#📙 നോവൽ - മുറ ചെറുക്കൻ...... 🔻 ഭാഗം _26 ✍️ രചന - Aysha akbar ഇരു വശവും വയലേലകൾ നിറഞ്ഞ ആ റോഡിലൂടെ അവരങ്ങനെ നീങ്ങി...... റോഡിന്റെ ഭംഗിയോ നാടിന്റെ സൗന്ദര്യമോ ഒന്നും ആസ്വധിക്കാൻ കഴിയാത്ത വണ്ണം മനസ്സ് പിടിക്കുന്നത് ഇഷാനിയറിഞ്ഞു..... ആ ഇട വഴികൾക്കൊക്കെയും ഇത് വരെയില്ലാത്തൊരു ഭംഗി അവനും തോന്നിയിരുന്നു..... അവൻ പോലുമറിയാതെ ആ ചുണ്ടിലൊരിളം പുഞ്ചിരി പറ്റി പ്പിടിച്ചു നിന്നു... ചെറു ചൂട് പിടിച്ചു തുടങ്ങിയ ഒരിളം കാറ്റ് അവരെ തട്ടി തട്ടി പ്പറന്നകന്നു.... മീനുവിന്റെ കൂടെ നടന്നു വന്നു എന്നതൊഴിച്ചാൽ ഇങ്ങനെയൊരു യാത്ര ഇതാദ്യമായിട്ടായിരുന്നു..... കാണുന്ന കാഴ്ചകളെക്കാറേ അരികിലിരിക്കുന്നവന്റെ ചൂടിലായിരുന്നു അവളലിഞ്ഞു ചേർന്നത്..... രണ്ട് പേരും പോകുന്നത് പല കണ്ണുകളും ഒപ്പിയെടുക്കുന്നത് സച്ചുവറിഞ്ഞിരുന്നു.... എത്രയോ ദൂരം താണ്ടി യാത്ര ചെയ്ത തനിക്ക് അതിലൊന്നും തോന്നാത്തൊരു അനുഭൂതി ഈ ചെറിയ യാത്ര യിൽ തോന്നിയതെന്തെന്ന് അവന് മനസ്സിലാകുന്നില്ലായിരുന്നു...... അവളുടെ നീളൻ മുടിയിഴകൾ അവന്റെ ദേഹത്തു കൂടങ്ങനെ പാറി കളിക്കുന്നുണ്ട്... അവന്റെ ഗന്ധത്തിലേക്കെന്ന പോൽ അവളും അങ്ങനെ ലയിച്ചു ചേർന്നു...... അവർ നേരെ ചെന്നു നിന്നത് ഒരു ചെറിയ ആശുപത്രിയുടെ മുമ്പിലായിരുന്നു...... വണ്ടി നിർത്തിയതും ബേബി മെറ്റൽ വിരിച്ച ആ മുറ്റത്തേക്ക് ഇഷാനിയിറങ്ങി...... സച്ചുവും അവൾക്ക് പിറകെയിറങ്ങി അകത്തേക്ക് നടക്കുമ്പോൾ ഒന്ന് കൂടി അവളെയൊന്ന് നോക്കാൻ മറന്നിരുന്നില്ല.... പെട്ടെന്നുള്ള ആ നോട്ടത്തിൽ ശ്വാസം വിലങ്ങുന്നത് പോലെ തോന്നിയിരുന്നു ഇഷാനിക്ക്.... അത്ര മേൽ വശ്യമായ ആ കണ്ണുകളും ഗൗരവത്തിന്റെ പിറകിലെന്ന വണ്ണം ആ ചോടിയിലൊളിപ്പിച്ച മനോഹരമായൊരു പുഞ്ചിരിയും അവളുടെ ഹൃദയത്തിലേക്ക് ആഴ്ന്നിറങ്ങും പോലെ.... അവൾ തല താഴ്ത്തി കൊണ്ട് അവനു