🍃🍃🌼🍃🍃 નીડર સિદ્ધાંતવાદી સદ્. ઇશ્વરચરણદાસજી સ્વામીનું જીવન ભાગ :-૨૧ હવે સદ્ગુરુશ્રીની રજા લઈ મુક્તરાજશ્રી સંધે સહિત કચ્છ પાછા પધાર્યા. સદ્ગુરુશ્રીના સંતો તથા હેતરુચિવાળા સંત-હરિભક્તો સદ્દગુરુશ્રીની સેવા ઉમંગથી કરે છે. ગામે-ગામના હરિભક્તો દર્શન કરવા આવે છે. કથા-વાર્તારૂપી બ્રહ્મયજ્ઞ તો અખંડ ચાલતો જ હોય. સદ્દગુરુશ્રી સૌ કોઈને ધર્મમર્યાદામાં રહેવાનું સમજાવતા અને વિશેષે તો મુક્તરાજ અબજીભાઈશ્રીનો જોગસમાગમ કરવાનું કહેતા. આ રીતે ભલામણ કરતાં ને સેવા-સમાગમ તથા દર્શનનું અંતિમ સુખ સૌને આપી રહેલા એવા સ.ગુ.શ્રી નિર્ગુણદાસજી સ્વામી, મુક્તરાજ અબજીભાઈએ અગાઉથી કહ્યું હતું તે જ પ્રમાણે, સંવત ૧૯૪૮ના આસો સુદ ૧ પડવાને રોજ રાત્રે એક વાગ્યે અલૌકિક પ્રતાપ જણાવી શ્રીજીમહારાજની મૂર્તિના સુખે સુખિયા થઈ ગયા. અમદાવાદ મંદિર અને શ્રી નરનારાયણદેવ દેશવિભા-ગના સમર્થ સદ્ગુરુના ભૌતિક દર્શન બંધ થયા જાણી અસંખ્ય સંત-હરિભક્તો બંને દેશવિભાગમાંથી આવ્યા ને સદ્દગુરુની યથાશાસ્ત્ર અંત્યેષ્ટિ કરી, સ્વામી ઈશ્વરચરણદાસજી સદ્દગુરુશ્રીને સદાય શ્રીજીમહારાજના દિવ્ય સ્વરૂપમાં અનુભવતા છતાં આ લોકના વિરહ-વ્યથાથી ઉદાસ થઈ ગયા. પારસમાંથી પારસ થાય તેવું જંગમતીર્થ શ્રીહરિજીએ બંધ કર્યું. હરિ મિલાયે સદ્ગુરુ, ગુરુને હરિકી રાહ દિખાઈ! સદ્ગુરુશ્રી સતત દિગ્દર્શક રહ્યા, ને આખરી વિદાય પહેલાં જ સુયોગ્ય પથદર્શન કરાવી દીધેલું, તેથી સદ્દગુરુશ્રીના મંડળના સંતોને વિરહવેદના હતી, વિરહથી અંતર ઉદાસ હતાં, પણ દિશાશૂન્ય ન હતાં. તેમાં યે વિશેષ તો સ્વામી ઇશ્વરચરણદાસજીને પોતાની સ્થિતિનું સતત અનુસંધાન અને મુક્તરાજ અબજીભાઈ સાથેની એકતા – એવા દ્રઢ થઈ ગયા હતા કે પોતાને સદ્ગુરુશ્રી સદાય ભેળા ને ભેળા અનુભવાતા. ઘેઘૂર વટવૃક્ષને જેમ વડવાઈઓ ફૂટતી જાય અને વધુ ને વધુ વિસ્તારમાં છાંયો થતો જાય, તેમ શ્રી સ્વામિનારાયણ સંપ્રદાયરૂપી વટવૃક્ષને મુક્તોરૂપી વડવાઈઓ છે, નવા નવા મુક્તો પધારે છે ને શ્રીહરિજીના પરમ સુખમય સ્વરૂપમાં મુમુક્ષુઓને જોડાવા માટે છાંયો થતો જાય છે! સદ્ગુરુ નિર્ગુણદાસજી સ્વામીએ અનંત મુમુક્ષુઓને શ્રીહરિજીને વિષે જોડ્યા. સદ્ગુરુશ્રીના પરમ શિષ્ય સ્વામી ઈશ્વરચરણદાસજીનું જીવનકાર્ય પણ એ જ રીતે વધુ ને વધુ જીવોને સર્વોપરી ભગવત્સ્વરૂપમાં જોડવાનું બની રહ્યું. વડવાઇઓ વધતી વધતી ઘડની જેમ ટેકારૂપ બની જાય, તેમ સંપ્રદાયના વિકાસમાં આવા મુક્તો ટેકારૂપ બની ગયા. સદ્ગુરુશ્રી નિર્ગુણદાસજી સ્વામીની આજ્ઞા અને ભલામણ અનુસાર એમના મંડળના સંતો – પુરાણી શ્રીકૃષ્ણદાસજી, પુરાણી જોગેશ્વરદાસજી, સ્વામી ઈશ્વરચરણદાસજી, આદિ – દર વર્ષે મહિનો – બે મહિના કચ્છમાં જઇ અનાદિ મુક્તરાજ અબજીભાઈના દર્શન-સેવા-સમાગમનો લાભ લેતા. સદ્-ગુરુશ્રીએ સ્પષ્ટ આશા કરી હતી કે અનાદિ મુક્તરાજ અબજીભાઈ શ્રીજીમહારાજની મૂર્તિના અખંડ સુખમાં જ રહેનારા છે. તેથી તે ગૃહસ્થ છે ને આપણે ત્યાગી છીએ, એવું કોઈ મનમાં ન રાખજો, અને એમનો વધુ ને વધુ લાભ લેજો. તે મુજબ સંતો મુક્તરાજશ્રીની સેવા-સમાગમ કરી મુક્તશ્રીને રાજી કરતા, મુક્તરાજશ્રી પણ સંતોને પોતાના ગુરુભાઈ અને સ્ત્રી-ધનના ખરા ત્યાગી ને શ્રીહરિજીના અનુરાગી જાણી શ્રીહરિ મહિમાની અને મૂર્તિના સુખની અદભત વાતો કરી સૌને આનંદમાં તરબોળ કરી દેતા. 🍃🍃🌼🍃🍃 #🙏 સ્વામિનારાયણ મંદિર #✋ જય સ્વામીનારાયણ #અનાદિમુક્તરાજ શ્રી અબજીબાપા ##જય સ્વામિનારાયણ #🦋😊 𝗝𝗮𝘆 𝘀𝘄𝗮𝗺𝗶𝗻𝗮𝗿𝗮𝘆𝗮𝗻 🤗