#🤩चॅटरूम गप्पागोष्टी👫 भोंदूबाबा गडगेला बेड्या ठोकल्या अंनिसच्या फिर्यादीवरून पोलिसांची कारवाई ▶ मंत्रोच्चाराने कर्करोग बरा करतो, मूल न होणाऱ्यांना अपत्यप्राप्ती करून देतो असे दावे करत आणि स्वतःचे यूट्युब चॅनेल तयार करून सोशल मीडियातून त्याची माहिती पसरवून आर्थिक लूट करणारा भोंदूबाबा राजेंद्र बापू गडगे याला अखेर बेड्या ठोकण्यात आल्या आहेत. वडगावपान (ता. संगमनेर) येथे त्याचा दत्तधाम सरकार या नावाने आश्रम होता. विशेष म्हणजे ज्यांची आर्थिक लूट झाली, त्या भक्तांपैकी कोणीही तक्रार करण्यास पुढे आले नाही. त्यामुळे अधश्रद्धा निर्मूलन समितीच्या राज्य सचिव रंजना गवांदे यांना फिर्यादी व्हावे लागले. अंधश्रद्धा निर्मूलन समितीने या आश्रमातील एकूणच प्रकारांबाबत गंभीर आरोप केले होते. मात्र, फिर्यादी कोणी मिळत नव्हता. अंधश्रद्धा निर्मूलन समितीच्या आरोपाचे गडगेबाबाने खंडन केले होते. एकीकडे पोलिसांचा तपास सुरू असताना दुसरीकडे फिर्यादी शोधला जात होता. मात्र, आश्रमातील भंडाफोड करण्यापासून फिर्यादी होण्यापर्यंत सर्वच बाबतीत अंधश्रद्धा निर्मूलन समितीला पुढाकार घ्यावा लागला. आश्रमासाठी वीजचोरी पोलिसांनी शुक्रवारी रात्री उशीरा भोंदूबाबा गडगे आणि त्याचा साथीदार मधुकर शिंदे (रा. रहिमपूर, ता. संगमनेर) यांना बेड्या ठोकल्या. अन्य गुन्हा दाखल झालेले आश्रमातील डॉ. मोहन पुरी, ज्ञानेश्वरी गडगे (दोघे रा. वडगावपान) आणि सूरज शिंदे (रा. रहिमपूर) हे फरार आहेत. पोलिस त्यांचा शोध घेत आहेत. दरम्यान, गडगेबाबा याच्या दत्तधाम आश्रमावर महावितरण कंपनीच्या अधिकाऱ्यांनी छापा टाकला. त्यावेळी तेथे मोठ्या प्रमाणात वीजचोरी होत असल्याचे निदर्शनास आले. आश्रमाला दंडात्मक बिलाची आकारणी केली असून, सात दिवसात पैसे जमा करावयाचे आहेत. तसे न केल्यास गुन्हा दाखल करणार असल्याचे महावितरणच्या अधिकाऱ्यांकडून सांगण्यात आले. #Sangamner #FraudBaba #Andhashraddha #Satyarthi #SatyarthiNews