#📰ଦେଶ-ବିଦେଶ ଅପଡେଟ ଇରାନର ସୁପ୍ରିମ ଲିଡର ଭାବେ ନିଯୁକ୍ତି ପାଇଛନ୍ତି ମୋଜତାବା ଖାମେନେଇ। ଶନିବାର ଇସ୍ରାଏଲ ଓ ଆମେରିକାର ଏୟାର ଷ୍ଟ୍ରାଇକରେ ଇରାନର ସୁପ୍ରିମ ଲିଡର ଆୟୋତୁଲ୍ଲା ଅଲୀ ଖାମେନେଇ ପ୍ରାଣ ହରାଇଥିଲା। ଏହାପରେ ଦେଶର ଶକ୍ତିଶାଳୀ ଆସେମ୍ବ୍ଲି ଅଫ ଏକ୍ସପର୍ଟ ଅଲୀ ଖାମେନେଇ ପୁଅ ମୋଜତାବାଙ୍କୁ ଦେଶର ସୁପ୍ରିମ ଲିଡର ଭାବେ ଚୟନ କରିଛନ୍ତି। ମୋଜତାବା ଇରାନର ସୁପ୍ରିମ ଲିଡର ହେବା କ୍ଷଣୀ ଇସ୍ରାଏଲ ପକ୍ଷରୁ ତାଙ୍କୁ ଖୋଲା ଧମକ ଦିଆଯାଇଛି। ଇରାନର ପରବର୍ତ୍ତୀ ସୁପ୍ରିମ ଲିଡରଙ୍କୁ ନିପାତ କରିବା ପାଇଁ ଟାର୍ଗେଟ କରାଯିବ ବୋଲି ଇସ୍ରାଏଲ ପ୍ରତିରକ୍ଷା ମନ୍ତ୍ରୀ କହିଛନ୍ତି। ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ କହିଛନ୍ତି ଯେ ଇରାନ ଯାହାକୁ ବି ଦେଶର ପରବର୍ତ୍ତୀ ସୁପ୍ରିମ ଲିଡର ଭାବେ ବାଛିବ, ତାଙ୍କୁ ନିପାତ କରିବା ପାଇଁ ଟାର୍ଗେଟ କରାଯିବ। ସେ କହିଛନ୍ତି, “ଇସ୍ରାଏଲକୁ ଧ୍ୱଂସ କରିବା, ଆମେରିକା, ବିଶ୍ୱର ମୁକ୍ତ ଦେଶ ଓ ଉକ୍ତ ଅଞ୍ଚଳରେ ଥିବା ଦେଶଗୁଡ଼ିକ ଧମକାଇବା ପାଇଁ ଇରାନୀ ଆତଙ୍କୀ ଶାସନ ଦ୍ୱାରା ନିଯୁକ୍ତ ହେଉଥିବା ପ୍ରତିଟି ନେତା ଓ ନେତୃତ୍ୱଙ୍କୁ ନିପାତ କରାଯିବ। କାହାକୁ ବି ଛଡ଼ା ଯିବ ନାହିଁ।” ମୋଜତାବା ଇରାନର ନୂଆ ସୁପ୍ରିମ ଲିଡର ଭାବେ ନିଯୁକ୍ତି ପାଇବା ଖବର ସାମ୍ନାକୁ ଆସିବା ପରେ ଇସ୍ରାଲଏ ପକ୍ଷରୁ ଏପରି ଧମକ ଦିଆଯାଇଛି। ଅଲୀ ଖାମେନେଇଙ୍କ ଭଳି ଆଇଆରଜିସିରେ ମୋଜତାବାଙ୍କ ବେଶ ଦବଦବା ରହିଛି। ମୋଜତାବାଙ୍କୁ ସୁପ୍ରିମ ଲିଡର କରିବାକୁ ଆଇଆରଜିସି ମଧ୍ୟ ପ୍ରସ୍ତାବ ଦେଇଥିଲା। ୧୯୬୯ରେ ମାଶହାଦରେ ଜନ୍ମ ଗ୍ରହଣ କରିଥିବା ମୋଜତାବା ଖାମେନେଇ ହେଉଛନ୍ତି ଅଲୀ ଖାମେନେଇଙ୍କ ଦ୍ୱିତୀୟ ପୁଅ। ସେ ଶାହ ମହମ୍ମଦ ରେଜା ପହଲଭୀଙ୍କ ଶାସନ ସମୟରେ ବଡ଼ ହୋଇଥିଲେ। ତାଙ୍କ ବାପା ଅଲୀ ଖାମେନେଇ ରାଜତନ୍ତ୍ରର ତୀବ୍ର ସମାଲୋଚକ ଥିଲେ। ସେ ରାଜତନ୍ତ୍ର ବିରୋଧରେ ରୁହୋଲ୍ଲା ଖୋମେନିଙ୍କ ସହ ହାତ ମିଳାଇଥିଲେ। ୧୯୭୯ ଇରାନ ବିପ୍ଳବର ରାଜତନ୍ତ୍ରର ଲୋପ ହୋଇଥିଲା ଓ ଦେଶରେ ଧାର୍ମିକ ଗଣତନ୍ତ୍ର ଶାସନ ଆରମ୍ଭ ହୋଇଥିଲା। ରୁହୋଲ୍ଲା ଖୋମେନି ଇରାନର ପ୍ରଥମ ସୁପ୍ରିମ ଲିଡର ହୋଇଥିଲେ। ପରବର୍ତ୍ତୀ ସମୟରେ ଖାମେନେଇ ପରିବାର ନୂଆ ଶକ୍ତି କେନ୍ଦ୍ରର ମୂଳକୁ ଦଖଲ କରିଥିଲେ। ୧୯୮୯ରେ ଅଲି ଖାମେନେଇ ଇରାନର ସୁପ୍ରିମ ଲିଡର ହେବା ପରେ ମୋଜତାବା ଇରାନର ଧାର୍ମିକ ଓ ରାଜନୀତିକ କେନ୍ଦ୍ରକୁ ଆସିଥିଲେ। ଅଧିକାଂଶ ରାଜନୀତିକ ପରିବାର ଭଳି କିନ୍ତୁ ୫୬ ବର୍ଷୀୟ ମୋଜତାବା ସର୍ବସମ୍ମୁଖକୁ ଆସୁ ନଥିଲେ। ସେ ସବୁବେଳେ କ୍ୟାମେରା ଆଢ଼ୁଆଳରେ ରହୁଥିଲେ। ସେ ପରାଦ ପଛରେ ରହି ସବୁ କିଛି କରୁଥିଲେ। ସୁପ୍ରିମ ଲିଡରଙ୍କ ଅଫିସରେ ତାଙ୍କ ନିର୍ଦ୍ଦେଶରେ କାର୍ଯ୍ୟ ହେଉଥିଲା। ଫେବୃଆରୀ ୨୮ରେ ବାପା ଖାମେନେଇଙ୍କ ମୃତ୍ୟୁ ପରେ ଏବେ ମୋଜତାବା ସୁପ୍ରିମ ଲିଡର ହୋଇଛନ୍ତି। ମୋଜତାବା ଖାମେନେଇ ୧୯୮୭ରେ ଇରାନର ଇସଲାମିକ ମିଲିଟାରୀ ଫୋର୍ସରେ ସାମିଲ ହୋଇଥିଲେ। ଇରାନ-ଇରାକ ଯୁଦ୍ଧର ଶେଷ ପର୍ଯ୍ୟାୟରେ ହିଁ ସେ ବନ୍ଧୁକ ଉଠାଇଥିଲେ। ଯୁଦ୍ଧ ସମୟରେ ସେ ହାବିବ ବାଟାଲିୟନ ପାଇଁ ଲଢ଼େଇ କରି ନିଜର ଦକ୍ଷତା ପ୍ରଦର୍ଶନ କରିଥିଲେ।

