🚩 "लोकराजा राजर्षी छत्रपती श्री.शाहु महाराज यांच्या स्मृतीस विनम्र अभिवादन 🙏 'आरक्षणाचे जनक' या एकाच विशेषणाखाली दडलेले शाहू महाराजांचे आभाळाएवढे कर्तृत्व जनतेसमोर येणे गरजेचे आहे. महाराजांची ओळख हि केवळ 'आरक्षणाचे जनक' इतकीच मर्यादित नाही. लोककल्याणाच्या हजारो निर्णयांपैकी महाराजांचा तो एक निर्णय होता, हेदेखील लक्षात घेतले पाहिजे. या व्यतिरिक्त ही महाराजांच्या अशा अनेक लोककल्याणकारी कामांचा अभ्यास झाला पाहिजे. महाराजांनी आपल्या राज्यात राबविलेली सिंचन योजना, दुष्काळ निवारण यंत्रणा, शिक्षण व्यवस्था, आरोग्य व्यवस्था, सहकार चळवळ, उद्योगविकासाचे आराखडे, वनसंरक्षणाचे कायदे या व अशा इतर अनेक बाबी या आजही तितक्याच उपयुक्त व परिणामकारक ठरणाऱ्या आहेत, पण आपल्याला 'आरक्षणाचे जनक' याच्या पुढचे महाराज दिसतच नाहीत, हे खरे दुर्दैव आहे. शाहू महाराजांच्या संपूर्ण कार्यकर्तृत्वातून धडे घेऊन आज महाराजांच्या कार्यपद्धती नुसार व महाराजांच्या विचारांनी हे राज्य चालविले, तर महाराष्ट्र सर्व समस्यांचा यशस्वी सामना करत शिक्षण, आरोग्य, उद्योग, रोजगार, सहकार, दुष्काळ निवारण, शेती अशा सर्व बाबतींत अग्रेसर राहिल, हे कोणताही शाहूचरित्र अभ्यासक छातीठोकपणे सांगू शकतो. पण यासाठी सर्व शाहूचरित्र अभ्यासकांनी व शाहूप्रेमींनी 'आरक्षणाचे जनक' या एकाच ओळखीत दडलेले महाराजांचे आभाळाएवढे कर्तृत्व जगासमोर आणणे गरजेचे आहे. आज केवळ आरक्षण देणारे शाहू महाराज दाखविले जातात, पण यापुढे शेतकऱ्यांसाठी सारा खजिना रिकामा करून त्याकाळचे सर्वांत मोठे धरण बांधणारे, शेकडो तलावांची निर्मिती करणारे, ज्यांच्या राज्यात भीषण दुष्काळ पडला असताना माणूसच काय तर साधे एखादे जनावरही मेले नाही, अशी आदर्शवत दुष्काळ निवारण यंत्रणा राबविणारे महाराज लोकांना दिसूदेत. कलाकारांच्या उद्धारासाठी, कलेच्या जोपासनेसाठी त्याकाळी आशिया खंडातील सर्वांत मोठे थिएटर बांधणारे, कुस्तीगीरांसाठी सर्वांत मोठे खासबाग मैदान बांधणारे महाराज कळूदेत. विद्यार्थ्यांसाठी मोफत शिक्षणाची व्यवस्था करणारे, त्यांच्या राहण्या-खाण्याची सोय व्हावी यासाठी वसतीगृहे उभारणारे महाराज आज सर्वांपर्यंत पोहोचूदेत. ज्यांच्यामुळे हजारो लोकांच्या रोजगाराची व्यवस्था झाली, आजही ज्यांच्यामुळे लाखो लोकांचे पोट भरते, ते सहकार चळवळीचा पाया रचणारे, उद्योगधंद्यांच्या वाढीसाठी प्रोत्साहन देणारे कोल्हापूरचे दूरदृष्टी असणारे एकमेव लोकराजा राजर्षी शाहू महाराज यांच्या स्मृतीस कोटी कोटी वंदन 🙏 #📆छत्रपती शाहू महाराज पुण्यतिथी🌺