଙ୍କୁ କହିଲି, "ଆଈମା, ବର୍ଷା ଋତୁ ତ ଅନେକ ଅସୁବିଧା ଆଣେ। ରାସ୍ତାଘାଟ କାଦୁଅ ହୁଏ, ରୋଗୀ ବଢ଼ନ୍ତି, ଜାମା-କପଡ଼ା ଶୁଖେ ନାହିଁ। ଏହା କେମିତି ଆମକୁ ସହଯୋଗ କରେ?" ଆଈମା ହସି କହିଲେ— "ବାପା, ବର୍ଷା ଋତୁ କେବଳ ଜଳ ଦେବା ପାଇଁ ନୁହେଁ, ଏହା ପ୍ରକୃତିର ଏକ ବଡ଼ ସ୍ୱଚ୍ଛତା ପ୍ରକ୍ରିୟା। ଜଳ ବିହୁନେ ସୃଷ୍ଟି ନାଶ ହୁଏ, ଆଉ ଜଳର ଅତ୍ୟଧିକତା ମଧ୍ୟ ସୃଷ୍ଟିକୁ ପ୍ରଭାବିତ କରେ। ପ୍ରକୃତିର ନିୟମକୁ ବୁଝିବା ଆବଶ୍ୟକ।" ଆଈମା କହିଲେ— "ତୁମେମାନେ ଯେଉଁ ଆମ୍ବ ଖରା ଦିନେ ବହୁତ ଖାଅ, ଆଷାଢ଼ ମାସ ଆସିଲେ ସେହି ଆମ୍ବ ଭିତରେ ପୋକ ଦେଖାଯାଏ। ଏହା ପ୍ରକୃତିର ଏକ ସଙ୍କେତ — ଏବେ ଋତୁ ପରିବର୍ତ୍ତନ ହେଲା, ଆହାରରେ ମଧ୍ୟ ପରିବର୍ତ୍ତନ ଆଣ। କେବଳ ଆମ୍ବ ନୁହେଁ, ବେଲରେ ମଧ୍ୟ ପୋକ ଲାଗିବା ଆମକୁ ସତର୍କ କରାଏ।" "ପୂର୍ବଜମାନେ ଋତୁ ଅନୁସାରେ ଖାଦ୍ୟ ଖାଉଥିଲେ। ଖରା ଦିନର ଆମ୍ବକୁ ଆମ୍ବୁଲ କରି ସଂରକ୍ଷଣ କରୁଥିଲେ। ଅଦିନିଆ ଖାଦ୍ୟରୁ ଦୂରେ ରହୁଥିଲେ। ଯେପରିକି ଟମାଟୋକୁ ମୁଖ୍ୟତଃ ଶୀତ ଋତୁରେ ବ୍ୟବହାର କରୁଥିଲେ। ସେମାନେ ଜାଣୁଥିଲେ — ପ୍ରକୃତି ଯେଉଁ ସମୟରେ ଯେଉଁ ଖାଦ୍ୟ ଦିଏ, ତାହାର ନିଜସ୍ୱ ମହତ୍ତ୍ୱ ରହିଥାଏ।" ଆଈମା କହିଲେ— "ଗ୍ରୀଷ୍ମ ଶେଷରେ ମାଛି ବଢ଼ିଥାଏ। ବର୍ଷା ଆରମ୍ଭ ଓ ଝଡ଼ ତୋଫାନ ଦ୍ୱାରା ଅନେକ କୀଟପତଙ୍ଗର ସଂଖ୍ୟା କମିଯାଏ। କିନ୍ତୁ ତାପରେ ଆମର ଦାୟିତ୍ୱ ଆରମ୍ଭ ହୁଏ। ନାଳ ନର୍ଦମାରେ ପ୍ଲାଷ୍ଟିକ ପକାଇବା, ଜଳ ନିଷ୍କାସନ ବନ୍ଦ କରିବା ଓ ଅପରିଷ୍କାର ପରିବେଶ ରଖିବା ଦ୍ୱାରା ଆମେ ନିଜେ ରୋଗକୁ ଆମନ୍ତ୍ରଣ କରୁ।" ମୁଁ ପଚାରିଲି, "ଆଈମା, ଚାଉଳ ଓ ଡାଲିରେ ପୋକ ଲାଗୁଛି। କେମିକାଲ ବ୍ୟବହାର ନକରି କିଛି ଉପାୟ ଅଛି କି?" ଆଈମା କହିଲେ— "ଶସ୍ୟର ସବୁଠାରୁ ବଡ଼ ଶତ୍ରୁ ହେଉଛି ଆଦ୍ରତା। ଚାଉଳ ଓ ଅଟାକୁ ଶୁଖିଲା ପାତ୍ରରେ, ବାୟୁରୋଧୀ ଭାବରେ ରଖିବା ଦରକାର। ଆଦ୍ରତା ପାଇଲେ ଚାଉଳ ଭିତରେ ଥିବା ସୁପ୍ତ ପୋକର ଅଣ୍ଡା