#🗞ଓଡ଼ିଶା ଅପଡେଟ📺 ଭୁବନେଶ୍ୱର,୪।୩: ରଙ୍ଗର ପର୍ବ ହୋଲିରେ ଭୁବନେଶ୍ୱରରେ ଚାଞ୍ଚଲ୍ୟ। ସ୍ତ୍ରୀଙ୍କ ରକ୍ତରେ ହୋଲି ଖେଳିଲେ ସ୍ବାମୀ। ହୋଲିରେ ସ୍ତ୍ରୀଙ୍କୁ ଛୁରି ଭୁସିି ହତ୍ୟା କଲେ ସ୍ବାମୀ। ଏଭଳି ଅଭାବନୀୟ ଘଟଣା ଘଟିଛି ଭରତପୁର ଥାନା ଅଧୀନ ଫୁଲେଶରି ବସ୍ତିରେ। ମହିଳାଙ୍କୁ ହତ୍ୟା କରାଯାଇଥିବା ସୂଚନା ମିଳିଛି । ସ୍ବାମୀଙ୍କ ଛୁରା ମାଡ଼ରେ ସ୍ତ୍ରୀଙ୍କ ମୃତ୍ୟୁ ଅଭିଯୋଗ ହୋଇଛି। ହତ୍ୟାର କାରଣ ଅସ୍ପଷ୍ଟ ଥିବା ବେଳେ ଭରତପୁର ପୋଲିସ ତଦନ୍ତ ଆରମ୍ଭ କରିଛି।

#📰ଦେଶ-ବିଦେଶ ଅପଡେଟ ତିନି ଦିନ ଧରି ବନ୍ଦ ହୋଇ ରହିଥିଲା ଦୋକାନ, ଫ୍ରିଜରରେ ଥିଲା ମୃତଦେହ ଶରୀରରେ ନାହିଁ ଆଘାତ, ଫ୍ରିଜରରେ ପଶିଥିଲା କି ଜୀଅନ୍ତା ମଣିଷ? ଗୋଟିଏ ଚପଲ ରାସ୍ତାରେ, ଅନ୍ୟଟି ଦୋକାନରେ ମୋବାଇଲ୍ ଓ ଆଧାର କାର୍ଡ ଦେଲା ପରିଚୟ ଭେଜ୍ ବିରିୟାନୀ ଦୋକାନ। ସେଠି ଆମିଷର ଗନ୍ଧ ନାହିଁ। କିନ୍ତୁ ଫ୍ରିଜର ଭିତରୁ ବାହାରିଲା ମଣିଷର ମୃତଦେହ। ଫ୍ରିଜର ଭିତରକୁ କେମିତି ଗଲା ମଣିଷର ମୃତଦେହ? କିଏ, କାହିଁକି ଓ କ’ଣ ପାଇଁ ମାରିଲା? ଏ ମୃତ୍ୟୁ ରହସ୍ୟ ଉପରୁ ଉଠୁନି ପରଦା। ମଦ ନିଶାରେ ବ୍ୟକ୍ତି ଜଣକ ଫ୍ରିଜରେ ପଡ଼ି ପ୍ରାଣ ହରାଇଛନ୍ତି ନା କିଏ ଜାଣି ଜାଣି ତାଙ୍କୁ ମାରି ଫ୍ରିଜ୍ ଭିତରେ ପୂରାଇଥିଲା, ତାହା ସ୍ପଷ୍ଟ ହୋଇପାରିନି। ଏ ଜଘନ୍ୟ ଘଟଣାଟି ଘଟିଛି ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌର। ଗତ ଶନିବାର ଅପରାହ୍ଣରୁ ୩୮ ବର୍ଷୀୟ ବିଜୟ ପାଲ ନାମକ ଏହି ବ୍ୟକ୍ତି ନିଖୋଜ ହୋଇଯାଇଥିଲେ। ଆଉ ରବିବାର ସକାଳେ ଏକ ନିରାମିଷ ବିରିୟାନୀ ଦୋକାନର ଡିପ୍ ଫ୍ରିଜର ଭିତରୁ ତାଙ୍କ ମୃତଦେହ ମିଳିଥିଲା। ପୁଲିସର ସୂଚନା ଆନୁଯାୟୀ, ଯେଉଁ ଦୋକାନରୁ ମୃତଦେହଟି ମିଳିଥିଲା, ତାହା ଟିଣକାନ୍ଥ ଘେରା ଏକ ଅସ୍ଥାୟୀ ଦୋକାନ। ଦୋକାନ ମାଲିକକୁ ପଚରାଉଚରା ପରେ ସେ ପୁଲିସକୁ କହିଛନ୍ତି ଯେ, ତିନି ଦିନ ଧରି ଦୋକାନ ବନ୍ଦ ଥିଲା। ଯେଉଁ ଫ୍ରିଜରରୁ ମୃତଦେହଟି ମିଳିଛି, ତାହା ମଧ୍ୟ ବହୁଦିନ ଧରି ଖରାପ ହୋଇ ପଡ଼ି ରହିଥିଲା। ଘଟଣାସ୍ଥଳରୁ ମିଳିଥିବା ମୋବାଇଲ୍ ଫୋନ୍ ଓ ଆଧାର କାର୍ଡ ଆଧାରରେ ପୁଲିସ ଏହି ବ୍ୟକ୍ତିଙ୍କୁ ବିଜୟ ପାଲ୍ ବୋଲି ଚିହ୍ନଟ କରିଛି। ତାଙ୍କ ଶରୀରରେ କୌଣସି ଆଘାତ ଚିହ୍ନ ନାହିଁ। ମୃତ୍ୟୁର ସଠିକ୍ କାରଣ ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ଜଣାପଡ଼ିବ। ତେବେ ମୃତ ବିଜୟ ପାଲଙ୍କର ଗୋଟିଏ ଚପଲ ଦୋକାନ ବାହାରେ ପଡ଼ିଥିବା ବେଳେ ଆଉ ଗୋଟିଏ ପଡ଼ିଥିଲା ଦୋକାନ ଭିତରେ। ଏହାର ଉତ୍ତର ଖୋଜୁଛି ପୁଲିସ। ପୁଲିସ ଘଟଣାର ତଦନ୍ତ କରୁଛି।

