#🗞ଓଡ଼ିଶା ଅପଡେଟ📺 ଭୁବନେଶ୍ବର: ଆଜି ଅନ୍ତର୍ଜାତୀୟ ମହିଳା ଦିବସ । ସାରା ବିଶ୍ବରେ ଏହାକୁ ବଡ ଧୂମଧାମ ସହକାରେ ପାଳନ କରାଯାଉଛି। ଚଳିତ ବର୍ଷ ଦୁଇଟି ଭିନ୍ନ କିନ୍ତୁ ଗୁରୁତ୍ୱପୂର୍ଣ୍ଣ ‘ଥିମ୍’ ଚୟନ କରାଯାଇଛି । ବିଶ୍ୱର ବିଭିନ୍ନ ସଂସ୍ଥା ଓ ଜାତିସଂଘ ନିଜ ନିଜର ଲକ୍ଷ୍ୟ ଅନୁଯାୟୀ ଏହି ଦିବସକୁ ପାଳନ କରୁଛନ୍ତି । ମୁଖ୍ୟ ଅଭିଯାନ ଭାବରେ ଥିମ୍ ରହିଛି ‘ଗିଭ୍ ଟୁ ଗେନ୍’ ଅର୍ଥାତ୍ ‘ଉନ୍ନତି ପାଇଁ ସହଯୋଗ କରନ୍ତୁ’ । ମହିଳାମାନଙ୍କୁ କେବଳ ସାହାଯ୍ୟ କରିବା ନୁହେଁ, ବରଂ ସେମାନଙ୍କ ଉପରେ ନିବେଶ କରିବା ଏହାର ଉଦ୍ଦେଶ୍ୟ ରହିଛି ।
ଯଦି ଆମେ ମହିଳାଙ୍କୁ ସମୟ, ଶିକ୍ଷା, ପରାମର୍ଶ ଏବଂ ସମ୍ବଳ ଯୋଗାଇ ଦେବା, ତେବେ ଏହା କୌଣସି କ୍ଷତି ନୁହେଁ, ବରଂ ଏଥିରେ ସମାଜର ଲାଭ ହେବ। ଯେତେବେଳେ ଜଣେ ମହିଳା ସଫଳ ହୁଅନ୍ତି, ସେ ନିଜ ସହ ପରିବାର ଓ ପୂରା ସମାଜକୁ ଆଗକୁ ନେଇଥାନ୍ତି। ତେଣୁ ମହିଳାଙ୍କୁ ସହଯୋଗ କରିବା ଅର୍ଥ ହେଉଛି ସମାଜର ମୂଳଦୁଆକୁ ମଜବୁତ କରିବା । ଏହି ଅବସରରେ ଆଜି ବିଏମସି ପକ୍ଷରୁ ” ସମ୍ପୂର୍ଣ୍ଣା ” ମହିଳା ଗଣଦୌଡ ମାଷ୍ଟର କ୍ୟାଣ୍ଟିନ୍ ଠାରେ ଉଦଘାଟିତ ହୋଇଛି। ଅନ୍ୟପଟେ ଅନ୍ତର୍ଜାତୀୟ ମହିଳା ଦିବସ ଅବସରରେ ରାଜ୍ୟର ସମସ୍ତ ମାତୃଶକ୍ତିଙ୍କୁ ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।
#🗞ଓଡ଼ିଶା ଅପଡେଟ📺 ୦୭.୦୩.୨୦୨୬
ଅପରେସନ ସାଇବର କବଚ:
୩୧,୪୯୮ଟି ମ୍ୟୁଲ୍ (ବେନାମୀ) ବ୍ୟାଙ୍କ ଆକାଉଣ୍ଟ ଯାଞ୍ଚ,୩୨୮ଜଣ ଅଭିଯୁକ୍ତ ଗିରଫ
ସାଇବର ଅପରାଧ ଉପରେ ଲଗାମ ଲଗାଇବା ପାଇଁ ଓଡ଼ିଶା ପୋଲିସ ପକ୍ଷରୁ ଆରମ୍ଭ ହୋଇଥିବା ବିଶେଷ ଅଭିଯାନ ‘ଅପରେସନ ସାଇବର କବଚ’ ସମଗ୍ର ରାଜ୍ୟରେ ଜାରି ରହିଛି।
ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଶ୍ରୀ ଯୋଗେଶ ବାହାଦୁର ଖୁରାନିଆଙ୍କ ନିର୍ଦ୍ଦେଶ କ୍ରମେ ଜିଲ୍ଲା ଏସ୍.ପି. ଓ ଡି.ସି.ପି. ମାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଜିଲ୍ଲା ସାଇବର କ୍ରାଇମ୍ ୟୁନିଟ୍ ମାନଙ୍କ ଦ୍ୱାରା ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏହି ଅଭିଯାନ ଅଧୀନରେ ସାଇବର ଠକେଇରେ ବ୍ୟବହୃତ ମ୍ୟୁଲ୍ (ବେନାମୀ) ବ୍ୟାଙ୍କ ଆକାଉଣ୍ଟ ଏବଂ ଏଥିରେ ସମ୍ପୃକ୍ତ ସହାୟକ ମାନଙ୍କୁ ଚିହ୍ନଟ କରାଯାଇ ଦୃଢ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
ଏପର୍ଯ୍ୟନ୍ତ ‘ଅପରେସନ ସାଇବର କବଚ’ ଅନ୍ତର୍ଗତ ସମଗ୍ର ରାଜ୍ୟରେ ମୋଟ ୩୧,୪୯୮ଟି ମ୍ୟୁଲ୍/ବେନାମୀ ବ୍ୟାଙ୍କ ଆକାଉଣ୍ଟ ଯାଞ୍ଚ କରାଯାଇଥିବା ବେଳେ ୧୦୯୦ଟି ମ୍ୟୁଲ୍ ବ୍ୟାଙ୍କ ଆକାଉଣ୍ଟ ସମ୍ପର୍କିତ ସାଇବର ମାମଲା, ଏ.ଟି.ଏମ୍ ଉଠାଣ ସମ୍ପର୍କିତ ୩୪ଟି, ଚେକ୍ ଉଠାଣ ସମ୍ପର୍କିତ ୩୫ଟି ଏବଂ ୨୩ଟି ନକଲି ସିମ୍/PoS ଯାଞ୍ଚ ସମ୍ପର୍କିତ ମାମଲା ରୁଜୁ କରାଯାଇଛି। ଏହା ସହ ୩୨୮ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ସହ, ନୂଆ ଓ ପୁରୁଣା ୧୮୩ଟି ଏଫ୍.ଆଇ.ଆର୍ ସହ ସଂପୃକ୍ତ ୬୫୩୨ ଜଣ ସନ୍ଦିଗ୍ଧ ଆକାଉଣ୍ଟଧାରୀ ଓ ସହାୟକଙ୍କୁ ଆଇନଗତ ନୋଟିସ୍ ଜାରି କରାଯାଇଛି।
