#😱भीषण स्फोट मध्ये 13 जणांचा मृत्यू💣 कतारमधील रास लाफान औद्योगिक शहरात झालेल्या भीषण स्फोटात 13 जणांचा मृत्यू झाला आहे. यात काही भारतीय लोकांचाही समावेश आहे. कतार एनर्जीने सोमवारी जारी केलेल्या अधिकृत निवेदनात सांगितले की, देशातील प्रमुख ऊर्जा केंद्र असलेल्या रास लाफान औद्योगिक शहरातील बरजान परिसरात रविवारी उशिरा रात्री हा स्फोट झाला. या दुर्दैवी घटनेबद्दल कंपनीने तीव्र दुःख व्यक्त करत मृतांच्या कुटुंबीयांप्रती संवेदना व्यक्त केल्या आहेत. मृतांमध्ये भारतीय लोकांचा समावेश कंपनीच्या प्रवक्त्यांनी दिलेल्या माहितीनुसार, घरगुती गॅस पुरवठा प्रकल्पाची देखभाल केल्यानंतर पुन्हा बसवताना हा स्फोट झाला. स्फोटानंतर मोठी आग लागली होती, मात्र स्थानिक अग्निशमन दल आणि आपत्कालीन सेवांच्या पथकांनी ती वेगाने नियंत्रणात आणली. या घटनेतील मृतांमध्ये काही भारतीय आणि पाकिस्तानी नागरिकांचा समावेश आहे. या दुर्घटनेत एकूण 66 जण जखमी झाले आहेत. जखमींमध्ये कतार, भारत, पाकिस्तान, टांझानिया, गिनी, नेपाळ, बांगलादेश, केनिया आणि नायजेरिया येथील नागरिकांचा समावेश आहे. जखमींवर उपचार सुरू आहेत. LNG उत्पादनावर परिणाम नाही रास लाफान हे कतारचे सर्वात मोठे औद्योगिक आणि ऊर्जा केंद्र असून येथे जगातील सर्वात मोठ्या द्रवीकृत नैसर्गिक वायू (LNG) उत्पादन आणि निर्यात सुविधा आहेत. हा परिसर कतारच्या अर्थव्यवस्थेचा मुख्य आधार मानला जातो आणि जागतिक LNG पुरवठ्यात महत्त्वाची भूमिका बजावतो. कतार एनर्जीने स्पष्ट केले आहे की या स्फोटामुळे LNG उत्पादन, निर्यात प्रक्रियेवर कोणताही परिणाम झालेला नाही. सध्या प्रकल्प आणि बंदर दोन्ही पूर्ण क्षमतेने कार्यरत आहेत. स्फोटाचे कारण शोधण्यासाठी समितीची स्थापना स्फोटाचे नेमके कारण शोधण्यासाठी कतार एनर्जीने उच्चस्तरीय तांत्रिक चौकशी समिती स्थापन केली आहे. तज्ज्ञांचे पथक घटनास्थळी पोहोचले असून पुरावे गोळा करण्याचे काम सुरू आहे. प्राथमिक तपासात प्रकल्प पुन्हा सुरू करण्याच्या प्रक्रियेदरम्यान स्फोट झाल्याचे समोर आले आहे, मात्र अंतिम अहवाल येईपर्यंत कोणताही निष्कर्ष काढण्यात आलेला नाही. स्थानिक प्रशासन आणि सुरक्षा यंत्रणांनी संपूर्ण परिसरातील सुरक्षा वाढवली असून जखमींना सर्वोत्तम वैद्यकीय सुविधा उपलब्ध करून दिल्या जात आहेत.