ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/mX8aP91?d=n&ui=v64j8rk&e1=cപരിണയം ❣️ 7 "നീ എന്താ അനു ഈ പറയണേ.? നീ അങ്ങനെ ഒന്നും.അഥവാ അങ്ങനെ ആണെങ്കിൽ തന്നെ നീ എന്തിനാ അത് അവരോട് പറയാൻ പോയെ. ഹരിക്ക് അറിയോ.?" "നീ ഒന്ന് ശ്വാസം വിട് മീനു. ഞാൻ പറഞ്ഞു തീർന്നില്ല. ഹരിക്ക് അറിയില്ല. പക്ഷെ ഹരിയുടെ അമ്മക്ക് അറിയാം." ഗൗരവം നിറഞ്ഞ അവളുടെ വാക്കുകൾ കേട്ടു സത്യത്തിൽ മീനുവിന് ദേഷ്യം തോന്നിയിരുന്നു. "നീ എന്ത് മണ്ടത്തരം ആണ് കാട്ടിയത്. ഹരി അറിയുന്നത് പോലാണോ അമ്മ അറിയുന്നത്.അവരൊക്കെ ഇത് ഉൾക്കൊള്ളുമോ അനു.? ഒന്നാതെ ഡ്രസിങ് സ്റ്റൈൽ നോക്കി പെണ്ണിനെ മോശം പറയുന്ന ആളുകൾ ഉള്ള നാട്ടിൽ ആണ് നമ്മൾ ജീവിക്കുന്നത്. അത് നീ ഓർക്കണ്ടേ. നീ എന്തിനാ അവരോട് പറയാൻ പോയത്. അല്ല നീ അങ്ങനെ ഒന്നും ചെന്നു പെടുന്നവൾ അല്ലല്ലോ?" വീണ്ടും ആധിയോടെ സംസാരിക്കുന്ന മീനുനോട് അവൾക്ക് സഹതാപം തോന്നി. "എന്റെ മീനു നീ എന്നെ ഒന്ന് പറയാൻ അനുവദിക്ക്.." അനു വീണ്ടും പറഞ്ഞതും മീനു നിശബ്ദത പാലിച്ചു. "ഞാൻ പറഞ്ഞത് അല്ല അത്. അവരാണ് പറഞ്ഞത്. അവർക്ക് ആ കാര്യത്തിൽ സംശയം ഉണ്ട് പോലും.ഏകമകൻ ആണ്. അവന്റെ ലൈഫ് നശിക്കാൻ പാടില്ല. അവർക്ക് ഒപ്പം പണവോ പ്രതാപമോ ഇല്ല. അത് പിന്നെയും സഹിക്കാം. എന്നാൽ ഞാൻ വിർജിൻ ആണോന്ന് അവർക്ക് അറിയണമെന്ന്. ഇപ്പോഴത്തെ പെൺകുട്ടികളെ വിശ്വസിക്കാൻ കഴിയില്ല. പിന്നെ.." "പിന്നെ..?" "എനിക്ക് പ്രെഗ്നന്റ് ആകാൻ കഴിയോ അതും അവർക്ക് അറിയണമെന്ന് " അനുവിന്റെ സംസാരം കേട്ടു ഇത്തവണ ശരിക്കും മീനു ഞെട്ടിയിരുന്നു. "അവർ സ്ത്രീ തന്നെ അല്ലെ അനു.? ഇതൊക്കെ നോക്കിയേ അവർ നിന്നെ മരുമകൾ ആയി അംഗീകരിക്കൂ എങ്കിൽ ആ സ്ഥാനം നിനക്ക് വേണ്ട. നീ എന്താണെന്ന് എനിക്കും നിനക്കും അറിയാം. അത് മതി. പ്രെഗ്നന്റ് ആകണോ എന്നതൊക്കെ ഒരു വിധി ആണ്. അത് പോലെ നടക്കും. അല്ലാതെ അത് അറിഞ്ഞാലേ വിവാഹം മതിയെന്ന് അവർക്ക് പറയാൻ എങ്ങനെ തോന്നി. നീ അവിടെ പോകാഞ്ഞത് നന്നായി അനു. ഇല്ലേൽ നീ ബാക്കി ഉണ്ടാവില്ലായിരുന്നു. അല്ല ഹരിക്ക് അറിയോ ഇത്.?" "ഇല്ല മീനു. ഹരിക്ക് അറിയോ എന്നറിയില്ല. പക്ഷെ ഹരി ഒരിക്കലും അങ്ങനെ ചിന്തിക്കുന്നവൻ അല്ല. അവരുടെ മകന്റെ കാര്യത്തിൽ അവർക്ക് ഭയമാണ്. ഇതൊക്കെ കേട്ടിട്ടും എനിക്ക് എങ്ങനെ സന്തോഷത്തോടെ അവിടെ ജീവിക്കാൻ കഴിയും മീനു. സമാധാനമെന്തെന്നു ഞാൻ അറിയോ അവിടെ.? ആക്‌സിഡന്റ് കഴിഞ്ഞു ഞാൻ കിടപ്പിലായപ്പോൾ അവർ വിളിച്ചിരുന്നു. ഹരിയുമായി ഇപ്പോഴും റിലേഷൻ ഉണ്ടെന്ന് കരുതി ആണ് അവർ വിളിച്ചതും ഇങ്ങനെ ചോദിച്ചതും. എന്നാൽ ഹരിയുമായി പിരിഞ്ഞു എന്നറിഞ്ഞപ്പോൾ അവർക്ക് സമാധാനം ആയി. ഇപ്പൊ അവർ ഹരിക്കായി മറ്റൊരു പെണ്ണിനെ അന്വേഷിക്കുന്ന തിരക്കിൽ ആയിരിക്കും ". "ഹരി നിന്നെ ഒരിക്കലും ഉപേക്ഷിക്കില്ല അനു. നിങ്ങൾക്ക് എവിടെ എങ്കിലും പോയി ജീവിച്ചൂടെ. അവർക്ക് ഒപ്പം പറ്റില്ലെങ്കിൽ അതല്ലേ നല്ലത്." "വേണ്ട മീനു. ഒരച്ഛൻ ഇല്ലാതെ ഞങ്ങളെ വളർത്തിയ അമ്മയുടെ അവസ്ഥ എനിക്ക് ഊഹിക്കാൻ കഴിയും. ആ ഞാൻ കാരണം ഹരിയുടെ അമ്മയുടെ കണ്ണുകൾ നനയിക്കരുത്. അവർക്ക് എന്നേക്കാൾ നല്ലൊരാളെ ഹരിക്ക് കണ്ടെത്തി കൊടുക്കാൻ കഴിഞ്ഞാൽ അങ്ങനെ ചെയ്യട്ടെ. അല്ലാതെ ഞാൻ ആയി അവരിൽ നിന്നും ഹരിയെ അകറ്റില്ല. അന്ന് എന്നെ കുറെ വേദനിപ്പിച്ചതാണ് അവർ. അന്നേ ഉറപ്പിച്ചു ഹരിയുടെ ജീവിതത്തിൽ നിന്നും പോകുന്നതാണ് എനിക്ക് നല്ലത് എന്നത്. ഹരി ഉപേക്ഷിക്കില്ലെന്ന് ഉറപ്പിച്ചു പറയാൻ ആവില്ല മീനു. അന്ന് അവരുടെ വാക്കുകളിൽ നിന്നും വ്യക്തമായതാണ് അവരുടെ വാക്കുകൾ മാത്രം ഉൾകൊള്ളുന്നവൻ ആണ് ഹരി. ഹരി എല്ലാവരെയും എതിർത്തു എന്നെ വിവാഹം ചെയ്തു എന്നിരിക്കട്ടെ. ഒരു നാൾ ആ അമ്മയുടെ വാക്കുകൾ കേട്ടു എന്നെ ഉപേക്ഷിച്ചാലോ? പിന്നെ ഇപ്പൊ ഈ അവസ്ഥ കൂടി ആകുമ്പോൾ പറയണ്ടല്ലോ " "അനു.. നീ.." "അതേ മീനു. ഹരിക്ക് ഒരിക്കലും ഞാൻ പെർഫെക്ട് അല്ല. പണം ആണ് മനുഷ്യന് വലുത്. അത് ഞാൻ മറന്നു പോയിരുന്നു. എന്തായാലും ഞാൻ വിവാഹം ചെയ്താൽ ഹരിയും വിവാഹത്തിനു സമ്മതിക്കും എന്നല്ലേ പറഞ്ഞത്. ഇനി വിളിക്കുമ്പോൾ ഹരിയോട് പറഞ്ഞേക്ക് അനുവിന്റെ കല്യാണം കഴിഞ്ഞു എന്ന്.