கற்றதை மறந்திடு... கற்றலை மறவேல்! 1950 - 70 களில் பிறந்தவர்கள் வாழ்க்கையில் ஏராளமான மாற்றங்களை பார்த்திருப்பார்கள். அலுவலக சூழ்நிலையில், LOTUS 123 யில் துவங்கி இன்று WINDOWS 11 வரை அவர்கள் அனைத்தையும் பார்த்து வந்தவர்கள். ஒவ்வொரு மாற்றத்திற்கும் தோதாக ஒருவர் தன்னை மாற்றிக் கொள்வது எளிதான காரியம் இல்லை. பல சமயங்களில் கஷ்டப்பட்டு கற்றதை மறக்க வேண்டியது (Unlearning) அவசியமாகிறது. ஆனால், முன்னேற வேண்டும் என்றால் காலாவதியான நடைமுறையை மறப்பதும் தொடர்ந்து கற்றுக்கொண்டே இருப்பது அவசியமாகிறது. மாற்றங்களுக்கேற்ப மாறி வந்தவர்கள் வாழ்க்கையில் மறுமலர்ச்சியை காண்கிறார்கள். இன்றைய தலைமுறையினருக்கு, ஒரு பஜாஜ் ஸ்கூட்டருக்காகவும், டெலிபோன் இணைப்பிற்காகவும் மக்கள் தசாப்தங்கள் காத்திருந்தது பற்றித் தெரியாது. முன்பு கார்களில் அம்பாசடர், ஃபியட், ஸ்டாண்டர்டு மொத்தமே மூன்று வகைகள்தான் இந்தியாவில் இருந்தன. அப்போதெல்லாம் புதிய தொழில் நுட்பங்கள் வளரும் நாடுகளுக்கு வர பல ஆண்டுகள் ஆகும். இன்று இந்திய கார் சந்தையில், 40 பிராண்டுகளில் கிட்டத்தட்ட 300 வகையான கார் மாடல்கள் இருக்கின்றன. அவற்றில், சாமானியர்களுக்கு மாருதி, மஹீந்ரா, டாடா, ஹோண்டா, கியா, டொயோட்டா மற்றும் ஹூண்டாய் ஆகியவை பிரபலமான பிராண்டுகள் ஆகும். இன்று புதிய தொழில் நுட்பங்களினால் ஆன பொருட்கள் உடனே உலகச் சந்தைகளுக்கு வருகின்றன. அறிவியலும் தொழில் நுட்பமும் நாலு கால் பாய்ச்சலில் போய்க் கொண்டு இருக்கும் இந்தக் கால கட்டத்தில், வேகமாக நிகழ்ந்து வரும் மாற்றங்களின் காரணமாக, தொழில் மற்றும் வியாபாரத்தின் போக்கு மற்றும் நடைமுறைகள் மட்டுமல்லாமல், வாழ்க்கை முறைகளே மாறிவருகின்றன. எனவே - கற்றதை மறந்திடு கற்றலை மறவேல் என்ற புதிய கொள்கையுடன் செயல்பட வேண்டியது அவசியமாகிறது. பல சமயங்களில் மாற்றத்திற்கான அறிகுறிகள் தெரியுமுன்பே மாற்றங்கள் நிகழ்ந்து விடுகின்றன. எனவே, போட்டிகள் மிகுந்த இந்தக் காலகட்டத்தில் தங்களது திறமைகளை வளர்த்துக் கொண்டு மாற்றங்களை எதிர்கொள்வதற்கு தொடர்ச்சியான கற்றல் அவசியமாகிறது. இன்றும் குறுஞ்செய்தி அனுப்பத் தெரியாதவர்கள், ஸ்மார்ட் போனை உபயோகிக்கத் தெரியாத பலர் இருக்கிறார்கள். கற்றலுக்கு வயது ஒரு தடையில்லை. முயன்றால் முடியாததில்லை. "You can't make an omelette without breaking a few eggs" என ஆங்கிலத்தில் ஒரு பழமொழி உண்டு. முட்டைகளை உடைக்காமல் ஆம்லெட் தயாரிக்க முடியாது. கற்றல் பல்வேறு சவால்களையும் பின்னடைவுகளையும் உள்ளடக்கியது. ஆனால் கற்றல் முன்னேற்றத்திற்கு அவசியம் என்பதை இந்த பழமொழி அறிவுறுத்துகிறது. காலத்துடன் ஒட்டி ஒழுகுவதற்கு - கற்றதை மறந்திடு... கற்றலை மறவேல்! வாழ்க்கையின் அடிநாதமே மாற்றம்தான், மடிக்கணினி என்ற பொருளோ அல்லது ஸ்மார்ட் போன் என்ற கையிருப்போ ஜஸ்ட் மாற்றத்தின் மைல் கற்களே! இவைகளும் மாற்றம் என்ற ஆழிப்பேரலையில் நாளை அடித்துச் செல்லப்படும்... #📺அரசியல் 360🔴 #🚹உளவியல் சிந்தனை