★నాణ్యత సాకుతో తిరస్కరించకుండా ప్రత్యేక నిబంధనలతో ధాన్యం సేకరించాలి. ★మార్కెట్ యార్డుల్లో టార్పాలిన్లు, తాత్కాలిక షెడ్లు ఏర్పాటు చేయాలి. ★రైతులకు ఆర్థిక నష్టం కలగకుండా ప్రభుత్వం ప్రత్యేక ప్యాకేజీ ప్రకటించాలి. గత రెండు మూడు రోజులుగా కురుస్తున్న అకాల వర్షాల కారణంగా రంగారెడ్డి జిల్లాలోని వ్యవసాయ మార్కెట్ యార్డుల్లో వేలాది వడ్ల బస్తాలు తడిసిపోవడం అత్యంత బాధాకరమని రంగారెడ్డి జిల్లా గ్రంథాలయ సంస్థ పూర్వ ఛైర్మన్ కప్పాటి పాండురంగా రెడ్డి తీవ్ర ఆవేదన వ్యక్తం చేశారు. కంటికి రెప్పలా కాపాడుకున్న పంట చేతికందే సమయంలో వర్షార్పణం కావడంతో రైతాంగం తీవ్ర ఆందోళనలో ఉందన్నారు. ఈ సందర్భంగా ఆయన మాట్లాడుతూ, తడిసిన వడ్లను నాణ్యత పేరుతో తిరస్కరించకుండా, ప్రభుత్వం ప్రత్యేక నిబంధనలను సడలించి తక్షణమే కొనుగోలు చేయాలని డిమాండ్ చేశారు. స్థానిక రైస్ మిల్లర్ల సహకారాన్ని తీసుకుంటూ కొనుగోలు ప్రక్రియను మరింత వేగవంతం చేయాలని కోరారు. ప్రభుత్వానికి ముఖ్య సూచనలు, డిమాండ్లు: తక్షణ కొనుగోళ్లు:అకాల వర్షాలకు దెబ్బతిన్న ధాన్యాన్ని ఎలాంటి షరతులు లేకుండా ప్రభుత్వమే కొనుగోలు చేసి రైతులను ఆదుకోవాలి. రక్షణ చర్యలు:మార్కెట్ యార్డులకు ఇంకా వస్తున్న ధాన్యం తడిసిపోకుండా ఉండేందుకు తగినన్ని టార్పాలిన్లు (కవర్లు), తాత్కాలిక షెడ్లను యుద్ధప్రాతిపదికన ఏర్పాటు చేయాలి. ప్రత్యేక ప్యాకేజీ: ప్రకృతి వైపరీత్యం వల్ల నష్టపోయిన రైతులకు ఎలాంటి ఆర్థిక భారం పడకుండా ప్రభుత్వం ప్రత్యేక ప్యాకేజీని ప్రకటించాలి. "రైతు నష్టపోతే గ్రామీణ ఆర్థిక వ్యవస్థ పూర్తిగా దెబ్బతింటుంది. అన్నదాతలను అన్ని విధాలా ఆదుకోవడం ప్రభుత్వ ప్రథమ కర్తవ్యం. జిల్లా యంత్రాంగం, ప్రభుత్వం వెంటనే స్పందించి కొనుగోలు ప్రక్రియను ప్రారంభించాలని రంగారెడ్డి జిల్లా గ్రంథాలయ సంస్థ పూర్వ ఛైర్మన్ కప్పాటి పాండురంగా రెడ్డి డిమాండ్ చేసారు.