manmohan
676 views
ಫಾಸ್ಟ್ಯಾಗ್ ನಿಯಮದಲ್ಲಿ ಭಾರೀ ಬದಲಾವಣೆ, NHAIನಿಂದ ಬಿಗ್ ರಿಲೀಫ್!
ಟೋಲ್ ರಸ್ತೆಗಳಲ್ಲಿ ಸಂಚರಿಸುವ ವಾಹನಗಳಿಗೆ ಫಾಸ್ಟ್ಯಾಗ್ (FASTag) ಕಡ್ಡಾಯ ಮಾಡಲಾಗಿದೆ. ಸ್ವಯಂಚಾಲಿತ ಟೋಲ್ ಶುಲ್ಕ ಪಾವತಿ ಉದ್ದೇಶದಿಂದ ಇದನ್ನು ಜಾರಿಗೆ ತರಲಾಯಿತು. ವಾಹನ ಮಾಲೀಕರು ಮೊದಲೇ ತಮ್ಮ ಫಾಸ್ಟ್ಯಾಗ್ ಖಾತೆಯಲ್ಲಿ ಹಣ ಹೊಂದಿರುವುದರಿಂದ ಟೋಲ್ಗಳಲ್ಲಿ ಹೆಚ್ಚು ಹೊತ್ತು ನಿಲ್ಲದೆ ಸುಗಮವಾಗಿ ಸಂಚರಿಸಲು ಅನುವು ಮಾಡಿಕೊಡಲಾಗುತ್ತಿದೆ.ಈಗ ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ಈ ಫಾಸ್ಟ್ಯಾಗ್ ಬಳಕೆದಾರರಿಗೆ ಮತ್ತೊಂದು ರಿಲೀಫ್ ನೀಡಿದೆ.
ಇದೀಗ ಫಾಸ್ಟ್ಯಾಗ್ ಬಳಕೆದಾರರಿಗೆ ನಿಮ್ಮ ವಾಹನವನ್ನು ತಿಳಿದುಕೊಳ್ಳಿ (Know Your Vehicle) ಪ್ರಕ್ರಿಯೆಯನ್ನು ಸರಳೀಕರಿಸಿದೆ. ಇದು ಹೆಚ್ಚು ಅನುಕೂಲಕರ ಮತ್ತು ಬಳಕೆದಾರ ಸ್ನೇಹಿಯಾಗಿ ಕಾರ್ಯನಿವರ್ಹಿಸಲಿದೆ. ಸದ್ಯ KYV ಪ್ರಕ್ರಿಯೆಯನ್ನು ಎನ್ಎಚ್ಎಐ ಸರಳಗೊಳಿಸಿದ್ದು, ಸುಗಮ ರಾಷ್ಟ್ರೀಯ ಹೆದ್ದಾರಿ ಅನುಭವ ನೀಡಲು ಮಾರ್ಗಸೂಚಿಗಳನ್ನು ಸರಳಗೊಳಿಸಿದೆ.
ಈ ಸರಳೀಕೃತ ಮಾರ್ಗಸೂಚಿಗಳ ಅಡಿಯಲ್ಲಿ, ನಿಮ್ಮ ವಾಹನದ ನಂಬರ್ ಪ್ಲೇಟ್ ಮತ್ತು FASTag ಅನ್ನು ತೋರಿಸುವ ಮುಂಭಾಗದ ಚಿತ್ರ ಮಾತ್ರ ಅಗತ್ಯವಾಗಿರುತ್ತದೆ. ಇದನ್ನು ಪಾಲಿಸದ ವಾಹನಗಳಿಗೆ ಫಾಸ್ಟ್ಯಾಗ್ ಸೇವೆಗಳನ್ನು ನಿಲ್ಲಿಸಲಾಗುವುದಿಲ್ಲ. KYV ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಬಳಕೆದಾರರಿಗೆ ಸಾಕಷ್ಟು ಅವಕಾಶವನ್ನು ನೀಡಲಾಗುತ್ತದೆ.
ಹೊಸ ನಿಯಮ ಏನು.?
ಈ ಸರಳೀಕೃತ KYV ಮಾರ್ಗಸೂಚಿಗಳ ಅಡಿಯಲ್ಲಿ ಕಾರು, ಜೀಪ್, ವ್ಯಾನ್ನ ಪಕ್ಕದ ಛಾಯಾಚಿತ್ರಗಳು ಇನ್ನು ಮುಂದೆ ಅಗತ್ಯವಿಲ್ಲ. ಬದಲಾಗಿ ನಂಬರ್ ಪ್ಲೇಟ್ ಮತ್ತು ಫಾಸ್ಟ್ಯಾಗ್ ತೋರಿಸುವ ಮುಂಭಾಗದ ಚಿತ್ರವನ್ನು ಮಾತ್ರ ಅಪ್ಲೋಡ್ ಮಾಡಬೇಕಾಗುತ್ತದೆ. ಅಲ್ಲದೆ, ಬಳಕೆದಾರರು ವಾಹನ ಸಂಖ್ಯೆ, ಚಾಸಿಸ್ ಸಂಖ್ಯೆ ಅಥವಾ ಮೊಬೈಲ್ ಸಂಖ್ಯೆಯನ್ನು ನಮೂದಿಸಿದಾಗ ವಾಹನ್ನಿಂದ ಆರ್ಸಿ ವಿವರಗಳನ್ನು ಸ್ವಯಂಚಾಲಿತವಾಗಿ ಪಡೆಯಲು ಅವಕಾಶ ನೀಡಲಾಗುತ್ತೆ. ಅಲ್ಲದೆ ಒಂದೇ ಮೊಬೈಲ್ ಸಂಖ್ಯೆಯಡಿ ಹಲವು ಬಹು ವಾಹನಗಳನ್ನು ನೋಂದಾಯಿಸಿದ್ದರೆ, ಬಳಕೆದಾರರು KYV ಅನ್ನು ಪೂರ್ಣಗೊಳಿಸಲು ಬಯಸುವ ವಾಹನವನ್ನು ಆಯ್ಕೆ ಮಾಡಲು ಸಹ ಅವಕಾಶ ನೀಡಲಾಗಿದೆ.
ವಾಹನದ ವಿವರಗಳನ್ನು ಈಗ ವಾಹನ್ ಡೇಟಾಬೇಸ್ನಿಂದ ಸ್ವಯಂಚಾಲಿತವಾಗಿ ಪಡೆಯಬಹುದು. ಒಂದು ಮೊಬೈಲ್ ಸಂಖ್ಯೆಗೆ ಲಿಂಕ್ ಮಾಡಲಾದ ಹಲವು ವಾಹನಗಳನ್ನು ಹೊಂದಿರುವ ಬಳಕೆದಾರರಿಗೆ ಆಯ್ಕೆ ಕೂಡ ಇದೆ. ಈ ಉಪಕ್ರಮವು ರಾಷ್ಟ್ರೀಯ ಹೆದ್ದಾರಿ ಪ್ರಯಾಣಿಕರಿಗೆ ಸುಗಮ, ಅಡಚಣೆ ಮುಕ್ತ ಅನುಭವವನ್ನು ನೀಡಲಿದೆ.
ಈ KYV ನಿಯಮಗಳ ಸರಳೀಕರಣವು ಬಳಕೆದಾರರ ಅನುಭವವನ್ನು ಹೆಚ್ಚಿಸಲು, ಫಾಸ್ಟ್ಯಾಗ್ ವ್ಯವಸ್ಥೆಯನ್ನು ಬಲಪಡಿಸಲು ಮತ್ತು ದೇಶಾದ್ಯಂತ ರಾಷ್ಟ್ರೀಯ ಹೆದ್ದಾರಿ ಬಳಕೆದಾರರಿಗೆ ಸುಗಮ ಮತ್ತು ತಡೆರಹಿತ ಅನುಭವವನ್ನು ಒದಗಿಸುವ ಭಾಗವಾಗಿದೆ ಎಂದು ತಿಳಿಸಿದೆ.
ಈ ಸೇವೆಗಳನ್ನು ಮುಂದುವರಿಸಲು ವಿತರಕ ಬ್ಯಾಂಕುಗಳು ಸಹ KYV ಅನ್ನು ಪೂರ್ಣಗೊಳಿಸಲು ಬಳಕೆದಾರರಿಗೆ ಎಸ್ಎಂಎಸ್ ಅಲರ್ಟ್
(SMS Alert) ಕಳುಹಿಸುತ್ತವೆ. ಯಾವುದೇ ಕಾರಣಕ್ಕಾಗಿ ಬಳಕೆದಾರರು ದಾಖಲೆಗಳನ್ನು ಅಪ್ಲೋಡ್ ಮಾಡುವಲ್ಲಿ ತೊಂದರೆ ಎದುರಿಸಿದರೆ, ವಿತರಿಸುವ ಬ್ಯಾಂಕ್ ಗ್ರಾಹಕರನ್ನು ಮುಂಚಿತವಾಗಿ ಸಂಪರ್ಕಿಸಿ, ಸಂಪರ್ಕ ಕಡಿತಗೊಳಿಸುವ ಮೊದಲು KYV ಪ್ರಕ್ರಿಯೆ ಪೂರ್ಣಗೊಳಿಸಲು ನೆರವಾಗುತ್ತದೆ. ಗ್ರಾಹಕರು ತಮ್ಮ ವಿತರಕ ಬ್ಯಾಂಕಿನೊಂದಿಗೆ ಯಾವುದೇ KYV ಸಂಬಂಧಿತ ಸಮಸ್ಯೆಗಳಿಗೆ ರಾಷ್ಟ್ರೀಯ ಹೆದ್ದಾರಿ ಸಹಾಯವಾಣಿ ಸಂಖ್ಯೆ-1033ಗೆ ದೂರುಗಳನ್ನು ಸಲ್ಲಿಸಬಹುದು ಎಂದು ಹೇಳಿದೆ.
#LATEST #NHAI #FASTAG #CHANGERULES #KYV #VAHANDATABASE
5 likes
1 comment • 13 shares
