ഗായികയും സംഗീത സംവിധായകയുമായ ആര്യ ദയാല്‍ വിവാഹിതയായി. അഭിഷേക് എസ്.എസ്. ആണ് വരന്‍. അടുത്ത ബന്ധുക്കൾ മാത്രം പങ്കെടുത്ത റജിസ്റ്റര്‍ വിവാഹമായിരുന്നു എന്നാണ് വിവരം. ഇരുവരും ഒന്നിച്ച് വിവാഹ സർട്ടിഫിക്കറ്റ് പിടിച്ച് നിൽക്കുന്ന ചിത്രങ്ങള്‍ ആര്യ സമൂഹ മാധ്യമങ്ങളില്‍ പങ്കുവച്ചു. അഭിഷേകിനെ ടാഗ് ചെയ്ത് '3/10/ 2025/' എന്ന തിയതിയോടെയാണ് ചിത്രങ്ങള്‍ പങ്കുവച്ചത്. പച്ചയില്‍ കസവ് പ്രിന്റോടുകൂടിയ കരയുള്ള ഓഫ് വൈറ്റ് സാരിയാണ് ചിത്രങ്ങളില്‍ ആര്യയുടെ വേഷം. ലളിതമായ ആഭരണങ്ങളാണ് ആര്യ അണിഞ്ഞിരിക്കുന്നത്. ഫ്‌ളോറല്‍ പ്രിന്റുള്ള ഷര്‍ട്ടും മുണ്ടുമാണ് അഭിഷേകിന്റെ വേഷം. ഒട്ടേറപ്പേര്‍ നവദമ്പതികള്‍ക്ക് ആശംസകളുമായെത്തി. ‘സഖാവ്’ എന്ന കവിത ആലപിച്ച് ശ്രദ്ധനേടിയ ഗായികയാണ് ആര്യ. പിന്നാലെ, കവിതയെച്ചൊലി വിവാദങ്ങളുമുണ്ടായിരുന്നു. പിന്നീട് കോവിഡ് കാലത്ത് സാമൂഹികമാധ്യമങ്ങളില്‍ പങ്കുവച്ച കവര്‍ സോങ്ങുകളിലൂടെ ആര്യ വീണ്ടും ശ്രദ്ധനേടി. അമിതാഭ് ബച്ചനടക്കം ആര്യയുടെ പാട്ടുകള്‍ പങ്കുവച്ചിരുന്നു. ‘ജീന്‍സ്’ എന്ന ചിത്രത്തില്‍ എ.ആര്‍. റഹ്‌മാന്‍ സംഗീതം നല്‍കിയ ‘കണ്ണോട് കാൺപതെല്ലാം’ എന്ന പാട്ടിന്റെ കവറിലൂടെ ആര്യ കൂടുതല്‍ ശ്രദ്ധേയയായി. ഏതാനും സിനിമകളിലും ഗാനങ്ങള്‍ ആലപിച്ചിട്ടുണ്ട്. #💑 മലയാള ഗായിക വിവാഹിതയായി; വൈറലായി ചിത്രങ്ങൾ