*باعمل عالمہ سے شادی — گھر کی زینت اور نسلوں کی امانت* آج کے دور میں بعض لوگ یہ تاثر دینے کی کوشش کرتے ہیں کہ عالمہ عورت سے شادی کرنا مشکلات کو دعوت دینے کے مترادف ہے۔ کہا جاتا ہے کہ وہ زیادہ بحث کرے گی، بات نہیں مانے گی اور گھریلو زندگی کو دشوار بنا دے گی۔ یہ سوچ نہ صرف غلط ہے بلکہ دینی تعلیمات اور حقیقت دونوں کے خلاف ہے حقیقت یہ ہے کہ جس خاتون نے قرآن و حدیث کا علم حاصل کیا ہو، جو دین کے احکام سے واقف ہو اور جس کی زندگی علم و عمل سے مزین ہو، وہ گھر کی تباہی نہیں بلکہ تعمیر کا ذریعہ بنتی ہے۔ ایک باعمل عالمہ جانتی ہے کہ شوہر کے حقوق کیا ہیں، والدین کا مقام کیا ہے، اولاد کی صحیح تربیت کیسے کی جاتی ہے اور خاندان کے افراد کے ساتھ حسنِ سلوک کا کیا طریقہ ہے عالمہ سے شادی کا مطلب صرف ایک شریکِ حیات حاصل کرنا نہیں، بلکہ اپنے گھر میں علم، ادب اور دین کا چراغ روشن کرنا ہے۔ ایسی ماں اپنی اولاد کو صرف دنیاوی کامیابی کا راستہ نہیں دکھاتی بلکہ انہیں اللہ اور رسول ﷺ کی محبت بھی سکھاتی ہے۔ اس کی گود بچوں کے لیے پہلی درسگاہ بن جاتی ہے جہاں قرآن، اخلاق اور اسلامی اقدار پروان چڑھتی ہیں یہ بھی درست ہے کہ ایک باعمل عالمہ غلط بات پر خاموش نہیں رہتی۔ وہ برائی کو برائی سمجھتی ہے اور اچھائی کی ترغیب دیتی ہے۔ لیکن یہی تو اس کی خوبی ہے، کیونکہ جو انسان آپ کو گناہ سے بچائے اور نیکی کی طرف بلائے، وہ آپ کا خیر خواہ ہے نہ کہ دشمن۔ رسول اللہ ﷺ نے نکاح کے معاملے میں دین داری کو سب سے اہم معیار قرارھ دیا اور فرمایا: "تُنْكَحُ الْمَرْأَةُ لأَرْبَعٍ: لِمَالِهَا وَلِحَسَبِهَا وَلِجَمَالِهَا وَلِدِينِهَا، فَاظْفَرْ بِذَاتِ الدِّينِ تَرِبَتْ يَدَاكَ" "عورت سے چار چیزوں کی بنا پر نکاح کیا جاتا ہے: مال، حسب و نسب، جمال اور دین۔ پس دیندار عورت کو اختیار کرو۔" لہٰذا معاشرے میں عالمات کے بارے میں منفی پروپیگنڈا پھیلانے کے بجائے ان کی قدر کرنی چاہیے۔ ایک باعمل عالمہ صرف ایک فرد کی نہیں بلکہ پوری نسل کی اصلاح کا ذریعہ بن سکتی ہے۔ وہ گھر کی زینت، اولاد کی بہترین مربیہ اور خاندان کے لیے اللہ تعالیٰ کی عظیم نعمت ہوتی ہے۔ یاد رکھئے دیندار اور بااخلاق شریکِ حیات دنیا و آخرت دونوں کی کامیابی کا سرمایہ ہے، اور ایک باعمل عالمہ اس سرمایہ کی بہترین مثال ہو سکتی ہے۔ #📗حدیث کی باتیں📜