#🗞ଓଡ଼ିଶା ଅପଡେଟ📺 ବରିଷ୍ଠ ବିଜେପି ନେତା ତଥା ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଅସୁସ୍ଥ ହୋଇ ଭୁବନେଶ୍ୱରସ୍ଥିତ ଏମ୍ସରେ ଭର୍ତ୍ତି ହୋଇଛନ୍ତି । ମଙ୍ଗଳବାର ସନ୍ଧ୍ୟାରେ ହଠାତ୍ ସେ ଅସୁସ୍ଥ ଅନୁଭବ କରିବାରୁ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା । ଏମସ୍ ସୂତ୍ରରୁ ମିଳିଥିବା ଅନୁସାରେ, ରାଜସ୍ୱ ମନ୍ତ୍ରୀ ଶ୍ରୀ ପୂଜାରୀ ମଙ୍ଗଳବାର ସନ୍ଧ୍ୟାରେ ଛାତିରେ ଯନ୍ତ୍ରଣା ଓ ଅସ୍ୱାଭାବିକତା ଅନୁଭବ କରିବାରୁ ତାଙ୍କୁ ସଙ୍ଗେସଙ୍ଗେ ଭୁବନେଶ୍ୱରସ୍ଥିତ ଏମସ ଜରୁରୀକାଳୀନ ୱାର୍ଡକୁ ଅଣାଯାଇଥିଲା । ସେଠାରେ ପ୍ରାରମ୍ଭିକ ଚିକିତ୍ସା ପରେ ତାଙ୍କୁ ଅଧିକ ନିରୀକ୍ଷଣ ପାଇଁ କାର୍ଡିଓଥୋରାସିକ୍ ଆଣ୍ଡ ଭାସ୍କୁଲାର ସର୍ଜରୀ(ସିଟିଭି) ଆଇସିୟୁରେ ରଖାଯାଇଛି । ଏମ୍ସର ଏକ ସ୍ୱତନ୍ତ୍ର ଡାକ୍ତରୀ ଦଳ ତାଙ୍କର ସ୍ୱାସ୍ଥ୍ୟ ପରୀକ୍ଷା କରୁଛନ୍ତି । ପ୍ରାଥମିକ ଚିକିତ୍ସା ପରେ ତାଙ୍କର ସ୍ୱାସ୍ଥ୍ୟବସ୍ଥା ସ୍ଥିର ରହିଥିଲେ ମଧ୍ୟ ଡାକ୍ତରମାନେ ତାଙ୍କୁ ଅବଜରଭେସନରେ ରଖିଛନ୍ତି । ମନ୍ତ୍ରୀ ଶ୍ରୀ ପୂଜାରୀଙ୍କ ଅସୁସ୍ଥତା ଖବର ପାଇ ରାଜ୍ୟ ବିଜେପି ସଭାପତି ମନମୋହନ ସାମଲ ଏମସ୍ ଯାଇ ତାଙ୍କୁ ଭେଟିଛନ୍ତି । ଦଳର କିଛି ନେତା, ସମର୍ଥକ ଓ କର୍ମୀ ଏମସରେ ପହଂଚିଥିବା ଦେଖିବାକୁ ମିଳିଛି । ତାଙ୍କ ସ୍ୱାସ୍ଥ୍ୟବସ୍ଥାକୁ ନେଇ ଏମସ କର୍ତ୍ତୃପକ୍ଷଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ମେଡିକାଲ ବୁଲେଟିନ୍ ଜାରି କରାଯାଇନାହିଁ । ତେବେ ରାଜ୍ୟ ସରକାରଙ୍କ ପକ୍ଷରୁ ତାଙ୍କର ସ୍ୱାସ୍ଥ୍ୟବସ୍ଥା ଓ ଚିକିତ୍ସା ସମ୍ପର୍କରେ ଏମସ କର୍ତ୍ତୃପକ୍ଷଙ୍କ ସହ ଆଲୋଚନା କରାଯାଇଥିବା ସୂଚନା ମିଳିଛି ।

#📰ଦେଶ-ବିଦେଶ ଅପଡେଟ ଇରାନର ରାଜଧାନୀ ତେହରାନରେ ଥିବା ପ୍ରାୟ ସମସ୍ତ ଟ୍ରାଫିକ କ୍ୟାମେରାକୁ ୩ ବର୍ଷ ଧରି ହ୍ୟାକ କରି ରଖିଥିଲା ଇସ୍ରାଏଲ। ଟ୍ରାଫିକ କ୍ୟାମେରା ନେଟୱର୍କ ସମେତ ଇରାନରେ ସକ୍ରିୟ ଥିବା ମୋବାଇଲ ବ୍ୟବସ୍ଥାରେ ଅନୁପ୍ରବେଶ କରି ସୁପ୍ରିମ ଲିଡର ଆୟୋତୁଲ୍ଲା ଅଲୀ ଖାମେନେଇଙ୍କ ଗତିବିଧି ଉପରେ ନଜର ରଖିଥିଲା। କେବଳ ଖାମେନେଇଙ୍କ ଗିତିବିଧି ଉପରେ ଇସ୍ରାଏଲ ନଜର ରଖି ନଥିଲା ବରଂ ଆକ୍ରମଣ କରିବା ପୂର୍ବରୁ ତାଙ୍କ ସୁରକ୍ଷା ବ୍ୟବସ୍ଥାର ବିସ୍ତୃତ ତଥ୍ୟ ହାସଲ କରିଥିଲା। ଇସ୍ରାଏଲ ଗୁଇନ୍ଦା ବିଭାଗ ସହ ଜଡ଼ିତ ଅଧିକାରୀଙ୍କ ତଥ୍ୟକୁ ଆଧାର କରି ଅନ୍ତର୍ଜାତୀୟ ଗଣମାଧ୍ୟମରେ ଏଭଳି ରିପୋର୍ଟ ପ୍ରକାଶ ପାଇଛି। ରିପୋର୍ଟରେ ଦାବି କରାଯାଇଛି ଯେ ପ୍ରାୟ ୩ ବର୍ଷ ଧରି ତେହରାନରେ ଥିବା ପ୍ରାୟ ସମସ୍ତ ଟ୍ରାଫିକ କ୍ୟାମେରାରେ ହେରଫେର କରାଯାଇଥିଲା। ଟ୍ରାଫିକ କ୍ୟାମେରାରେ ରେକର୍ଡ ହେଉଥିବା ଦୃଶ୍ୟ ସିଧାସଳଖ ତେଲ ଅଭିଭ ଓ ଦକ୍ଷିପୂର୍ବ ଇସ୍ରାଏଲ ସର୍ଭରକୁ ଆସୁଥିଲା। ଗୋଟିଏ ଟ୍ରାଫିକ କ୍ୟାମେରା ଇସ୍ରାଏଲ ପାଇଁ ଗେମ ଚେଞ୍ଜର