ഇനി അനുവിനെ ഓർക്കരുതെന്നും പറയണം. ഹരി ഈ അനുവിനെ മറന്നു എന്നാണ് ഞാൻ കരുതിയത്. പിരിഞ്ഞിട്ട് ഇപ്പൊ വർഷം രണ്ട് കഴിഞ്ഞില്ലേ.?" അത് പറഞ്ഞു തീരുമ്പോഴേക്കും അനുവിന്റെ കണ്ണുകൾ നിറഞ്ഞിരുന്നു. ശരിയാണ് താൻ ചെയ്തത് തെറ്റാണ്.. പ്രാണനെ പോലെ സ്നേഹിക്കുന്നവനെ ഉപേക്ഷിക്കാൻ പാടില്ലായിരുന്നു. എന്നാൽ ഹരിയുടെ അമ്മയുടെ വാക്കുകൾ ഒരിക്കലും ക്ഷമിക്കാൻ കഴിയില്ല. നാളെ അമ്മയെ സ്നേഹിക്കുന്ന ഹരിയും തന്നെ അകറ്റി നിർത്തിയാൽ.... അർഹിക്കാത്തത് തനിക്ക് വേണ്ടെന്ന നിലപാട് ആയിരുന്നു അനുവിന്. "ഞാൻ പറയാം അനു. ആട്ടെ നിന്റെ വിവാഹം? " "അത്.. അതൊക്കെ നടക്കും മീനു. എന്നേക്കാൾ ആ കാര്യത്തിൽ വാശി കാട്ടുന്നത് അഭിയും അമ്മയും ആണ്. അപ്പൊ അത് നടക്കാതിരിക്കില്ലല്ലോ." "ശരി എന്നാ. ഹരിയോട് ഞാൻ പറഞ്ഞോളാം." മീനു കാൾ കട്ട്‌ ചെയ്തതും അനു നെടുവീർപ്പോടെ ഒന്ന് ഉയർന്നു ഇരുന്നു. ✨️✨️✨️✨️✨️✨️✨️✨️✨️✨️✨️✨️✨️✨️✨️✨️✨️ "അനു... ദാ അവരെത്തി കേട്ടോ. നീ വരുന്നുണ്ടോ ഒന്ന്." വീണ്ടും മറ്റൊരു ആലോചന വന്നതും അഭിയും ദേവകിയും കൂടി അനുവിനെ നിർബന്ധിച്ചു കൊണ്ടിരുന്നു. ഒടുവിൽ ഒന്ന് സമ്മതം മൂളിയതും എല്ലാം വേഗം നടത്താൻ ആയിരുന്നു അശോകന്റെ നിർദേശം. അഭി വീണ്ടും ഒരുക്കി നിർത്തിയതും മടുത്തു പോയിരുന്നു അനു. വിവാഹം എന്നത് പോലും കേൾക്കുമ്പോൾ വെറുപ്പാണ് അവൾക്ക്. എങ്കിലും അമ്മയുടെയും അഭിയുടെയും സന്തോഷം കാണുമ്പോൾ അവൾക്ക് അത് എതിർക്കാനും കഴിയാതെ ആകുന്നു. അഭി അനുവിനെ കൂട്ടി വന്നപ്പോഴേക്കും ബന്ധുമിത്രാതികൾ എന്ന പേരിൽ യാതൊരു ആളും അനക്കവും അവിടെ ഇല്ലായിരുന്നു. ഒരു ചെറുപ്പക്കാരനും ഒപ്പം ബ്രോക്കർ ശേഖരനും മാത്രം ആണ് അവിടെ ഉണ്ടായിരുന്നത്. അത് കൊണ്ട് തന്നെ ആരുടെയും സഹതാപത്തിന്റെയോ പരിഹാസത്തിന്റെയോ മുഖങ്ങൾ കാണേണ്ടി വന്നില്ലെന്ന ആശ്വാസം ഉണ്ടായിരുന്നു. "മോളെ ഇതാണ് പയ്യൻ. ദേവൻ അതാണ് പേര്. ഏകമകൻ ആണ്." ശേഖരൻ അനുവിനോടായി പറഞ്ഞതും അവൾക്ക് ആദ്യം തന്നെ ആ ബന്ധം വേണ്ടെന്നു പറയുവാൻ മനസ്സ് വെമ്പൽ കൊണ്ടു. ഹരിയുടെ കാര്യം ഓർക്കുമ്പോൾ തന്നെ ഇപ്പൊ ഏകമകൻ ഉള്ള വീട്ടിൽ നിന്നും ആലോചന വരുമ്പോൾ ഭയമാണ്. "പിന്നെ അശോകേട്ടാ. മഠത്തിൽ തറവാട്ടുകാരെ പറ്റി കേട്ടിട്ടുണ്ടാകുമല്ലോ. ദേവന്റെ അച്ഛനും അമ്മയും