ଏହି ବିଶେଷ ଅଭିଯାନରେ ପୁରୀ ଜିଲ୍ଲା ପୋଲିସ ୧ଟି ବେନାମୀ ଆକାଉଣ୍ଟ ଯାଞ୍ଚ କରି ୧ଟି ମାମଲା ରୁଜୁ କରିବା ସହ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି। ସେହିପରି ରାଉରକେଲା ଜିଲ୍ଲା ପୋଲିସ ୨୨ଟି ବେନାମୀ ଆକାଉଣ୍ଟ ଯାଞ୍ଚ କରି ମ୍ୟୁଲ୍ ବ୍ୟାଙ୍କ ଆକାଉଣ୍ଟ ସଂପୃକ୍ତ ୩ଟି ଏବଂ ଚେକ୍ ଟଙ୍କା ଉଠାଣ ସଂପୃକ୍ତ ୧ଟି ମାମଲା ରୁଜୁ କରି ୩ ଜଣଙ୍କୁ ଆଇନଗତ ନୋଟିସ୍ ଜାରି କରିଛି। ଭୁବନେଶ୍ୱର (UPD) ପୋଲିସ ୧୨ଟି ବେନାମୀ ଆକାଉଣ୍ଟ ଯାଞ୍ଚ କରି ୧ଟି ମାମଲା ରୁଜୁ କରିବା ସହ ୧ ଜଣ ଅଭିଯୁକ୍ତଙ୍କୁ ଗିରଫ କରି ୪ ଜଣଙ୍କୁ ନୋଟିସ୍ ଜାରି କରିଛି। କଟକ (UPD) ପୋଲିସ ଚେକ୍ ଟଙ୍କା ଉଠାଣ ସଂପୃକ୍ତ ୧ଟି ମାମଲା ରୁଜୁ କରିଛି।
ସେହିପରି ନୟାଗଡ଼ ଜିଲ୍ଲା ପୋଲିସ ୮୨ଟି ବେନାମୀ ଆକାଉଣ୍ଟ ଯାଞ୍ଚ କରି ୩୦ ଜଣଙ୍କୁ ଆଇନଗତ ନୋଟିସ୍ ଜାରି କରିଛି। ବଲାଙ୍ଗିର ଜିଲ୍ଲା ପୋଲିସ ୬ଟି, ସୁବର୍ଣ୍ଣପୁର ଜିଲ୍ଲା ପୋଲିସ ୮୦ଟି, ବାଲେଶ୍ୱର ଜିଲ୍ଲା ପୋଲିସ ୩୩ଟି ଏବଂ ଭଦ୍ରକ ଜିଲ୍ଲା ପୋଲିସ ୨୬ଟି ବେନାମୀ ଆକାଉଣ୍ଟ ଯାଞ୍ଚ କରିଛି।
ସେହିପରି ମୟୂରଭଞ୍ଜ ଜିଲ୍ଲା ପୋଲିସ ୨୦ଟି ବେନାମୀ ଆକାଉଣ୍ଟ ଯାଞ୍ଚ କରି ୧୮ ଜଣଙ୍କୁ ଆଇନଗତ ନୋଟିସ୍ ଜାରି କରିଛି। ବ୍ରହ୍ମପୁର ଜିଲ୍ଲା ପୋଲିସ ୮୦ଟି ବେନାମୀ ଆକାଉଣ୍ଟ ଯାଞ୍ଚ କରି ୨ଟି ପୁରୁଣା ଏଫ୍.ଆଇ.ଆର୍ ସଂପୃକ୍ତ ୮୦ ଜଣଙ୍କୁ ନୋଟିସ୍ ଜାରି କରିଛି। ବୌଦ୍ଧ ଜିଲ୍ଲା ପୋଲିସ ୭ଟି ବେନାମୀ ଆକାଉଣ୍ଟ ଯାଞ୍ଚ କରି ୭ ଜଣଙ୍କୁ ନୋଟିସ୍ ଜାରି କରିଛି।
ସେହିପରି ଗଞ୍ଜାମ ଜିଲ୍ଲା ପୋଲିସ ୧୧ଟି, କଳାହାଣ୍ଡି ଜିଲ୍ଲା ପୋଲିସ ୧୨୪ଟି ବେନାମୀ ଆକାଉଣ୍ଟ ଯାଞ୍ଚ କରି ୪ ଜଣଙ୍କୁ ଆଇନଗତ ନୋଟିସ୍ ଜାରି କରିଛି। କୋରାପୁଟ ଜିଲ୍ଲା ପୋଲିସ ୨୩ଟି, ମାଲକାନଗିରି ଜିଲ୍ଲା ପୋଲିସ ୬ଟି ଏବଂ ନୂଆପଡ଼ା ଜିଲ୍ଲା ପୋଲିସ ୧୧୯ଟି ବେନାମୀ ଆକାଉଣ୍ଟ ଯାଞ୍ଚ କରିଛି।
ରାଜ୍ୟବାସୀଙ୍କ ଡିଜିଟାଲ କାରବାରର ସୁରକ୍ଷା ପାଇଁ ଓଡ଼ିଶା ପୋଲିସ ସର୍ବଦା ପ୍ରତିଶ୍ରୁତିବଦ୍ଧ। ସାଇବର ଅପରାଧ ମୁକ୍ତ ଓଡ଼ିଶା ଗଠନ ପାଇଁ ଏହି ଅଭିଯାନ ଆଗାମୀ ଦିନରେ ଆହୁରି କଡ଼ାକଡ଼ି ହେବ ବୋଲି ଡିଜିପି ଶ୍ରୀ ଖୁରାନିଆ ସୂଚନା ଦେଇଛନ୍ତି।
#🗞ଓଡ଼ିଶା ଅପଡେଟ📺 ଭୁବନେଶ୍ୱର : ଆସନ୍ତାକାଲି ଅର୍ଥାତ୍ ରବିବାର ମିଳିବ ସୁଭଦ୍ରା ଯୋଜନାର ଚତୁର୍ଥ କିସ୍ତି ଟଙ୍କା। ଏନେଇ ଶନିବାର ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା।