ସକ୍ରିୟ ହୋଇଯାଏ।" "ଆମ ସମୟରେ ଚାଉଳ ଭିତରେ ହଳଦୀ, ଲବଙ୍ଗ ଓ ଚିନି ଥିବା ସୂତି କପଡ଼ାର ପୁଟୁଳି ରଖୁଥିଲୁ। ଡାଲିକୁ ଦୀର୍ଘ ସମୟ ଭଲ ରଖିବା ପାଇଁ ଶୁଖିଲା ବେଗୁନିଆ ପତ୍ର ବ୍ୟବହାର କରୁଥିଲୁ। ନିମ ଓ ନିର୍ଗୁଣ୍ଡି ପତ୍ର ମଧ୍ୟ ପାରମ୍ପରିକ ଭାବରେ ଶସ୍ୟ ସଂରକ୍ଷଣରେ ବ୍ୟବହାର ହେଉଥିଲା।" ମାଛି ନିୟନ୍ତ୍ରଣ ବିଷୟରେ ଆଈମା କହିଲେ— "ମାଛି ଅପରିଷ୍କାର ସ୍ଥାନ, ସଢ଼ୁଥିବା ଜିନିଷ ଓ ମଳ ପ୍ରତି ଆକର୍ଷିତ ହୁଏ। ତେଣୁ ଘରକୁ ଶୁଖିଲା ଓ ସଫା ରଖିବା ହିଁ ପ୍ରଥମ ଉପାୟ।" "ମାଟି ଘରରେ ଗୋବର ଲେପନ ସହିତ ଅଳ୍ପ ଚୂନ, ଚୁଲିର ପାଉଁଶ ଓ ନିମ ପତ୍ର ଗୁଣ୍ଡ ମିଶାଇଲେ ଘର ସ୍ୱଚ୍ଛ ରହେ। ସିମେଣ୍ଟ କିମ୍ବା ଟାଇଲ୍ ଚଟାଣରେ କର୍ପୂର ମିଶା ପାଣିରେ ପୋଛା କରାଯାଇପାରେ।" "ଘର ପାଖରେ ନିମ, ତୁଳସୀ, ଲେମ୍ବୁ ଭଳି ଗଛ ଲଗାଇବା ମଧ୍ୟ ଉପକାରୀ। ନୃସିଂହନାଥ ଯିବା ବେଳେ ସଂକଳ୍ପ ଆଶ୍ରମରେ ମୁଁ ଦେଖିଥିଲି, ଚାରିପାଖରେ ଅନେକ ଦେଶୀ ଲେମ୍ବୁ ଗଛ ଥିବାରୁ ସେଠାରେ ମଶା ବହୁତ କମ୍ ଥିଲା।" ଶେଷରେ ଆଈମା କହିଲେ— "ଖାଲି ମଣିଷ ନୁହେଁ, ଗାଈ ବଳଦ, ପୋଖରୀର ମାଛ — ସମସ୍ତେ ସ୍ୱଚ୍ଛତା ପସନ୍ଦ କରନ୍ତି। ଆମେ ମଣିଷମାନେ ହିଁ ପରିବେଶକୁ ଅପରିଷ୍କାର କରୁ।" ସେହି ଦିନ ମୁଁ ବୁଝିଲି — ବର୍ଷା ଋତୁ କେବଳ ଜଳର ଋତୁ ନୁହେଁ, ଏହା ପ୍ରକୃତିର ସ୍ୱଚ୍ଛତା ଓ ନୂତନ ଜୀବନର ସନ୍ଦେଶ। ପ୍ରକୃତିକୁ ଯିଏ ବୁଝେ, ପ୍ରକୃତି ତାହାର ସ୍ୱାସ୍ଥ୍ୟକୁ ସୁରକ୍ଷା କରେ। _ଆଜିର ଆଈମା ସ୍ୱାସ୍ଥ୍ୟ କଥାଟି ଆପଣଙ୍କୁ କେମିତି ଲାଗିଲା ନିଶ୍ଚୟ ନିଜର ସୁଚିନ୍ତିତ ମତାମତ ଦେବେ l ଯଦି ଆଗକୁ ଏଭଳିଆ ଭାରତୀୟ ସଂସ୍କୃତି ବିଶିଷ୍ଟ ବୈଜ୍ଞାନିକ କଥା ବିଷୟରେ ଜାଣିବାକୁ ଆଗ୍ରହୀ ତାହେଲେ ମଧ୍ୟ ଆମକୁ ଯୋଗାଯୋଗ କରିପାରିବେ l_ *ଜୟ ଜଗନ୍ନାଥ 🙏ଜୟ ଗୋବଂଶ* *ସାହିତ୍ୟ ଓ ସଂସ୍କୃତି ବିଭାଗ* *ଶ୍ରୀ ଗୋ ବିଜ୍ଞାନ ଓଡ଼ିଶା* *Mob- 8480076504* *E-mail- gobigyanodisha@gmail.com*