ସାବ୍ୟସ୍ତ ହୋଇଥିଲା। କ୍ୟାମେରାଟି ଏମିତି ସ୍ଥାନରେ ରହିଥିଲା ଯେଉଁଥିରେ ତେହରାନର ପାସ୍ତେଉର ଷ୍ଟ୍ରିଟ ନିକଟରେ ଥିବା ଖାମେନେଇଙ୍କ ବିଲଡିଂର ସବୁ ଦୃଶ୍ୟକୁ କଏଦ କରୁଥିଲା। ଖାମେନେଇଙ୍କ ବଡିଗାର୍ଡ କେଉଁଠାରେ ବ୍ୟକ୍ତିଗତ ଭାବେ ସେମାନଙ୍କ ଗାଡ଼ି ପାର୍କିଂ କରୁଥିଲେ ଓ ସେମାନେ ଦୈନନ୍ଦିନ କେଉଁ ପ୍ରକାରର ସେବା ଯୋଗାଇ ଦେଉଥିଲେ, ତା’ର ତଥ୍ୟ ମଧ୍ୟ ଇସ୍ରାଏଲ ପାଖରେ କ୍ୟାମେରା ଦ୍ୱାରା ପହଞ୍ଚୁଥିଲା। ସିଏନଏନର ସୂଚନା ଅନୁସାରେ, ଆମେରିକା ଓ ଇସ୍ରାଏଲର ଗୁଇନ୍ଦା ଅଧିକାରୀମାନେ ବେଶ ତୀକ୍ଷ୍ଣ ଭାବେ ଖାମେନେଇଙ୍କ ଦୈନନ୍ଦିନ କାର୍ଯ୍ୟ ଉପରେ ନଜର ରଖୁଥିଲେ। ସେ କେଉଁଠି ରୁହନ୍ତି, କାହାକୁ ଭେଟନ୍ତି, କେମିତି ଯୋଗାଯୋଗ କରନ୍ତି ଓ ଆକ୍ରମଣ ଭୟରେ ସେ କେଉଁଠିକୁ ଯାଇ ପାରନ୍ତି, ତା’ର ଟିକିନିକି ତଥ୍ୟ ଗୁଇନ୍ଦା ଅଧିକାରୀ ହାସଲ କରିଥିଲେ। ଏହାବାଦ ୮୬ ବର୍ଷୀୟ ଖାମେନେଇଙ୍କୁ ଗୋଟିଏ ସ୍ଥାନରେ ଭେଟୁଥିବା ଇରାନର ବରିଷ୍ଠ ରାଜନେତା ଓ ସାମରିକ ଅଧିକାରୀଙ୍କ ଗତିବିଧିକୁ ମଧ୍ୟ ଇସ୍ରାଏଲ ଓ ଆମେରିକାର ଗୁଇନ୍ଦା ଅଧିକାରୀ ଟ୍ରାକ କରିଥିଲେ। ଟପ ଇରାନୀୟ ଅଧିକାରୀଙ୍କ ସମେତ ଖାମେନେଇ ଶନିବାର ସକାଳେ ତେହରାନର ଗୋଟିଏ ବିଲଡିଂ ଭିତରେ ଅଲଗା ଅଲଗା ସ୍ଥାନରେ ବୈଠକ କରିବାର ଥିଲା। ଏହି ବିଲଡିଂରେ ସର୍ବୋଚ୍ଚ ନେତା, ରାଷ୍ଟ୍ରପତି କାର୍ଯ୍ୟାଳୟ ଓ ରାଷ୍ଟ୍ରୀୟ ସୁରକ୍ଷା ବଳର କାର୍ଯ୍ୟ ରହିଛି। ଏକଥା ଜଣାପଡ଼ିବା ପରେ ରାତିରେ କରାଯିବାକୁ ଥିବା ଆକ୍ରମଣ ଯୋଜନାରେ ପରିବର୍ତ୍ତନ କରାଯାଇଥିଲା। ରାତି ବଦଳରେ ଦିନ ସମୟରେ ଏୟାର ଷ୍ଟ୍ରାଇକ କରିବାକୁ ଆମେରିକା ଓ ଇସ୍ରାଏଲ ନିଷ୍ପତ୍ତି ନେଇଥିଲେ। ଇସ୍ରାଏଲର ସ୍ଥାନୀୟ ସମୟ ସକାଳ ୬ଟା ବେଳେ ଉକ୍ତ ବିଲଡିଂ ଉପରେ ଯୁଦ୍ଧ ବିମାନଗୁଡ଼ିକ ଘନଘନ ବୋମା ବର୍ଷଣ କରିଥିଲେ। ଏହି ଠାରୁ ଆରମ୍ଭ ହୋଇଥିଲା ଆମେରିକା-ଇସ୍ରାଏଲର ମିଳିତ ଅପରେସନର ପ୍ରଥମ ପର୍ଯ୍ୟାୟ। ଜଣେ ଇସ୍ରାଏଲ ସାମରିକ ଅଧିକାରୀଙ୍କ କହିବା କଥା ଯେ ୬୦ ସେକେଣ୍ଡ ମଧ୍ୟରେ ୩ଟି ସ୍ଥାନରେ ଏୟାର ଷ୍ଟ୍ରାଇକ କରାଯାଇଥିଲା। ଏଥିରେ ଇରାନର ସୁପ୍ରିମ ଲିଡରଙ୍କ ସମେତ ପ୍ରାୟ ୪୦ ଜଣ ଅଧିକାରୀ ନିହତ ହୋଇଥିଲେ। ଦିନ ବେଳା ଆକ୍ରମଣ କରାଯିବାର ଆକଳନ କେହି ବି କରି ନଥିଲେ। ତେଣୁ ଏହି ଆକ୍ରମଣରେ ସମସ୍ତେ ଚକିତ ହୋଇଥିଲେ ବୋଲି ଅଧିକାରୀ ଜଣଙ୍କ କହିଛନ୍ତି। ରିପୋର୍ଟରେ ଆହୁରି କୁହାଯାଇଛି ଯେ ପାସ୍ତେଉର ଷ୍ଟ୍ରିଟ ନିକଟରେ ଥିବା ପ୍ରାୟ ୧୨ଟି ଫୋନ ଟାୱାରରେ ବିଭ୍ରାଟ ସୃଷ୍ଟି କରିବାକୁ ସକ୍ଷମ ହୋଇଥିଲା ଇସ୍ରାଏଲ। ସମ୍ଭାବ୍ୟ ୱାର୍ଣ୍ଣିଂ ସମ୍ପର୍କିତ ସୂଚନା ଯେମିତି ଖାମେନେଇଙ୍କ ସୁରକ୍ଷା ଦାୟିତ୍ୱରେ ଥିବା ଲୋକଙ୍କ ପାଖରେ ପହଞ୍ଚି ପାରିବ ନାହିଁ, ତା’ର ବ୍ୟବସ୍ଥା ଇସ୍ରାଏଲ କରିଥିଲା। ଇସ୍ରାଏଲ ମୋବାଇଲ ଟାୱାର ଗୁଡ଼ିକୁ ଏମିତି ହ୍ୟାକ କରିଥିଲା ଯେ ଖାମେନେଇଙ୍କ ସୁରକ୍ଷା ଦାୟିତ୍ୱରେ ଥିବା ଲୋକଙ୍କୁ କେହି ବି ଫୋନ କରି ସମ୍ଭାବ୍ୟ ବିପଦ ସମ୍ପର୍କରେ ସୂଚନା ଦେଇ ପାରି ନଥିଲେ। ସବୁ କିଛି ନିଶ୍ଚିତ କରିବା ପରେ ଖାମେନେଇଙ୍କ ଠିକଣା ଉପରେ ଇସ୍ରାଏଲ ଓ ଆମେରିକା ଏୟାର ଷ୍ଟ୍ରାଇକ କରିଥିଲେ।