୧ କୋଟି ୧୨ ଲକ୍ଷ ୫୭ ହଜାର ୬୬୭ ଜଣ ଆବେଦନ କରିଥିଲେ । ସେମାନଙ୍କ ମଧ୍ୟରୁ ୧ କୋଟି ୨ ଲକ୍ଷ ୧୨ ହଜାର ୬୬୫ ଜଣ ମହିଳାଙ୍କୁ ସୁଭଦ୍ରା ଟଙ୍କା ମିଳିବ। ୫ ହଜାର କୋଟିରୁ ଊଦ୍ଧର୍ବ ଟଙ୍କା ହିତାଧିକାରୀଙ୍କ ବ୍ୟାଙ୍କ ଖାତାକୁ ଯିବ। ୨ ଲକ୍ଷ ୧୩ ହଜାର ନୂଆ ହିତାଧିକାରୀ ମଧ୍ୟ ଏଥର ସୁଭଦ୍ରା ଟଙ୍କା ପାଇବେ। ପୁରୀର ତାଳବଣିଆ ଠାରେ ଏକ ବିଶାଳ କାର୍ଯ୍ୟକ୍ରମ ଆୟୋଜନ ହେବ। ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ସମସ୍ତ ହିତାଧିକାରୀଙ୍କୁ ସୁଭଦ୍ରା ଟଙ୍କା ମିଳିବ। ୨ ଲକ୍ଷ ୧୩ ହଜାର ୧୯୮ ଜଣ ନୂଆ ହିତାଧିକାରୀ ସୁଭଦ୍ରା ଟଙ୍କା ପାଇବେ। ସୁଭଦ୍ରା ହିତାଧିକାରୀଙ୍କ ତାଲିକା ବଦଳିବା ଏକ ନିରନ୍ତର ପ୍ରକ୍ରିୟା। ଯେଉଁମାନଙ୍କୁ ୨୧ ବର୍ଷ ହେବ ସେମାନେ ଉକ୍ତ ଯୋଜନାରେ ସାମିଲ ହେବେ। ୬୦ ଟପିଲେ ପେନ୍ସନ ଲିଷ୍ଟକୁ ଯିବେ ବୋଲି ଉପମୁଖ୍ୟମନ୍ତ୍ରୀ କହିଛନ୍ତି।
#🗞ଓଡ଼ିଶା ଅପଡେଟ📺 ଭୁବନେଶ୍ୱର : ସର୍ବ ଭାରତୀୟ ସିଭିଲ ସର୍ଭିସ ପରୀକ୍ଷା (UPSC) ରେ ଅଲ୍ ଇଣ୍ଡିଆ ର୍ୟାଙ୍କ ୧୦୦ ହାସଲ କରିଥିବା କେନ୍ଦୁଝର ଜିଲ୍ଲା ହାଟଡିହି ବ୍ଲକର ମେଧାବୀ ଛାତ୍ର ଶ୍ରୀ ସାତ୍ତ୍ୱିକ ସତ୍ୟକାମ ଦେବତା ଆଜି ନିଜ ପିତାମାତାଙ୍କ ସହ ଲୋକସେବା ଭବନ ଆସି ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସାତ୍ତ୍ୱିକଙ୍କୁ ଅଭିନନ୍ଦନ ଜଣାଇବା ସହ ତାଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଥିଲେ।
ସେ କହିଥିଲେ ଯେ ଏଭଳି ସଫଳତା ରାଜ୍ୟ ବିଶେଷ କରି କେନ୍ଦୁଝର ଜିଲ୍ଲାର ଅନ୍ୟ ଯୁବପିଢ଼ିଙ୍କ ପାଇଁ ପ୍ରେରଣା ହେବ। ଲୋକଙ୍କ ସେବା କରିବା ହିଁ ପ୍ରଶାସନିକ ସେବାର ମୂଳ ଲକ୍ଷ୍ୟ। ଦେଶ ଓ ସମାଜର ଉନ୍ନତି ପାଇଁ ନିଷ୍ଠାର ସହିତ କାମ କରିବାକୁ ମୁଖ୍ୟମନ୍ତ୍ରୀ ସାତ୍ତ୍ୱିକଙ୍କୁ ପରାମର୍ଶ ଦେଇଥିଲେ।
#📰ଦେଶ-ବିଦେଶ ଅପଡେଟ ଇସ୍ରାଏଲ ଓ ଆମେରିକା ସହ ଯୁଦ୍ଧ ସମୟରେ ମଧ୍ୟପ୍ରାଚ୍ୟର ବିଭିନ୍ନ ଦେଶଗୁଡ଼ିକ ଉପରେ ଆକ୍ରମଣ କରିଛି ଇରାନ। ବାହାରିନ ଠାରୁ ଆରମ୍ଭ କରି ୟୁଏଇ ଓ ସାଉଦି ଭଳି ଦେଶରେ ଥିବା ଆମେରିକାର ବେସ୍ଗୁଡ଼ିକ ଇରାନ ପକ୍ଷରୁ ଟାର୍ଗେଟ କରାଯାଇଥିଲା। ଏହାକୁ ନେଇ ମଧ୍ୟପ୍ରାଚ୍ୟର ଦେଶଗୁଡ଼ିକ ମଧ୍ୟ ଇରାନ ଉପରେ ଖପ୍ପା ହୋଇଥିଲେ। ବିଶେଷ କରି ତୈଳ ଡିପୋ ଓ ଏୟାରପୋର୍ଟରେ ଇରାନୀୟ ମିସାଇଲ ମାଡ଼ ହେବାରୁ ଉତ୍ତେଜନା ବଢ଼ିଥିଲା।
ଉତ୍ତେଜନା ବଢ଼ୁଥିବାରୁ ଆଜି ଇରାନ ରାଷ୍ଟ୍ରପତି ମାସୌଦ ପେଜେଶକିଆନ ପଡ଼ୋଶୀ ଦେଶଗୁଡ଼ିକୁ କ୍ଷମା ମାଗିଛନ୍ତି। ଇସ୍ରାଏଲ ଓ ଆମେରିକା ସହ ଉତ୍ତେଜନା ଯୋଗୁ ଇରାନ କେବେ ହେଲେ ଅନ୍ୟ ଦେଶରେ ଅନୁପ୍ରବେଶ ଉଦ୍ଦେଶ୍ୟ ରଖି ନଥିଲା ବୋଲି ସେ କହିଛନ୍ତି। ଏଥିସହ ମଧ୍ୟପ୍ରାଚ୍ୟ କିମ୍ବା କୌଣସି ଗଲ୍ଫ ଦେଶ ଉପରେ ଆଗକୁ ଇରାନ ଆକ୍ରମଣ କରିବ ନାହିଁ ବୋଲି ମଧ୍ୟ ରାଷ୍ଟ୍ରପତି ମାସୌଦ ପ୍ରତିଶ୍ରୁତି ଦେଇଛନ୍ତି।
