മുംബൈയെ ചുവപ്പിച്ച്‌ ആസാദ്‌ മൈതാനിയിൽ ആയിരക്കണക്കിന്‌ സ്‌കീം തൊഴിലാളികളുടെ വൻപ്രക്ഷോഭം. തൊഴിലാളികളെ സ്ഥിരപ്പെടുത്തുക, വേതനം വർധിപ്പിക്കുക, കുടിശ്ശിക ഉടൻ വിതരണം ചെയ്യുക, സാമൂഹ്യ സുരക്ഷാ ആനുകൂല്യങ്ങൾ ഉറപ്പാക്കുക തുടങ്ങിയ ആവശ്യങ്ങൾ ഉന്നയിച്ച്‌ സിഐടിയു നേതൃത്വത്തിലാണ്‌ പ്രേക്ഷോഭം. ആശ പ്രവർത്തകർ, അങ്കണവാടി ജീവനക്കാർ, സ്‌കൂൾ പാചക തൊഴിലാളികൾ, എൻഎച്ച്‌എം ജീവനക്കാർ തുടങ്ങിയവർ അണിനിരക്കുന്ന മൂന്നുദിന ധർണ ‘ആക്രോശ്‌’ ബുധനാഴ്‌ച സമാപിക്കും. അങ്കണവാടി ജീവനക്കാർ, ആശമാർ, ഗ്രൂപ്പ് ഫെസിലിറ്റേറ്റർമാർ, സ്‌കൂൾ പോഷകാഹാര പദ്ധതി തൊഴിലാളികൾ, എൻഎച്ച്എം ജീവനക്കാർ, മറ്റ് സ്‌കീം തൊഴിലാളികൾ എന്നിവരെ സ്ഥിരപ്പെടുത്തുക, പിഎഫ്‌, ഗ്രാറ്റുവിറ്റി, പെൻഷൻ തുടങ്ങിയവ ഉറപ്പാക്കുക, തൊഴിലാളി വിരുദ്ധ ലേബർ കോഡുകൾ റദ്ദാക്കുക, ഓണറേറിയം, യാത്രാ അലവൻസ് എന്നിവ കുടിശ്ശികയില്ലാതെ നൽകുക എന്നിവയാണ്‌ പ്രധാന ആവശ്യങ്ങൾ. സിഐടിയു ദേശീയ സെക്രട്ടറി ഉഷാ റാണി, പ്രൊഫ. സുചിത കൃഷ്‌ണപ്രസാദ്, സിഐടിയു മഹാരാഷ്‌ട്ര സംസ്ഥാന പ്രസിഡന്റ് ഡോ. ഡി എൽ കരാഡ്‍, ജനറൽ സെക്രട്ടറി എം എച്ച് ഷെയ്ഖ്, അങ്കണവാടി എംപ്ലോയീസ് യൂണിയൻ, മഹാരാഷ്‌ട്ര ആശാ ഫെഡറേഷൻ, സ്‌കൂൾ ന്യൂട്രീഷൻ വർക്കേഴ്സ് യൂണിയൻ നേതാക്കൾ തുടങ്ങിയവർ സംസാരിച്ചു. വീട്ടു ജോലിക്കാർ, നിർമാണത്തൊഴിലാളികൾ, ബീഡി തൊഴിലാളികൾ, മറ്റ് അസംഘടിത മേഖലയിലെ തൊഴിലാളികൾ തുടങ്ങിയവരും ‘ആക്രോശി’ൽ അണിനിരന്നു. #🔴 എൽഡിഎഫ് #🗳️ രാഷ്ട്രീയം #💪🏻 സിപിഐഎം #💪 സഖാവ് പിണറായി #🟥 സിപിഐ