હાસ્ય રસ 🤪 😂🤣 ડિયર મોન્સૂન, કેરળ-તમિલનાડુથી ગુજરાત સુધી પહોંચતાં આટલી બધી વાર લાગે? જલ્દી આવ ભાઈ, અહીં એસીનાં બિલો વધતાં જાય છે. રસ્તાઓ ધોવાઈ જવા માટે બેબાકળા બન્યા છે. કોન્ટ્રાક્ટરોનાં છોકરાં નવી ગાડી માટે કજિયો કરે છે, ને એમના પપ્પાઓ “એક વરસાદ પડી જવા દે...” એવા વાયદા કરે છે... ઘણા બધાને સ્વિમિંગ શીખવું છે, રેઇનકોટ અને છત્રીઓ માર્કેટમાં ખડકાઈ ગયાં છે, પણ તારા અભાવે વકરો શરૂ થવામાં વાર છે. દાળવડાં અને ભજિયાં વગર લોકોની આંતરડી કકળે છે. ફેસબુક પરની સેલ્ફીઓ પણ સાવ નપાણિયાં થઈ ગયાં છે... ટિટોડીના ઈંડાંમાંથી બચ્ચાં પણ આવી ગયાં, ને સૂકવેલા ગોટલાના મુખવાસ પણ બની ગયા... તારા વગર 'અમીછાંટણાં', 'ધડાકાભેર', 'મેઘસવારી', 'સર્વત્ર શ્રીકાર', 'નવી આવક', 'જળબંબાકાર', 'સાંબેલાધાર', 'ઓવરફ્લો', 'ખતરાના નિશાનથી ઉપર', 'ઉપરવાસમાં', 'નીચાણવાળા વિસ્તારો પાણીમાં ગરકાવ', 'ડિઝાસ્ટર મેનેજમેન્ટના દાવા પોકળ', 'પ્રિમોન્સૂન પ્લાન ધોવાયો', 'ઠેર ઠેર ભૂવા પડ્યા' જેવા શબ્દપ્રયોગો વિના ગુજરાતી ભાષા ઑક્સિજન લેવા માંડી છે. હજારો દેડકાં અને કરોડો કવિઓ પણ તારા વિના ટળવળે છે. તારા વિના 'પલળેલાં ભીનાં બદન'નાં લેખો_ સૂકાભઠ્ઠ ચિંતનાત્મક થઈ ગયાં છે... અમારી ભાષા મરી પરવારશે, એનું તને કંઈ ભાન છે?! એટલે ભાઈ, તને પણ વિજય માલ્યાની જેમ ભાગેડુ જાહેર કરાય એ પહેલાં આવી જા... – લિ. ટુવાલથી પરસેવો લૂછતો એક કોરોધાકોર ગુજરાતી #😆 હા હા હા