രാപ്പകലില്ലാതെ ഓടിനടന്ന് പണമുണ്ടാക്കി, മക്കൾ ചോദിച്ചതെല്ലാം കാൽക്കൽ കൊണ്ടുവെച്ചു കൊടുക്കുന്നവരാണ് ഇന്നത്തെ ഭൂരിഭാഗം മാതാപിതാക്കളും. മികച്ച സ്കൂൾ, ബ്രാൻഡഡ് വസ്ത്രങ്ങൾ, ഏറ്റവും പുതിയ മൊബൈൽ . അങ്ങനെ അവർക്ക് വേണ്ടതെല്ലാം നമ്മൾ നൽകുന്നു. എന്നാൽ ഒരു പ്രായമാകുമ്പോൾ ഇതേ മക്കൾ നമ്മുടെ മുഖത്തുനോക്കി പറയും. "അച്ഛനും അമ്മയും എന്നെ ഒട്ടും സ്നേഹിച്ചിട്ടില്ല, എനിക്ക് വേണ്ടി നിങ്ങൾ എന്താണ് ചെയ്തിട്ടുള്ളത്..." ഈ വാക്കുകൾ കേട്ട് നെഞ്ചുപൊട്ടി നമ്മൾ അവർക്ക് വേണ്ടി ചെയ്ത കാര്യങ്ങളുടെയും ചിലവാക്കിയ പണത്തിന്റെയും കണക്കുകൾ നിരത്തും. പക്ഷേ ഇതിലൊന്നുംവലിയ കാര്യമില്ല കുട്ടികളെ സംബന്ധിച്ചിടത്തോളം ഇതൊക്കെ മാതാപിതാക്കളുടെ ഉത്തരവാദിത്വങ്ങൾ തന്നെയാണെന്നാണ് അവർ ചിന്തിക്കുന്നത്. കാരണം, നമ്മൾ ഓടിനടന്ന് പണമുണ്ടാക്കുന്ന തിരക്കിൽ അവർക്ക് കൊടുക്കാൻ മറന്നുപോയ ചിലതുണ്ടായിരുന്നു.അതായിരുന്നു അവർക്ക് ശരിക്കും വേണ്ടിയിരുന്നത്.. മുതിരുമ്പോൾ മക്കൾ നമ്മളെ സ്നേഹത്തോടെ മനസ്സിൽ ഓർത്തിരിക്കണമെങ്കിൽ, പണത്തിനപ്പുറം നമ്മൾ അവർക്ക് നൽകേണ്ട ചില കാര്യങ്ങളുണ്ട്. പല മാതാപിതാക്കളും അത് ഓർക്കാറില്ല എന്നതാണ് സത്യം.. ഒന്നോർത്തു നോക്കിക്കേ.. നമ്മൾ പലപ്പോഴും കുട്ടികളുടെ കൂടെ ഉണ്ടാകാറുണ്ട്, പക്ഷേ നമ്മുടെ ശ്രദ്ധ മുഴുവൻ മൊബൈൽ ഫോണിലോ ഓഫീസിലെ തിരക്കുകളിലോ ആയിരിക്കും. കുട്ടികൾക്ക് വേണ്ടത് നിങ്ങളുടെ വെറും സാന്നിധ്യമല്ല, പൂർണ്ണമായ ശ്രദ്ധയാണ്. ദിവസവും കുറച്ചു സമയമെങ്കിലും ഫോൺ പൂർണ്ണമായി മാറ്റിവെച്ച് അവരുടെ കണ്ണുകളിലേക്ക് നോക്കി സംസാരിക്കാൻ ശ്രമിച്ചാൽ അവർക്ക് എന്ത് സന്തോഷമായിരിക്കും ഇതൊക്കെ കുട്ടികളുടെ ചെറിയ സമയത്ത് മുതലേ തുടങ്ങണം അല്ലാതെ കൗമാരപ്രായം കഴിഞ്ഞതിനുശേഷം തുടങ്ങണമെന്നല്ല ഉദ്ദേശിച്ചത്. കുട്ടികൾ അവരുടെ ചെറിയ പ്രായത്തിൽ സ്കൂളിൽ നടക്കുന്ന കൊച്ചുകൊച്ച് സംഭവങ്ങൾ വരെ പറയാറുണ്ട്.