*అలసిన వానిని ఊరడించు మాటలు*
🍞🍞🍞🍞🍞🍞🍞🍞🍞
*సహోదరుడు భక్త సింగ్ గారి పరిచర్య నుండి సేకరించిన అనుదిన ధ్యానములు*
🍇🍇🍇🍇🍇🍇🍇🍇🍇
*🌷🌷ఫిబ్రవరి 21🌷🌷*
*"నేను యెహోవా యొద్ద విచారణ చేయగా ఆయన నాకు ఉత్తరమిచ్చెను" ( కీర్తన 34:4)*
కీర్తన 34:5 లో, "వారు ఆయన తట్టు చూడగా వారికి వెలుగు కలిగెను" అని చదువుదుము. దీని అర్థమేమనగా వారు వెలుగుచు, ప్రకాశించుచుండిరి. వారు ఆయన యొద్దకు రాక మునుపు వారి ముఖములు భయము, పాపపు గుర్తులతో, సిగ్గుతో నిండియుండెను. ప్రతి యొక్క పాపపు తలంపు, మాట లేక క్రియ నీ ముఖము పై వికారమైన, సిగ్గుకరమైన గుర్తును తీసికొని వచ్చును. ఆరంభములో దానిని నీవు చూడక పోవచ్చును గాని తరువాత అది కనబడును. "వారు ఆయన తట్టు చూడగా వారికి వెలుగు కలిగెను" అని దేవుని వాక్యము చెప్పుచున్నది. ఎవరు ఈ ప్రజలు ? వీరు ఎవరనగా, ఒకప్పుడు అవమానకరమైన, వికారమైన ముఖములు గలవారై, వారియందు పాపపు నలుపు తప్ప నీవు మరేమియు చూడలేవు. అయితే ఇపుడు వారు ఆయనను చూచుట వలన, వారి ముఖములు ప్రకాశించుచుండెను : అవి వెలుగుచుండెను. ఒక క్రొత్త పరలోక సౌందర్యము వారి ముఖముల మీదికి వచ్చెను.
*దేవుడిచ్చు ఈ సౌందర్యము సబ్బు గాని, పౌడర్ గాని, క్రీమ్ గాని లేక బంగారు, వెండి నగలు ధరించుట ద్వారా గాని రాదు. కొందరు ఎంత బుద్ధి హీనులుగా ఉందురు గదా! వారు అలాంటివి వాడుట ద్వారా తాము అందముగా ఉండగలమని తలంచుదురు. నిజముగా ఈ విధముగా వారు వికారంగా అగుదురు.* కేవలము మన భయములు పోయి విశ్వాసము ద్వారా మనము కష్టములను జయించినప్పుడు, దేవుని యొక్క మహిమతో ప్రకాశించు ముఖములు కలిగి యుందుము. దావీదు యొద్దకు సణుగుచు, గొణుగుచు, విచార ముఖములతో వచ్చిన ప్రజలు చీకటి గల అదుల్లాము గుహలో కూడా దావీదు ముఖము ప్రకాశించు చుండుటను చూచిరి. వారు కూడా ప్రభువు వైపు చూచుటకు నేర్చుకొనిరి. వారి ముఖములు కూడా ప్రకాశించ నారంభించెను. వారి ముఖములపై తమ దారిద్ర్యము, రోగమునకు బదులు దైవిక మహిమ, సౌందర్యములు ప్రకాశించు చుండెను.
అదే కీర్తనలో 4,6,17,19 వచనములలో కీర్తన కారుడు అనేక శ్రమలద్వారా వెళ్లుచున్నట్లుగా చూచుదుము. అయితే అతడు ప్రభువు యొద్దకు వచ్చి, ఆయనను చూచినపుడు, భయములన్నిటి నుండి తప్పించ బడెను. అతని కష్టములు, శ్రమలన్నియు మాయమైపోయెను. ఒక వేళ నీ మాటలు వినుటకు నాకు సమయము, నాతో మాటలాడుటకు నీకు సమయము ఉన్న యెడల నీ కష్టములన్నియు నాతో చెప్పుదువు. అయితే వినుము.. *నీ కష్టములు నాకు చెప్పకుము. వాటిని నీ పొరుగు వానితో గాని, ప్రసంగికులతో గాని, లేక ఏ ఒక్కరితో నైనను చెప్పకుము . వారు ఒకవేళ చేయ గలిగినను, వారు నీకు సహాయము ఏ మాత్రమును చేయరు.* ఈ దైవ జనుడైన దావీదు తన స్నేహితుల యొద్ద ప్రయత్నించెను. గాని వారు అతని యెడల తప్పిపోయిరి. అతనికి, తనను ఎంతో ప్రేమించు యోనాతాను అను స్నేహితుడు గలడు, అతడు రాజు యొక్క కుమారుడు. అతడు సహాయము చేయవలెనని ప్రయత్నించినను అతడును చేయలేకపోయెను. మరియు ఇతర రాజుల యొద్దకు వెళ్లినను వారు కూడా తప్పిపోయిరి. అంతమున అతడు తాను యెహోవా యొద్ద విచారణ చేసితినని చెప్పుచున్నాడు . మరొక విధముగా చెప్పవలెననిన అతడు ప్రభువును చూచెను . అప్పుడు అతడు ఇట్లు చెప్పెను. "నాకు ఏ నొప్పి లేదు, ఏ బాధ లేదు, ఏ శ్రమలు లేవు... అవన్నియు పోయినవి. చూడుడి ప్రభువు నాకు సహాయము చేసెను. నా భయములన్నిటి నుండి ఆయన నన్ను తప్పించెను." ఇంకను కొండ గుహలలో నివసించుచున్నను, ఇంకను అదే కష్టములలో ఉన్నను, ఇంకను సౌలు ద్వారా తరుమ బడుచున్నను, అతడు విశ్వాసము ద్వారా ఇట్లు చెప్పుచున్నాడు, *"నేను యెహోవా యొద్ద విచారణ చేయగా ఆయన నాకుత్తరమిచ్చెను. నాకు కలిగిన భయములు, శ్రమలు, పరీక్షలు, కష్టములన్నిటి నుండి ఆయన నన్ను తప్పించెను". అదే రీతిగా, ఆయన నిన్ను కూడా తప్పించును.*
Please share
🙏🏼Praise the LORD.🙏🏼
#📝అనుదిన వాక్యము #⛪దేవుని వాక్యము ✝
