#📔 കഥ #📙 നോവൽ #💞 പ്രണയകഥകൾ നീയെൻ നീലാംബരി 🦋8  അമ്മായിമാർ തന്ന ഡ്രെസ്സുകൾ നിറച്ച ബക്കറ്റുമായി അഭി കുളത്തിനടുത്തെത്തി. കുളപ്പുരക്ക് രണ്ടു വാതിലുകളാണ് ഒന്ന് ആണുങ്ങൾക്കുള്ള കടവും മറ്റേത് പെണ്ണുങ്ങൾക്കുള്ളതും. പണ്ടത്തെ പോലെ കുളത്തിലിപ്പോൾ സ്ഥിരമായി ആരും കുളിക്കാറില്ല. വസ്ത്രങ്ങൾ ഒക്കെ മെഷീനിൽ ഇട്ട് അലക്കലാണ് പതിവ്. ഇനി കല്ലിൽ അലക്കാനുള്ളതാണെങ്കിൽ ജാനി ചേച്ചിയോ അമ്മാളു ചേച്ചിയോ കൊണ്ടുവന്നു അലക്കിയിടും.പറമ്പിൽ പണിക്കാരുള്ളപ്പോൾ അവർ ഇവിടെ വന്നാണ് കുളിക്കാർ   .  പിന്നെ ഇടക്ക് അഭി വന്നു കുളിക്കും. നല്ല തണുത്ത വെള്ളത്തിൽ ഒരുപാടു നേരം നീന്തി തുടിച്ചു ആസ്വദിച്ചു കുളിക്കുമ്പോൾ എന്തെന്നില്ലാത്ത സന്തോഷവും സമാധാനവുമാണവന് . അങ്ങനെ കുളിക്കാൻ വരുന്ന ദിവസം എണ്ണ കുപ്പിയുമായി വന്നു കുളപ്പടവിലിരുന്ന് തല നിറയെ അവൻ എണ്ണ തേക്കും. അമ്മ ഉണ്ടായിരുന്നപ്പോൾ ഇടക്കൊക്കെ " മനു..... അമ്മ എണ്ണയിട്ടു താരാടാ ..... " എന്നും പറഞ്ഞു അമ്മ പിടിച്ചിരുത്തി ഓരോ വിശേഷങ്ങൾ ഒക്കെ പറഞ്ഞു എണ്ണയൊക്കെ തേച്ചു നന്നായി മസ്സാജ് ചെയ്തു തരും. ആ ഓർമകളുടെ ഒരു നോവോടെയായിരുന്നു ഓരോ തവണയും അവൻ ഒറ്റക്ക് അത് ചെയ്യാറ്. അന്നൊക്കെ അഭിക്ക് തോളൊപ്പം വളർന്ന മുടിയായിരുന്നു. ആദ്യ സൈക്കിൾ കീമോ കഴിഞ്ഞപ്പോൾ തൊട്ട് എല്ലാം പതുക്കെ പൊഴിഞ്ഞു തുടങ്ങി. കുറച്ചു ദിവസം കഴിഞ്ഞതും ഉറങ്ങി എന്നേറ്റപ്പോൾ വിഗ് ഊരി പോന്ന പോലെ മുടി മൊത്തത്തിൽ കിടക്കയിൽ കിടപ്പുണ്ടായിരുന്നു.  'അമ്മ ജീവനോടെ ഇല്ലാതിരുന്നത് നന്നായെന്ന് ആദ്യമായി അഭി അന്ന് ചിന്തിച്ചു പോയി. ഇല്ലെങ്കിൽ അത് കണ്ടു അമ്മയുടെ നെഞ്ചു തകർന്നു പോയേനെ...... ഓരോന്നോർത്തു അഭി ആണുങ്ങളുടെ കടവിന്റെ വാതിൽ തുറന്ന് കുളപ്പടവിലേക്കിറങ്ങി. ഇട്ടിരിക്കുന്ന ടീഷർട്ടും ട്രൗസറും ഊരി മുകളിലെ പടവിൽ വച്ചു. അടിവസ്ത്രത്തിനു മുകളിലായി കയ്യിലുണ്ടായിരുന്ന വെള്ള തോർത്തെടുത്തുടുത്തു . പതുക്കെ വെള്ളത്തിലിറങ്ങി. നഗ്നനമായാ പുറത്തേക്ക് നല്ല ഉച്ചവെയിൽ അടിക്കുന്നുണ്ടായിരുന്നു. പൊള്ളുന്നത് പോലെ തോന്നിയെങ്കിലും അവനതു കാര്യമാക്കിയില്ല. പടവിലിട്ട അലക്ക് കല്ലിൽ ഓരോന്നായി അലക്കി എടുത്തു. നാല് ചുരിദാറും രണ്ടു സാരിയും ആയിരുന്നു അതിൽ ഉണ്ടായിരുന്നത്.  