#📰ଦେଶ-ବିଦେଶ ଅପଡେଟ ଇସଲାମାବାଦ : ପାକିସ୍ତାନର ସବୁଠାରୁ ବଡ଼ ସହର କରାଚୀରୁ ଏକ ଦୁଃଖଦ ଖବର ଆସିଛି। ଏକ ଆବାସିକ ଅଞ୍ଚଳରେ ଏକ ଶକ୍ତିଶାଳୀ ବିସ୍ଫୋରଣ ସମଗ୍ର ଅଞ୍ଚଳକୁ ଥରାଇ ଦେଇଛି। ଫେବୃଆରୀ ୧୯ ପବିତ୍ର ରମଜାନ ମାସର ଆରମ୍ଭ। ରୋଜାର ପ୍ରଥମ ଦିନରେ କରାଚୀ ଏକ ଶକ୍ତିଶାଳୀ ବିସ୍ଫୋରଣରେ ଥରି ଉଠିଥିଲା। ପ୍ରାରମ୍ଭିକ ରିପୋର୍ଟ ଅନୁଯାୟୀ, ଏହି ଘଟଣାରେ ଅତି କମରେ ୧୬ ଜଣଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୧୩ ଜଣ ଆହତ ହୋଇଥିବା ଜଣାପଡ଼ିଛି। ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ। ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି, ଯେଉଁଠାରେ ସେମାନଙ୍କର ଚିକିତ୍ସା ଚାଲିଛି। ସ୍ଥାନୀୟ କର୍ତ୍ତୃପକ୍ଷଙ୍କ ଅନୁଯାୟୀ, ବିସ୍ଫୋରଣ ସନ୍ଦେହଜନକ ଗ୍ୟାସ ଲିକ ଯୋଗୁ ହୋଇଥାଇପାରେ। ଏକ କୋଠାରେ ଗ୍ୟାସ ଜମା ହଠାତ ବିସ୍ଫୋରଣ ହୋଇଥିବା ସୂଚନା ମିଳିଛି, ଯାହାଦ୍ୱାରା ନିକଟବର୍ତ୍ତୀ କୋଠାଗୁଡ଼ିକ କ୍ଷତିଗ୍ରସ୍ତ ହୋଇଛି। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ଏହା ଅନେକ ଘରର ଝରକା ଏବଂ କାନ୍ଥକୁ କ୍ଷତିଗ୍ରସ୍ତ କରିଥିଲା। ଘଟଣା ପରେ ତୁରନ୍ତ ଘଟଣାସ୍ଥଳରେ ରିଲିଫ ଏବଂ ଉଦ୍ଧାରକାରୀ ଦଳ ପହଞ୍ଚିଥିଲେ। ଭଗ୍ନାବଶେଷରେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଉଦ୍ଧାର କାର୍ଯ୍ୟ ଜାରି ରହିଛି। ପ୍ରଶାସନ ତଦନ୍ତ ନିର୍ଦ୍ଦେଶ ଦେଇଛି ଏବଂ ଆଖପାଖ ଅଞ୍ଚଳରେ ସୁରକ୍ଷା ବୃଦ୍ଧି କରିଛି। ଏହି ଦୁର୍ଘଟଣା ପରେ, ସମଗ୍ର ସହର ଆତଙ୍କିତ ଅବସ୍ଥାରେ ଅଛି। ପୋଲିସର ସୂଚନା ଅନୁଯାୟୀ, ବିସ୍ଫୋରଣ ସ୍ଥଳରୁ ଏପର୍ଯ୍ୟନ୍ତ ୧୪ ଜଣଙ୍କ ମୃତଦେହ ଉଦ୍ଧାର କରାଯାଇଛି, ଉଦ୍ଧାର କାର୍ଯ୍ୟ ଜାରି ରହିଛି। ବିସ୍ଫୋରଣରେ ଅନେକ ଲୋକ ଆହତ ହୋଇଥିବା ମଧ୍ୟ ଜଣାପଡିଛି। ବିସ୍ଫୋରଣ ଯୋଗୁ ଏକ କୋଠା ଭୁଶୁଡ଼ି ପଡ଼ିଥିଲା ଏବଂ ଏଥିରେ ଅନେକ ଲୋକଙ୍କର ମୃତ୍ୟୁ ହୋଇଥିଲା। ଉଲ୍ଲେଖଯୋଗ୍ୟ, ମୃତକଙ୍କ ମଧ୍ୟରେ ୨ ରୁ ୧୭ ବର୍ଷ ବୟସର ନଅ ଜଣ ପିଲା ଅଛନ୍ତି।

#🗞ଓଡ଼ିଶା ଅପଡେଟ📺 ଅନୁଗୋଳ ପୁଲିସକୁ ବଡ଼ ସଫଳତା। ଗଞ୍ଜେଇ ବୋଝେଇ ଟ୍ରକ୍‌ ଜବତ। ଟ୍ରକରେ ଥିଲା ୬୩ ବସ୍ତା ଗଞ୍ଜେଇ। ଗଞ୍ଜେଇ ବେପାରୀ ତଥା ଟ୍ରକ ମାଲିକଙ୍କୁ ଗିରଫ କରିଛି ପୁଲିସ। ଜବତ ଗଞ୍ଜେଇର ପରିମାଣ ୧୫ କ୍ଵିଣ୍ଟାଲ ୭୩ କିଲୋଗ୍ରାମ (୧୫୭୩ କିଲୋ)। ଏହାର ଆନୁମାନିକ ମୂଲ୍ୟ ଦେଢ଼ କୋଟି ଟଙ୍କାରୁ ଅଧିକ ହେବ ବୋଲି ଜଣାପଡିଛି। ସୂଚନା ଅନୁସାରେ, ଗଞ୍ଜେଇ ବେପାରୀ ତଥା ଟ୍ରକର ମାଲିକ ଏହି ଗଞ୍ଜେଇକୁ କନ୍ଧମାଳରୁ ଆଣି ଝାଡ଼ଖଣ୍ଡ ଓ ବିହାରକୁ ପଠାଇବାକୁ ଯୋଜନା କରିଥିଲା। ଗଞ୍ଜେଇ ବୋଝେଇ ଟ୍ରକ ନିଶା ଶିଳ୍ପାଞ୍ଚଳ ଥାନା ଅଧୀନସ୍ଥ ଜେଏସପିଏଲ ଫେଜ୍-୨ ନିକଟରେ ଥିବା ସମୟରେ ଖବର ପାଇଥିଲା ଅନୁଗୋଳ ଜିଲ୍ଲା ପୁଲିସ। ଅନୁଗୋଳ ଏସପି ରାହୁଲ ଜୈନଙ୍କ ତତ୍ତ୍ଵାବଧାନରେ ଜିଲ୍ଲା ପୁଲିସର ସ୍ପେଶାଲ୍ ସ୍କ୍ୱାଡ୍ ଓ ନିଶା ଥାନା ପୁଲିସ ମିଳିତ ଭାବେ ଚଢ଼ାଉ କରି ଟ୍ରକକୁ ଅଟକାଇଥିଲେ। ଟ୍ରକରେ ଏତେ ପରିମାଣର ଗଞ୍ଜେଇ ଦେଖି ତାଜୁବ୍ ହୋଇଯାଇଥିଲା ପୁଲିସ। ଏହା ପୂର୍ବରୁ ଗତକାଲି ଅନୁଗୋଳ ପୁଲିସ ପୁରୁଣାକୋଟ ଥାନା ଅଧୀନସ୍ଥ କନ୍ଧକୋଇଲି ଗାଁ ଛକ ନିକଟରୁ ପ୍ରାୟ ୨୬୪ କିଲୋ ଗଞ୍ଜେଇ ଜବତ କରିଥିଲା।