ଗୋଟିଏ ଟିଭି ବାର୍ତ୍ତାରେ ପେଜେଶକିଆନ କହିଛନ୍ତି ଯେ “ଇରାନର ଅସ୍ଥାୟୀ ନେତୃମଣ୍ଡଳୀ ପରିଷଦ ପଡ଼ୋଶୀ ଦେଶଗୁଡ଼ିକ ଉପରେ ଆକ୍ରମଣ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ସେହି ଦେଶଗୁଡ଼ିକ ଇରାନ ବିରୋଧରେ ଆକ୍ରମଣ ଆରମ୍ଭ ନ କରିବା ଯାଏ ତେହେରାନ କୌଣସି ପ୍ରକାରର ମିସାଇଲ ମାଡ଼ କରିବ ନାହିଁ।
ମୁଁ ବ୍ୟକ୍ତିଗତ ପାଇଁ ପଡ଼ୋଶୀ ଦେଶଗୁଡ଼ିକୁ କ୍ଷମା ମାଗୁଛି। ଅନ୍ୟ ଦେଶରେ ଅନାଧିକାର ପ୍ରବେଶ ପାଇଁ ଆମର କୌଣସି ଉଦ୍ଦେଶ୍ୟ ନାହିଁ। ସ୍ଥାନୀୟ ଅଞ୍ଚଳରେ ଉତ୍ତେଜନାକୁ ଅଧିକ ତୀବ୍ର ନ କରିବା ପାଇଁ ଇରାନ ଏପରି ପଦକ୍ଷେପ ନେଇଛି।”
ପେଜେଶକିଆନଙ୍କ କହିବା କଥା ସୁପ୍ରିମ ଲିଡର ଆୟୋତୁଲ୍ଲା ଖାମେନେଇଙ୍କ ମୃତ୍ୟୁ ପରେ ଗଠନ ହୋଇଥିବା ଅସ୍ଥାୟୀ ଲିଡରଶିପ ପରିଷଦ ପଡ଼ୋଶୀଙ୍କ ଉପରେ ଆକ୍ରମଣ ନ କରିବାକୁ ନିଷ୍ପତ୍ତି ନେଇଛି। ଯେଉଁ ପର୍ଯ୍ୟନ୍ତ ପଡ଼ୋଶୀ ଦେଶଗୁଡ଼ିକ ପକ୍ଷରୁ ଇରାନ ଉପରେ ଆକ୍ରମଣ କରାଯାଇ ନାହିଁ ସେ ଯାଏ ତେହରାନ ମିସାଇଲ ମାଡ଼ କରିବ ନାହିଁ।
ଯଦି ପଡ଼ୋଶୀ ଦେଶକୁ ଆକ୍ରମଣ ପାଇଁ ବ୍ୟବହାର କରଯିବ, ତା’ହେଲେ ଏହାର ଜବାବ ଦେବାକୁ ଇରାନ ପାଖରେ ଅଧିକାର ରହିଥିବା ସେ କହିଛନ୍ତି।
ପଡ଼ୋଶୀ ଦେଶଗୁଡ଼ିକ ଉପରେ ଆକ୍ରମଣ ବନ୍ଦ ପାଇଁ ଇରାନ ନିଷ୍ପତ୍ତି ନେଇଥିଲେ ହେଁ ଇସ୍ରାଏଲ ସହ ଲଢ଼େଇ ଜାରି ରଖିବ ବୋଲି ରାଷ୍ଟ୍ରପତି ସ୍ପଷ୍ଟ କରିଛନ୍ତି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଉତ୍ତେଜନା ମଧ୍ୟରେ ଇରାନକୁ ନିଃସର୍ତ୍ତ ଆତ୍ମସମର୍ପଣ ପାଇଁ କହିଥିଲେ। ହେଲେ ଇରାନ ରାଷ୍ଟ୍ରପତି ପେଜେଶକିଆନ ଏହାକୁ ବେଖାତିର କରିଛନ୍ତି। ଆମେରିକା ଆଗରେ ଇରାନ କୌଣସି ପ୍ରକାରର ମୁଣ୍ଡ ନୁଆଁବ ନାହିଁ ବୋଲି ସେ କହିଛନ୍ତି।
ଟ୍ରମ୍ପଙ୍କ ଆତ୍ମସମର୍ପଣ ଦାବିକୁ ଅଗ୍ରାହ୍ୟ କରି ସେ କହିଛନ୍ତି ଯେ “ଆମେ ନିଃସର୍ତ୍ତ ଆତ୍ମସମର୍ପଣ କରିବୁ ବୋଲି ସେମାନେ ଦେଖୁଥିବା ସ୍ୱପ୍ନକୁ ନର୍କରେ ପକାଇ ଦିଅନ୍ତୁ।”
#📰ଦେଶ-ବିଦେଶ ଅପଡେଟ ଜାତୀୟ ଲୋକସେବା ଆୟୋଗ (UPSC) ଶୁକ୍ରବାର ସିଭିଲ୍ ସର୍ଭିସେସ୍ ପରୀକ୍ଷା (CSE) ୨୦୨୫ ପାଇଁ ଚୂଡ଼ାନ୍ତ ଫଳାଫଳ ଆନୁଷ୍ଠାନିକ ଭାବରେ ଘୋଷଣା କରିଛି।
ଆୟୋଗ ଦ୍ୱାରା ପ୍ରକାଶିତ ମେଧା ତାଲିକା ଅନୁସାରେ, ଅନୁଜ ଅଗ୍ନିହୋତ୍ରୀ ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ହାସଲ କରି ସଫଳତା ପାଇଛନ୍ତି। ଏହି ଘୋଷଣା ନଅ ମାସ ପୂର୍ବରୁ ଆରମ୍ଭ ହୋଇଥିବା ଏକ ଲମ୍ବା ଏବଂ କଠୋର ଚୟନ ପ୍ରକ୍ରିୟାର ଅନ୍ତ ଘଟାଇଛି।
ପରୀକ୍ଷାରେ ଅଂଶଗ୍ରହଣ କରିଥିବା ପ୍ରାର୍ଥୀମାନେ ଏବେ ସରକାରୀ UPSC ପୋର୍ଟାଲରେ ସେମାନଙ୍କର ଫଳାଫଳ ଦେଖିପାରିବେ। ଚୂଡ଼ାନ୍ତ ମେଧା ତାଲିକାର ବିସ୍ତୃତ PDF ସରକାରୀ ୱେବସାଇଟ୍: upsc.gov.in ଏବଂ upsconline.nic.in ରେ ଉପଲବ୍ଧ। ଫଳାଫଳ ଯାଞ୍ଚ କରିବା ପାଇଁ, ପ୍ରାର୍ଥୀମାନଙ୍କୁ ହୋମପେଜରେ ଥିବା ଅପ୍ସନ ‘what’s new’ ବିଭାଗରୁ ଚୂଡ଼ାନ୍ତ ତାଲିକା ଡାଉନଲୋଡ୍ କରିବାକୁ ଏବଂ ସେମାନଙ୍କର ରୋଲ ନମ୍ବର ଖୋଜିବାକୁ ପରାମର୍ଶ ଦିଆଯାଇଛି।
୨୦୨୫ ମେ ୨୫ରେ ସିଭିଲ୍ ସର୍ଭିସେସ୍ ପ୍ରାଥମିକ ପରୀକ୍ଷା(Preliminary) ଅନୁଷ୍ଠିତ ହୋଇଥିଲା। ଯାହା ପ୍ରାର୍ଥୀଙ୍କ ପାଇଁ ପ୍ରଥମ ସୋପାନ ଥିଲା। ଯେଉଁମାନେ ଯୋଗ୍ୟତା ହାସଲ କରିଥିଲେ ସେମାନେ ୨୨ ଅଗଷ୍ଟରୁ ୩୧ ଅଗଷ୍ଟ, ୨୦୨୫ ପର୍ଯ୍ୟନ୍ତ ଅନୁଷ୍ଠିତ ମୁଖ୍ୟ ପରୀକ୍ଷାରେ ଯୋଗ ଦେଇଥିଲେ। ଶେଷ ପ୍ରତିବନ୍ଧକ ଥିଲା ବ୍ୟକ୍ତିତ୍ୱ ପରୀକ୍ଷା ବା ସାକ୍ଷାତକାର ଯାହା ଗତ ଫେବୃଆରୀ ୨୭ରେ ସମାପ୍ତ ହୋଇଥିଲା। ଏହି ବର୍ଷ, ସାକ୍ଷାତକାର ସମାପ୍ତି ପରେ UPSC ଦ୍ୱାରା ଏକ ସପ୍ତାହ ବିଳମ୍ବରେ ଫଳାଫଳ ଘୋଷଣା କରାଯାଇଛି।
ଫଳାଫଳ ଅନୁସାରେ ଆଇଏଏସ୍, ଆଇପିଏସ, ଆଇଏଫଏସ ଏବଂ କେନ୍ଦ୍ରୀୟ ସେବା ସମେତ ବିଭିନ୍ନ ପ୍ରତିଷ୍ଠିତ ସେବାରେ ନିଯୁକ୍ତି ପାଇଁ କମିଶନ ଦ୍ୱାରା ମୋଟ ୯୫୮ ପ୍ରାର୍ଥୀଙ୍କୁ ସୁପାରିଶ କରାଯାଇଛି।
#📰ଦେଶ-ବିଦେଶ ଅପଡେଟ ବତକ ମାଂସ ଖାଇବା ପାଇଁ ଚାହୁଁଥିବା ଜଣେ ସାଧାରଣ ବ୍ୟକ୍ତି ବନି ଯାଇଛନ୍ତି ଲକ୍ଷପତି। ସେ ଗୋଟିଏ ବତକୁ ହାଣି ମାଂସ ବାହାର କରୁଥିବା ବେଳେ ତା’ ପେଟରୁ ପାଇଛନ୍ତି ସୁନା ଖଣ୍ଡ। ଏହାକୁ ଦେଖି ଗ୍ରାମବାସୀ ଜଣଙ୍କ ବେଶ ଖୁସି ହୋଇ ଯାଇଛନ୍ତି। ବତକ ପେଟରୁ ସୁନା ବାହାରିବା ଘଟଣା ପୂରା ଚର୍ଚ୍ଚାର ବିଷୟ ପାଲଟିଛି।
କେନ୍ଦ୍ରୀୟ ଚାଇନା ରୁ ଏପରି ଖବର ସାମ୍ନାକୁ ଆସିଛି। ଚଳିତ ବର୍ଷ ଫେବୃଆରୀ ମାସରେ ଏପରି ଘଟଣା ଘଟିଥିଲା। ବତକ ପେଟରୁ ସୁନା ପାଇଥିବା ଗ୍ରାମବାସୀଙ୍କୁ ଲିଉ ଭାବେ ଚିହ୍ନଟ କରାଯାଇଛି। ସେ ବତକଟିକୁ କାଟିବା ସମୟରେ ତା’ ପେଟରୁ କିଛି ସୁନା ଖଣ୍ଡ ପାଇଥିଲେ।
ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ, ଲିଉ ଚକଚକ କରୁଥିବା ଜିନିଷକୁ ବତକ ପେଟରୁ ପାଇବା ପରେ ଚିକିତ ହୋଇ ଯାଇଥିଲେ। ପ୍ରାରମ୍ଭିକ ପର୍ଯ୍ୟାୟରେ ଏହା ସୁନା ଖଣ୍ଡ ବୋଲି ତାଙ୍କୁ ଜଣାନଥିଲା। କିନ୍ତୁ ପବର୍ତ୍ତୀ ଅବସ୍ଥାରେ ଏହାକୁ ପରୀକ୍ଷା କରାଯିବା ପରେ ବତକ ପେଟରୁ ମିଳିଥିବା ଚକଚକ ଜିନିଷ ସୁନା ବୋଲି ସ୍ପଷ୍ଟ ହୋଇଥିଲା।
ବତକ ପେଟରୁ ମିଳିଥିବା ସୁନାର ଓଜନ ପ୍ରାୟ ୧୦ ଗ୍ରାମ। ଏହାର ଦାମ ୧୨ ହଜାର ୟୁଆନ ବା ୧,୬୫,୮୨୧ ଟଙ୍କା। ଲିଉଙ୍କ ବାପା ଏପରି ସୁନା ଠାବକୁ ଅଲୌକିକ ମୁହୂର୍ତ୍ତର ସଙ୍କେତ ବୋଲି କହିଛନ୍ତି। ବର୍ଷର ଆଗାମୀ ଦିନଗୁଡ଼ିକ ତାଙ୍କ ପରିବାର ପାଇଁ ଶୁଭ ହେବ ବୋଲି ସେ ଆଶାବାଦୀ ରହିଛନ୍ତି।
ଲିଉଙ୍କ କହିବା କଥା ଯେ ଗାଁର ଲୋକମାନେ ବତକ ମାନଙ୍କୁ ବାହାରେ ଲାଳନପାଳନ କରନ୍ତି। ବତକଗୁଡ଼ିକ ସାଧାରଣତଃ ସ୍ଥାନୀୟ ଅଞ୍ଚଳରେ ଥିବା ଗୋଟିଏ ନଦୀ ନିକଟରେ ବୁଲନ୍ତି। ପୂର୍ବରୁ ଉକ୍ତ ନଦୀ ପଠାରେ ସୁନା ଖଣି ଥିବା ବିଶ୍ୱାସ କରାଯାଏ। ଏହିକ୍ରମରେ ବତକଟି ସେଠାରେ ବୁଲିବା ସମୟରେ କିଛି ମାଟି ଗିଳି ଦେଇଥିଲା। ସମ୍ଭବତଃ ଏତିକି ବେଳେ ତା’ ପେଟକୁ ଛୋଟ ସୁନା ଖଣ୍ଡ ଚାଲି ଯାଇଥିଲା। ଏବେ ବତକକୁ ମାଂସ ପାଇଁ କାଟିବା ପରେ ତା’ ପେଟରୁ ସୁନା ମିଳିଛି।
