📚 ട്വിസ്റ്റ് കഥകൾ, ✍ തുടർക്കഥ Image & Post

ഷാൻ 🌹മാലാഖ 👍👍👍 - Author on ShareChat: Funny, Romantic, Videos, Shayari, Quotes

ആദ്യ ഭാഗങ്ങൾ ലിങ്കിൽ ഉണ്ട് https://sharechat.com/post/ml1B8A1a?d=n&ui=v64j8rk&e1=cമിഴിയോരങ്ങളിൽ.. 45 🎫🎫🎫🎫🎫🎫🎫🎫 ഡെർലസ് ഭ്രാന്തെടുത്ത അവസ്ഥയിൽ ആയെന്ന് കണ്ടതോടെ ഡെറിക്സൻ അവനെ പിടിച്ചു നിർത്താൻ നോക്കിയെങ്കിലും അനിയന്റെ കരുത്തിന് മുൻപിൽ ചേട്ടന്റെ കൈകൾക്ക് ബലം പോരാതെ വന്നു. "ഡർലസ്സേ.. അവളെ ഒന്നും ചെയ്യല്ലേടാ..." തന്റെ കയ്യിൽ കിടന്ന് കുതറുന്ന അനിയനെ നോക്കി പറഞ്ഞ ശേഷം ആവണിയ്ക്ക് നേരെ മുഖം തിരിച്ചു അവൻ അലറി. "ഇറങ്ങിപ്പോടീ പട്ടിച്ചീ, ജീവൻ വേണോങ്കിൽ. അല്ലേൽ എന്റനിയൻ ഇവിടിട്ട് നിന്നെ ചവിട്ടിക്കൂട്ടും..പോ പുറത്ത്." ഡെറിക്സൻ പറയുന്നതൊന്നും ആവണിയുടെ കാതിൽ വീഴുന്നില്ലായിരുന്നു. അവൾ കുറച്ചു മുൻപ് ഡെർലസിന്റെ നാവിൻ തുമ്പിൽ നിന്നൂർന്നു വീണ മഹാ രഹസ്യം കേട്ട് നടുങ്ങി നിൽക്കുകയായിരുന്നു. അപ്പോഴാണ് എന്താടാ ഇവിടൊരു ബഹളം എന്നും ചോദിച്ചു കൊണ്ട് മാർഗരറ്റ് അവിടേയ്ക്ക് വന്നത്. അതോടെ ഡെർലസ് അവർക്ക് നേരെ തിരിഞ്ഞു. "മമ്മീ, ഈ തെണ്ടിച്ചിനമ്മുടെ ജസീന്ത മോളേ കാണാനൊന്നും വന്നതല്ല. ഇവള് അവന്റെ ആളാ.. ആ വിൻസന്റിന്റെ... ഇവള് നമ്മുടെ പെങ്കൊച്ചിന്റെ ജീവിതം തകർക്കാൻ വന്നവളാ മമ്മീ... വിടരുത് അവളെ. ജീവനോടെ അവളെ ഇവിടെ നിന്ന് പുറത്ത് വിടരുത്..." അതൊക്കെ മാർഗരറ്റിനോട് പറയുമ്പോഴും അവൻ ചേട്ടന്റെ കൈപ്പിടിയിൽ നിന്ന് മുക്തനാകാൻ കുതറുകയും, പിടയുകയും ചെയ്യുന്നുണ്ടായിരുന്നു. മാർഗരറ്റ് ആവണിയുടെ അടുത്തേയ്ക്ക് വന്നിട്ട് അവളുടെ നീണ്ട മുടിക്കുത്തിൽ പിടിച്ചു മുഖമുയർത്തി. "എന്റെ മോൻ പറഞ്ഞത് നേരാണൊടി.. എടീ ആണോന്ന്.. നീ ഇനിയും ആ എമ്പോക്കിയുടെ ഓർമ്മകൾ എന്റെ കൊച്ചിന്റെജീവിതത്തിലേക്ക് കുത്തി തിരുകി കയറ്റാൻ വന്നതാണോടീ... എങ്കിലു നീയിവിടുന്നു ജീവനോടെ പോവില്ല.. നാടൊട്ടുക്ക് പെണ്ണ് പിടിച്ചു നടന്ന അവൻ വന്ന് എന്റെ മോടെ ജീവിതം കോഞ്ഞാട്ടയാക്കാൻ നോക്കിയതിനു അവടെ നട്ടെല്ലുള്ള ആങ്ങളമാർ കൊടുത്ത ശിക്ഷ കണ്ടല്ലോ.. നിന്നെയും വെറുതേ വിടില്ലായിരുന്നു.. നീയൊരു പെണ്ണായിപ്പോയി.. ഇറങ്ങി പോടീ എന്റെ വീട്ടീന്ന്.." മാർഗരറ്റ് അവളുടെ മുടിയിലെ പിടി വിടാതെ പിന്നോട്ട് വലിച്ചു കൊണ്ട് പോയി സിറ്റൗട്ടിലേക്ക് തള്ളി. ഓട്ടോയ്ക്കുള്ളിൽ ഇരുന്നു കൊണ്ട് ഡ്രൈവർ ആവണി അകത്തേയ്ക്ക് കയറിപ്പോയി അൽപ്പസമയത്തിന് ശേഷം ഉച്ചത്തിലുള്ള സംസാരം കേട്ട് പുറത്തിറങ്ങി നിന്ന് ശ്രദ്ധിച്ചു. അവിടെന്തോ വാക്ക് തർക്കവും, പടക്കം പൊട്ടും പോലെ അടിയുടെ ശബ്ദവും കേട്ട് ഗേറ്റിൽ പിടിച്ചു കൊണ്ട് ഡ്രൈവർ, അകത്തേയ്ക്ക് ചെല്ലണോ എന്ന സന്ദേഹത്തോടെ അൽപ്പ സമയം നിന്നു. ഏതോ ആണ് ചീറിക്കടിയ്ക്കും പോലെ മറ്റാരോടോ സംസാരിയ്ക്കുന്ന ഒച്ച കേൾക്കാം. അതിനാകട്ടെ തന്റെ ഓട്ടോയിൽ വന്നിറങ്ങിയ പെൺകുട്ടി മറുപടി കൊടുക്കുന്ന ശബ്ദം കേൾക്കാനുമില്ല. അയാൾ എന്തും വരട്ടെ എന്ന് ചിന്തിച്ചുകൊണ്ട് ഗേറ്റ് തുറന്ന് അകത്തേയ്ക്ക് കയറി ചെന്നു. മാർഗരറ്റ് അപ്പോഴാണ് ആവണിയുടെ മുടിയ്ക്ക് കുത്തിപ്പിടിച്ചു വലിച്ചു കൊണ്ട് വെളിയിലേക്ക് വരുന്നത്.. ഓട്ടോ ഡ്രൈവർ ഓടി സിറ്റൗട്ടിലേക്ക് കയറിച്ചെന്നു. "ഹേയ്.. നിങ്ങളിത് എന്താ സ്ത്രീയേ കാണിയ്ക്കുന്നത്.. അതൊരു മനുഷ്യ ജീവിയല്ലേ..." അവൻ അവരെ തടയാൻ നോക്കുമ്പോൾ മാർഗരറ്റ് അവളെ അവന്റെ നേർക്ക് തള്ളി വിട്ടു. ''നീയാരുന്നോ എവിടോ കിടന്ന ഈ നെറികെട്ടവളെ പിടിച്ചു ഇങ്ങോട്ട്കൊണ്ട് വന്നത്.. ദാ കിടക്കുന്നു.. ജീവൻ വേണമെങ്കിൽ രണ്ടെണ്ണവും ഇറങ്ങി പൊയ്ക്കോ. അല്ലെങ്കിൽ... " തന്റെ നേർക്ക് വന്ന ആവണിയെ ഡ്രൈവർ ബലമായി അവിടെ പിടിച്ചു നിർത്തി.. "അല്ലെങ്കിൽ എന്തോ ചെയ്യും സ്ത്രീയെ നിങ്ങൾ. ഞാനും ഈ ശക്തികുളങ്ങരയിൽ തന്നെ വളർന്ന് ജീവിയ്ക്കുന്നവനാ.. വീട്ടിൽ കയറി വന്ന ഒരു പാവം പെങ്കൊച്ചിനോട് ഈ വിധം കാണിച്ച നിങ്ങടെ പ്രവൃത്തിയ്ക്ക് പറയുന്ന ഒരു പേരുണ്ട്. പച്ച മലയാളത്തിൽ അതെന്നെ കൊണ്ട് വിളിച്ചു പറയിയ്ക്കല്ലേ. മര്യാദയില്ലാത്ത വർഗ്ഗം.." "അതേടാ.. മാർഗരറ്റിനും മക്കൾക്കും ഒട്ടും മര്യാദയില്ലെന്ന് ഈ മുക്കാട് മുഴുവൻ അറിയാവുന്ന കാര്യമാ. ഇവള് വല്യ മര്യാദക്കാരിയാണെങ്കിൽ നിന്റെ വീട്ടിൽ കൊണ്ട് പോയി പൊറുപ്പിയ്ക്കേടാ അവളെ. ഇതുപോലുള്ള തെണ്ടിച്ചികൾക്ക് കയറി നിരങ്ങാനുള്ളതല്ല എന്റെ വീട്.. അവനൊരു മര്യാദക്കാരിയെയും കൊണ്ട് വന്നിരിക്കുന്നു. എന്റെ മക്കളിറങ്ങി വന്നാലുണ്ടല്ലോ..." "നിങ്ങടെ മക്കള് ആരാ പെണ്ണുമ്പുള്ളേ.. കടുവയോ പുലിയോ വല്ലതും ആണോ... ആണെങ്കിൽ അത് ഈ വീട്ടിനുള്ളിലേ ചിലവാകുകയുള്ളൂ.. പുറത്തോട്ട് വന്ന് വല്ലവന്റെയും മെക്കിട്ട് കേറിയാൽ അതിനപ്പുറം തിരിച്ചു വാങ്ങിച്ചോണ്ട് അമ്മച്ചിയ്ക്ക് കൊണ്ട് തരും ആൺമക്കൾ.." 'ഇവള് പോയില്ലേ'എന്ന് ചോദിച്ചുകൊണ്ട് അപ്പോഴാണ് ഡെർലസ് ഇറങ്ങി പുറത്തേയ്ക്ക് വരുന്നത്... "ഇവനാണോ മമ്മീ ഇവളെ പോയി കെട്ടി എഴുന്നള്ളിച്ചു ഇങ്ങോട്ട് വിട്ടത്." അവൻ മാർഗരറ്റിനെ നോക്കി ചോദിച്ചു. "ആണെടാ.. ഞാൻ തന്നെയാ കൊണ്ട് വന്നത്. അതിന് നിനക്കെന്തെങ്കിലും കുഴപ്പമുണ്ടോ.. ആരെങ്കിലും യാത്രക്കാർ വന്ന് എവിടേക്കെങ്കിലും ഓട്ടം പോകണമെന്ന് പറയുമ്പോ അവരെ അവിടെ കൊണ്ട് വിടേണ്ട ചുമതലയുള്ളവരാ ഡ്രൈവർ മാർ.. മേലനങ്ങാതെ വീട്ടിനുള്ളിലിരുന്ന് മറ്റുള്ളവന്റെ വിയർപ്പിന്റെ അദ്ധ്വാനം പറ്റുന്ന നിനക്കൊന്നും അത് പറഞ്ഞാൽ മനസിലാകില്ല. നല്ല കൊന്ന തെങ്ങിന്റെ വലിപ്പത്തിലുള്ള തണ്ടും തടിയും ഉണ്ടല്ലോടാ നിനക്ക്.. പക്‌ഷേ നാണമെന്ന് പറയുന്നത് നിന്റെ ഏഴയലത്ത്‌ കൂടി പോയിട്ടില്ല. അത് ലവലേശമെങ്കിലും അമ്മച്ചിയ്ക്കും മക്കൾക്കും ഉണ്ടായിരുന്നെങ്കിൽ ഈ പെണ്ണിന്റെ മുഖത്ത്‌ നീയൊന്നും കൈ നീട്ടി അടിയ്ക്കില്ലായിരുന്നു.. പെണ്ണിന്റെ മുഖത്തടിച്ചിട്ട് നിന്ന് ശൂരത്വം വിളമ്പുന്നകണ്ടില്ലേ.. വൃത്തികെട്ട ജന്മങ്ങൾ.." തനിയ്ക്കൊപ്പം, തന്റെ ഓട്ടോയിൽ യാത്ര ചെയ്തു വന്ന പെൺകുട്ടിയ്ക്കാണ് ഈ വിധം മർദനംഏറ്റതെന്ന് കണ്ടിട്ട് ഓട്ടോ ഡ്രൈവർക്ക് ദേഷ്യം അടക്കാൻ ആയില്ല. "പെണ്ണിന്റെ മാത്രമല്ലെടാ,, ആണിന്റെയും മുഖത്തടിയ്ക്കാൻ ഈ ഡെർലസിനു അറിയാം. കാണണോ നിനക്ക് അത്..." ഡെർലസ് കോട്ടൺ ഷർട്ടിന്റെ കൈ തെറുത്ത്‌ മുകളിലേക്ക് വച്ചുകൊണ്ട് പുറത്തേക്കിറങ്ങാൻ തുടങ്ങുമ്പോ അവനെ പിന്നിൽ നിന്ന് മാർഗരറ്റ് പിടിച്ചുനിർത്തി. "അത്രയ്ക്ക് തന്റേടമുള്ളവനാണെങ്കിൽ ഒന്ന് തൊട്ടു നോക്കെടാ ആണും പെണ്ണും കെട്ടവനേ... നീയെന്നെ കൂട്ടം ചേർന്ന് ഇവിടിട്ട് തല്ലിയാൽ ഈ ജന്മത്ത്‌ നീ ഈ വീടിന്റെ മതിൽ കെട്ടിനു വെളി കാണില്ല.. എനിയ്ക്ക് നിന്റെ വീട്ടിലേക്ക് വരേണ്ട കാര്യമില്ല.. പക്‌ഷേ നിനക്ക് വെളിയിൽ വരാതെ ജീവിയ്ക്കാൻ പറ്റില്ലല്ലോ.. അവിടെ വച്ചു തരും ഞാൻ.. പലിശ ചേർത്തല്ല, പലിശയും പിഴപ്പലിശയും ചേർത്ത്.. ധൈര്യമുണ്ടെങ്കിൽ നീയെന്നെ ഒന്ന് തല്ലി നോക്കെടാ..." "വാ ഇങ്ങോട്ട്.. ആ നാശങ്ങൾ ഇറങ്ങി പോട്ടെ.. കൊച്ചുങ്ങൾ തിരിച്ചെത്താൻ നേരമായി.. എന്തെങ്കിലും ഒരു കാര്യം ജസീന്തയുടെ കെട്ടിയോന്റെ ചെവിയിൽ കിട്ടിയാൽ അതുമതി ഇനി നമ്മുടെ കൊച്ചിന്റെ ജീവിതം കുട്ടി ചോറാകാൻ..." മാർഗരറ്റ് പെട്ടന്ന് മകനെ വീട്ടിനുള്ളിലേക്ക് വലിച്ചു കയറ്റിയിട്ട് വാതിലടച്ചു ഓടാoബൽ ഇട്ടു. ഓട്ടോ ഡ്രൈവർ വന്ന് ആവണിയുടെ മുഖത്തേയ്ക്ക് നോക്കി. "ആ ചെകുത്താന്റെ കൈക്ക് അഞ്ച് വിരൽ ആയിപ്പോയത് നിന്റെ ഭാഗ്യം.. ആറോ ഏഴോ വിരലുണ്ടായിരുന്നെങ്കിൽ അതുകൂടി നിന്റെ കവിളിൽ കിടന്നേനെ കൊച്ചേ.." "മതി പാടിയത്. അടി കിട്ടിയത് എനിയ്ക്കല്ലേ. ഞാൻ സഹിച്ചു.. നിങ്ങൾക്ക് ഒരഞ്ചു മിനിറ്റ് മുൻപ് അങ്ങോട്ടൊന്ന് വരാൻ തോന്നിയില്ലല്ലോ.." ഓട്ടോ ഡ്രൈവർക്ക് പിന്നാലേ പുറത്തേയ്ക്ക് നടക്കുമ്പോൾ ഒരു പരിഭവം പോലെ ആവണി പറഞ്ഞു. ഓട്ടോ ഡ്രൈവർ അവിടെ തിരിഞ്ഞു നിന്നു. "അതിന് കൊച്ചേ നീ ആ വീട്ടിലേക്ക് കയറി ചെന്നിട്ട് അഞ്ച് മിനിറ്റ് തികഞ്ഞില്ലല്ലോ. അതിന് മുമ്പ് നിനക്ക് അവന്മാർ സമ്മാനം തന്നില്ലേ.. അതുമല്ല,ഞാനറിഞ്ഞോ നീ വല്ലവന്റെയും കയ്യിൽ നിന്ന് വാങ്ങിച്ചു കെട്ടാനാ എന്റെ ഓട്ടോയിൽ നിന്ന് ഇറങ്ങി പോയതെന്ന്. ഇവിടെ കിടന്നോ, പത്തു മിനിറ്റിനുള്ളിൽ തിരിച്ചുവന്നേക്കാം എന്നും പറഞ്ഞു പോകുമ്പോ നിനക്ക് എന്തോരം ഗമയാരുന്നു. ഞാൻ കരുതിയത് നീ കേറി ചെന്നപ്പോൾ നിന്നെ ആ വീട്ടുകാർ എന്തെങ്കിലുമൊക്കെ തിന്നാനും, കുടിയ്ക്കാനും തന്നു സൽക്കരിച്ചോണ്ട് ഇരിയ്ക്കയാണെന്നാ. ഒരിത്തിരി വെള്ളമെങ്കിലും കുടിക്കാൻ കിട്ടിയിരുന്നെങ്കിൽ എന്നോർത്ത്‌ ഞാൻ ഓട്ടോയിൽ ഇരിയ്ക്കുമ്പോഴാ അവിടെ അടി ശബ്ദവും ഉച്ചത്തിലുള്ള സംസാരവും കേൾക്കുന്നത്. അവിടെ വന്നപ്പോഴല്ലേ ഞാൻ കാര്യം മനസ്സിലാക്കുന്നത്.. രണ്ടോ മൂന്നോ ബസ് മാറിക്കയറി എന്റെ ഓട്ടോയും വിളിച്ചു, ലോകമായ ലോകം മുഴുവൻ ചുറ്റി ഈ വീട് കണ്ടു പിടിച്ചു വന്നത് അടി ഇരന്ന് വാങ്ങാനാണെന്ന്... ഇതിന്റെയൊക്കെ വല്ല കാര്യവുമുണ്ടായിരുന്നോ കൊച്ചേ നിനക്ക്.