#🗞ଓଡ଼ିଶା ଅପଡେଟ📺 ଓଡ଼ିଶାବାସୀ ସାବଧାନ । ସ୍କୁଲ ବସରେ ନାହିଁ ଫିଟନେସ୍‌ । ଆପଣ ଯଦି ନିଜର ପିଲାଙ୍କୁ ସ୍କୁଲ ବସରେ ଛାଡୁଛନ୍ତି ତେବେ ସତର୍କ ହୋଇଯାଆନ୍ତୁ । କାରଣ ରାଜ୍ୟରେ ୧୧୭୧ଟି ସ୍କୁଲ ବସରେ ନାହିଁ ଫିଟନେସ୍‌ ସାର୍ଟିଫିକେଟ । ଅତ୍ୟନ୍ତ ବିପଜ୍ଜନକ ସ୍ଥିତିରେ ସ୍କୁଲ, କଲେ ଯାଉଛନ୍ତି ଛାତ୍ରଛାତ୍ରୀ । ତେବେ ଛାତ୍ରଛାତ୍ରୀଙ୍କୁ ନେବା ଆଣିବା କରୁଥିବା ୧୧୭୧ଟି ବସରେ ଫିଟନେସ୍‌ ସାର୍ଟିଫିକେଟ ନଥିବା ସୂଚନା ମିଳିଛି । ସେଥିରୁ ରାଜଧାନୀରେ ଗଡୁଥିବା ୧୭ଟି ବସରେ ଫିଟନେସ୍‌ ସାର୍ଟିଫିକେଟ୍‌ ନଥିବା ଜଣାପଡିଛି ।

#🗞ଓଡ଼ିଶା ଅପଡେଟ📺 ଭୁବନେଶ୍ଵର : ଭୁବନେଶ୍ଵର ମଞ୍ଚେଶ୍ଵରରେ ଥିବା କପଡା ଫ୍ୟାକ୍ଟ୍ରିରେ ଭୟାବହ ଅଗ୍ନିକାଣ୍ଡ ଘଟିଛି। ଅଗ୍ନିଶମ କର୍ମଚାରୀଙ୍କ ପକ୍ଷରୁ ନିଆଁ ଲିଭାଇବାକୁ ଉଦ୍ୟମ ଜାରି ରହିଛି। ଫ୍ୟାକ୍ଟ୍ରିରେ ରେଡିମେଡ୍ ଗାର୍ମେଣ୍ଟସ୍ ତିଆରି କରାଯାଏ। ସୋଲାର୍ ପ୍ୟାନେଲ୍‌ରୁ ନିଆଁ ଲାଗିଥିବା ସୂଚନା ମିଳିଛି।

#🗞ଓଡ଼ିଶା ଅପଡେଟ📺 ଛତ୍ରପୁର : ଗୁରୁବାରଠୁ ଆରମ୍ଭ ହେଉଛି ମାଟ୍ରିକ ପରୀକ୍ଷା। ମାର୍ଚ୍ଚ ୨ ତାରିଖ ପର୍ଯ୍ୟନ୍ତ ଚାଲିବ। ଆଜି ମାତୃଭାଷାରେ ପରୀକ୍ଷା ଦେଲେ ଛାତ୍ରୀଛାତ୍ର । ସକାଳ ୯ ଟାରୁ ସାଢେ ୧୧ ପର୍ଯ୍ୟନ୍ତ ପରୀକ୍ଷା ହୋଇଥିଲା। ତେବେ ସକାଳ ୮ଟା ୩୦ ପୂର୍ବରୁ ଛାତ୍ରୀଛାତ୍ର ପରୀକ୍ଷା କେନ୍ଦ୍ରରେ ପହଞ୍ଚିବାକୁ ନିର୍ଦ୍ଦେଶ ଦିଆଯାଇଥିଲା । ତେବେ ସୁପରିଚାଳନା ପାଇଁ ​ସମସ୍ତ ପରୀକ୍ଷା କେନ୍ଦ୍ରରେ ଏଆଇ ଯୁକ୍ତ ସିସିଟିଭି କ୍ୟାମେରା ଲଗାଯାଇଛି । ତେବେ ଆଜି ଗଞ୍ଜାମ ଜିଲାପାଳ ଭି. କିର୍ତ୍ତୀ ଭାସନ ପରୀକ୍ଷା କେନ୍ଦ୍ର ବୁଲି ଯାଞ୍ଚ କରିଛନ୍ତି । କପି ରୋକିବା ପାଇଁ ବୋର୍ଡ ପକ୍ଷରୁ ସ୍କ୍ୱାଡ ଓ ଜିଲା ସ୍ତରରେ ସ୍କ୍ୱାଡ ହୋଇଛି । ଫ୍ଲାଇଂ ସ୍କ୍ୱାଡ୍, ଷ୍ଟାଟିକ୍ ସର୍ଭେଲାନ୍ସ ଟିମ୍ ଗଠନ କରାଯାଇଛି । ପ୍ରଶ୍ନପତ୍ର ଓ ଉତ୍ତର ଖାତା ସୁରକ୍ଷା ବଳୟରେ ରଖାଯାଇଛି । ଏହି ଅବସରରେ ଛତ୍ରପୁର ରେ ୧୧ଟି କେନ୍ଦ୍ରରେ ପରୀକ୍ଷା ହେଉଛି । ଛତ୍ରପୁରରେ ୨୨୮୮ ପରୀକ୍ଷାର୍ଥୀ ପରୀକ୍ଷା ଦେଉଛନ୍ତି । ନିଜେ ଗଞ୍ଜାମ ଜିଲାପାଳ ଭି. କିର୍ତ୍ତୀ ଭାସନ ବିଭିନ୍ନ ପରୀକ୍ଷା କେନ୍ଦ୍ର ବୁଲି ଯାଞ୍ଚ କରିଥିଲେ । ପରୀକ୍ଷା କେନ୍ଦ୍ରରେ ଛାତ୍ରୀଛାତ୍ରଙ୍କ ପାଇଁ ବିଭିନ୍ନ ପ୍ରକାର ସୁବିଧା ସୁଯୋଗ ରହିଛି । ପରୀକ୍ଷା କେନ୍ଦ୍ର ଗୁଡିକୁ କଡା ନଜର ରଖାଯିବା ସହ ପୋଲିସ ଜଗି ରହିଛନ୍ତି । ଜିଲା ପ୍ରଶାସନ ପକ୍ଷରୁ ସମସ୍ତ ଛାତ୍ରୀଛାତ୍ରଙ୍କୁ ଶୁଭେଚ୍ଛା ଜଣାଇଛନ୍ତି ଜିଲାପାଳ ।

#🗞ଓଡ଼ିଶା ଅପଡେଟ📺 ବଜାରରୁ କିଣିଲା ନକଲି ସୁନା ଚେନ୍। ତା’ପରେ ଦୋକନକୁ ଗଲା। ସୁନା ଚେନ୍ କିଣିବା ବାହାନାରେ ନକଲି ସୁନା ଚେନ୍‌କୁ ଥୋଇଦେଲା ଓ ନୂଆ ସୁନା ଚେନ୍ ନେଇ ପଳାଇଥିଲା। ହେଲେ ସୁନା ଦୋକାନୀଙ୍କର ସନ୍ଦେହ ହୋଇଥିଲା ଓ ଚୋର ଧରାପଡ଼ିଥିଲା। ବାଲେଶ୍ୱର ଜିଲ୍ଲା ସିମୁଳିଆ ଥାନା ଅଡ଼ା ବଜାରରେ ଘଟିଛି ଏହି ଘଟଣା। ଆଉ ଚୋରି ବେଳର ପୂରା ଦୃଶ୍ୟ ସିସିଟିଭିରେ କଏଦ ହୋଇଛି। ଅଭିଯୁକ୍ତଙ୍କ ନାଁ ସନ୍ତୋଷ ବେହେରା। ତାଙ୍କ ଘର ସିମୁଳିଆ ଥାନା ବାଘୁଆ ଗାଁରେ। ଚତୁର ସନ୍ତୋଷ ସୁନା ଦୋକାନରୁ ଚୋରି କରିବାର ଏକ ଚମତ୍କାର ଆଇଡିଆ ନେଇ ଆସିଥିଲେ। ଏଥିପାଇଁ ସେ ପୂର୍ବରୁ ବଜାରରୁ କିଣିଥିଲେ ଏକ ନକଲି ସୁନା ଚେନ। ସେଇ ନକଲି ସୁନାଚେନ ଧରି ପଶିଥିଲେ ସିମୁଳିଆର ଅଡ଼ା ବଜାରରେ ଥିବା ଏକ ଗହଣା ଦୋକାନରେ। ସେଠାରେ ସେ ଦୋକାନୀଙ୍କୁ ମାଗିଥିଲେ ଠିକ୍ ତାଙ୍କ ପାଖରେ ରଖିଥିବା ନକଲି ଚେନ୍ ପରି ଏକ ସୁନାଚେନ୍। ଆଉ ଅସଲି ସୁନାଚେନ୍ ଦେଖୁଥିବା ବେଳେ ମୌକା ଦେଖି ପକେଟରେ ରଖିଥିବା ନକଲି ଚେନ୍‌କୁ ବାହାର କରି ସୁନା ଦୋକାନର ଟେବୁଲ ଉପରେ ଥୋଇ ଦେଇଥିଲେ ଓ ଅସଲି ସୁନାଚେନ୍ ନେଇ ବାହାରି ଯାଇଥିଲେ ଭଦ୍ର ଗ୍ରାହକଙ୍କ ପରି। ଚତୁର ସନ୍ତୋଷ ଚତୁରତାର ସହ ଅସଲି ସୁନାଚେନ ପକେଟରେ ଭର୍ତ୍ତି କରି ପଳେଇଯିବା ପରେ ହିଁ ଦୋକାନୀଙ୍କର ସନ୍ଦେହ ହେଇଥିଲେ। ତେଣୁ ସେ ସନ୍ତୋଷ ଦେଖୁଥିବା ଚେନଟିକୁ ଯାଞ୍ଚ କରିଥିଲେ। ତାହା ନକଲି ସୁନାଚେନ୍ ବୋଲି ସେ ଜାଣିପାରିଥିଲେ। ସେ ସନ୍ତୋଷଙ୍କୁ ଧରି ପୁଲିସକୁ ଖବର ଦେଇଥିଲେ। ପ୍ରଥମେ ସନ୍ତୋଷ ମାନି ନଥିଲେ। କିନ୍ତୁ ଲୋକମାନେ ପଚରା ପଚାରି କରି ଅସଲି ଚେନକୁ ତା’ ନିକଟରୁ ପାଇଥିଲେ।

#📰ଦେଶ-ବିଦେଶ ଅପଡେଟ ବେଙ୍ଗାଲୁରୁ :ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ)ରୁ ଅବସର ଗ୍ରହଣ କରିଥିବା ଜଣେ ୬୫ ବର୍ଷୀୟ ଅଧିକାରୀ ତାଙ୍କ ସ୍ତ୍ରୀଙ୍କୁ ହତ୍ୟା କରିଛନ୍ତି। ନାଗେଶ୍ୱର ରାଓ ତାଙ୍କ ପରିବାର ସହ ବେଙ୍ଗାଲୁରୁରେ ରହୁଥିଲା ବେଳେ ବୁଧବାର ସେ ତାଙ୍କ ସ୍ତ୍ରୀ ସନ୍ଧ୍ୟାଶ୍ରୀଙ୍କ ବେକରେ ଏକ ଟାଓ୍ବେଲ ବାନ୍ଧି ତାଙ୍କୁ ହତ୍ୟା କରିଛନ୍ତି ବୋଲି ବେଙ୍ଗାଲୁରୁର ଆଭାଲହାଲି ଥାନାଧିକାରୀ କହିଛନ୍ତି। ନାଗେଶ୍ୱର କିଛି ଦିନ ହେଲା ମାନସିକ ରୋଗରେ ପୀଡ଼ିତ ଥାଇ ଚିକିତ୍ସିତ ହେଉଥିଲେ। ସେ ସନ୍ଧ୍ୟାଙ୍କୁ ମାରିବା ପରେ ନିଜେ ଆତ୍ମହତ୍ୟା କରିବାକୁ ଚାହୁଁଥିଲେ ବୋଲି ପୋଲିସ କହିଛି।

#📰ଦେଶ-ବିଦେଶ ଅପଡେଟ ରାଞ୍ଚତ୍: ଝାଡ଼ଖଣ୍ଡର ପଶ୍ଚିମ ସିଂହଭୂମ ଜିଲା କାଲାଇୟା ଗ୍ରାମରେ ଗୁଣିଗାରେଡ଼ି ସନ୍ଦେହରେ ଜଣେ ୩୨ ବର୍ଷୀୟା ମହିଳା ଓ ତାଙ୍କ ୨ ମାସର ଝିଅଙ୍କୁ ସମ୍ପର୍କୀୟମାନେ ଜାଳି ହତ୍ୟା କରିଛନ୍ତି। ମଙ୍ଗଳବାର ରାତିରେ ଘଟିଥିବା ଏହି ଘଟଣାରେ ମହିଳାଙ୍କ ସ୍ବାମୀ ବର୍ତ୍ତିଯାଇଥିଲେ ହେଁ ତାଙ୍କ ଶରୀରର ଅନେକ ଭାଗ ଜଳିଯାଇଛି। ୪୦ ବର୍ଷୀୟ କୋଲ୍‌ହାନ୍‌ ସିଙ୍କୁ କହିଛନ୍ତି, ତାଙ୍କ ସ୍ତ୍ରୀ ଜ୍ୟୋତି ଓ ସେମାନଙ୍କ ପିଲାମାନେ ଘରେ ଶୋଇଥିବାବେଳେ କେତେଜଣ ସମ୍ପର୍କୀୟ ବାହାରକୁ ଡାକିଥିଲେ। ପ୍ରାୟ ୧୨ ଜଣ ପୁରୁଷ ଓ ମହିଳାଙ୍କୁ ଦେଖି ଜ୍ୟୋତି ଭୟଭୀତ ହୋଇଯାଇଥିଲେ। ସେମାନେ ତାଙ୍କୁ ଡାହାଣୀ ଆଖ୍ୟା ଦେଇଥିଲେ। ଇତିମଧ୍ୟରେ କୋଲ୍‌ହାନ୍‌ଙ୍କ ପ୍ରଥମ ସ୍ତ୍ରୀ ମଧ୍ୟ ସେଠାରେ ପହଞ୍ଚତ୍ଥିଲେ। ସେ ଶାନ୍ତ ରହିବାକୁ ଅନୁରୋଧ କରିବାରୁ ସେମାନେ ସକାଳେ ପଞ୍ଚାୟତ ବୈଠକରେ ସମାଧାନ କରାଯିବ ବୋଲି କହିଥିଲେ। କେତେଜଣ ବ୍ୟକ୍ତି ପେଟ୍ରୋଲ ଆଣି ପରିବାର ଲୋକଙ୍କ ଉପରେ ଢାଳି ଦେଇ ନିଅଁା ଲଗାଇଦେଇଥିଲେ। ଏଥିରେ ଜ୍ୟୋତି ଓ ନବଜାତକ ଶିଶୁ ଘଟଣାସ୍ଥଳରେ ପ୍ରାଣ ହରାଇଥିବେଳେ କୋଲ୍‌ହାନ୍‌ ନିଜ ଦେହରୁ ପୋଷାକ କାଢ଼ି ବର୍ତ୍ତିଯିବାରେ ସକ୍ଷମ ହୋଇଥିଲେ। ଏହି ଘଟଣାରେ ୪ ଅଭିଯୁକ୍ତଙ୍କୁ ଗିରଫ କରାଯାଇଛି। ଅନ୍ୟମାନଙ୍କ ପରିଚୟ ସ୍ପଷ୍ଟ ସହ ସେମାନଙ୍କୁ ଧରିବା ପାଇଁ ଉଦ୍ୟମ ଚାଲିଥିବା ସ୍ଥାନୀୟ ଏସ୍‌ପି ଅମିତ୍‌ ରେଣୁ ସୂଚନା ଦେଇଛନ୍ତି।

#🗞ଓଡ଼ିଶା ଅପଡେଟ📺 ଆନନ୍ଦପୁର : ଅତି କମ୍ ବୟସରୁ ସାଇବର ଠକେଇ ଭଳି ଜଘନ୍ୟ ଅପରାଧ କରି ଜେଲ ଯିବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। କେନ୍ଦୁଝର ଜିଲ୍ଲା ରାମଚନ୍ଦ୍ରପୁର ଥାନା କୃଷ୍ଣପୁର ଗ୍ରାମର ବିପିନବିହାରୀ ଜେନାଙ୍କ ପୁଅ ଅବିନାଶ ଜେନା(୧୯) ବିଭିନ୍ନ ସମୟରେ ଅନଲାଇନ ଗେମ୍ ସହ ସାଇବର ଠକେଇ କରି ବ୍ୟାଙ୍କ ଅଫ ଇଣ୍ତିଆ ରାମଚନ୍ଦ୍ରପୁର, ଅଳତି ଏବଂ ୟୁକୋ ବ୍ୟାଙ୍କ ଘସିପୁରା ଶାଖା ଜରିଆରେ ଅନଲାଇନ ଠକେଇ କରି ୨୦ ଲକ୍ଷରୁ ଉର୍ଦ୍ଧ ଟଙ୍କା ଠକେଇ ଅଭିଯୋଗରେ ରାମଚନ୍ଦ୍ରପୁର ପୁଲିସ ହାତରେ ଧରାପଡିଛି। ବିଭିନ୍ନ ସ୍ଥାନରେ ସାଇବର ଠକେଇ ନେଇ ଅଭିଯୋଗ ପାଇବା