नागपुरात क्रिकेट सट्टा लावतोय, तरूणाईला बट्टा उपराजधानीला 'सट्टा बुकीचा' विळखा सावधान...!!! नागपूर बनतेय 'गुन्हेगारी हब' राहुल पाटील, हिंगणा नागपूर नागपूर: (दि १२एप्रिल): राज्याची उपराजधानी असलेल्या नागपुरात क्रिकेट सट्टा सध्या जोमात सुरू असून, आय पी एल क्रिकेट लिग 'सट्टा महोत्सव' म्हणून तरूणाईत 'फेमस' शब्द झाल्याचे दिसून येत आहे. महिन्याभरापासून सुरू झालेल्या 'आय पी एल' टी २० क्रिकेट सामन्यावर सट्टा लावणा-यांच्या संख्येत कमालीची वाढ झाल्याचे चित्र आहे. दरम्यान, नागपूर हे देशाचे मध्यवर्ती शहर असल्याने अनेक नामवंत 'बुकी' इथूनच आपला हा महोत्सव प्रारंभ करीत आहे. पूर्वीपेक्षा बुकींच्या संख्येतही लक्षणीय वाढ झाली असून, यात तरुणाई अधिकाधिक गुंतत चालली आहे. नागपूरला 'गुन्हेगारी हब' बनायला क्रिकेट सट्टा एजंटही नेमल्याचे अधून मधून निदर्शनात येत आहे. 'सट्टा एजंट' हे महाविद्यालयीन तरूण व तरूणी यांना 'टारगेट' करीत असून, इतर शहरातून नागपुरात उच्च शिक्षणासाठी आलेले महाविद्यालयीन विद्यार्थी त्वरीत पैसा कमविण्याच्या नादात या एजंटच्या जाळ्यात सहजपणे अडकतात. सट्टा बुकींचा विळखा हा शहरासह ग्रामीण भागातही पहायला मिळत आहे. 'क्रिकेटचा नाद, करी आयुष्य बरबाद' असे यात बरबाद झालेले काही नागरिक उघडपणे बोलूनही दाखवत आहे. शहरातील पोलिस प्रशासनाचा या बुकींना आशीर्वाद असल्याने त्यांचा हा धंदा राजरोसपणे चालू आहे. शहर 'गुन्हेगारी हब' बनण्यात पोलिसांचे योगदान असून अशा प्रकरणाकडे हेतूपुरस्सर दुर्लक्ष केल्या जातेय का? असा सवाल नागपूरकर विचारत आहेत. क्रिकेट सट्ट्यात कर्जबाजारी झालेल्या अनेक तरुण, तरूणींनी आत्महत्यासारखे पाऊल उचलले आहेत. काहींची पोलिसात नोंद केली जाते. तर काही बदनामी व भितीपोटी 'सेटलमेंट' करण्याचाही मार्ग निवडत आहेत. सोशल मिडीयने सर्व 'दुनिया मुठ्ठी मे' केली असून, मोबाईलनेही आनलाईन क्रिकेट गेमच्या नावाखाली आनलाईन सट्टा सुरू केला असून यात लहान मोठे असे अनेक गुंतले असून देशातील याचा आकडा काढणे अशक्य आहे. या आनलाईन क्रिकेट गेमवर बंदी आणावी, असे अनेक सामाजिक संस्था बेंबीच्या देठापासून ओरडून सांगताहेत. परंतु प्रशासन व राज्य सरकार यावर काहीही ठोस उपाय करायला तयार नाही.