6️⃣3️⃣
*_శ్రీ మహావిష్ణు పురాణం_*
*_(అరవై మూడవ భాగం)_*
*_చంద్ర వంశము - జమదగ్ని మహర్షి కథ._*
*పురూరవునికి ఊర్వశి వలన ఆయువు, ధీమంతుడు, అమా వశుడు, విశ్వవసుడు, శ్రతా యువు, శ్రుతాయువు అనే ఆరుగురు కుమారులు జన్మించారు*. *అమావశుని మనవడు సుహోత్రునికి జాహ్నవు అనే కుమారుడు జన్మించి రాజర్షియై గొప్ప యాగం చేయసాగాడు.*
*అదే సమయంలో భగీరథుని ద్వారా భూమికి వస్తున్న ఆకాశగంగ వేగంగా ప్రవహిస్తూ వచ్చి జాహ్నవు చేసే యాగ ప్రదేశాన్ని నీటిలో ముంచివేసి యాగాన్ని ఆపివేసింది.*
*జాహ్నవు మహర్షికి కోపం వచ్చి గంగ జలాలను తన కమండలం లోకి తీసుకుని పూర్తిగా త్రాగినేసాడు. గంగా ప్రవాహం భూలోకంలో ఆగిపోయింది*.
*భగీరథుడు, దేవతలు వచ్చి జాహ్నవు మహర్షిని లోకకల్యాణం కోసం గంగాదేవిని వదిలివేయమని ప్రార్థించారు*.
*జాహ్నవు మహర్షి శాంతించి తన ఉదరంలో ఉన్న గంగను బయటకు వదిలాడు.*
*గంగాదేవి జాహ్నవు మహర్షికి పుత్రికా సమానురాలైనాటినుంచి "జాహ్నవి" అనే పేరు పొందింది*.
*జాహ్నవు మహర్షి మునిమనవడు కుశాశ్వుడు. ఇతడు ఇంద్రుడి వంటి కుమారుడు కావాలని తపస్సు చేశాడు. ఇంద్రుడు తనలాంటి వాడు పుడితే తనకు ప్రమాదమని ప్రత్యక్షమై కుశాశ్వునికి తనతో సమానుడైన కుమారుడు జన్మిస్తాడని వరము ఇచ్చాడు. వరము తీర్చడానికి ఇంద్రుడు కుశాశ్వుడికి కుమారుడు గాధి రాజుగా జన్మించాడు.*
*గాధిరాజుకి పుత్ర సంతానం కలుగ లేదు. సౌందర్యవతి అయిన సత్యవతి కుమార్తెగా జన్మించింది. ఋచీక మహర్షి పెళ్ళి చేసుకోవాలని కోరిక కలిగి గాధిరాజు వద్దకు వెళ్లి సత్యవతిని ఇచ్చి పెళ్లి చేయమని అడిగాడు*.
*వయస్సులో పెద్ద, తపస్వి ఐన ఋచీకునికి కూతురుని ఇచ్చి వివాహం చేయడం ఇష్టం లేదు*.
*కుమార్తెను ఇవ్వనంటే మహర్షి ఆగ్రహించిశపిస్తాడేమో అని భయపడి గాధిరాజు “కన్యాశుల్కంగా వేయి నల్ల చెవులు గల తెల్లని అశ్వాలు తెచ్చి ఇస్తే కూతురుని ఇచ్చి వివాహం చేస్తాను” అని నిబంధన పెట్టాడు*.
*సరేనన్న ఋషీకుడు వరుణదేవుని ప్రార్ధించి అశ్వతీర్థంలో జన్మించి ఉన్న వేయి నల్ల చెవులు గల తెల్లని ఆశ్వాలు తెచ్చి గాధిరాజుకి ఇచ్చి సత్యవతిని వివాహం చేసుకున్నాడు*.
*సత్యవతి చేసిన పతి సేవలకు మెచ్చుకుని ఋచీకుడు వరం కోరుకోమన్నాడు. సత్యవతి తనకు తేజోవంతుడైన కుమారుని ప్రసాదించమని కోరింది. అదే సమయానికి అక్కడకు వచ్చిన గాధిరాజు భార్య, సత్యవతి తల్లి తనకు కూడా పుత్ర సంతానం కలిగేలా ఋచీకుని అడగమని సత్యవతికి చెప్పింది*.
*సత్యవతి భర్తతో తనతో పాటు తన తల్లికి కూడా పుత్ర సంతానం కలిగేలా చేయమని కోరింది*.
