ଦେବଦୂତ ସାଜିଲା ଓଡ୍ରାଫ୍ ଟିମ୍ । ବନ୍ୟା ଘେରରେ ଫସିଥିବା ରୋଗୀଙ୍କୁ ରାତିଅଧରେ ଉଦ୍ଧାର କରି ଡାକ୍ତରଖାନାରେ ପହଞ୍ଚାଇଲା ଓଡ୍ରାଫର ଉଦ୍ଧାରକାରୀ ଦଳ । ଲଗାଣ ବର୍ଷା ଓ ମହାନଦୀରେ ବନ୍ୟା ଆସିବା ଫଳରେ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ୍‌ର ୧୦ରୁ ଅଧିକ ଗାଁ ଏବେ ଜଳବନ୍ଦୀ ଅବସ୍ଥାରେ । ରାସ୍ତାଘାଟ ସବୁଠି ମାଡ଼ି ଯାଇଛି ବନ୍ୟାପାଣି । ଫଳରେ ସାଧାରଣ ଜୀବନଯାତ୍ରା ପ୍ରଭାବିତ ହୋଇଛି । ଗତକାଲି ରାତିରେ ପାଣିଘରା ଗାଁର ନବାତୀ ବେହେରା ଅସୁସ୍ଥ ହୋଇପଡ଼ିଥିଲେ। କିନ୍ତୁ ବନ୍ୟା ପାଇଁ ଯାତାୟାତର ସୁବିଧା ନଥିବାରୁ ତାଙ୍କୁ ଡାକ୍ତରଖାନା ନେବା ପରିବାର ପକ୍ଷରେ ସମ୍ଭବ ହୋଇପାରି ନଥିଲା । ପରେ ଗ୍ରାମବାସୀ ଓଡ୍ରାଫ୍ ଟିମ୍‌କୁ ସୂଚନା ଦେଇଥିଲେ ।ଖବର ପାଇ ତୁରନ୍ତ ରାତିଅଧରେ ମହାନଦୀର ବନ୍ୟା ସୁଅରେ ପ୍ରାୟ ୨ କିଲୋମିଟର ବାଟ କାଟି ଘଟଣାସ୍ଥଳରେ ପହଞ୍ଚିଥିଲା ବୌଦ୍ଧ ଓଡ୍ରାଫ୍ ଟିମ୍ । ସେଠାରୁ ରୋଗୀଙ୍କୁ ଉଦ୍ଧାର କରିବା ସହ ମହାନଦୀର ଅପର ପାର୍ଶ୍ୱରେ ଥିବା ଆଠମଲ୍ଲିକ ଉପଖଣ୍ଡ ଚିକିତ୍ସାଳୟରେ ପହଞ୍ଚାଇଥିଲେ । ରାତିଅଧରେ ଏପରି ଅତି ବିପଦପୂର୍ଣ୍ଣ ପରିସ୍ଥିତିରେ ଜଣେ ରୋଗୀଙ୍କୁ ଉଦ୍ଧାର କରି ବନ୍ୟାପ୍ଲାବିତ ମହାନଦୀ ପାର କରାଇ ହସ୍ପିଟାଲ ନେବା, ଓଡ୍ରାଫ୍ ଟିମ୍‌ର ଏହି ସାହସିକ କାର୍ୟ୍ୟକୁ ଏବେ ସାରା ଅଞ୍ଚଳରେ ଉଚ୍ଚ ପ୍ରଶଂସା କରାଯାଉଛି । ଆଉ ଟିମ୍‌କୁ ଦିଆଯାଉଛି ଅଜସ୍ର ଧନ୍ୟବାଦ । #🚨ଆସାମ ବନ୍ୟା ଅପଡେଟ : ଯୁଆଡେ ଦେଖିଲେ ଶବ🌊