🙏🏼ஓம் நமசிவாய, திருஞானசம்பந்தர் Image & Post

ரவிசங்கர் ராஜா, ஆரணி - Author on ShareChat: Funny, Romantic, Videos, Shayari, Quotes

திருஞான சம்பந்தர் - பகுதி 2 சீர்காழி தோணியப்பர் ஆலய பிரம்ம தீர்த்த கரையில், தனது தந்தை குளிக்க நீரில் மூழ்கி மந்திரங்களை சொன்ன போது, பயத்தில் அழுத குழந்தைக்கு ஸ்ரீ சிவபெருமான் தாயாரிடம் பால் தரச் சொல்ல, உமையம்மை பொன் கிண்ணத்தில் அளித்த ஞானப்பாலை உண்ட பிறகு, சம்பந்தனின் தந்தையார், தினம் தனது மகனுடன் கோயிலுக்குச் சென்று தோணியப்பரை வணங்கினார். இறைவனால் ஆட்கொள்ளப்பட்டமையால் 'ஆளுடைய பிள்ளையார்' என்றும் சிவஞான சம்பந்தம் பெற்றமையால் 'திருஞானசம்பந்தர்' என்றும் பெயர் பெற்றார். சில நாட்கள் கழித்து, திருஞான சம்பந்தர் இறைவன் மீது தலந்தோறும் சென்று பதிகங்களைப் பாடிட தன் தந்தை தோள் மேல் ஏறி புறப்பட்டார். திருக்கோலக்கா எனும் தலம் வந்தார். கையால் தாளமிட்டபடி பாடினார். கை வலிக்க தாளமிடும் குழந்தை திருஞான சம்பந்தனை கண்ட திருக்கோலக்கா இறைவன் சம்பந்தருக்குப் பொற்றாளம் கொடுத்தார். பொற்றாளம் என்பது பொன்னால் ஆன தாளமிடும் கருவி. அந்த தாளத்திற்கு உமையம்மை ஓசைக் கொடுத்தார். இதனால் திருக்கோலக்கா இறைவன் திருத்தாளமுடையார் என்றும், அம்மை ஓசைக்கொடுத்த நாயகி என்றும் அழைக்கப்படுகின்றனர். திருஞான சம்பந்தரின் புகழ் சோழ தேசம் எங்கும் பரவியது. தங்களது ஊருக்கு தலத்திற்கு வந்து இறைவனை தொழ மக்கள் வேண்டினர். சம்பந்தரின் தாயாரின் ஊரான திருநனிப்பள்ளியில் எழுந்தருளியிருக்கும் இறைவனைப் புகழ்ந்து பதிகம் பாடி அருளியவுடன் தமது தந்தையின் தோள் மீது அமர்ந்து தலயாத்திரையைத் தொடர்ந்தார். அவ்வாறு சென்று, திருக்கருகாவூர் உள்ளிட்ட ஏழு சிவாலயங்களைத் தொழுது பதிகம் பாடிய குழந்தை திரும்ப சீர்காழியை வந்து சேர்ந்தது. சிதம்பரத்தை அடுத்துள்ள திருவெருக்கத்தம்புலியூரில் வாழ்ந்து வந்த திருநீலகண்டப் பெரும்பாணரும் எனும் திருநீலகண்ட யாழ்ப்பாணர் அவருடைய மனைவி மதங்க சூளாமணியும் சீர்காழிக்கு வந்து திருஞானசம்பந்தரை வணங்கிப் பாடினர். அதனைக் கேட்டு மகிழ்ந்த திருஞான சம்பந்தர், தாம் பாடும் பதிகங்களை யாழில் இசைக்குமாறு பாணர்க்கு அருள்செய்தார். தாம் எங்கு சென்றாலும் பாணரையும் நிழல் போலக் கூட அழைத்துச் சென்று தமது பாடல்களுக்கு இன்னிசை அமைக்கச் செய்தார். சிதம்பரம் ஸ்ரீ நடராஜ பெருமானை தரிசிக்கும் ஆவலுடன், பெருந்திரளாக அடியார்கள் தொடர, தமது இரண்டாம் தலயாத்திரையை மேற்கொண்டார். அப்போது திருநீலகண்டரின் விண்ணப்பத்தின் படி, பாணரின் சிற்றூரான திரு எருக்கத்தம்புலியூர் எனும் திருத்தருமபுரத்தைப் திருஞான சம்பந்தர் அடைந்த பொழுது, பாணரின் சுற்றத்தார் அவர்களை எதிர்கொண்டு வணங்கினர். அப்பொழுது பாணர், திருஞான சம்பந்தரின் திருப்பதிகங்களை யாழிலிட்டு வாசிக்கும் பேறு தமக்குக் கிடைத்ததெனபெருமை பொங்க கூறினார். அதைக்கேட்ட பாணரின் உறவினர்கள், பாணர், திருப்பதிகங்களை யாழில் இட்டு வாசிப்பதனால் அவற்றின் சிறப்பு உலகில் விளங்குகின்றது என்றனர். உடனே பாணர் மனம் நடுங்கினார், சொந்தங்கள் இப்படி சொல்லிவிட்டார்களே என மனம் நொந்தவராக திருஞான சம்பந்தரிடம், தங்களது இந்த திருப்பதிக இசை அளவிட முடியாத தன்மை உடையது என்பதனை எல்லோரும் அறிய ஒரு திருப்பதிகம் இந்த ஊரில் உள்ள சிவபெருமானை பாட வேண்டும் என்று வேண்டினார். திருஞான. சம்பந்தர் மாதர் மடப் பிடியும்.... என்னும் பதிகத்தைப் பாடினார். பாணரால் அதனை யாழில் இட்டு வாசிக்க இயலவில்லை பாணர், திருஞானசம்பந்தரை வணங்கி தங்களின் திருப்பாடல்களை யாழிலே ஏற்பேன் என்று கூறப்பண்ணியது இந்த யாழே என்று கூறி அதனை உடைக்க முற்பட்டார். திருஞான சம்பந்தர் அவரைத் தடுத்து, இதனை உடைப்பதேன்?இறைவனின் அருள் திறன் எல்லாம் இக்கருவியில் அமையுமோ? இயன்ற அளவு வாசித்தாலே போதும் என்று கூறினார். இப்பதிகப் பண் யாழ்முரி என வழங்குகிறது பொற்றாளம் பெறும் போது பாடிய பதிகம் மடையில் வாளை பாய மாதரார் குடையும் பொய்கைக் கோலக் காவுளான் சடையும் பிறையுஞ் சாம்பற் பூச்சுங்கீள் உடையுங் கொண்ட வுருவ மென்கொலோ. தொடருவோம்... ஞானக்குழந்தையை.... 🚩🕉🪷🙏🏼 #🙏🏼ஓம் நமசிவாய #திருஞானசம்பந்தர் #🙏ஆன்மீக குருக்கள்🧘🏿‍♂️ #🙏ஆன்மீகம் #🙏🌹பாரதபூமி🌹🙏🌹சித்தர்கள் பூமி🌹🙏புண்ணியபூமி🌹🙏