കൂടുതൽ കാലം ഇതിനൊന്നും നിൽക്കാതെ മരിച്ചു പോയാൽ മതിയായിരുന്നെന്നവന് തോന്നി. ആ വീട്ടിലെ ജീവിതം അത്രത്തോളം അവനു മടുത്തു പോയിരുന്നു. മര്യാദക്ക് വിശപ്പ് മാറി കിടന്നുറങ്ങിയ കാലം പോലും അഭി മറന്നു പോയി.  പ്രതികരിക്കാൻ അറിയാഞ്ഞിട്ടല്ല. പക്ഷെ വയ്യ , ശരീരം കൊണ്ടും മനസ് കൊണ്ടും വയ്യ. ചെയ്യാവുന്നിടത്തോളം അവരൊക്കെ ചെയ്യട്ടെ എന്നാണ് ഇപ്പോൾ ചിന്തിക്കുന്നത്.പ്രതികരിച്ചു നേടിയിട്ട് പ്രത്യേകിച്ച് കാര്യം ഒന്നുമില്ലല്ലോ .  അലക്കി കഴിഞ്ഞു എല്ലാം വെള്ളത്തിൽ മുക്കി പിഴിഞ്ഞ് ബക്കറ്റിലേക്കിട്ടു. കുളത്തിനടുത്തായി കെട്ടിയിരിക്കുന്ന അയയിൽ കൊണ്ട് പോയി വിരിച്ചിട്ടിട്ട് വേണം ഒന്ന് പോയി കിടക്കാൻ. അത്രയും ക്ഷീണമുണ്ടായിരുന്നു അഭിക്ക് . അപ്പോഴാണ് അപ്പുറത്തെ വാതിൽ തുറക്കുന്ന ശബ്‌ദം അഭി കേൾക്കുന്നത്. ആരോ ആ ഭാഗത്തേക്കിറങ്ങുന്നുണ്ടെന്നവന് മനസിലായി. പൊതുവെ ആരും അങ്ങോട്ട് വരാറില്ല. കിങ്ങിണി ചിലപ്പോൾ ഫോട്ടോ എടുക്കാൻ വരാറുണ്ട് . അവളായിരിക്കുമെന്നാണ് അഭി ചിന്തിച്ചത്. അവസാന ചുരിദാർ ടോപ്പും വെള്ളത്തിൽ മുക്കി പിഴിഞ്ഞ് എടുത്തു ബക്കറ്റിൽ ഇട്ടതും. അപ്പുറത് വെള്ളത്തിൽ എന്തോ വീഴുന്ന ശബ്‌ദം കേട്ടതും ഒരുമിച്ചായിരുന്നു . പെണ്ണുങ്ങളുടെ കടവിനറ്റത്തായി കുളത്തിലേക്ക് ചാഞ്ഞൊരു തെങ്ങു നിൽപ്പുണ്ട്. അതിൽ നിന്നും ഓല വീണതാവും എന്നും വിചാരിച്ചാണ് അഭി അങ്ങോട്ട് നോക്കിയത്. പക്ഷെ കണ്ട കാഴ്ചയിൽ അക്ഷരാർഥത്തിൽ അവൻ ഞെട്ടി പോയി. ആഴമുള്ള തെളിഞ്ഞ നീല വെള്ളത്തിൽ ഒരുത്തി ശ്വാസം കിട്ടാതെ കൈകാലിട്ടടിക്കുന്നു. അഭി പകച്ചു പോയി. നീന്തൽ അറിയാത്താരോ ആണെന്നവന് ഉറപ്പായി. കൂടുതൽ ആഴങ്ങിലേക്കവൾ പോയി കൊണ്ടിരിക്കുകയാണ്. രണ്ടും കൽപ്പിച്ചു അഭി വെള്ളത്തിലേക്കെടുത്തു ചാടി. പറ്റാവുന്ന വേഗത്തിൽ നീന്തി അവൾക്കടുത്തെത്തി. എന്നാൽ ആ പെൺരൂപം കൂടുതൽ ആഴങ്ങളിലേക്ക് താഴ്ന്നു പോയിരുന്നു. അഭി മുങ്ങാംകുഴിയിട്ടു. വെള്ളത്തിൽ മുകളിലേക്ക് ഉയരാൻ ശ്രമിച്ചു കൊണ്ടവൾ പിടഞ്ഞു കൊണ്ടിരുന്നു. ആഴങ്ങളിലേക്ക് നീന്തി അവൾക്കടുത്തെത്തിയതും അഭിക്ക് പിടിത്തം കിട്ടിയത് അവളുടെ മുടിയിലായിരുന്നു. പരമാവധി ശ്രമപ്പെട്ടു അഭി ആ മുടി വലിച്ചു വെള്ളത്തിന് മുകളിലേക്ക് നീന്തി. വെള്ളത്തിന് മുകളിലെത്തി തല പൊക്കിയതും മുടിയിൽ നിന്ന് വിട്ട് അവളെ അരക്കെട്ടിൽ പിടിച്ചവൻ വെള്ളത്തിൽ നിന്നും പുറത്തേക്കുയർത്തി. പുതുജീവൻ കിട്ടിയപോലെയാ പെൺരൂപം ശ്വാസം ആഞ്ഞു വലിച്ചു. വായിലൂടെ ശ്വാസം ആഞ്ഞു വലിച്ചുകൊണ്ടവന്റെ തോളിലേക്കവൾ കിടന്നു. അഭി പടികെട്ട് ലക്ഷ്യമാക്കി നീന്തി.  പടിക്കെട്ടിനടുത്തെത്തിയതും അഭി തോളിൽ നിന്നും അവളെ തന്റെ ഇരുകൈകളിലേക്കും മലർത്തി എടുത്തു. കണ്ണുകൾ ഇറുക്കിയടച്ചു വിറയ്ക്കുന്ന ചുണ്ടുകളോടെ ആർത്തിയിൽ ശ്വാസം വലിച്ചെടുക്കുന്നവളെ അഭി ഒന്ന് നോക്കി.  ഇന്നോളം കണ്ടിട്ടില്ലാത്ത ആ മുഖം കണ്ടതും അതാരാണെന്നവന് മനസിലായി. വെള്ളത്തിന് തൊട്ടു മുകളിലുള്ള പടിക്കെട്ടിലേക്കവളെ കിടത്തി വെള്ളത്തിലുള്ള പടിക്കെട്ടിലേക്കവൻ ഇരുന്ന് കിതച്ചു.  അഭി പുറകിലേക്ക് നോക്കി. അവളുടെ ശരീരം ആസകലം വിറകുന്നുണ്ടെന്ന് കണ്ടതും അവൾ നന്നായി പേടിച്ചിട്ടുണ്ടെന്ന് ഊഹിച്ചു. നനഞു കുതിർന്നു വസ്ത്രത്തിനു മുകളിലൂടെ ശരീരത്തിലെ സകലഅളവുകളും വ്യക്തമായി കാണാവുന്നതിൽ ഉന്തി നിൽക്കുന്ന വയറുകണ്ടവൻ അവൾക്കു നേരെ തിരിഞ്ഞു . കൊള്ളവുന്നതിലും അധികം വെള്ളമതിൽ ഉണ്ടായിരുന്നു.നാലഞ്ചു പ്രാവശ്യം അമർത്തിയതും ചുമയോടെ അവൾ അത് തുപ്പി കളഞ്ഞു. ഒരുപാടു വെള്ളം പുറത്തു വന്നതും വയറിന്റെ വലുപ്പം നന്നേ കുറഞ്ഞു. ഒരാശ്വാസത്തോടെയവൾ കണ്ണുകൾ തുറന്നു.  അവളുടെ മുഖത്തിന് തൊട്ടടുത്തയി ചെറിയൊരുപുഞ്ചിരിയോടെ നനഞ്ഞു നിൽക്കുന്നയാളെ കണ്ടതും മധു ഒന്ന് ഞെട്ടി പോയി. അവൾ വേഗം എണീക്കാൻ ശ്രമിച്ചതും വിറയ്ക്കുന്ന ശരീരം കാരണം അതിനു കഴിയാതെ വീണ്ടും ആ പടിക്കെട്ടിലേക്ക് തന്നെ കിടന്നു.  " പേടിച്ചിട്ടാണ് ഇങ്ങനെ വിറക്കുന്നത് , കുറച്ചു കഴിഞ്ഞാൽ മാറിക്കോളും ...." അഭി അലിവോടെ പറഞ്ഞു.  തന്നെ രക്ഷിച്ചതിന്റെ നന്ദിയോടെ അവൾ അതിനു തലയാട്ടി. എന്നാൽ വെള്ളത്തുള്ളികൾ പറ്റിപ്പിടിച്ച നിറയെ പീലിയുള്ള കണ്ണിലെ അപരിചിതത്വം കണ്ടു അഭിക്ക് ചിരി വന്നു.  " അഭിമന്യു...." അവളെ നോക്കി അഭി പറഞ്ഞു.  മധുവിന്റെ കണ്ണുകൾ വിടർന്നു. അവൾ മനസ്സിൽ കണ്ട രൂപത്തിൽ ഒരാളായിരുന്നില്ല മുന്നിലുള്ളത്. ആ വീട്ടിൽ കണ്ട ആണുങ്ങളെ പോലൊന്നുമല്ലാതെ മെലിഞ്ഞു ഐശ്വര്യം തുളുമ്പുന്ന മുഖവുമായൊരു ചെറുക്കൻ. കണ്ണുകൾ കൊണ്ടവനെയവൾ മൊത്തത്തിൽ നോക്കി. ഒരു തോർത്ത് മാത്രം ഉടുത്താണ് ആളിരിക്കുന്നതെന്ന് കണ്ടപ്പോൾ അവൾക്ക് മനസിലായി അപ്പുറത്ത് അലക്കി കൊണ്ടിരുന്നത് ഇയാളാണെന്ന്.  കുറച്ചു നേരം രണ്ടുപേരും അങ്ങനെ ഇരുന്നു. മധുവിന്റെ പേടിക്ക് കുറച്ചു കുറവ് വന്നെന്ന് അഭിക്ക് തോന്നി.  " എന്തിനാ ഒറ്റക്കിങ്ങോട്ട് വന്നത് ? " അഭി ചോദിച്ചപ്പോഴവൾ അവന്റെ തോളിൽ കൈ വച്ച് പതുക്കെ കിടന്നിടത് നിന്നെണീറ്റു. ഒരു താങ്ങിനെന്നോണം അവനെ ചാരി ഇരുന്നു. അഭി അവളെ തന്നെ നോക്കിയിരിക്കുകയായിരുന്നു.  നനഞു നഗ്നമായ തോളിലവളുടെ തണുത്ത കൈ അമർന്നിരുന്നു. നനഞ്ഞ ശരീരങ്ങൾ അടുത്തടുത്തായി ഒട്ടിയിരുന്നു.  " കിങ്ങിണിയുടെ കൂടെ വന്നതായിരുന്നു. പടിക്കെട്ടിൽ ഇരിക്കാമെന്നു വിചാരിച്ചിങ്ങോട്ട് ഇറങ്ങിയതാണ്. വെള്ളം കണ്ടപ്പോൾ ഒന്ന് കാൽ നനക്കാൻ തോന്നി. പക്ഷെ ചവിട്ടിയിടത്തു നല്ല പായൽ ഉണ്ടായിരുന്നു. തെന്നി വീണു പോയി. " വിറയ്ക്കുന്ന സ്വരത്തിൽ മധു പറഞ്ഞു നിർത്തി .  " അപ്പോ കിങ്ങിണിയോ? "  "അവളുടെ അമ്മ ഞങ്ങളിങ്ങോട്ടു വരുന്ന വഴി  അവളെ വിളിച്ചു. ഇപ്പൊ വരാമെന്ന് പറഞ്ഞു പോയതാ...."  അഭി മൂളി. രേവതി അമ്മായി മനഃപൂർവം വിളിച്ചതായിരിക്കുമെന്നവന് അറിയാം.  " ഇപ്പോൾ ഓക്കേ അല്ലെ? " അഭി ചോദിച്ചു.  " മ്മ്....... " മധു മൂളി. അവന്റെ തോളിൽ തന്നെ കൈകൊണ്ട് മുഴുവൻ ബലവും കൊടുത്തു എണീക്കാൻ ശ്രമിച്ചതും കാലിനു ബലം കിട്ടാതെ മധു അഭിയുടെ മുകളിലേക്ക് വീണു പോയി. വെള്ളം ഓളം വെട്ടുന്ന പടികെട്ടിൽ അഭിക്ക് മുകളായിലായി മധു കിടന്നു.  അഭി ഞെട്ടി പോയി . നനഞ്ഞു കുതിർന്നൊരു പെൺശരീരം തന്റെ നഗ്നമായ നെഞ്ചിൽ അമർന്നു നിൽക്കുകയാണെന്ന് ചിന്ത അവനെ വലച്ചു .  " സോറി...." മധു വെപ്രാളത്തിൽ പറഞ്ഞു എണീൽക്കാൻ ശ്രമിച്ചു. പക്ഷെ സാധിക്കുന്നുണ്ടായിരുന്നില്ല.  എണീക്കാൻ ശ്രമിക്കും തോറും അവൾ കൂടുതൽ അവനോടൊട്ടി കൊണ്ടിരുന്നു. ഇപ്പോൾ കൂട്ടിയിടിക്കുമെന്ന പോലെ രണ്ടു മുഖങ്ങളും സമാന്തരമായി നിന്നു.  മധുവിന്റെ നനഞ്ഞ മുടി മുഴുവനും അഭിയുടെ മുഖത്തും കഴുത്തിലുമായി വീണു കിടന്നു.  അവളെ എടുത്തുയർത്താനുള്ള ആരോഗ്യം അഭിക്കുണ്ടായിരുന്നില്ല. അവളാണെങ്കിൽ എഴുന്നേൽക്കാൻ ശ്രമിച്ചു കൈകാലിട്ടടിക്കുകയാണ്..  " അയ്യോ...........ഏട്ടത്തി............."  വാതിൽ തുറന്നു ഭയന്ന മുഖത്തോടെ അതിവേഗത്തിൽ പടികളിറങ്ങി വരുന്ന കിങ്ങിണിയെ മധു ആശ്വാസത്തോടെ നോക്കി . കിങ്ങിണി വേഗത്തിൽ താഴെയുള്ള പടിക്കെട്ടിൽ എത്തി. അപ്പോഴാണവൾ അഭിയെ കാണുന്നത്. അഭിക്ക് മുകളിലായി മധു ഉള്ളത് കൊണ്ട് മുകളിൽ നിന്നും അവനെ കാണുന്നുണ്ടായിരുന്നില്ല.  " ശോ....." അവരുടെ ഇടയിൽ ശല്യമായി താൻ വന്നോ എന്ന ചിന്തയിൽ കിങ്ങിണി നാവു കടിച്ചു.  " സോറി.... ഞാൻ ചേച്ചി വെള്ളത്തിൽ വീണെന്ന് വിചാരിച്ചു. അഭിയേട്ടൻ ഇവിടുള്ളത് ഞാൻ കണ്ടിരുന്നില്ല. ഞാൻ പോയേക്കാം... നിങ്ങൾ റൊമാൻസ് continue....." കള്ളച്ചിരിയോടെ പറഞ്ഞു കിങ്ങിണി പടികെട്ട് കയറാൻ തുടങ്ങി. .  അഭിയും മധുവും അവളുടെ പറച്ചിലും പോക്കും കണ്ടു കിളി പാറി കിടന്നു.  " കിങ്ങിണി...... " പെട്ടന്ന് വന്ന ബോധത്തിൽ അഭി ഉറക്കെ വിളിച്ചു.  " എന്താ ഏട്ടാ ....... " അവരെ തിരിഞ്ഞു നോക്കാതെ കാലിന്റെ വിരൽ കൊണ്ട് നിൽക്കുന്ന പടിക്കെട്ടിൽ കളം വരച്ചു കിങ്ങിണി നാണത്തിൽ ചോദിച്ചു.  " എന്റെ പൊന്നു കിങ്ങിണി. ഈ കൊച്ചെന്റെ മേലേക്ക് വീണിട്ട് എണീക്കാൻ പറ്റാതെ കിടക്കുകയാണ്. നീ ഈ നാണം കളിക്കലൊന്ന് നിർത്തി പിടിച്ചെണീപ്പിച്ചേ.... ഇല്ലെങ്കി ഞാൻ  ചത്ത് പോവുമെടി...." അഭി നിസ്സാഹയതയോടെ പറഞ്ഞു. " ഓ പിന്നേ............  