#🗞ଓଡ଼ିଶା ଅପଡେଟ📺 ପୁରୀ: ଶ୍ରୀକ୍ଷେତ୍ରରେ ଆଜି ଆଧ୍ୟାତ୍ମିକ ପରିବେଶ। ପବିତ୍ର ଦୋଳପୂର୍ଣ୍ଣିମା ଅବସରରେ ମହାପ୍ରଭୁଙ୍କ ଦର୍ଶନ ପାଇଁ ପୁରୀରେ ଶ୍ରଦ୍ଧାଳୁଙ୍କ ଅସମ୍ଭାଳ ଭିଡ଼ ପରିଲକ୍ଷିତ ହୋଇଛି। ରତ୍ନବେଦୀରୁ ଦୋଳବେଦୀକୁ ବିଜେ କରିଛନ୍ତି ଦୋଳଗୋବିନ୍ଦ, ଶ୍ରୀଦେବୀ ଓ ଭୂଦେବୀ। ଏହି ଅବସରରେ ଭକ୍ତ ଓ ଭଗବାନଙ୍କ ମଧ୍ୟରେ ଦେଖିବାକୁ ମିଳିଛି ଅପୂର୍ବ ମିଳନ। ଦୋଳବେଦୀରେ ମହାପ୍ରଭୁଙ୍କ ଚଳନ୍ତି ପ୍ରତିମାଙ୍କ ସହ ଫଗୁ ଖେଳିବାର ସୁଯୋଗକୁ କୌଣସି ଭକ୍ତ ହାତଛଡ଼ା କରିନାହାନ୍ତି। ଚତୁର୍ଦ୍ଦିଗ ଫଗୁ ଓ ଅବିରରେ ରଙ୍ଗେଇ ହୋଇଯାଇଥିବା ବେଳେ ଭକ୍ତମାନେ ମହାପ୍ରଭୁଙ୍କ ଉପରକୁ ଫଗୁ ଫିଙ୍ଗି ନିଜକୁ ଧନ୍ୟ ମନେ କରିଛନ୍ତି। ହରିବୋଲ ଓ ହୁଳହୁଳି ଶବ୍ଦରେ କମ୍ପୁଛି ଶ୍ରୀକ୍ଷେତ୍ର। ତେବେ ଏହି ଆନନ୍ଦ ଉଲ୍ଲାସ ଭିତରେ ଦୋଳବେଦୀରେ ଠାକୁରଙ୍କ ପ୍ରବେଶ ସମୟରେ ଏକ ଅଭାବନୀୟ ପରିସ୍ଥିତି ଦେଖିବାକୁ ମିଳିଥିଲା। ମହାପ୍ରଭୁଙ୍କ ସହ ଫଗୁ ଖେଳିବା ଏବଂ ଟିକେ ପାଖରୁ ଦର୍ଶନ କରିବା ପାଇଁ ଭକ୍ତଙ୍କ ମଧ୍ୟରେ ପ୍ରତିଯୋଗିତା ଦେଖାଦେଇଥିଲା। ଅତ୍ୟଧିକ ଗହଳି ଯୋଗୁଁ ଠେଲାପେଲା ହେବାରୁ କିଛି ମହିଳା ଓ ପୁରୁଷ ଶ୍ରଦ୍ଧାଳୁ ତଳେ ପଡ଼ିଯାଇଥିଲେ। ଘଟଣାସ୍ଥଳରେ ଉପସ୍ଥିତ ଥିବା ସୁରକ୍ଷାକର୍ମୀ ଏବଂ ସେବାୟତମାନେ ତୁରନ୍ତ ତଳେ ପଡ଼ିଯାଇଥିବା ଭକ୍ତମାନଙ୍କୁ ଉଦ୍ଧାର କରିଥିଲେ। ସୌଭାଗ୍ୟବଶତଃ ଏହି ପେଲାଠେଲାରେ କୌଣସି ଭକ୍ତ ଗୁରୁତର ଆହତ କିମ୍ବା ଅସୁସ୍ଥ ହୋଇନାହାନ୍ତି। ସ୍ଥିତିକୁ ନିୟନ୍ତ୍ରଣ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।

#🗞ଓଡ଼ିଶା ଅପଡେଟ📺 ଭୁବନେଶ୍ୱର: ଓଡ଼ିଶାରେ ଖାଲି ପଡ଼ିଥିବା ରାଜ୍ୟସଭା ଆସନ ପାଇଁ ଭାରତୀୟ ଜନତା ପାର୍ଟି (BJP) ନିଜର ରଣନୀତି ସ୍ପଷ୍ଟ କରିଛି। ଦଳ ପକ୍ଷରୁ ରାଜ୍ୟ ସଭାପତି ମନମୋହନ ସାମଲ ଏବଂ ପୂର୍ବତନ ରାଜ୍ୟସଭା ସାଂସଦ ସୁଜିତ କୁମାରଙ୍କୁ ପ୍ରାର୍ଥୀ କରାଯାଇଛି। କେନ୍ଦ୍ରୀୟ ନିର୍ବାଚନ କମିଟିର ଅନୁମୋଦନ ପରେ ବିଜେପି ପକ୍ଷରୁ ଆଜି ଆଧିକାରିକ ଭାବେ ଏହି ଘୋଷଣା କରାଯାଇଛି। ମନମୋହନ ସାମଲ: ରାଜ୍ୟ ବିଜେପିର ସଭାପତି ଭାବେ ମନମୋହନ ସାମଲଙ୍କର ଦଳୀୟ ସଂଗଠନ ଉପରେ ଶକ୍ତ ନିୟନ୍ତ୍ରଣ ରହିଛି। ତାଙ୍କୁ ରାଜ୍ୟସଭାକୁ ପଠାଇ ଦଳ ଓଡ଼ିଶାରେ ନିଜର ରାଜନୈତିକ ସ୍ଥିତିକୁ ଅଧିକ ମଜଭୁତ କରିବାକୁ ଲକ୍ଷ୍ୟ ରଖିଛି। ସୁଜିତ କୁମାର: ସୁଜିତ କୁମାର ପୂର୍ବରୁ ମଧ୍ୟ ରାଜ୍ୟସଭା ସାଂସଦ ଭାବେ କାର୍ଯ୍ୟ କରି ସାରିଛନ୍ତି। ନିକଟରେ ବିଜେଡି ଛାଡ଼ି ବିଜେପିରେ ସାମିଲ ହୋଇଥିବା ସୁଜିତଙ୍କ ଉପରେ ଦଳ ପୁଣି ଥରେ ଭରସା ପ୍ରକଟ କରିଛି। ଓଡ଼ିଶାରେ ବିଜେପିର ବିଧାୟକ ସଂଖ୍ୟାକୁ ଦୃଷ୍ଟିରେ ରଖିଲେ, ଏହି ଦୁଇ ପ୍ରାର୍ଥୀଙ୍କ ବିଜୟ ଏକ ପ୍ରକାର ନିଶ୍ଚିତ ବୋଲି କୁହାଯାଉଛି। କଂଗ୍ରେସ ଓ ବିଜେଡି ଏହି ପରିପ୍ରେକ୍ଷୀରେ କି ରଣନୀତି ଆପଣାଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।