ବିଶେଷଜ୍ଞଙ୍କ କହିବା କଥା ମଣିଷ କିମ୍ବା ପଶୁ-ପକ୍ଷୀ ସୁନାକୁ ହଜମ କରିପାରନ୍ତି ନାହିଁ। ସୁନା ଖଣ୍ଡ ସାଧାରଣତଃ ହଜମ ନଳୀ ଦେଇ ଚାଲି ଯାଏ। କିନ୍ତୁ ସୁନା ଖଣ୍ଡ ଯଦି ବଡ଼ କିମ୍ବା ମୋଟା ହୋଇଥିବ, ତା’ହେଲେ ଏହା ବ୍ଲକେଜ କିମ୍ବା ବିଷକ୍ରିୟା ସୃଷ୍ଟି କରିପାରେ।
ଲିଉ କହିଛନ୍ତି ଯେ ତାଙ୍କ ପୂର୍ବରୁ ମଧ୍ୟ ଗାଁର ଅନେକ ଲୋକ ବତକ ପେଟରୁ ଏମିତି ସୁନା ଖଣ୍ଡ ପାଇଥିଲେ। ହେଲେ ତାଙ୍କ ଭଳି କେହି ବି ୧୦ ଗ୍ରାମର ସୁନା କେବେ ହେଲେ ଠାବ କରିପାରି ନଥିଲେ।
#📰ଦେଶ-ବିଦେଶ ଅପଡେଟ ନେପାଳ ଜେନ ଜେଡ ଝଡ଼ର ଚେହେରା ବାଲେନ ଶାହଙ୍କ ଯାଦୁ। ହିଂସାମତ୍କ ଜେନ ଜେଡ ଆନ୍ଦୋଳନ ପରେ ନିଜର ଦଳ ଗଠନ କରିଥିବା ବାଲେନ ଶାହ ଏବେ ନେପାଳର କ୍ଷମତା ଦଖଲ କରିବା ଦିଗରେ ଆଗେଇ ଚାଲିଛନ୍ତି।
ନେପାଳ ସଂସଦୀୟ ନିର୍ବାଚନରେ ବାଲେନ ଶାହଙ୍କ ରାଷ୍ଟ୍ରୀୟ ସ୍ୱତନ୍ତ୍ର ପାର୍ଟି(ଆରଏସ୍ପି)ର ଏକତରଫା ପ୍ରଦର୍ଶନ। ନେପାଳର ୨୭୫ ଲୋକସଭା ଆସନରୁ ଭୋଟିଂ ହେଉଥିବା ୧୬୫ ଆସନରେ ବାଲେନଙ୍କ ଦଳ ବଡ଼ ବିଜୟ ଦିଗରେ ଆଗେଇ ଚାଲିଛି।
ନେପାଳରେ ୧୬୫ଟି ଆସନ ପାଇଁ ସିଧାସଳଖ ଭୋଟିଂ ହୋଇଥାଏ। ବାକି ୧୧୦ ଆସନ ଅନୁପାତିକ ପ୍ରତିନିଧିତ୍ୱ ବ୍ୟବସ୍ଥା ଦ୍ୱାରା ହୋଇଥାଏ। ଅର୍ଥାତ ଯେଉଁ ଦଳକୁ ଯେତେ ପ୍ରତିଶତ ଭୋଟ ମିଳିବ, ସେହି ଅନୁସାରେ ୧୧୦ ଆସନରୁ ସେମାନଙ୍କୁ ସାଂସଦ ଚୟନ ପାଇଁ ଅନୁମତି ମିଳିବ। ଗୁରୁବାର ନେପାଳରେ ୧୬୫ଟି ଆସନ ପାଇଁ ସିଧାଳସଖ ଭୋଟ ହୋଇଥିବା ବେଳେ ଆଜି ଗଣତି ଚାଲିଛି।
ବର୍ତ୍ତମାନ ସୁଦ୍ଧା ହୋଇଥିବା ଗଣତି ଅନୁସାରେ ବାଲେନ ଶାହଙ୍କ ଆରଏସପି ୧୦୨ଟି ଆସନରେ ଲିଡ କରୁଛି। ପୂର୍ବତନ ପ୍ରଧାନମନ୍ତ୍ରୀ ତଥା CPN (UML) କେପି ଶର୍ମା ଓଲି ୧୧ଟି ଆସନରେ ଆଗରେ ରହିଛନ୍ତି। ସେହିପରି ଗଗନ ଥାପ୍ପାଙ୍କ ନେପାଳୀ କଂଗ୍ରେସ ମଧ୍ୟ ୧୧ଟି ଆସନରେ ଜିତିବାର ସମ୍ଭାବନା ସୃଷ୍ଟି କରିଛି।
ଝାପା-୫ ଆସନରେ ସିଧାସଳଖ ବାଲେନ ଶାହ ଓ କେପି ଓଲି ଶର୍ମାଙ୍କ ମଧ୍ୟରେ ଟକ୍କର ହେଉଛି। କିନ୍ତୁ ଏଠାରେ ବାଲେନ ଶାହ ଲିଡ କରୁଛନ୍ତି। ବର୍ତ୍ତମାନ ସୁଦ୍ଧ ବାଲେନଙ୍କୁ ୭ ହଜାର ଭୋଟ ମିଳିଥିବା ବେଳେ ଓଲି ଶର୍ମା ୧୪ ଶହ ଭୋଟ ପାଇଛନ୍ତି। ସେହିପରି ଆଉ କିଛି ସ୍ଥାନରେ ଆରଏସ୍ପି ପ୍ରାର୍ଥୀମାନେ ବିଜୟୀ ହୋଇ ସାରିଲେଣି। ଯଦି ଏହି ଟ୍ରେଣ୍ଡ ଜାରି ରହିବ, ତା’ହେଲେ ରେକର୍ଡ ବିଜୟ ସହ ବାଲେନ ଶାହ ନେପାଳର ପ୍ରଧାନମନ୍ତ୍ରୀ ହୋଇ ପାରନ୍ତି।