അവന്മാരെ പോലുള്ള രണ്ട് കാള കൂറ്റൻ മാരോട് പിടിച്ചു നിൽക്കാനുള്ള ശേഷിയുണ്ടെങ്കിൽ വേണ്ടില്ലായിരുന്നു.." "മതി കളിയാക്കിയത്.. അത്രയ്ക്ക് തന്റേടമുള്ള ആളായിരുന്നെങ്കിൽ എന്താ കേറിവന്ന് അവനൊന്ന് കൊടുക്കാതെ വിട്ടത്.. അവിടെ നിന്ന് വല്യ വായിലേ പ്രസംഗിയ്ക്കുന്നത് കേട്ടല്ലോ എന്നെ ഇവിടിട്ട് തൊട്ടാൽ പുറത്തിട്ടു നിന്നെ കീച്ചിക്കളയും എന്ന്.." "എന്റെ കൊച്ചേ അതൊക്കെ ഒരു നമ്പരല്ലേ. ഞാൻ ആ തന്റേടം അവിടെ കാണിച്ചതുകൊണ്ടല്ലേ അവന്റെ തള്ള അവനെ പിടിച്ചു വീട്ടിനുള്ളിലാക്കി പൂട്ടിയത്. അല്ലായിരുന്നെങ്കിൽ നിനക്ക് കൊണ്ടോണം ഞാനും വാങ്ങിച്ചു കെട്ടിക്കൊണ്ട് പോരേണ്ടി വന്നേനെ.. ഞാൻ അവന്മാരെ പുറത്തിട്ട് എന്തോ ചെയ്യാനാ.. അവന്മാരെ ഞാനെന്തെങ്കിലും ചെയ്‌താൽ പുറത്ത് വച്ചു അവന്മാർ എന്റെ വണ്ടിയ്ക്കിട്ട് ചിലപ്പോൾ പണി തന്നെന്നിരിയ്ക്കും. ഞാനീ ഓട്ടോ ഓടിച്ചാണേ ഒരു കുടുംബം പുലർത്തി പോരുന്നത്." അയാൾ വന്ന് ഓട്ടോയുടെ ഡ്രൈവർ സീറ്റിലേക്ക് കയറിയിരുന്നു. "നിങ്ങൾക്ക് അറിയാമോ അവന്മാരെ... നേരിട്ട് പരിചയമുള്ളവരാണോ.." ശക്തി കുളങ്ങരയിൽ ആർക്കാ ഈ തെമ്മാടികളെ അറിയാത്തത്. ഇവന്മാരുടെ അപ്പൻ ഡിക്രൂസ് ഹാർബറിൽ പിരിവിടുത്ത്‌ ജീവിയ്ക്കുന്നവനായിരുന്നു. അവിടുത്തെ ഒന്നാന്തരം ഒരു ഗുണ്ടയും. എന്നിട്ടെന്താ അവസാനം സർവ്വ ഗുണ്ടകൾക്കും ഉണ്ടാകുന്ന ഗതി തന്നെ അയാൾക്കും കിട്ടി. ഒരു ദിവസം രാത്രി ഹാർബറിൽ വച്ചു ഡിക്രൂസിനെ ആരോ തലയ്ക്കടിച്ചു കൊലപ്പെടുത്തി. അതിന് ശേഷം ഇവന്മാര് രണ്ടും ചേർന്ന് അപ്പന്റെ കുലത്തൊഴിലിന് അനന്തരാവകാശം ചമയാൻ നോക്കിയെങ്കിലും ഹാർബറിലെ പിള്ളേർ സമ്മതിച്ചില്ല.. കൈവിട്ട് പോയാൽ പിന്നെ പിടിച്ചാൽ കിട്ടില്ലെന്ന്‌അവർക്കറിയാം. അതിലുപരി ബോട്ടിൽ പോയി രാപ്പകലില്ലാതെ കിടന്ന് കഷ്ടപ്പെടുന്നത് ഇവന്മാരെ തീറ്റിയ്ക്കാനല്ലെന്ന് അവർക്ക് അറിയരുതോ. ഒന്നോ രണ്ടോ വർഷം മുമ്പ് വരെ കുറച്ച് അടിപിടിയും നാറ്റ കേസുകളും ഒക്കെയായി ഇവന്മാരെ ശക്തി കുളങ്ങരയിൽ കാണാമായിരുന്നു. ഇപ്പോൾ എന്തോ... വെള്ളമടിയും, പെണ്ണ് കേസും ഒന്നും കളഞ്ഞിട്ടില്ലെങ്കിലും രണ്ടും കുറച്ചൊക്കെ ഒതുങ്ങി ജീവിയ്ക്കുവാ. ഇവന്മാരുടെ മടയിലേക്കാണ് നീ പോകുന്നതെന്ന് അറിഞ്ഞിരുന്നെങ്കിൽ ഒരു മുന്നറിയിപ്പെങ്കിലും ഞാൻ നിനക്ക് തന്ന് വിട്ടേനേ.. സാരമില്ല.. പോയേക്കാം.. കൊച്ചിനെ ഞാൻ ശക്തികുളങ്ങര ഇറക്കിയാൽ പോരെ.. അവിടെ നിന്നാൽ കായംകുളത്തു നിന്നും കൊല്ലം വഴി പോകുന്ന പുനലൂർ ബസ്ബസ് കിട്ടും. അതില്കയറി കുന്നിക്കോട്ട് ഇറങ്ങി നാട്ടിലേക്ക് പോകാമല്ലോ.. " "ശരി ചേട്ടാ.. സന്തോഷം..." അവളയാൾക്ക് നന്ദി പറഞ്ഞു. ആവണി ചുരീദാറിന്റെ ഷാൾ തലയിലൂടെ മൂടി ഇരു കവിളുകളും കാണാത്ത വിധം ചുറ്റി അതിന്റെ ഒരു തുമ്പ് പിന്നിലേക്ക് ഇട്ടു. ഓട്ടോ ഓടി ശക്തി കുളങ്ങരയിൽ എത്തി ആവണി അയാൾക്ക് പൈസ കൊടുത്തു കൊണ്ട് നിൽക്കുമ്പോൾ ഒരു പുനലൂർ ഫാസ്റ്റ് പാസഞ്ചർ സ്റ്റോപ്പിൽ കൊണ്ട് നിർത്തി ആളിറക്കാൻ തുടങ്ങി. ആവണി ആ ബസിലേക്ക് കയറാൻ അതിന്റെ അടുത്തേയ്ക്ക് നടന്നു ചെന്നു. ♦️ രാത്രി.. ആഹാരം കഴിഞ്ഞ ശേഷം ആശാലത നേരത്തെ ബെഡ് റൂമിലേക്ക് കയറി പോന്നു. അവൾക്ക് ബെഡിൽ ഇരുന്നു കൊണ്ട് തന്റെ ജീവിതത്തിൽ വിവാഹാനന്തരം സംഭവിച്ച ഓരോ കാര്യങ്ങളെയും കുറിച്ചോർക്കുമ്പോൾ അത്ഭുതം തോന്നി. ജീവിതം.. ഇതുപോലൊരു ജീവിതമായിരുന്നോ തന്റെ സ്വപ്നങ്ങളിൽ ഉണ്ടായിരുന്നത്... അന്യ ഒരു വീടും, സിനിമയിലും, കഥകളിലും ഒക്കെ താൻ കണ്ട ജീവിതവുമായി ഇതിന് പുലബന്ധം പോലുമില്ലല്ലോ. തന്റെ കഴുത്തിൽ താലി ചാർത്തിയ ഒരു പുരുഷനുമായി എത്രയോ നാൾ ഒരു വീട്ടിൽ കഴിയേണ്ടി വന്നു.. ഇതിനെയും ജീവിതമെന്ന പേരിട്ടാണോ വിളിയ്ക്കേണ്ടത്.. നാളെ.. നാളത്തെ ഒറ്റ പകൽ കൂടി മാത്രമേ രതീഷേട്ടൻ ഈ വീട്ടിൽ ഉണ്ടാകുകയുള്ളൂ എന്നോർക്കവേ അവൾക്ക് നെഞ്ചിൽ വല്ലാത്തൊരു ശ്വാസം മുട്ടൽ അനുഭവപ്പെട്ടു. ഇനി