എത്ര പേരെ അത് ശ്രദ്ധിക്കും. വലിയ കാര്യമായി ചില സംഭവങ്ങൾ അവർ സ്വന്തം കയ്യിൽ നിന്ന് അല്പം കൂടി കൂട്ടിച്ചേർത്തു പറയുന്നതും ഞാൻ ശ്രദ്ധിച്ചിട്ടുണ്ട് ഇതൊക്കെ മാതാപിതാക്കളെ ഇംപ്രസ് ചെയ്യാനുള്ള കുഞ്ഞുങ്ങളുടെ ഓരോ അടവുകളാണ്. ഇങ്ങനെയൊക്കെ വന്നു പറയുമ്പോൾ "ഇതാണോ നിന്റെ വലിയ പ്രശ്നം.. ഇതിനാണോ കരയുന്നത്...എന്ന് പറഞ്ഞ് തള്ളിക്കളയന്നവരെ എനിക്കറിയാം. മുതിർന്നവർക്ക് അത് നിസ്സാരമായിരിക്കാം, പക്ഷേ ഒരു കുട്ടിയുടെ ലോകത്ത് അത് വലിയ സങ്കടമാണ്. അത്തരം സമയങ്ങളിൽ അവരെ ചേർത്തുപിടിച്ച് ആശ്വസിപ്പിക്കുക. കുട്ടികൾ കളിക്കുമ്പോഴോ എന്തെങ്കിലും വരയ്ക്കുമ്പോഴോ "അമ്മേ...അച്ഛാ ഇതൊന്ന് നോക്കിക്കേ" എന്ന് പറയാറില്ലേ... അവർ വരക്കുന്ന അല്ലെങ്കിൽ അവർ എഴുതുന്ന ചെറിയ ചെറിയ കാര്യങ്ങൾ നമ്മൾ കണ്ടിട്ട് 'എത്ര നന്നായി...'. എന്ന് പറയുന്നത് കേൾക്കാൻ അവർക്ക് എന്ത് ആഗ്രഹമുണ്ടായിരിക്കും. അവിടെ അവർ ആഗ്രഹിക്കുന്നത് നിങ്ങളുടെ ഒരു നോട്ടവും അഭിനന്ദനവുമാണ്. "ആ... ഞാൻ കണ്ടു, നീ അങ്ങോട്ട് മാറി ഇരുന്ന് കളിച്ചേ" എന്ന് പറഞ്ഞ് ഒഴിവാക്കുമ്പോൾ, അവരുടെ ഉള്ളിലെ സ്നേഹമാണ് നമ്മൾ നിഷേധിക്കുന്നത്. പരീക്ഷയ്ക്ക് മാർക്ക് കുറയുമ്പോഴോ, അവരിൽ നിന്ന് എന്തെങ്കിലും തെറ്റ് സംഭവിക്കുമ്പോഴോ ആദ്യം വന്ന് പറയാൻ തോന്നുന്ന ഇടമായിരിക്കണം മാതാപിതാക്കൾ. "തെറ്റ് പറ്റിയാലും എന്റെ അച്ഛനും അമ്മയും എന്നെ തള്ളിപ്പറയില്ല, കൂടെയുണ്ടാകും" എന്ന ആ വലിയ ഉറപ്പാണ് കുട്ടികൾക്ക് നൽകാൻ കഴിയുന്ന ഏറ്റവും വലിയ സ്നേഹം. കുട്ടികൾക്ക് സ്നേഹം എന്നത് നമ്മൾ വാങ്ങി