*భార్య కోరికను మన్నించి రెండు మంత్రించిన పాయసాలు తయారు చేసాడు. సత్యవతికి తేజోవంతుడైన పుత్రుడు కలగటానికి ఒకటి, అత్తగారికిబల పరాక్రమాలు కలిగిన పుత్రుడు కలగటానికి మరోకటి అని వేరే వేరే పెట్టి సంధ్యావందనము చేసుకోవడానికి నదీతీరానికి వెళ్లాడు*.
*సత్యవతి తన తల్లికి రెండు మంత్ర పాయసాలు చూపించి ఋచీకుడు వచ్చాక ఇస్తారని, వాటి వలన తాము కోరుకున్నట్టుగా పుత్రులు జన్మిస్తారు అని చెప్పింది.*
*పుత్రుడు కలగాలి అనే ఆత్రుత ఉన్న సత్యవతి తల్లి అల్లుడు వచ్చేదాకా ఆగకుండా వెంటనే ఒక పాయస పాత్ర తీసుకుని పాయసం తినేసింది*.
*తల్లి ఒక్కతే అలా తింటే భర్త ఆగ్రహిస్తాడేమో అనుకుని సత్యవతి రెండవ పాత్రలోని పాయసం తినివేసింది. గందరగోళంలో తల్లి తినవలసిన పాయసం కూతురు, కూతురు తినవలసిన పాయసం తల్లి తినేశారు*.
*నది నుండి తిరిగి వచ్చిన ఋచీకుడు జరిగింది తెలుసుకుని ఆగ్రహించాడు. భార్య సత్యవతితో “మీరు మరో ఘోరమైన తప్పు చేశారు. నీవు స్వీకరించవలసింది మీ అమ్మగారు, మీ అమ్మగారు స్వీకరించవలసింది నీవు తీసు కున్నారు. ఫలితంగా నీకు బ్రాహ్మణుడైనా క్షత్రియుడిలా యుద్ధాలు చేసి చంపేవాడు, నీ తల్లికి క్షత్రి యుడైనా బ్రహ్మజ్ఞానం కలిగిన బ్రహ్మర్షి జన్మిస్తారు" అని కోపంగా చెప్పాడు.*
*సత్యవతి భర్త పాదాలపై పడి నావలన మీకు క్రూర స్వభావుడైన కుమారుడు కలుగకూడదు*.
*మీ తపఃశక్తితో క్రూరక్షత్రియ స్వభావాన్ని కుమారుని నుంచి మనవడికి మారేలా చేయండి" అని ప్రార్ధించింది*.
*ఋచీక మహర్షి శాంతించి భార్య కోరినట్టు కుమారుడు కాకుండా మనవడు క్షత్రియ స్వభావుడిగా పుడతాడు అని అనుగ్రహించాడు*.
*కొంతకాలానికి సత్యవతి, ఆమె తల్లి ప్రసవించి కుమారులను కన్నారు. గాధిరాజుకి విశ్వామిత్రుడు కౌశికుడు అనే నామధేయంతో జన్మించాడు. సత్యవతి, ఋచీకులకు జమదగ్ని జన్మించాడు. జమదగ్ని వేదాధ్యయనం చేసి సర్వవిద్యాపారంగతుడు అయ్యాడు. అమోఘమైన తపస్సు చేసి జమదగ్ని మహర్షి అయ్యాడు*.
*తపస్సు పూర్తి అయిన తర్వాత గృహస్థాశ్రమం స్వీకరించ దలచాడు. ప్రసన్నజిత్తుడు అనేమహా రాజు వద్దకు వెళ్లి ఆయనకుమార్తె రేణుక నిచ్చి వివాహం చేయమని కోరాడు. జమదగ్ని మహర్షి గొప్పతనం గురించి విన్న ప్రసన్నజిత్తుడు కుమార్తె అంగీకారంతో రేణుకను ఇచ్చి వివాహం చేశాడు*.
*రేణుక జమదగ్ని మహర్షి వెంట ఆశ్రమానికి వెళ్లింది. పతినే ప్రత్యక్ష దైవంగా భావించి సేవలు చేసింది. వారికి ఐదుగురు కుమారులు జన్మించారు. ఐదవకుమారుడిగా నారాయణుడు ఋచీక మహర్షికి ఇచ్చిన వరంకారణంగా కుమారుడిగా జన్మించాడు. అతడే మహావిష్ణు అవతారమైన పరశురాముడు* #మన సంప్రదాయాలు సమాచారం