ഒരു പക്‌ഷേ രതീഷേട്ടൻ തിരിച്ചു വരുന്നത് താൻ ഈ വീട്ടിൽ നിന്ന് മടുത്ത്‌ ആവണീശ്വരത്തേയ്ക്ക് മടങ്ങിപ്പോയി എന്നറിയിയ്ക്കുമ്പോൾ മാത്രമായിരിക്കും. ആശാലത ചിന്തിച്ചിരിയ്ക്കെ രതീഷ് അവിടേയ്ക്ക് കടന്നു വന്നു. "നീ കിടന്നില്ലേ ആശേ.." അവൻ തിരക്കി. "ഇല്ല രതീഷേട്ടൻ കിടക്കുന്നില്ലേ.." "ഞാൻ പൊയ്ക്കോളാം. ഇവിടെ റൂമിൽ വെളിച്ചവും, വാതിൽ തുറന്നും കിടക്കുന്നത് കണ്ടിട്ട് നോക്കിയതാ. സാധാരണ നീ റൂമിനുള്ളിൽ കടന്നാലുടൻ വാതിലടച്ചു ഓടാമ്പൽ ഇടുകയല്ലേ പതിവ്." അവൻ തിരിഞ്ഞു പുറത്തേയ്ക്ക് നടക്കാൻ തുടങ്ങുമ്പോൾ അവൾ അവനെ പിന്നിൽ നിന്ന് വിളിച്ചു. "എന്താ ആശേ." അവൻ അവിടെ തിരിഞ്ഞു നിന്നു. "ഇവിടെ കിടക്കാമല്ലോ രതീഷേട്ടന്..". അവൾ എണീറ്റ് നിന്നിട്ട് താനിരുന്ന ബെഡ് ചൂണ്ടിക്കാട്ടി. രതീഷ് അവളെ നോക്കി ചുണ്ടിന്റെ ഒരു വശം മാത്രം കൊണ്ട് ചിരിച്ചു. "അപ്പോൾ ആശ എവിടെ കിടക്കും." അവൻ തിരക്കി. "നമ്മൾ ആവണീശ്വരത്ത്‌വച്ചു ഒരൊറ്റ റൂമിലല്ലേ കഴിഞ്ഞത് രതീഷേട്ടാ." അവൾ മടിച്ച് മടിച്ച് പറഞ്ഞു. "അത് അവിടെ.അവിടെ ആർക്കും അറിയില്ലല്ലോ നമുക്കിടയിലെ വിള്ളൽ വലുതാണെന്ന്.. ഏതായാലും അതിവിടെ വേണ്ട. ഞാനിവിടെ കട്ടിലിലുംതാൻ നിലത്തും.. ഈ രാത്രി മുഴുവൻ ഉറങ്ങാതെ കിടക്കാൻ ആശക്ക് ആ ഒറ്റ കാരണം പോരെ. തൽക്കാലം അത് വേണ്ട. ആശാലതയുടെ ജീവിതത്തിലെ ഒറ്റ രാത്രിയുടെ സൗജന്യം ഞാനെന്തായാലും സ്വീകരിയ്ക്കുന്നില്ല." അവൻ അത്രയും പറഞ്ഞിട്ട് അവളെ ഒന്ന് നോക്കുക പോലും ചെയ്യാതെ പുറത്തേക്കിറങ്ങിപ്പോയി. (തുടരും) തീർക്കാൻ പറ്റിയില്ല. കണ്ണൂർകാരൻ 🌹🌹🌹🌹 #📚 ട്വിസ്റ്റ് കഥകൾ #✍ തുടർക്കഥ #📙 നോവൽ #💞 പ്രണയകഥകൾ #📔 കഥ

📚 ട്വിസ്റ്റ് കഥകൾ - ooooo 451 Kannorkaran ্l9leo5@6e3gloo. (ನ ooooo 451 Kannorkaran ্l9leo5@6e3gloo. (ನ - ShareChat