#😮800 फूट खोल दरीत कार कोसळून 8 मित्रांचा मृत्यू➡️ रायगड: कोकण आणि पश्चिम महाराष्ट्र जोडणाऱ्या पोलादपूर महाबळेश्वर घाटात रविवारी रात्री उशिरा भीषण अपघात झाला आहे. आंबेनळी घाटात एक स्कॉर्पिओ काल खोल दरीत कोसळून झालेल्या या भीषण अपघातात तब्बल आठ जणांचा मृत्यू झाला आहे. सातारा जिल्ह्यातील आजगाव येथील आठ युवक दापोली येथे पर्यटनाचा आनंद लुटून पुन्हा आपल्या गावाकडे निघाले असताना हा अपघात झाला. आंबेनळी घाटात दाभिळ गावच्या हद्दीमध्ये गाडीवरील नियंत्रण सुटल्याने कारला अपघात झाल्याची माहिती आहे. raigad accident आंबेनळी घाटात भीषण अपघात साताऱ्यातील आठ युवकांचा मृत्यू(फोटो- महाराष्ट्र टाइम्स.कॉम) मिळालेल्या माहितीनुसार, प्रतापगड ट्रेकर्ससह भाटिया सर यांची महाबळेश्वर रेस्क्यू टीम, महाड येथील सिस्केप, पोलादपूर पोलिस प्रशासन आणि स्थानिक टीम यांनी घटनास्थळी धाव घेऊन तब्बल 1000 फूट दरीत कोसळलेल्या या युवकांना बाहेर काढण्याचे काम सुरू केलं आहे. सोम सकाळी 7 वाजेपर्यंत एका जणाचा मृतदेह बाहेर काढण्यात यश आले आहे. घटनास्थळी प्रतापगड, रायगड, महाबळेश्वर आदी आपत्कालीन बचाव पथके तैनात करण्यात आली असून पोलीस अधिकारीही घटनास्थळी आहेत. नेमकं काय घडलं? घाटातील तीव्र वळणावर स्कॉर्पिओ गाडी थेट खोल दरीत कोसळली. रात्रीचा अंधार व घाटातील अतिशय दुर्गम भागामुळे प्रशासनाला अपघाताची माहिती मिळण्यास काहीसा उशीर झाल्याचे समजते. बचाव पथके घटनास्थळी दाखल झाल्यानंतर रात्रभर दोरांच्या सहाय्याने दरीत उतरून वाहनापर्यंत पोहोचण्याचा आणि अडकलेल्या प्रवाशांचा शोध घेण्याचा प्रयत्न करण्यात आला. परंतु, अंधार, खोल दरी आणि कठीण भौगोलिक परिस्थितीमुळे कार्यात मोठ्या अडचणी निर्माण होत आहेत. घटनेची गंभीरता लक्षात घेऊन उपविभागीय पोलीस अधिकारी (डीवायएसपी) शंकर काळे, पोलादपूरचे तहसीलदार कपिल घोरपडे तसेच सहाय्यक पोलीस निरीक्षक आनंद रावडे यांनी घटनास्थळी भेट देऊन बचावकार्याचा आढावा घेतला. विविध विभागांमध्ये समन्वय साधून शोधमोहीम अधिक वेगाने राबवण्याच्या सूचना यावेळी अधिकाऱ्यांकडून देण्यात आल्या आहेत. दरम्यान, आंबेनळी घाटात यापूर्वीही अनेक भीषण अपघात झाले आहेत. काही वर्षांपूर्वी दापोली येथील डॉ. बाळासाहेब सावंत कोकण कृषी विद्यापीठातील कर्मचाऱ्यांची बस दरीत कोसळल्याने तब्बल 30 जणांचा जागीच मृत्यू झाला होता. आता पुन्हा एकदा तरुणांच्या वाहनाला झालेल्या भीषण अपघातामुळे आठ ते दहा वर्षांपूर्वी झालेल्या अपघाताच्या काळ्याकुट्ट आठवणी पुन्हा एकदा जाग्या झाल्या आहेत.