ചത്ത് പോവാൻ മാത്രം ഞാൻ അത്ര weight ഒന്നും ഇല്ല...... എന്നിട്ട് അഭിമന്യു എന്താ അങ്ങനൊരു വർത്താനം..." കുറുമ്പൊടെ അവനെ കണ്ണുരുട്ടി മധു പറഞ്ഞു.  " seariously? " അഭി അവളെ മിഴിച്ചു നോക്കി.  അപ്പോഴേക്കും താൻ വിചാരിച്ചതു പോലെയല്ല കാര്യങ്ങളുടെ കിടപ്പെന്നു കിങ്ങിണിക്ക് മനസിലായിരുന്നു.  അവൾ വേഗം താഴേക്കിറങ്ങി വന്നു മധുവിനെ എണീപ്പിച്ചു.  അഭി നെഞ്ചിൽ കൈവെച്ചെണീറ്റു. ആഞ്ഞു ശ്വാസം വലിച്ചു.  " നീ ഈ കൊച്ചിനെ വീട്ടിൽ കൊണ്ട് ചെന്നാക്കിക്കെ ...ഇനി രണ്ടാളെയും ഈ പരിസരത്തു കാണരുത് .." അതും പറഞ്ഞു മധുവിനെ ഒന്ന് കൂടെ നോക്കി അഭി കുളത്തിലേക്ക് ചാടി. നീന്തി ആണുങ്ങളുടെ കടവിലേക്ക് കയറി.  ആ നേരം അഭിയുടെ ചുണ്ടിൽ ഒരു കുഞ്ഞു പുഞ്ചിരി തങ്ങി നിന്നിരുന്നു. " ശരിക്കും എന്താ ഉണ്ടായത് ഏട്ടത്തി ? " കിങ്ങിണി മധുവിനോടൊപ്പം ഗസ്റ്ഹൗസിലേക്ക് നടക്കുന്നതിനിടെ ചോദിച്ചു.  തണുപ്പ് കൊണ്ടും പേടിച്ചത് കൊണ്ടും നന്നായി വിറയ്ക്കുന്ന മധു ഇരു കൈകൾ കൊണ്ടും അവളുടെ ദേഹം പൊതിഞ്ഞു പിടിച്ചാണ് നടക്കുന്നത്. " നീ പറഞ്ഞത് കേൾക്കാതെ ഞാൻ വെള്ളത്തിലേക്കിറങ്ങി . തെന്നി വീണു . മുങ്ങി പൊങ്ങി. അഭിമന്യു അവിടെ ഉണ്ടായിരുന്നത് കൊണ്ട് ഇപ്പോൾ ജീവനോടെ നിൽക്കുന്നു. ഇല്ലെങ്കിൽ ചുമരിൽ തൂങ്ങിയേനെ...." മധു വിറച്ചു വിറച്ചു പറഞ്ഞു. " ശോ.... അതാണോ.... ഞാൻ പറഞ്ഞതെല്ലേ ഏട്ടത്തി വഴുക്കളുണ്ടെന്ന്. പക്ഷെ നിങ്ങൾ അങ്ങനെ കിടക്കുന്നത് കണ്ടപ്പോൾ ഞാൻ വിചാരിച്ചു ....................."  " എന്ത് വിചാരിച്ചു.."  " കല്യാണത്തിന് മുന്നേ.. കുൽസിതം തുടങ്ങിയെന്ന്....."  " തേങ്ങാ......... " അവളുടെ തലക്കിട്ടൊരു കിഴുക്ക് കൊടുത്തു മധു വേഗത്തിൽ നടന്നു.  ഡ്രസ്സ് ധരിച്ചു കുളത്തിൽ നിന്ന് തല തോർത്തി കയറി  അഴയിൽ വസ്ത്രങ്ങൾ വിരിച്ചിട്ടുകൊണ്ട് അഭി അവർ നടന്നു പോകുന്നത് നോക്കി കാണുന്നുണ്ടായിരുന്നു.  അവനവളെ നോക്കുന്നത് മാളിക്കൽ വീടിന്റെ ബാല്കണിയിൽ വർഷവും താരയും പുച്ഛത്തോടെ നോക്കി നിന്നു.  തുടരും..................