#🗞ଓଡ଼ିଶା ଅପଡେଟ📺 ନୀଳଗିରି: ଦୋଳ ମେଳଣକୁ କେନ୍ଦ୍ରକରି ବାଲେଶ୍ବର ଜିଲା ନୀଳଗିରି ପୌରାଞ୍ଚଳରେ ଗୋଷ୍ଠୀ ସଂଘର୍ଷ ସୃଷ୍ଟି ହୋଇଛି। ଆକ୍ରମଣରେ ଜଣେ ସାମ୍ବାଦିକଙ୍କ ସମେତ ୫ଜଣ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। କାହାଳିଆ ଚକ୍ରଧରପୁର ଶାସନରେ ରାହାସ ବିହାରୀ ଜୀଉଙ୍କ ପବିତ୍ର ଦୋଳଉତ୍ସବ ଉପଲକ୍ଷେ ସୋମବାର ଅନୁଷ୍ଠିତ ମେଳଣ କାର୍ଯ୍ୟକ୍ରମରେ ବିଗ୍ରହ ପ୍ରଥମେ ବ୍ରାହ୍ମଣ ଶାସନର ପ୍ରତି ଘରକୁ ଯାଇ ପୂଜା ପାଇଥିଲେ। ସେଠାରୁ ପୂଜା ସମ୍ପନ୍ନ ହେବା ପରେ ଅନ୍ୟ ସମ୍ପ୍ରଦାୟର ଲୋକ ପହଞ୍ଚି ଠାକୁରଙ୍କ ପୂଜାବିଧି କରିବାକୁ ତଥା ମେଳଣ ନେବାକୁ ଅନୁରୋଧ କରୁଥିବା ସମୟରେ କିଛି ଲୋକ ଏହାକୁ ବାରଣ କରିଥିଲେ। ଏହି ଘଟଣାକୁ କେନ୍ଦ୍ରକରି ଉଭୟ ଗୋଷ୍ଠୀଙ୍କ ମଧ୍ୟରେ ଯୁକ୍ତିତର୍କ ହୋଇ ସଂଘର୍ଷ ସୃଷ୍ଟି ହୋଇଛି। ଆକ୍ରମଣରେ ମନୋରଞ୍ଜନ ମହାରଣାଙ୍କ ସ୍ତ୍ରୀ ପ୍ରତିମା(୨୮), ସମରେନ୍ଦ୍ର ମହାନ୍ତିଙ୍କ ସ୍ତ୍ରୀ ପ୍ରିୟଙ୍କା(୩୦), ଜୟନ୍ତ ମହାରଣାଙ୍କ ସ୍ତ୍ରୀ ସରସ୍ବତୀ(୩୦), ଚିତ୍ତରଞ୍ଜନ ମହାରଣାଙ୍କ ସ୍ତ୍ରୀ ଚିନ୍ମୟୀ(୨୨) ପ୍ରମୁଖ ଆହତ ହୋଇ ନୀଳଗିରି ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସେମାନଙ୍କ ମଧ୍ୟରୁ ୨ଜଣ ମହିଳା ଗୁରୁତର ହେବାରୁ ବାଲେଶ୍ବର ମୁଖ୍ୟ ଡାକ୍ତରଖାନା ସ୍ଥାନାନ୍ତର ହୋଇଛନ୍ତି। ଏହି ଗୋଷ୍ଠୀସଂଘର୍ଷ ସମୟରେ ମୋବାଇଲରେ ଭିଡ଼ିଓ ଉତ୍ତୋଳନ କରୁଥିବା ସେହି ଗାଁର ସାମ୍ବାଦିକ ପ୍ରଫୁଲ ମହାନ୍ତି(୬୫)ଙ୍କୁ ମରଣାନ୍ତକ ଆକ୍ରମଣ କରାଯାଇ ତାଙ୍କ ମୋବାଇଲ ଓ ବୁମ୍ ଛଡ଼ାଇ ନେଇଥିଲେ। ସେଠାରୁ ତାଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି। ସେହିପରି ଅପରପକ୍ଷରୁ ମଧ୍ୟ ଆକ୍ରମଣ କରାଯାଇଥିବା ନେଇ ଥାନାରେ ଏତଲା ଦାଏର କରାଯାଇଛି। ଉପରୋକ୍ତ ପ୍ରସଙ୍ଗକୁ କେନ୍ଦ୍ରକରି ନୀଳଗିରି ଥାନାରେ ମୋଟ ୩ଟି ମାମଲା ରୁଜୁ ହୋଇଥିବା ବେଳେ ରାତିରେ ଏସଡିପିଓ ପ୍ରମୋଦ ମଲିକ, ଆଇଆଇସି ଗୋବର୍ଦ୍ଦନ ନାୟକ ପ୍ରମୁଖ ସଦଳବଳେ ପହଞ୍ଚି ତଦନ୍ତ ଜାରି ରଖିଛନ୍ତି। ଅପରପକ୍ଷରେ ଜଣେ ବରିଷ୍ଠ ସାମ୍ବାଦିକଙ୍କୁ ଆକ୍ରମଣ ଘଟଣାରେ ନୀଳଗିରିର ସମସ୍ତ ସାମ୍ବାଦିକ ଏକତ୍ରୀତ ହୋଇ ଡାକ୍ତରଖାନାରେ ତାଙ୍କୁ ଭେଟିବା ସହ ଏ ବାବଦରେ ତୁରନ୍ତ ପଦକ୍ଷେପ ନେବାକୁ ପୁଲିସ ଅଧିକାରୀଙ୍କ ସହ ଆଲୋଚନା କରାଯାଇଛି।