കൊടുക്കുന്ന പലതരം സാധനങ്ങളിലല്ല മറിച്ച് നമ്മളിൽ നിന്ന് അവർക്ക് കിട്ടുന്ന അനുഭവങ്ങളാണ്.. സ്നേഹം ഉള്ളിലുണ്ടെങ്കിലും പുറത്തെപ്പോഴും കുറ്റപ്പെടുത്തുകയും, താരതമ്യം ചെയ്തു സംസാരിക്കുന്ന മാതാപിതാക്കളെ കുട്ടികൾ എങ്ങനെ മനസ്സിലാക്കാനാണ്. നിങ്ങൾ പണം മുടക്കി വാങ്ങി നൽകിയ സാധനങ്ങളോ കളിപ്പാട്ടങ്ങളോ ഒന്നും അവർ മുതിരുമ്പോൾ പലരും ഓർത്തിരിക്കാൻ വഴിയില്ല. എന്നാൽ അവർ കരഞ്ഞപ്പോൾ നിങ്ങൾ എങ്ങനെ ചേർത്തുപിടിച്ചു, അവർക്ക് വേണ്ടി എങ്ങനെ സമയം മാറ്റിവെച്ചു, അവരുടെ കൊച്ചു സന്തോഷങ്ങളിൽ എങ്ങനെ പങ്കാളികളായി എന്നത് അവർ ജീവിതാവസാനം വരെ മറക്കില്ല. മക്കൾക്ക് വേണ്ടി സമ്പാദിക്കുന്ന തിരക്കിൽ അവർക്ക് നിങ്ങളുടെ സാന്നിധ്യംനൽകാൻ മറക്കരുത്. കാരണം കുട്ടിക്കാലം വളരെ പെട്ടെന്ന് കടന്നുപോകും. ഒരു പ്രായം കഴിഞ്ഞിട്ട് അവരോട് പരാതി പറഞ്ഞിട്ടോ, കണക്കുകൾ നിരത്തുമ്പോൾ അവർ പറയുന്ന മറുപടി കേട്ടിട്ട് ഞെട്ടിയിട്ട് ഒരു കാര്യവുമില്ല.. മാറ്റങ്ങൾ നമ്മുടെ വീടുകളിൽ നിന്ന് തന്നെ തുടങ്ങട്ടെ. മക്കളുടെ മനസ്സ് നിറയ്ക്കാൻ പണത്തിനല്ല, നമ്മുടെ സ്നേഹപൂർവ്വമായ സാമീപ്യത്തിനേ കഴിയൂ. നാളെ അവർ വളർന്ന് സ്വന്തം വഴിക്ക് പിരിയുമ്പോൾ, ഓർത്തു വെക്കാൻ അവർക്കൊരു സമ്പാദ്യം വേണം. നമ്മുടെ ചിരിയും, ചേർത്തുപിടിക്കലുകളും, അവർക്കായി നമ്മൾ കാത്തുവെച്ച ആ നല്ല നിമിഷങ്ങളും. കാരണം കുഞ്ഞുങ്ങളുടെ കുട്ടിക്കാലം വളരെ പെട്ടെന്ന് കടന്നു പോകും. അത് തീരും മുമ്പേ അവരെ നെഞ്ചോട് ചേർക്കാം. വരുംതലമുറ നമ്മെ സ്നേഹത്തോടെ ഓർക്കണമെങ്കിൽ ഇന്ന് അവർക്കായി കുറച്ചു സമയം മാറ്റിവെക്കാം.. ❤️❤️❤️GRnath❤️❤️❤️ #🌞 ഗുഡ് മോണിംഗ് #💭 എന്റെ ചിന്തകള്‍ #🙋‍♀️ എൻ്റെ സ്റ്റാറ്റസുകൾ #😔 ഇമോഷണൽ സ്റ്റാറ്റസ് 😍 #👨‍👩‍👧‍👦 കുടുംബം