ପ୍ରଧାନମନ୍ତ୍ରୀ ହେବା ପାଇଁ ନେପାଳ ସଂସଦରେ ୧୩୮ ଜଣ ସାଂସଦଙ୍କ ସମର୍ଥନ ଆବଶ୍ୟକ। ଏଥିପାଇଁ ସିଧାସଳଖ ଭୋଟିଂ ହେଉଥିବା ଆସନଗୁଡ଼ିକ ଜିତିବା ସହ ନିଜର ଭୋଟ ଭାଗ ମଧ୍ୟ ବୃଦ୍ଧି କରିବାକୁ ପଡ଼ିବ। ଏବେ ବାଲେନ ଶାହଙ୍କ ଦଳ ଭୋଟିଂ ହୋଇଥିବା ୨/୩ ଆସନରେ ଲିଡ କରୁଛି। ହେଲେ ଦଳର ଭୋଟ ଶେୟାର କେତେ ରହିଛି, ସେକଥା ଜଣାପଡ଼ିନି।
ବାଲେନ ଶାହ ଏକଦା କାଠମାଣ୍ଡୁ ମହାନଗର ପାଳିକାର ମେୟର ଭାବେ କାମ କରୁଥିଲେ। କିନ୍ତୁ ଖୁବଶୀଘ୍ର ସେ ନେପାଳର ପ୍ରଧାନମନ୍ତ୍ରୀ ଭାବେ ଦାୟିତ୍ୱ ମଧ୍ୟ ନେଇ ପାରନ୍ତି। ଯୁବଗୋଷ୍ଠୀଙ୍କୁ ନିର୍ବାଚନ ଜରିଆରେ ସେ ପରିବର୍ତ୍ତନର ଆହ୍ୱାନ ଦେଇଥିଲେ। ଏବେ ଏହା ସତ ହେବାର ଯଥେଷ୍ଟ ସମ୍ଭାବନା ରହିଛି।
୨୦୨୫ରେ ଓଲି ସରକାର ବିରୋଧରେ ନେପାଳର ଯୁବଗୋଷ୍ଠୀ ଯୁଦ୍ଧଂଦେହୀ ଡାକରା ଦେବାରୁ ନେପାଳ ସ୍ଥିତି ବେକାବୁ ହୋଇଥିଲା। ଓଲି ସରକାର ଦୁର୍ନୀତି ଗ୍ରସ୍ତ ବୋଲି ଯେଉଁ ନାରା ଦିଆଯାଇଥିଲା, ତାହା ବିସ୍ଫୋରକ ରୂପ ନେଇଥିଲା। ପୋଡ଼ାଜଳା ଓ ଭଙ୍ଗାରୁଜା ତଥା ଜେନ ଜେଡ ବିକ୍ଷୋଭକାରୀଙ୍କ ଚାପ ଯୋଗୁ ନେପାଳର ପ୍ରଧାନମନ୍ତ୍ରୀ ପଦରୁ କେପି ଶର୍ମା ଓଲି ଇସ୍ତଫା ଦେଇଥିଲେ।
ଏହାପରେ ନେପାଳରେ ଏବେ ନିର୍ବାଚନ ହୋଇଛି। ନିର୍ବାଚନରେ ନେପାଳର ପ୍ରାୟ ସବୁ ବର୍ଗର ଲୋକ ବାଲେନ ଶାହଙ୍କୁ ସମର୍ଥନ କରୁଛନ୍ତି। ସେ ଚିରାଚରିତ ଢଙ୍ଗ ବଦଳରେ ବେଶ ନାଟକୀୟ ଭାବେ ରାଜନୀତିରେ ପ୍ରବେଶ କରିଥିବାରୁ ସମସ୍ତଙ୍କ ଧ୍ୟାନ ମଧ୍ୟ ଆକର୍ଷଣ କରିପାରିଛନ୍ତି।
#📰ଦେଶ-ବିଦେଶ ଅପଡେଟ ବେଙ୍ଗାଲୁରୁ : କର୍ଣ୍ଣାଟକରେ ପିଲାମାନଙ୍କ ପାଇଁ ସୋସିଆଲ ମିଡିଆ ଉପରେ ପ୍ରତିବନ୍ଧକ ଲଗାଯାଇଛି । ବଜେଟ ଅଧିବେଶନ ସମୟରେ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ବିଧାନସଭାରେ ସୋସିଆଲ ମିଡିଆ ଉପରେ ପ୍ରତିବନ୍ଧକ ନେଇ ଘୋଷଣା କରିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ ୧୬ ବର୍ଷରୁ କମ୍ ବୟସର ପିଲାମାନେ ସୋସିଆଲ ମିଡିଆ ବ୍ୟବହାର କରିପାରିବେ ନାହିଁ । ପିଲାମାନଙ୍କ ଉପରେ ମୋବାଇଲ ଫୋନ୍ ବ୍ୟବହାରର ନକାରାତ୍ମକ ପ୍ରଭାବ ଯୋଗୁଁ ୧୬ ବର୍ଷରୁ କମ୍ ବୟସର ପିଲାମାନଙ୍କ ଉପରେ ଏହି ପ୍ରତିବନ୍ଧକ ଲଗାଯାଇଛି ।
ଶିଶୁମାନଙ୍କ ପାଇଁ ସୋସିଆଲ ମିଡିଆ ବ୍ୟବହାରକୁ ନିଷେଧ କରିବାରେ କର୍ଣ୍ଣାଟକ ଦେଶର ପ୍ରଥମ ରାଜ୍ୟ ହୋଇଛି। ତଥାପି, ଗୋଆ, ମହାରାଷ୍ଟ୍ର ଏବଂ ବିହାରରେ ମଧ୍ୟ ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟବହାରକୁ ନିଷେଧ କରିବା ସମ୍ପର୍କରେ ଅଂଶୀଦାରମାନଙ୍କ ସହିତ ପରାମର୍ଶ କରାଯାଉଛି । ପିଲାମାନଙ୍କ ପାଇଁ ସୋସିଆଲ ମିଡିଆ ପ୍ରତିବନ୍ଧକ ଲାଗୁ କରିବା ପାଇଁ ଏହି ରାଜ୍ୟଗୁଡ଼ିକରେ ସରକାରଙ୍କ ଦ୍ୱାରା ଟାସ୍କ ଫୋର୍ସ ଗଠନ କରାଯାଇଛି।
ଗତ ମାସରେ, ରାଜ୍ୟ ଉଚ୍ଚଶିକ୍ଷା ପରିଷଦର ଭାଇସ୍ ଚାନ୍ସେଲରଙ୍କ ସହ କଥାବାର୍ତ୍ତା ସମୟରେ, କର୍ଣ୍ଣାଟକର ମୁଖ୍ୟମନ୍ତ୍ରୀ ଅଷ୍ଟ୍ରେଲିଆର ଉଦାହରଣ ଦେଇ ବୟସ-ଉପଯୁକ୍ତ ସୋସିଆଲ ମିଡିଆ ପ୍ରତିବନ୍ଧକ ବିଷୟରେ ଆଲୋଚନା କରିଥିଲେ। ଏହି ସମୟ ମଧ୍ୟରେ, ସରକାର ସୋସିଆଲ ମିଡିଆ ପ୍ରତିବନ୍ଧକ ପାଇଁ ଆନ୍ତର୍ଜାତୀୟ ମଡେଲଗୁଡ଼ିକର ଅଧ୍ୟୟନ କରିବାକୁ ନିଷ୍ପତ୍ତି ନେଇଥିଲେ।