നാട്ടിൽ തന്നെ ഉണ്ട്. മോൻ പക്ഷെ ഉടനെ അമേരിക്കയിലേക്ക് പോകുകയാണ്. അവിടെ ആണ് മോന്റെ ബന്ധുക്കൾ എല്ലാം. അപ്പൊ പറഞ്ഞു വന്നത് നാട്ടിൽ വെച്ചു ചെറിയ ഒരു ചടങ്ങ് പോലെ നടത്തിയാൽ മതി എന്നാണ് ഇവരുടെ അഭിപ്രായം. ബന്ധുക്കളെ എല്ലാം ക്ഷണിച്ചു അവിടെ ഒരു പാർട്ടി നടത്താൻ ആണ് ഇവർക്ക് താല്പര്യം. കാരണം നാട്ടിൽ പറയത്തക്ക ബന്ധുക്കൾ ഒന്നുമില്ല." ശേഖരൻ പറഞ്ഞു മുഴുവിപ്പിച്ചതും അനുവിന്റെ കണ്ണുകൾ ദേവകിയിലേക്കും അഭിയിലേക്കും നീണ്ടു. അവരുടെ മുഖത്തെ സന്തോഷം കണ്ടതും അനുവിന് നിരാശ തോന്നി. ഒരിക്കലും ഇങ്ങനെ ഒരു ബന്ധം ആഗ്രഹിക്കുന്നില്ല. കാരണം തന്റെ അവസ്ഥ. തനിക്ക് ഒരിക്കലും ചിന്തിക്കാൻ കഴിയാത്ത ഒരു ബന്ധം ആണ് വന്നു ചേർന്നിരിക്കുന്നത്. അത് ഒരിക്കലും ശാശ്വതമാകില്ലെന്നു അനുവിന് തോന്നി. "ശേഖരാ.. അല്ല മോന്റെ അച്ഛനും അമ്മയും.."? അവനൊപ്പം അവരെ കാണാത്തത് കൊണ്ട് തന്നെ അശോകൻ ചോദിച്ചു പോയിരുന്നു. "അച്ഛനും അമ്മയും നാട്ടിൽ തന്നെ ആണ് അമ്മാവാ.പക്ഷെ അവർക്ക് എന്റെ ഇഷ്ടം ആണ് വലുത്. അത് കൊണ്ട് തന്നെ ആണ് ഞാൻ ഇങ്ങനെ ഒരു ആലോചന വന്നപ്പോൾ മറ്റൊന്നും ചിന്തിക്കാതെ പുറപ്പെട്ടത്. എനിക്ക് ഇഷ്ടായാൽ വൈകാതെ തന്നെ അവർ അനുഗ്രഹയെ കാണാൻ എത്തും." ദേവൻ അനുവിനെ ഒന്ന് പാളി നോക്കി അശോകനായി പറഞ്ഞതും അനു മുഖം കുനിച്ചു ഇരുന്നു. "അല്ല ശേഖരൻ എല്ലാം പറഞ്ഞിട്ടുണ്ടാകുമല്ലോ. അത് കൊണ്ട് പറയ്യാ. മോന് ഇഷ്ടം ഉണ്ടെങ്കിൽ മാത്രം ഒരു അഭിപ്രായം പറയാവൂ. പയ്യന് ഇഷ്ടം ആയി വീട്ടിൽ എത്തുമ്പോൾ ബന്ധുക്കൾക്ക് ഇഷ്ടാവില്ല.അങ്ങനെ ആണ് അധികവും ആലോചന മുടങ്ങിയത്. കാരണം ഞങ്ങളുടെ കുട്ടിയുടെ കുറവ് അറിയാലോ.?" ദേവകി കണ്ണുകൾ ഒപ്പി കൊണ്ട് ദേവനോടായി പറഞ്ഞതും അവൻ ഒന്ന് ചിരിച്ചു കൊണ്ട് ഇരിപ്പിടത്തിൽ നിന്നും എണീറ്റു. "അമ്മ വിഷമിക്കരുത്. ഞാൻ ആദ്യമേ പറഞ്ഞല്ലോ എന്റെ ഇഷ്ടം ആണ് എന്റെ കുടുംബത്തിന്റെയും ഇഷ്ടം. അത് കൊണ്ട് ബന്ധുക്കളുടെ അഭിപ്രായം ഒന്നും ഞാൻ ചെവികൊള്ളില്ല. കുറവുകളോ കഴിവുകളോ പണമോ ഒന്നും ഞാൻ നോക്കുന്നില്ല. എനിക്ക് വേണ്ടത് എന്നെ സ്നേഹിക്കാൻ മാത്രം അറിയാവുന്ന ഒരു കുട്ടിയെ ആണ്. അത് ഒരിക്കലും സഹതാപം കൊണ്ട് അല്ല. നാളെ എന്റെ പെണ്ണായി കഴിഞ്ഞു ഇങ്ങനെ ഒന്ന് സംഭവിച്ചാലും ഞാൻ തന്നെ അവളെ നോക്കണ്ടേ. അന്ന് അവളെ ഉപേക്ഷിച്ചു മറ്റൊരു വിവാഹത്തിന് കഴിയോ? " "വൗ... അടിപൊളി ഡയലോഗ് " ദേവന്റെ അഭിപ്രായം കേട്ടു അഭി ചിരിച്ചു കൊണ്ട് കയ്യടിച്ചു. ദേവകിയുടെ കണ്ണുകൾ അഭിയിലേക്ക് നോട്ടമിട്ടതും അവൾ ചമ്മി കൊണ്ട് പിന്നിലേക്ക് നീങ്ങി. "അഭിനയ ആൾ കൊള്ളാലോ. അല്ല ഞാൻ പറഞ്ഞു വന്നത് എന്തെന്നാൽ എനിക്ക് അനുഗ്രഹയെ ഇഷ്ടായി. ഇനി നിങ്ങളുടെ അഭിപ്രായം എന്താണെന്ന് അറിയിച്ചാൽ അച്ഛനെയും അമ്മയെയും കൂട്ടി ഞാൻ വരാം." ദേവൻ പറഞ്ഞു തീർന്നതും ദേവകി അനുവിനെ നോക്കി ദേവന്റെ കൈകൾ തന്റെ കൈകളിൽ കൂട്ടി പിടിച്ചു. "എന്താ പറയ്യാ. ഞങ്ങൾക്ക് എതിർപ്പ് ഒന്നുമില്ല മോനെ.. ഞങ്ങളുടെ കുട്ടിയെ ഇഷ്ടമാണെന്ന് പറഞ്ഞപ്പോൾ തന്നെ എനിക്ക് ഒരുപാട് സന്തോഷം ആയി. മോനെ പോലൊരു പയ്യനെ ആർക്കാ ഇഷ്ടമാവാത്തത്. പക്ഷെ ഞങ്ങളുടെ അവസ്ഥ വെച്ചു ഒരിക്കലും ഈ ബന്ധം ചേർന്നതല്ല. പക്ഷെ പണമോ പൊന്നോ നോക്കാതെ ഉള്ള മോന്റെ നല്ല മനസിന് എത്ര നന്ദി പറഞ്ഞാലും മതിയാവില്ല. എന്റെ കുട്ടിക്ക് സ്വപ്നം കാണാൻ കഴിയാത്ത ബന്ധം ആണ് ഇത്.ഞങ്ങൾക്ക് എതിർപ്പ് ഒന്നുമില്ല. അച്ഛനെയും അമ്മയെയും കൂട്ടി വന്നോളൂ. " ദേവകിയുടെ മറുപടി കേട്ടു അനു സങ്കടത്തോടെ ദേവനെ നോക്കി. തനിക്ക് എതിർപ്പ് പ്രകടിപ്പിക്കണമെന്നുണ്ട് എന്നാൽ അമ്മയുടെ മുഖം കാണുമ്പോൾ അതിന് കഴിയാതെ ആകുന്നു. ദേവനുമായി സംസാരിക്കുമ്പോൾ അത് തുറന്നു പറയുവാൻ ആയിരുന്നു തീരുമാനം എങ്കിലും ഒന്നും സംസാരിക്കാതെ അത്രെയും പറഞ്ഞു കൊണ്ട് അവരോട് യാത്ര പറഞ്ഞു ദേവൻ പുറത്തേക്ക് ഇറങ്ങിയിരുന്നു. ഒപ്പം ശേഖരനും. വാതിലിന്റെ മറവിൽ അഭിയുടെ അരികിലായി ഇരുന്ന അനുവിനെ നോക്കി കണ്ണ് ചിമ്മിയ ശേഷം ആണ് ദേവൻ കാറിൽ കയറിയത്. ദേവനെ കണ്ടത് മുതൽ അനുവിന്റെ ഓർമയിൽ തെളിഞ്ഞു നിന്നത് താൻ കണ്ടിട്ട് കൂടി ഇല്ലാത്ത ദേവിന്റെ മുഖം ആയിരുന്നു. ഒരുനാൾ തന്റെ എല്ലാമെല്ലാമായിരുന്ന ദേവ്. (തുടരും ).. കണ്ണൂർകാരൻ #📙 നോവൽ #📔 കഥ #💞 പ്രണയകഥകൾ #✍ തുടർക്കഥ #📚 ട്വിസ്റ്റ് കഥകൾ