#💪పాజిటీవ్ స్టోరీస్ అందరికి నమస్కారం🙏 ఈరోజు జనగణలో భాగంగా ఎదురైన ఒక ఆదర్శవంతమైన మహిళను గూర్చి మీతో పంచుకోవాలనుకుంటున్నాను. పైన ఫోటోలో కనిపిస్తున్న మాతృమూర్తి పేరు కొండ్లె కరుణ గారు. వీరి వయస్సు 53 సంవత్సరాలు. భర్త పేరు కొండ్లె వెంకటేశ్వర్లు గారు, ఈమెకు ఇద్దరు కుమార్తెలు కాగా వారిరువురి పెళ్లిళ్లు ఘనంగా చేసి వారిని జీవితంలో స్థిరపడేటట్లు చేయడం జరిగింది. ఇందులో విశేషమేముంది అని మీరు అనుకోవచ్చు. అయితే పరకాల మండలం భాగిర్తిపేట గ్రామస్తురాలైన కరుణ గారిది నిరుపేద కుటుంబం. బ్రతుకుతెరువు కోసం హనుమకొండ పట్టణానికి విచ్చేసి ఒక కిరాయి ఇంట్లో జీవనం సాగిస్తున్నారు. భర్త సెక్యూరిటీ గార్డ్ గా పనిచేస్తున్నాడు. కరుణ గారు భద్రకాళి వెడ్డింగ్ మాల్ లో సేల్స్ వర్కర్ గా పనిచేస్తున్నారు. ఇద్దరూ చిరు ఉద్యోగులే. వారికి వచ్చిన కొద్దిపాటి జీతంతో ప్రతినెల ఇంటి అద్దె కడుతూ ఇంటి ఖర్చులు చూసుకుంటూ ఇద్దరు ఆడపిల్లలను చదివించి వారిని ఒక ఇంటివారిని చేసింది. ప్రతిరోజు ఆమె పని చేసే చోటుకు వెళ్లాలంటే డబ్బులు అవుతాయని ఇప్పటికి కూడా అనగా 53 సంవత్సరాల వయస్సులోనూ ప్రతిరోజు ఆమె సైకిల్ పైననే షాప్ కు వెళ్లి వస్తుందట. తాను మాట్లాడుతున్నప్పుడు నేను గమనించిన అంశం ఏమిటంటే తాను ఎంతో ఆరోగ్యంగా సంతోషంగా ముఖ్యంగా మానసికంగా ఎంతో దృఢంగా, ఉల్లాసంగా, ప్రశాంతంగా కనిపించారు. 53 సంవత్సరాల వయసులో సైకిల్ తొక్కడం అనేటువంటిది మామూలు విషయమేమీ కాదు. దీనికి గల కారణంను ఆమెను అడిగినప్పుడు ఆమె చెప్పినటువంటి విషయాలు నాకు ఆమె పట్ల గౌరవభావం కలిగేలా చేశాయి. తాను మాట్లాడుతూ నేనెప్పుడూ నా స్వయంకృషి పైనే ఆధారపడ్డాను నాకు ఆస్తులు లేవు సొంత ఇల్లు లేదు అని ఎప్పుడూ బాధపడింది లేదు. నా కుటుంబం కోసం ప్రతి రోజు కష్టపడుతూ మాకు వచ్చిన జీతంలొనే ఉన్నంతలో బ్రతుకుతూ మేమందరం కలిసి మెలిసి తృప్తిగా సంతోషంగా జీవిస్తున్నాము, మాకు ఆస్తులు లేవు అని ఎన్నడు నిరాశ చెందలేదు అని చెప్పడం జరిగింది. సంసార జీవితాన్ని ఇలా తృప్తిగా జీవించడం కొందరికే సాధ్యమవుతుంది. నిజంగా ఇలా తృప్తిగా ఉండడం కారణంగానే ఆమె ఇంత సంతోషంగా ఆరోగ్యంగా ఉందేమో అనిపించింది. తనకు తరగని ఆస్తులు కూడపెట్టాలనే ఆశ లేదు, రేపు ఎలా అనే బాధ అంతకన్నా లేదు. ఉన్నదాంట్లో సంతోషంగా ఉండాలి, ఆరోగ్యంగా, ఉత్సాహంగా ఉండాలని తపన తప్ప మరే అత్యాశ లేదు, నేటి సమాజంలో ఇటువంటి వాళ్లు చాలా అరుదుగా కనిపిస్తున్నారు. సొంత ఇల్లు, అనేక వసతులు ఉద్యోగము ఉన్నప్పటికీ చాలామంది ఇంకా ఏదో తక్కువైనట్లు వెలితిగా ఉంటూ అశాంతిలో జీవిస్తున్నారు. దాని కారణంగా మానసికంగా శారీరకంగా అనారోగ్యం పాలవుతున్నారు. నిజంగా మనకున్న దాంట్లో తృప్తిగా జీవిస్తూ మనకిచ్చినటువంటి ఈ జీవితానికి ప్రతిరోజు దేవుడికి కృతజ్ఞతలు తెలుపుతూ సంతోషంగా ఉంటే ఏ అనారోగ్యము మన దరికి చేరదు. కరుణ గారిలా జీవించగలిగితే మనం కూడా 53 సంవత్సరాల వయసులోనూ ఉత్సాహంగా సంతోషంగా ఉండగలము, సైకిల్ కూడా తొక్కగలము. ఈరోజు ఆమెను చూసి వాళ్ళ పిల్లలతో మాట్లాడినప్పుడు వాళ్ల పిల్లలు కూడా వాళ్ళ అమ్మ పట్ల ఎంతో ఆరాధన భావాన్ని కలిగి ఉండడం చూసి నాకు చాలా ముచ్చటేసింది. ఆమె సామాన్యు రాలే కావచ్చు కానీ ఆమె జీవితం విజయవంతమైన మహిళల జీవితానికి ఏమాత్రం తీసిపోదు. ఇలాంటి మహిళలు మనందరికీ ఆదర్శమవ్వాలి. ఇటువంటి వారి జీవితాలు పుస్తకాల్లో పిల్లలకు పాఠ్యాంశాలుగా చేర్చాలి. నిశితంగా గమనిస్తే సమాజంలో అక్కడక్కడ ఇటువంటి ఆదర్శవంతులైన వ్యక్తులు మనకు తారసపడతారు. వారిని ఆదర్శంగా తీసుకొని ముందుకు సాగుదామని తెలుపుతూ కరుణ గారికి మనస్ఫూర్తిగా జేజేలు పలుకుతూ.... మీ రాజిరెడ్డి గణిత ఉపాధ్యాయుడు ప్రభుత్వ మర్కజి ఉన్నత పాఠశాల