#📙 നോവൽ #🧟 പ്രേതകഥകൾ! #✍ തുടർക്കഥ #✍️ വട്ടെഴുത്തുകൾ #📔 കഥ സിമന്റ് സജി ( കഥയും കഥാപാത്രങ്ങളും സാങ്കല്പികം. മരിച്ചവരോ മരിക്കാൻ പോകുന്നവരോ ആയി സാമ്യം തോന്നിയാൽ യാദൃശ്ചികം മാത്രം) ……………………………………. തൃശ്ശൂർ നഗരത്തിന്റെ ആകാശരേഖകളിൽ ഇന്ന് കാണുന്ന കൂറ്റൻ കോൺക്രീറ്റ് സൗധങ്ങൾക്കും മേൽപ്പാലങ്ങൾക്കും പിന്നിൽ സിമന്റും ചോരയും മണലും ചേർത്തുണ്ടാക്കിയ ഭീകരമായ ഒരു ചരിത്രമുണ്ട്. നഗരത്തിന്റെ വികസനത്തിനായി ഒഴുകിയ ഓരോ തുള്ളി കോൺക്രീറ്റിനടിയിലും സജി എന്ന ശില്പി തന്റെ പകയുടെ വിത്തുകൾ പാകിയിട്ടുണ്ടെന്ന് ആരും അറിഞ്ഞില്ല. പാലക്കാട്‌ തമിഴ് നാട് അതിർത്തിയിലെ ഒരു സാധാരണ കല്ലുകൊത്തുപണിക്കാരനായ മുരുകന്റെ മകനായി ജനിച്ച സജിക്ക് കല്ലും മണ്ണും വെറും നിർമ്മാണ സാമഗ്രികളായിരുന്നില്ല, പകരം ജീവൻ തുടിക്കുന്ന ശില്പങ്ങളായിരുന്നു. തന്റെ അച്ഛൻ കല്ലിൽ കൊത്തിയെടുക്കുന്ന രൂപങ്ങളിൽ ആത്മാവുണ്ടെന്ന് അവൻ വിശ്വസിച്ചു. "സജീ, കല്ലിന് ഉയിരുണ്ട്, നമ്മൾ കൊടുക്കുന്ന ഓരോ ഉളിക്കൊട്ടും അതിന്റെ ആത്മാവിനെ ഉണർത്തലാണ്," എന്ന് അച്ഛൻ എപ്പോഴും പറയുമായിരുന്നു. അച്ഛന്റെ മരണശേഷം ശില്പകലയിൽ പുതിയ വിപ്ലവങ്ങൾ സൃഷ്ടിക്കാൻ ഇറങ്ങിപ്പുറപ്പെട്ട സജി തൃശ്ശൂർ ഫൈൻ ആർട്സ് കോളേജിലെ ഏറ്റവും മികച്ച വിദ്യാർത്ഥിയായി മാറി. എന്നാൽ ലോകം അവനെ ഒരു കലാകാരനായി അംഗീകരിക്കുന്നതിന് മുൻപേ നഗരത്തിലെ സ്വാധീനശക്തിയുള്ള കോൺട്രാക്റ്റർ സുരേഷും സംഘവും അവന്റെ ജീവിതം തകർത്തു. ഒരു പൊതു പ്ലോട്ടിൽ ഒരു വലിയ മത്സരത്തിനായി അവൻ മാസങ്ങളോളം തപസ്സിരുന്നുണ്ടാക്കിയ ശില്പം ഭൂമി കയ്യേറ്റം എന്നും പറഞ്ഞു അവർ അടിച്ചുതകർത്തു. "ഇതൊരു വെറും കല്ലല്ല സുരേഷേ, ഇതിൽ എന്റെ അമ്മാവുടെ ജീവനുണ്ട്," എന്ന് സജി കരഞ്ഞപേക്ഷിച്ചെങ്കിലും, "അവന്റെ ഒരു കല , എനിക്ക് വേണ്ടത് ഈ ഭൂമിയാണ്," എന്ന് പരിഹസിച്ചുകൊണ്ട് സുരേഷ് കോടാലി വീശി. അത് തടയാൻ ശ്രമിച്ച സജിയുടെ വിരലുകൾ അവർ തല്ലിയൊടിച്ചു. ഒരു ശില്പിയുടെ ആയുധമായ വിരലുകൾ തകർക്കപ്പെട്ടതോടെ സജി മാനസികമായി തളർന്നു പോയി.