#🗞ଓଡ଼ିଶା ଅପଡେଟ📺 ଭଦ୍ରକ : ଭଦ୍ରକ ପୁଲିସକୁ ଏକ ବଡ ସଫଳତା ମିଳିଛି। ଗତ କିଛି ମାସ ହେଲା ଭଦ୍ରକରେ ବିଭିନ୍ନ ଲୋକଙ୍କ ଘରେ ପଶି ଆନ୍ତଃରାଜ୍ୟ ଡକାୟତମାନେ ସୁନା ଗହଣା ଲୁଟ କରୁଥିଲେ। ପୁଲିସ ପକ୍ଷରୁ ଏହି ଲୁଟେରା ଓ ଡକାୟତ ଟିମକୁ ଗିରଫ କରିବାରେ ସଫଳ ହୋଇଛି। ଏହି ଆନ୍ତଃରାଜ୍ୟ ଡକାୟତ ଗ୍ୟାଙ୍ଗ ଙ୍କ ଠାରୁ ୧ କିଲୋ ସୁନା, ୪କିଲୋ ରୂପା ଅଳଂକାର ଜବତ କରିଛି ଭଦ୍ରକ ଟାଉନ୍ ପୁଲିସ। ଏମାନଙ୍କ ଠାରୁ ୧୫ଟି ନକଲି ଗାଡି ନମ୍ବର, ୭ଟି ମୋବାଇଲ ଜବତ କରାଯାଇଛି। ମୁଖ୍ୟ ଅଭିଯୁକ୍ତ ଦୟା ଓରଫ ଦୟାନିଧି ଦାସଙ୍କ ସମେତ ୪ ଡକାୟତ ଉମେଶ ଦାସ, କୁନା ଦାସ, ମୁନା ଦାସ ଙ୍କୁ ପୁଲିସ ଗିରଫ କରିଛି। ଏମାନଙ୍କ ଠାରୁ ଜବତ ଚୋରି ଅଳଙ୍କାର ମୂଲ୍ୟ ୪ କୋଟିରୁ ଊର୍ଦ୍ଧ୍ବ ଟଙ୍କା ହେବ ବୋଲି ଜଣାପଡିଛି। ଭଦ୍ରକ ପୁଲିସର ଏଭଳି ସଫଳତା ସମ୍ପର୍କରେ ଆଜି ଅପରାହ୍ନରେ ଭଦ୍ରକ ଟାଉନ ଥାନା ପରିସରରେ ଏକ ସାମ୍ୱାଦିକ ସମ୍ମିଳନୀରେ ଏଭଳି ତଥ୍ୟ ପ୍ରଦାନ କରିଛନ୍ତି ଭଦ୍ରକ ଏସପି ମନୋଜ ରାଉତ। ଏହି ସାମ୍ବାଦିକ ସମ୍ମୀଳନୀରେ ଭଦ୍ରକ ଟାଉନ୍ ଥାନା ଅଧିକାରୀ ପ୍ରଭାନଶ ମିଶ୍ରଙ୍କ ସମେତ ତଦନ୍ତକାରୀ ଟିମ୍ ରେ ସାମିଲ ଥିବା ଅନ୍ୟ ପୁଲିସ ଅଧିକାରୀମାନେ ଉପସ୍ଥିତ ଥିଲେ। ପ୍ରକାଶ ଥାଉକି, ଭଦ୍ରକରେ ବିଭିନ୍ନ ସମୟରେ ଚୋରି ଓ ଡକାୟତ ହୋଉଥିବା ସୁନା ଅଳଙ୍କାର ଘଟଣାରେ ପୁଲିସ ଭଦ୍ରକ ପୁଲିସ ପକ୍ଷରୁ ମୋଟ ୧୫ ଟି ମାମଲା ରୁଜୁ ହୋଇଥିଲା। ଏହି ୧୫ ଟି ମାମଲା ଉପରେ ଭଦ୍ରକ ଏସପି ମନୋଜ ରାଉତଙ୍କ ନିର୍ଦ୍ଦେଶରେ ଟାଉନ୍ ଆଇ ଆଇ ସି ଙ୍କ ନେତୃତ୍ଵରେ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଏହି ଟିମ୍ ବିଭିନ୍ନ ସ୍ଥାନରେ ଚଢାଉ କରି ଡକାୟତ ଟିମର ମୁଖ୍ୟ ଅଭିଯୁକ୍ତ କୁହାଯାଉଥିବା ଦୟା ଓରଫ ଦୟାନିଧି ଦାଶ ଙ୍କୁ ପୁଲିସ ଧରିବାରେ ସଫଳ ହୋଇଥିଲା। ଦାୟର ଘର କେନ୍ଦ୍ରାପଡା ଜିଲ୍ଲାର ବୋଲି ଜଣାପଡ଼ିଥିବା ବେଳେ ଅନ୍ୟ ତିନି ଡକାୟତ ମୁନା ଦାସଙ୍କ ଘର କେନ୍ଦ୍ରାପଡା , ଉମେଶ ଦାସ, କୁନା ଦାସଙ୍କ ଘର କେନ୍ଦ୍ରାପଡା ବୋଲି ଜଣାପଡିଛି। ଏମାନେ ଭଦ୍ରକ, ବାଲେଶ୍ଵର, କଟକ, ଯାଜପୁର, କେନ୍ଦ୍ରାପଡା, କେନ୍ଦୁଝର ଆଦି ଜିଲ୍ଲାରେ ଚୋରି, ଡକାୟତି, ଛିନ୍ ତାଇ, ଓ ହତ୍ୟା କାଣ୍ଡ ଭଳି ସଙ୍ଗୀନ ମାମଲାରେ ସଂପୃକ୍ତ ରହି ଏହି ସବୁ ଜିଲ୍ଲାରେ ଆତଙ୍କ ଖେଳାଇ ଥିଲେ। ସବୁଠାରୁ ଗୁରୁତ୍ଵ ପୂର୍ଣ୍ଣ କଥା ହେଉଛି ଏହି ଡକାୟତମାନେ ଯେଉଁ ସବୁ ସ୍ଥାନରୁ ସୁନା ଓ ରୂପା ଅଳଂକାର ଲୁଟ କରୁଥିଲେ। ତାହାକୁ ବିଭିନ୍ନ ସ୍ଥାନରେ ମାଟିରେ ପୋତି ରଖିଥିଲେ। ପୁଲିସ ତଦନ୍ତ ବେଳେ ଏହି ଡକାୟତ ଟିମ ମାଟି ତଳେ ପୋତି ରଖିଥିବା ସୁନା ଆଲଙ୍କାରକୁ ଠାବ କରିବାରେ ସଫଳ ହୋଇଛି। ଆଜି ଏହି ୪ ଦାଜୟତଙ୍କୁ କୋର୍ଟ ଚାଲାଣ କରାଯିବ ବୋଲି ଭଦ୍ରକ ଏସପି ଶ୍ରୀ ରାଉତ ଗଣମାଧ୍ୟମକୁ କହିଥିବା ବେକେ ଏହି ଗ୍ୟାଙ୍ଗ ରେ ସଂପୃକ୍ତ ଥିବା ଆହୁରି ଦୁଇ ଅଭିଯୁକ୍ତ ଫେରାର ରହୁଛନ୍ତି। ସେମାନଙ୍କୁ ଖୁବ ସିଘ୍ର ଗିରଫ କରାଯିବ। ଉଦ୍ଧାର ହୋଉଥିବା ସୁନା ଅଳଙ୍କାରକୁ ଯେଉଁ ମାନଙ୍କର ଘରୁ ଚୋରି ହୋଇଥିଲା। ସେମାନଙ୍କୁ ପ୍ରଦାନ କରାଯିବ ବୋଲି ପୁଲିସ କହିଛି।