ତାଙ୍କ ବଜେଟ୍ ଭାଷଣ ସମୟରେ, କର୍ଣ୍ଣାଟକ ମୁଖ୍ୟମନ୍ତ୍ରୀ ଘୋଷଣା କରିଥିଲେ ଯେ ISRO ଏବଂ Keonics ସହଯୋଗରେ IISC ଅଧୀନରେ ବେଙ୍ଗାଲୁରୁ ରୋବୋଟିକ୍ସ ଏବଂ AI ଇନୋଭେସନ୍ ଜୋନ୍ ନାମକ ଏକ ରୋବୋଟିକ୍ସ ଏବଂ AI କ୍ୟାମ୍ପସ୍ ପ୍ରତିଷ୍ଠିତ ହେବ। ସେ ବ୍ୟାଖ୍ୟା କରିଥିଲେ ଯେ ସୋସିଆଲ ମିଡିଆର ନକାରାତ୍ମକ ପ୍ରଭାବ ଏବଂ ୧୬ବର୍ଷରୁ କମ୍ ବୟସର ପିଲାମାନଙ୍କ ଉପରେ ମୋବାଇଲ୍ ଫୋନ୍ ବ୍ୟବହାର ବୃଦ୍ଧି ପାଉଥିବାରୁ ଏହି କଠୋର ନିଷ୍ପତ୍ତି ନିଆଯାଇଛି।
#🗞ଓଡ଼ିଶା ଅପଡେଟ📺 ଭୁବନେଶ୍ୱର : ଭୁବନେଶ୍ୱର ବିମାନବନ୍ଦରରେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଶୁକ୍ରବାର ଆସି ପହଞ୍ଚିଛନ୍ତି। ଶାହା ବାୟୁସେନାର ଏକ ସ୍ବତନ୍ତ୍ର ବିମାନରେ ଆସି ଭୁବନେଶ୍ୱର ବିମାନବନ୍ଦରରେ ପହଞ୍ଚିଥିଲେ। ଏଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ସ୍ବାଗତ କରିଥିଲେ। ରାଜ୍ୟ ଭାଜପା ସଭାପତି ମନମୋହନ ସାମଲ ମଧ୍ୟ ବିମାନବନ୍ଦରରେ ଉପସ୍ଥିତ ରହି ଶାହାଙ୍କୁ ସ୍ବାଗତ କରିଛନ୍ତି। ଆଜି କଟକ, ଭୁବନେଶ୍ୱର, ପାରାଦୀପରେ ସ୍ବତନ୍ତ୍ର କାର୍ଯ୍ୟକ୍ରମ ରହିଛି। ଏଥିସହିତ ମୁଣ୍ଡଳିରେ ସିଆଇଏସ୍ଏଫ୍ର ୫୭ତମ ପ୍ରତିଷ୍ଠା ଉତ୍ସବରେ ଶାହା ମଧ୍ୟ ଯୋଗ ଦେବାକୁ ଓଡ଼ିଶା ଆସିଛନ୍ତି।
ଗୁରୁବାର ଗୃହ ବିଭାଗ ଅତିରିକ୍ତ ସଚିବ ଭବେଶ କୁମାର ନାୟକ ଏ ସଂକ୍ରାନ୍ତରେ ରାଜ୍ୟ ଉନ୍ନୟନ ଆୟୁକ୍ତ, ପୋଲିସ ମହାନିର୍ଦେଶକଙ୍କ ସମେତ ସଂପୃକ୍ତ ବିଭାଗୀୟ ମୁଖ୍ୟଙ୍କୁ ଅବଗତ କରାଇଥିଲେ। ବିଭାଗ ପକ୍ଷରୁ ଜାରି ସଂଶୋଧିତ ସୂଚୀ ଅନୁଯାୟୀ, ସ୍ବରାଷ୍ଟ୍ର ମନ୍ତ୍ରୀ ଶାହା ବିଏସ୍ଏଫ୍ ହେଲିକପ୍ଟରରେ ଭୁବନେଶ୍ୱର ବିମାନବନ୍ଦରଠାରୁ କଟକ ମୁଣ୍ଡୁଳି ଅଭିମୁଖେ ଯିବେ। ସେଠାରେ ୧୦ଟା ୫୫ ମିନିଟରେ ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟ୍ ଫୋର୍ସର ରାଇଜିଂ ଡେ’ ତଥା ସ୍ଥାପନ ଦିବସରେ ଯୋଗଦେବେ। ଏହାପରେ ଅପରାହ୍ନ ୧ଟା ୩୫ମିନିଟରେ ମୁଣ୍ଡୁଳିରୁ ପ୍ରତ୍ୟାବର୍ତ୍ତନ କରି ପାରାଦୀପ ଇଫ୍କୋ ୟୁନିଟ୍କୁ ଗସ୍ତ କରିବେ। ସେଠାରେ ସଲ୍ଫ୍ୟୁରିକ୍ ଏସିଡ ପ୍ଲାଣ୍ଟର ଲୋକାର୍ପଣ କରିବେ। ଏହାପରେ ଭୁବନେଶ୍ୱର ପ୍ରତ୍ୟାବର୍ତ୍ତନ କରି ଅପରାହ୍ନ ୩ଟା ୫୫ମିନିଟରେ ଏନ୍ଏଫ୍ଏସ୍ୟୁର ସ୍ଥାୟୀ ଏବଂ ପରେ ସିଏଫ୍ଏସଏଲ ଭବନର ଶିଳାନ୍ୟାସ କରିବେ। ଏହି ଅବସରରେ ଇଡ଼କୋ ପ୍ରଦର୍ଶନୀ ପଡ଼ିଆରେ ୩ଟି ନୂତନ ଆଇନ ଉପରେ ରାଜ୍ୟସ୍ତରୀୟ ପ୍ରଦର୍ଶନ କାର୍ଯ୍ୟକ୍ରମରେ ଯୋଗଦେବାର ରହିଛି। ସନ୍ଧ୍ୟା ୭ଟା ୩୦ମିନିଟରେ ଦିଲ୍ଲୀ ଅଭିମୁଖେ ସ୍ବରାଷ୍ଟ୍ରମନ୍ତ୍ରୀ ଶାହା ପ୍ରତ୍ୟାବର୍ତ୍ତନ କରିବେ ବୋଲି ଗୃହ ବିଭାଗ ପକ୍ଷରୁ କୁହାଯାଇଛି।