ପରେ କେନ୍ଦୁଝର ଏସପିଙ୍କ ନିର୍ଦ୍ଦେଶରେ ରାମଚନ୍ଦ୍ରପୁର ଥାନା ଅଧିକାରୀ ମନୋଜ ସ୍ୱାଇଁ, ଏସଆଇ ସୁଶାନ୍ତ ମହାକୁଡ ଅଧିକ ଖୋଳତାଡ କରି କୃଷ୍ଣପୁର ଗାଁରେ ଚଢାଉ କରି ଅଭିଯୁକ୍ତ ଯୁବକକୁ କାବୁ କରିଥିଲେ। ଥାନାରେ ପଚାରା ଉଚାରା କରିବା ପରେ କେସ୍ ନଂ ୫୦/୨୬ରେ ଏକ ମାମଲା ରୁଜୁ କରିବା ସହ ଗିରଫ କରି କୋର୍ଟ ଚାଲାଣ କରିଛନ୍ତି। ତା’ ନିକଟରୁ ତିନୋଟି ବ୍ୟାଙ୍କ ପାସବୁକ, ଦୁଇଟି ଏଟିଏମ କାର୍ଡ, ପାନକାର୍ଡ, ଆଧାରକାର୍ଡ ସହ ଗୋଟିଏ ଆଇଫୋନ୍ ଜବଦ କରାଯାଇଛି। ରାମଚନ୍ଦ୍ରପୁର ଉପଖଣ୍ତ ପୁଲିସ ଅଧିକାରୀ କମଲ କୁମାର ପଣ୍ତା ଏନେଇ ବିସ୍ତୁୃତ ସୂଚନା ପ୍ରଦାନ କରିଛନ୍ତି।

#🗞ଓଡ଼ିଶା ଅପଡେଟ📺 ନୀଳଗିରି : ଗହଣା ଦୋକାନ ବନ୍ଦ କରି ଘରକୁ ଫେରୁଥିବା ଜଣେ ବ୍ୟବସାୟୀଙ୍କ ଉପରକୁ ଗୁଳିମାଡ଼ ମାଡ଼ ହୋଇଛି। ବ୍ୟବସାୟୀ ଜଣକ ଅଳ୍ପକେ ବର୍ତ୍ତି ଯାଇଥିବା ବେଳେ ତାଙ୍କଠାରୁ ୫୦ଲକ୍ଷ ଟଙ୍କାର ଗହଣା ଲୁଟ କରି ଦୁର୍ବୃତ୍ତମାନେ ଫେରାର ହୋଇ ଯାଇଛନ୍ତି। ବାଲେଶ୍ୱର ଜିଲ୍ଲା ନୀଳଗିରି ଥାନା ଅଧୀନ ସନ୍ତରାଗଡ଼ିଆ ବଜାରରେ ଗହଣା ଦୋକାନ କରିଥିବା ନିକଟସ୍ଥ କୁଳିଗଡ଼ି ଗାଁର କୃପାସିନ୍ଧୁ ରଣା(୫୨) ଆଜି ରାତିରେ ଦୋକାନ ବନ୍ଦ କରି ସ୍କୁଟିରେ ଘରକୁ ଫେରୁଥିଲେ। କୁଳିଗଡ଼ି ଡାକ୍ତରଖାନା ନିକଟରେ ୪ଜଣ ଦୁର୍ବୃତ୍ତ ବାଇକରେ ତାଙ୍କୁ ପିଛା କରି ଗହଣା ବ୍ୟାଗ ଛଡ଼ାଇ ନେବା ସହ ଗୁଳିମାଡ଼ କରିଛନ୍ତି। ଅଳ୍ପକେ ବ୍ୟବସାୟୀ ଜଣକ ବର୍ତ୍ତି ଯାଇଛନ୍ତି। ଉକ୍ତ ବ୍ୟାଗ ଭିତରେ ୫୦ଲକ୍ଷ ଟଙ୍କାର ସୁନାଗହଣା ସହ ନଗଦ ଟଙ୍କା ରହିଥିବା ସୂଚନା ମିଳିଛି। ଖବରପାଇ ରାତି ୧୧ଟାରେ ନୀଳଗିରି ଆଇଆଇସି ଗୋବର୍ଦ୍ଧନ ନାୟକ ସଦଳବଳେ ପହଞ୍ଚି ଗୁଳିର ଖୋକା ଜବତ କରିବା ସହ ତନାଘନା ଆରମ୍ଭ କରିଛନ୍ତି।