ठाणे: महानगरपालिकेचे (टीएमसी) सहायक आयुक्त महेश आहेर यांच्या अडचणी अधिकच वाढल्या आहेत. लैंगिक छळाच्या एका प्रकरणात गेल्या १५ दिवसांपासून पोलिसांना चकमा देत असलेल्या आहेर यांना अखेर कोल्हापूर पोलिसांच्या स्थानिक गुन्हे शाखेने (एलसीबी) गुरुवारी पहाटे अटक केली. ते हातकणंगले तालुक्यातील नारंदे गावातील एका हॉटेलमध्ये लपून बसले होते. आहेर यांनी कोल्हापूरच्या सीमावर्ती भागात आश्रय घेतल्याची माहिती पोलिसांना मिळाल्यानंतर, एक सुनियोजित सापळा रचण्यात आला आणि त्यांना ताब्यात घेण्यात आले. पीडितेच्या तक्रारीनुसार, महेश आहेरने आपल्या पदाचा गैरवापर केला, तिला धमकावले आणि शीतपेयात औषध मिसळून तिच्यावर जबरदस्ती केली. हे २०२० ते २०२३ पर्यंत सुरू होते. जेव्हा पीडितेने प्रतिकार केला, तेव्हा तिचा मानसिक छळ करण्यात आला. अटक टाळण्यासाठी आहेरने न्यायालयात अटकपूर्व जामिनासाठी अर्ज दाखल केला, परंतु सबळ पुरावे पाहिल्यानंतर नंतर तो मागे घेतला. या प्रकरणातील सर्वात खळबळजनक खुलासा म्हणजे नाशिकस्थित एक कुख्यात घोटाळेबाज आणि स्वयंघोषित आध्यात्मिक गुरू भोंदू बाबा अशोक खरात यांचे ते अंधभक्त आहे. त्यांनीच पीडित महिलेला बळजबरी खरात यांच्या नाशिकच्या कार्यालयात नेले तिथे पीडित महिलेवर काही अघोरी विधी करण्यात आल्या. आहेर आणि खरात हे दोघे मिळून महिलांच्या शोषणाचे मोठे रॅकेट चालवत होते का, याचा तपास पोलीस आता करत आहेत. कासारवडवली पोलीस ठाण्यात एफआयआर दाखल झाल्यापासून, ठाणे गुन्हे शाखेच्या अनेक पथकांनी महाराष्ट्रातील विविध जिल्ह्यांमध्ये आणि शेजारील राज्यांमध्ये महेश आहेरचा शोध घेतला. पोलिसांनी त्याच्या घरावर आणि संभाव्य लपण्याच्या ठिकाणांवर छापे टाकले, परंतु तो सतत आपले ठिकाण बदलत होता. अखेरीस, तांत्रिक विश्लेषण आणि स्थानिक नेटवर्कच्या मदतीने कोल्हापूर पोलीस त्यांना पकडण्यात यशस्वी झाले. महेश आहेर यांना कोल्हापूरहून ठाण्यात आणण्यात आले असून, आज दुपारी त्यांना ठाणे न्यायालयात हजर केले जाईल. पोलीस त्यांच्या पूर्ण पोलीस कोठडीची मागणी करतील, जेणेकरून ते या प्रकरणातील इतर दुवे आणि अशोक खरात यांच्यासोबतच्या त्यांच्या संबंधांची सखोल चौकशी करू शकतील. या अटकेमुळे ठाणे महानगरपालिकेत खळबळ उडाली आहे.