സജിയുടെ ഉള്ളിലെ കലാകാരൻ ഒരു കൊലയാളിയായി പരിണമിച്ചു. …… വർഷങ്ങൾ കടന്നുപോയി. വിരലുകൾ വളഞ്ഞ തൈറോയ്ഡ് പിടിച്ചു മെലിഞ്ഞു രൂപമേ മാറിപോയ സജി ഉപജീവനത്തിനായി അതേ സുരേഷിന്റെ നിർമ്മാണ സൈറ്റുകളിൽ ഒരു സാധാരണ തൊഴിലാളിയായി ജോലിക്ക് ചേർന്നു.സുരേഷ് അവനെ തിരിച്ചറിഞ്ഞതെ ഇല്ല "നിനക്ക് ഈ വളഞ്ഞ വിരലുകൾ കൊണ്ട് സിമന്റ് ചാക്കെങ്കിലും ചുമക്കാൻ പറ്റുമോ?" എന്ന് സുരേഷ് അന്ന് ചോദിച്ചപ്പോൾ, "പറ്റും സാർ, സിമന്റ് കൂട്ടുമ്പോൾ കൈകൾക്ക് നല്ല ഉറപ്പ് കിട്ടും," എന്ന് സജി വിനീതനായി മറുപടി നൽകി. പകൽ സമയം അവൻ വിനീതനായി കഴിഞ്ഞു. രാത്രികളിൽ അവൻ തന്റെ പുതിയ കല പരീക്ഷിച്ചു. കുതിരാൻ തുരങ്കത്തിന്റെ നിർമ്മാണം പുരോഗമിക്കവെ ഒരു അമാവാസി രാത്രിയിൽ സുരേഷിനെ സജി പുറകിൽ നിന്നും അടിച്ചു വീഴ്ത്തി. ബോധം വന്നപ്പോൾ സുരേഷ് സൈറ്റിലെ വലിയ കോൺക്രീറ്റ് മിക്സിംഗ് ടാങ്കിന് സമീപം ആയിരുന്നു. പെട്ടന്ന് വികൃത മായി ചിരിച്ചു കൊണ്ട് സജി പ്രത്യക്ഷപെട്ടു "നീ ശരിക്കും ആരാണ്? നിനക്ക് എന്താണ് വേണ്ടത്?" എന്ന് സുരേഷ് കിതപ്പോടെ ചോദിച്ചു. മുഖത്തെ സിമന്റ് പൊടി തട്ടിമാറ്റി സജി അട്ടഹസിച്ചുകൊണ്ട് പറഞ്ഞു, "സുരേഷേ, നിനക്കു ഓർമ ഇല്ലേ നീ അന്ന് തകർത്ത ആ ശില്പം നിന്റെ സ്വപ്നങ്ങളിൽ വരാറില്ലേ? എന്റെ അമ്മയുടെ രൂപമുള്ള ആ ശില്പത്തിന് പകരം ഇന്ന് ഞാൻ മറ്റൊരു അത്ഭുതം സൃഷ്ടിക്കാൻ പോവുകയാണ്." പെട്ടന്ന് തന്നെ സജി സുരേഷിനെ ഒരു വലിയ ലോഹക്കൂട്ടിനുള്ളിലേക്ക് തള്ളി, അയാളുടെ പാദങ്ങളിൽ നിന്ന് സിമന്റ് മിശ്രിതം ഒഴിച്ചു തുടങ്ങിയപ്പോൾ, "എന്നെ വിടൂ , നിനക്ക് എത്ര വേണമെങ്കിലും പണം ഞാൻ തരാം," എന്ന് അയാൾ നിലവിളിച്ചു. “ പണം അല്ല എനക്ക് തേവൈ ഉൻ പൊണം” സജി ശാന്തനായി തന്റെ കൈക്കോട്ട് സിമന്റ് മിശ്രിതത്തിലിട്ട് ഇളക്കി. സിമന്റ് നെഞ്ചൊപ്പം എത്തിയപ്പോൾ സജി ഒരു ചെറിയ കുഴൽ എടുത്ത് സുരേഷിന്റെ വായ തുറന്ന് അതിലൂടെ പച്ചയായ സിമന്റ് കുഴമ്പ് നേരിട്ട് അയാളുടെ ഉള്ളിലേക്ക് പമ്പ് ചെയ്തു. "ഇനി നിന്റെ കണ്ണുകൾ അടയ്ക്കൂ സുരേഷേ. നീ ഇനി ഒരു കല്ലാണ്. ," എന്ന് സജി മന്ത്രിച്ചപ്പോൾ സുരേഷിന്റെ ആമാശയവും ശ്വാസകോശവും സിമന്റ് കൊണ്ട് നിറഞ്ഞു. അയാളെ പോലീസിന് കിട്ടുമ്പോൾ അതൊരു കല്ല് പ്രതിമ പോലെ ഉറച്ചിരുന്നു. ……. അന്വേഷണവുമായി ഇൻസ്‌പെക്ടർ വേണുവും അനസും മുന്നോട്ട് പോയെങ്കിലും സജിയുടെ ബുദ്ധിക്ക് മുന്നിൽ അവർ തോറ്റുപോയി. സജി തന്റെ വേട്ടയാടൽ തുടർന്നു. നഗരസഭയിലെ അഴിമതിയുടെ മുഖമായിരുന്ന കൗൺസിലർ ബിജു ജോണിനെയാണ് അവൻ അടുത്തതായി തിരഞ്ഞെടുത്തത്. ഒരു മഴയുള്ള രാത്രിയിൽ പുതിയ ബസ് കാത്തിരിപ്പുകേന്ദ്രത്തിന്റെ സൈറ്റിൽ വെച്ച് ബിജു ജോണിന്റെ മുന്നിലേക്ക് സജി അവതരിച്ചു. "എന്നെ വിടൂ , നിനക്ക് ഞാൻ നല്ലൊരു ലൈഫ് ഉണ്ടാക്കി തരാം," എന്ന് ബിജു ജോൺ കാലുപിടിച്ചു കരഞ്ഞപ്പോൾ, "എന്തിനാ ബിജു പേടിക്കുന്നത്, ഞാൻ നിനക്ക് നൽകുന്നത് നിത്യതയാണ്. ഈ നഗരത്തിലെ ആളുകൾ നിന്റെ പുറത്ത് ഇരിക്കുമ്പോൾ നിനക്ക് കിട്ടുന്ന ആ സുഖം ഒന്നു ആലോചിച്ചു നോക്കൂ," എന്നായിരുന്നു സജിയുടെ മറുപടി. ബസ് സ്റ്റാൻഡിലെ സിമന്റ് ബെഞ്ചിനുള്ളിൽ ബിജു ജോണിനെ സജി പകുതി കുഴിച്ചിട്ടു. കോൺക്രീറ്റ് ഉറച്ചതോടെ ബിജു ജോൺ ആ ബെഞ്ചിന്റെ ഭാഗമായി മാറി. അയാളുടെ നിലവിളികൾ ആ സിമന്റ് മിശ്രിതം ഉള്ളിലേക്ക് കടന്നതോടെ പുറത്തുവരാതെ തൊണ്ടയിൽ കുടുങ്ങി. വെയിലുദിക്കുമ്പോൾ ആ ബെഞ്ചിൽ നിന്ന് ഒരു പ്രത്യേക നീർവിയർപ്പ് പൊടിയുന്നത് യാത്രക്കാർ ശ്രദ്ധിച്ചുഅത് ബിജു ജോണിന്റെ അഴുകിയ ശരീരത്തിൽ നിന്നുള്ള രക്തവും വിയർപ്പും സിമന്റിൽ കലർന്നു പുറത്തു വരുന്നതായിരുന്നു. സജി തന്റെ ഓരോ കൊലപാതകത്തെയും ഒരു പ്രദർശനം പോലെയാണ് കണ്ടത്. തന്റെ രഹസ്യങ്ങൾ അറിയാമായിരുന്ന സഹായി അലിയെപ്പോലും സജി വിട്ടില്ല. ഒരു പാലത്തിന്റെ പില്ലറിനുള്ളിൽ അലിയെ ജീവനോടെ കോൺക്രീറ്റ് ചെയ്യുമ്പോൾ, "സജീ, ഞാൻ നിന്റെ കൂടെ നിന്നവനല്ലേ?" എന്ന് അവൻ ദയനീയമായി ചോദിച്ചു. "അതുകൊണ്ട് തന്നെയാണ് അലീ, എന്റെ ഈ വലിയ സാമ്രാജ്യത്തിന്റെ അടിസ്ഥാന ശിലയായി ഞാൻ നിന്നെ മാറ്റുന്നത്," എന്ന് പറഞ്ഞുകൊണ്ട് സജി സിമന്റ് മിക്സർ തുറന്നു. …… സജിയെക്കുറിച്ച് അന്വേഷിക്കാൻ ഇറങ്ങിയ ഇൻവെസ്റ്റിഗേറ്റീവ് ജേർണലിസ്റ്റ് സിജിയും സജിക്ക് ഒരു ശില്പത്തിനുള്ള അസംസ്‌കൃത വസ്തു മാത്രമായിരുന്നു. സജിയുടെ താവളം കണ്ടെത്താൻ ശ്രമിച്ച സിജിയെ അവൻ പിടികൂടി. "സത്യം പുറത്തുകൊണ്ടുവരാനാണല്ലോ നീ വന്നത് സിജി? എന്നാൽ ഇന്ന് നീ ഈ നഗരത്തിലെ ഏറ്റവും വലിയ സത്യത്തിന്റെ ഭാഗമാകും," എന്ന് സജി അവളുടെ കാതിൽ മന്ത്രിച്ചു. സജി അവളെ ബലം പ്രയോഗിച്ച് ഒരു വലിയ കോൺക്രീറ്റ് മിക്സിംഗ് ഡ്രമ്മിനുള്ളിലേക്ക് തള്ളിയിട്ടു. ഡ്രമ്മിനുള്ളിൽ സജി നേരത്തെ തന്നെ ആയിരക്കണക്കിന് മൂർച്ചയുള്ള ഗ്ലാസ് കഷ്ണങ്ങളും സിമന്റും നിറച്ചിരുന്നു. "സജീ... വേണ്ട... നീ ഒരു മനുഷ്യനാണോ!" എന്ന് സിജി ആക്രോശിച്ചപ്പോൾ, "ഞാൻ ഒരു ശില്പിയാണ് സിജി, ഒരു ശില്പിക്ക് ഭാവനയ്ക്ക് അതിരുകളില്ല," എന്ന് പറഞ്ഞ് സജി മിക്സർ ഓൺ ചെയ്തു. കൂറ്റൻ യന്ത്രം കറങ്ങാൻ തുടങ്ങിയതോടെ ഉള്ളിലെ ഗ്ലാസ് കഷ്ണങ്ങൾ സിജിയുടെ ശരീരം ആയിരം കഷ്ണങ്ങളായി കീറിമുറിച്ചു. അവളുടെ രക്തവും മാംസവും കലർന്ന ആ പൈശാചികമായ സിമന്റ് കുഴമ്പ് മേൽപ്പാലത്തിന്റെ ഒരു തൂണിനുള്ളിലേക്ക് സജി ഒഴുക്കി. പിന്നീട് സിജിയെ ആരും കണ്ടില്ല, പക്ഷേ ആ പാലത്തിലൂടെ വലിയ വണ്ടികൾ പോകുമ്പോൾ തൂണിനുള്ളിൽ നിന്ന് ഒരു തേങ്ങൽ കേൾക്കുന്നതായി ആരൊക്കെയോ അഭിപ്രായ പെട്ടു അങ്ങനെ 125 പേരോളം സജിയുടെ കലാ വിരുതിനു ഇരകൾ ആയി മാറി ……. സജിയുടെ ഭ്രാന്ത് തന്റെ അനിയനെ തിരയുന്ന ഗീതയെയും പിന്തുടർന്നു. അവളെ കോൺക്രീറ്റ് ലോറിക്കരികിലേക്ക് വലിച്ചിഴച്ചപ്പോൾ വേണുവും അനസും അവിടെയെത്തി. "എന്റെ അനിയനെ നീ എന്ത് ചെയ്തു രാക്ഷസാ?" എന്ന് ഗീത അലറിയപ്പോൾ, "അവൻ ഇപ്പോൾ അനശ്വരനാണ് ഗീതാ,നിനക്കും ഞാൻ അനശ്വരത നൽകും," എന്ന് പരിഹസിച്ചുകൊണ്ട് സജി കോൺക്രീറ്റ് ഡിസ്ചാർജ് പൈപ്പ് അവളുടെ മുഖത്തിന് നേരെ തിരിച്ചു. മർദ്ദമേറിയ കോൺക്രീറ്റ് മിശ്രിതം ഗീതയുടെ ശരീരത്തിലേക്ക് ഇരച്ചുകയറി. "കീഴടങ്ങൂ സജീ, നിനക്ക് രക്ഷപ്പെടാനാവില്ല," എന്ന് ഇൻസ്‌പെക്ടർ വേണു തോക്ക് ചൂണ്ടി വിളിച്ചുപറഞ്ഞപ്പോൾ, "രക്ഷപ്പെടാനോ? ഞാൻ ഇപ്പോൾ തന്നെ ഈ നഗരത്തിന്റെ ഭാഗമായിക്കഴിഞ്ഞു ഇൻസ്‌പെക്ടർ," എന്ന് ചിരിച്ചുകൊണ്ട് സജി മിക്സർ ലോറിക്കുള്ളിലേക്ക് സ്വയം ചാടി. നിമിഷങ്ങൾക്കുള്ളിൽ ആ യന്ത്രം അവനെ സിമന്റ് കുഴമ്പിനുള്ളിലേക്ക് വലിച്ചെടുത്തു. യന്ത്രം നിർത്തി മിശ്രിതം പുറത്തെടുത്ത പോലീസിന് പക്ഷേ സജിയുടെ ശരീരം കണ്ടെത്താനായില്ല. അവിടെ കിട്ടിയത് അവന്റെ ചോര പുരണ്ട മഴക്കോട്ട് മാത്രമാണ്. …….. മാസങ്ങൾക്ക് ശേഷം നഗരത്തിൽ പുതിയൊരു ആർട്ട് ഗാലറി തുറന്നപ്പോൾ അവിടെ പ്രദർശിപ്പിച്ച ശില്പങ്ങളിൽ സജിയുടെ വിരലടയാളങ്ങൾ പോലീസ് കണ്ടെത്തി. "ഇതൊരു പ്രതിമയല്ല അനസ്, ഇതിനുള്ളിൽ ഒരു മനുഷ്യനുണ്ട്, എനിക്ക് ആ ഗന്ധം തിരിച്ചറിയാം," എന്ന് ഫോറെൻസിക് വിദക്തൻ സാമുവേൽ വിറയലോടെ asi അനസിനോട് പറഞ്ഞു. സജി മരിച്ചിട്ടില്ലെന്നും നഗരത്തിന്റെ ഡ്രെയിനേജ് പൈപ്പുകൾക്കുള്ളിലും ഉപേക്ഷിക്കപ്പെട്ട ഗോഡൗണുകൾക്കുള്ളിലും ഒരു പുതിയ ശില്പശാല അവൻ ഒരുക്കിയിട്ടുണ്ടെന്നും ഇൻസ്‌പെക്ടർ വേണു തിരിച്ചറിഞ്ഞു. സജിയുടെ പുതിയ ശില്പങ്ങളിൽ മനുഷ്യ അസ്ഥികളുടെ പൊടി കലർന്നിരുന്നു. തന്റെ ശില്പങ്ങൾക്ക് ഉറപ്പും ആയുസ്സും കൂട്ടാൻ അവൻ മനുഷ്യരെ കൊന്നു അവരുടെ അസ്ഥികൾ പൊടിച്ച് സിമന്റിൽ ചേർക്കാൻ തുടങ്ങി. തൃശ്ശൂർ നഗരം ഇപ്പോൾ സജിയുടെ ശരീരമാണ്. ഓരോ കെട്ടിടത്തിലും ഓരോ റോഡിലും സജി ജീവിക്കുന്നു. നഗരത്തിലെ പുതിയ മേൽപ്പാലങ്ങളിൽ വിള്ളലുകൾ ഉണ്ടാകുമ്പോൾ അതിൽ നിന്ന് മനുഷ്യന്റെ മുടി നാരുകൾ പുറത്തേക്ക് വരുന്നത് കണ്ട് ജനങ്ങൾ ഭയചകിതരായി. മഴ പെയ്യുമ്പോൾ കെട്ടിടങ്ങളിൽ നിന്ന് ചാരനിറത്തിൽ ഒലിച്ചിറങ്ങുന്ന ദ്രാവകത്തെ നഗരത്തിന്റെ കണ്ണുനീരെന്നല്ല, സജിയുടെ സിമന്റ് കണ്ണുനീർ എന്നാണ് ആളുകൾ വിളിക്കുന്നത്. "നിങ്ങളുടെ വീടിന്റെ തറ പണിയുമ്പോൾ ഒരു നിമിഷം ഓർക്കുക, അതിന്റെ മിനുസത്തിന് പിന്നിൽ അവന്റെ വിരലുകളുണ്ട്." അവൻ ഇപ്പോഴും തൃശ്ശൂരിലെ പണി നടക്കുന്ന ഓരോ സൈറ്റിലും അദൃശ്യനായി ഉണ്ടെന്ന് പറയപ്പെടുന്നു. വടക്കുന്നാഥൻ ക്ഷേത്രത്തിന് ചുറ്റുമുള്ള റോഡുകൾ പണിയുമ്പോൾ പോലും തൊഴിലാളികൾ ഭയത്തോടെയാണ് സിമന്റ് കുഴയ്ക്കുന്നത്. കാരണം, മിശ്രിതത്തിനുള്ളിൽ നിന്ന് ചിലപ്പോൾ വിരലുകൾ ഉയർന്നു വരാറുള്ളത് പോലെ തോന്നാറുണ്ട്. നിങ്ങൾ ചവിട്ടി നടക്കുന്ന കോൺക്രീറ്റ് തറയ്ക്കുള്ളിൽ നിന്ന് ഒരു നേർത്ത ഹൃദയമിടിപ്പ് കേൾക്കുന്നുണ്ടെങ്കിൽ അത് സജിയുടേതാണ്. അവൻ ഈ നഗരത്തെ മുഴുവൻ ഒരു ശവപ്പറമ്പായി മാറ്റാനുള്ള തയ്യാറെടുപ്പിലാണ്. പുതിയൊരു കെട്ടിടം ഉയരുമ്പോൾ, അതിന്റെ തറക്കല്ലിനിടയിൽ സജിയുടെ പകയുടെ ഒരു തുള്ളി രക്തം കലർന്നിട്ടുണ്ടാകാം. കൈയ്യിൽ സിമന്റ് കപ്പുമായി അടുത്ത ഇരയുടെ തലയിലേക്ക് മരണത്തിന്റെ കുഴമ്പ് ഒഴിക്കാൻ അവൻ ഇന്നും കാത്തിരിക്കുന്നു. നിങ്ങളുടെ വീടിന്റെ ചുവരുകൾക്ക് കാതുകളുണ്ടോ എന്നറിയില്ല, പക്ഷേ സജിയുടെ ചുവരുകൾക്ക് ശ്വാസമുണ്ട്. സൂക്ഷിക്കുക! …… End