#📰ଦେଶ-ବିଦେଶ ଅପଡେଟ ପାକିସ୍ତାନ(Pakistan) ଓ ଆଫଗାନିସ୍ତାନ ମଧ୍ୟରେ ଚାଲିଥିବା ବିବାଦ ଆହୁରି ତୀବ୍ର ହୋଇଛି। ଆଫଗାନରେ ଶାସନ କରୁଥିବା ତାଲିବାନ ପକ୍ଷରୁ ରାୱଲପିଣ୍ଡିର ନୁର ଖାନ ଏୟାର ବେସ୍‌ରେ ଥିବା ପାକିସ୍ତାନର କମାଣ୍ଡ ଓ କଣ୍ଟ୍ରୋଲ ସେଣ୍ଟର ଉପରେ ଡ୍ରୋନ ଆଟାକ। ଏଥିରେ ନୁର ଖାନ ଏୟାର ବେସ୍‌ ପୁଣି କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି। ଭାରତ ମେ’ ମାସରେ କରିଥିବା ଅପରେସନ ସୁନ୍ଦୂର ବେଳେ ମଧ୍ୟ ପାକିସ୍ତାନର ନୁର ଖାନ ଏୟାର ବେସ୍‌ କ୍ଷତିଗ୍ରସ୍ତ ହୋଇଥିଲା। ପାକିସ୍ତାନ ଏହି ବେସ୍‌ର ମରାମତି ଚାଲିଥିବା ବେଳେ ତାଲିବାନ ଡ୍ରୋନ ଆକ୍ରମଣ କରିଛି। ଏଥିରେ ଏୟାର ବେସ୍‌ କ୍ଷତିଗ୍ରସ୍ତ ହୋଇଛି ଓ ମରାମତି କାମ ବନ୍ଦ ହୋଇ ଯାଇଛି। ଆଫଗାନିସ୍ତାନର ଜାତୀୟ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ୍ସରେ କୁହାଯାଇଛି ଯେ ତାଲିବାନ ସୁରକ୍ଷାବଳ କ୍ୱେଟ୍ଟାରେ ଥିବା ୧୨ତମ ଡିଭିଜନ ମୁଖ୍ୟାଳୟ ଓ ଖାୟବର ପାଖତୁନଖ୍ୱାରେ ଥିବା ଅନ୍ୟ ପାକିସ୍ତାନୀ ସାମରିକ ଠିକଣାଗୁଡ଼ିକ ଉପରେ ଡ୍ରୋନ Attack କରାଯାଇଛି। ପ୍ରତିରକ୍ଷା ମନ୍ତ୍ରଣାଳୟ କହିଛି, “ଆଜି ରାଷ୍ଟ୍ରୀୟ ପ୍ରତିରକ୍ଷା ମନ୍ତ୍ରଣାଳୟର ବାୟୁସେନା ପକ୍ଷରୁ ପାକିସ୍ତାନର ପ୍ରମୁଖ ସୈନ୍ୟ ପ୍ରତିଷ୍ଠାନ ଉପରେ ସଠିକ ଓ ସମନ୍ୱିତ ଏୟାର ଷ୍ଟ୍ରାଇକ କରାଯାଇଛି। ରାୱଲପିଣ୍ଡିରେ ଥିବା ନୁର ଖାନ ଏୟାର ବେସ୍‌, କ୍ୱେଟ୍ଟା(ବଲୁଚିସ୍ତାନ)ର ୧୨ତମ ଡିଭିଜନର ମୁଖ୍ୟାଳୟ, ଖାୟବର ପାଖତୁନଖ୍ୱାର ମହମ୍ମଦ ଏଜେନ୍ସିରେ ଥିବା ଖୱାଜାଇ ସମେତ ଅନେକ ଗୁରୁତ୍ୱପୂର୍ଣ୍ଣ ପାକିସ୍ତାନୀ ସୈନ୍ୟ ଠିକଣା ଓ କମାଣ୍ଡ ସେଣ୍ଟରକୁ ନଷ୍ଟ କରାଯାଇଛି।” ଏହାପୂର୍ବରୁ ଜଲାଲାବାଦରେ ପାକିସ୍ତାନର ଗୋଟିଏ ଯୁଦ୍ଧ ବିମାନକୁ ତାଲିବାନ ଖସାଇବା ସହ ଏହା ମଧ୍ୟରେ ଥିବା ପାଇଲଟଙ୍କ ଜୀବନ୍ତ କାବୁ କରିଥିବା ଦାବି କରିଥିଲା। ସ୍ଥାନୀୟ ଲୋକମାନେ ପାକିସ୍ତାନୀ ପାଇଲଟଙ୍କୁ କାବୁ କରାଯାଇଥିବା ଖବରକୁ ନିଶ୍ଚିତ କରିଛନ୍ତି। ଶୁକ୍ରବାର ପାକିସ୍ତାନ ପକ୍ଷରୁ ଆଫଗାନିସ୍ତାନର ରାଜଧାନୀ କାବୁଲ ସମେତ କାନ୍ଦାହାର ଭଳି ସ୍ଥାନରେ ଏୟାର ଷ୍ଟ୍ରାଇକ କରାଯାଇଥିଲା। ଏଥିରେ ୧୩୩ ଜଣ ତାଲିବାନ ଯୋଦ୍ଧା ପ୍ରାଣ ହରାଇଥିବା ବେଳେ ୨୦୦ରୁ ଅଧିକ ଆହତ ହୋଇଥିବା ପାକିସ୍ତାନ ସରକାର ଦାବି କରିଥିଲେ। ଘଟଣା ପରେ ତାଲିବାନ ମଧ୍ୟ ପାଲଟା ଆକ୍ରମଣ କରିଛି। ତାଲିବାନ ଶୁକ୍ରବାର ହମଲାର ବଦଲା ନେବାକୁ କରିଥିବା ଆକ୍ରମଣରେ ପାକିସ୍ତାନ ସେନାର ୫୫ ଜଣ ସଦସ୍ୟ ପ୍ରାଣ ହରାଇଥିବା ଆଫଗାନିସ୍ତାନ ସୂଚନା ଦେଇଛନ୍ତି। ତାଲିବାନର ଏହି ଆକ୍ରମଣ ପରେ ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖାୱାଜା ଆସିଫ ବଡ଼ ଘୋଷଣା କରିଥିଲେ। ପାକିସ୍ତାନ ଏବେ ଆଫଗାନିସ୍ତାନ ସହ ମୁକ୍ତ ଯୁଦ୍ଧ ସ୍ଥିତିରେ ରହିଥିବା କହିବା ପରେ ଆକ୍ରମଣ ଓ ପ୍ରତି ଆକ୍ରମଣ ତୀବ୍ର ହୋଇଛି।