പിറകെ നടന്നു..... ടോക്കൺ എടുത്തവൻ അവിടെയുള്ള ബെഞ്ചിലേക്കിരിക്കുമ്പോൾ അവളും അവനരികിലായിരുന്നു .... സുഖമുള്ള ഒരു തരം നിശബ്ദത അവിടെ നിറഞ്ഞു നിന്നത് പോലെ..... ഒരു നാട്ടിൻ പുറത്തെ ക്ലിനിക് എന്നത് കൊണ്ട് തന്നെ അധികം ഒച്ചയും ബഹളവുമോന്നുമവിടെയുമില്ലായിരുന്നു...... തലക്ക് മുകളിൽ കറങ്ങുന്ന സീലിംഗ് ഫാനിന്റെ ശബ്ദം മാത്രം അവിടെ നിറഞ്ഞു നിൽക്കുന്നത് പോലെ...... അവൾ അവനെ ഒന്ന് കണ്ടാസ്വദിച്ചു...... ഒരു ബ്രൗൺ കളർ ഷർട്ടും ബ്ലാക്ക് പാന്റുമാണ് അവനിട്ടിരിക്കുന്നത് ... ഫുൾ സ്ലീവ് ഷർട്ടിന്റെ കൈ അല്പം മടക്കി വെച്ചത് കൊണ്ട് ബലമേറിയ അവന്റെ കയ്യല്പം കാണാനുണ്ട്..... കൈ വെള്ളയിൽ ചുരുട്ടി പ്പിടിച്ച ടോക്കണിൽ അവൻ ചെറുതായി തെരു പിടിക്കുന്നത് ഇടം കണ്ണാലെ അവൾ നോക്കിയിരുന്നു......... തല ഉയർത്തി പ്പിടിച്ചിരിക്കുന്നത് കൊണ്ട് തന്നെ ഒരു വശത്തേക്ക് ചീകി വെച്ച അവന്റെ നീളൻ മുടിയിഴകൾ വളരെ ഒതുക്കത്തിൽ നിൽക്കുന്നുണ്ട്...... വാ....... ടോക്കൺ ആയെന്ന് കണ്ടതും അവനതും പറഞ്ഞ് കൊണ്ടെഴുന്നേൽക്കുമ്പോൾ പെട്ടെന്ന് അവളുടെ കൈ വിരലുകളിൽ ഒന്ന് പിടിക്കാൻ തുനിഞ്ഞു.... എന്നാൽ വിരലൊന്ന് മുട്ടിയെന്ന് തോന്നിയ അതേ നിമിഷം തന്നെ. എന്തോ ഓർമയിൽ പെട്ടെന്നവൻ കൈ പിൻ വലിച്ചിരുന്നു...... പെട്ടെന്നുള്ള ആ പ്രവർത്തിയിൽ അവന് പിറകെ എഴുന്നേറ്റ അവൾ അവനെ യൊന്നു നോക്കി.... അറിയാതെ പറ്റിയെന്ന തരത്തിൽ അവനും അവളെ യൊന്നു നോക്കുമ്പോൾ ആ കണ്ണുകളൊന്ന് ചുരുങ്ങിയത് പോലെ തോന്നിയിരുന്നു ഇഷാനിക്ക്..... മീനുവിന്റെയോ മറ്റോ ഓർമയിലാവാം അങ്ങനെ സംഭവിച്ചത്...... പക്ഷെ ആ വിരലുകൾ തനിക്കായി തന്നെ യൊന്നു നീണ്ടു പോയിരുന്നെങ്കിലെന്ന് അവളുടേ മനസ്സ് വല്ലാതെ ആഗ്രഹിച്ചു പോയിരുന്നു .. അകത്തേക്ക് കയറി ഡോക്ടറെ കാണുമ്പോൾ ഒരു കൊച്ചു കുട്ടിയെ പോലെ അവളങ്ങനെയിരുന്നു..... ഡോക്ടറുടെ ഓരോ ചോദ്യത്തിന് മറുപടിയടക്കം എല്ലാം പറഞ്ഞത് അവനായിരുന്നു..... അവന്റെ ചിറകിലൊതുങ്ങി യെന്ന പോൽ അവളങ്ങനെയിരുന്നു.... അത്ര നേരം കൂടി ധൈര്യമായി അവന്റെ മുഖത്തേക്ക് നോക്കാമല്ലോ...... അവൻ ഓരോ കാര്യങ്ങളും ഡോക്ടറോട് പറയുമ്പോൾ അവളവനെ തന്നെ നോക്കിയിരുന്നു..... ഡോക്ടർ മരുന്നെഴുതാൻ കണ്ണുകൾ നീക്കിയതും അവളുടെ നോട്ടം അറിഞ്ഞെന്ന വണ്ണം സച്ചു കണ്ണുകൾ ചുരുക്കി അവളെയൊന്ന് നോക്കി.... അവൾ പെട്ടെന്ന് നോട്ടം വെട്ടിച്ചിരുന്നു.... അവന്റെ ചുണ്ടിൽ വിരിഞ്ഞോരു കുഞ്ഞു പുഞ്ചിരിയെ അവൾ കാണാതെ അവൻ അടക്കി പ്പിടിച്ചു.... അവർ ഡോക്ടറുടെ റൂമിൽ നിന്നിറങ്ങുമ്പോഴാണ് ആശുപത്രി ക്കകത്തേക്ക് വരുന്ന മാജിയെ കാണുന്നത്..... കൂടെ അവളുടെ ഉമ്മയുമുണ്ട്....... അവളെ കണ്ടതും ഒരു നിമിഷം പരിചയ ഭാവത്തിൽ അവളുടെ കണ്ണുകൾ വിടർന്നിരുന്നു.... എന്നാൽ മാജി അവളെ കാണുക പോലും ചെയ്യാത്ത വിധം സച്ചുവിൽ മാത്രം കണ്ണുകൾ നട്ടപ്പോഴാണ് മീനു പറഞ്ഞ കാര്യം അവളോർത്തെടുത്തത്...... ആ..... എന്താണ് സൈനാത്താ..... ഇബൾക്കൊരു പനി......ഇന്നലെ രാത്രി തൊടങ്ങീതാ...... ഇങ്ങളെന്തിനാ.... ഒന്ന് കൂടി അടുത്ത് വന്നതും സച്ചു അത്‌ ചോദിച്ചപ്പോഴാണ് മാജിയുടെ ഉമ്മ മറുപടി പറഞ്ഞത്..... ഞങ്ങളും പനി തന്നെ...... സച്ചു ഇഷാനിയിലേക്കൊന്ന് ചൂണ്ടി അതും കൂടി പറയുമ്പോഴാണ് മാജിയും അവളെയൊന്ന് നോക്കിയത്...... മീനുവിന്റെ ദാവണിയൊക്കെ യുടുത്ത് വല്ലാത്തൊരു ഭംഗിയോടേ സച്ചുവിനരികിലായി നിൽക്കുന്നവളെ നോക്കി അവളൊന്നു പുഞ്ചിരിക്കുമ്പോൾ എന്തൊക്കെയോ മനസ്സിൽ നിറഞ്ഞു തുളുമ്പുന്നുണ്ടായിരുന്നു.... സച്ചിവിനെയും ഇഷാനിയെയും മാറ്റി മാറി അവളുടെ കണ്ണുകൾ ഒപ്പിയെടുത്തു... പിന്നെന്താ രണ്ടാളേം ആ വയിക്ക് കണ്ടില്ലല്ലോ..... മാജിയുടെ ഉമ്മ സ്നേഹത്തോടെ അത്‌ പറയുമ്പോൾ അവരുടെ പൊങ്ങിയ പല്ലുകളിൽ നോക്കി ഇഷാനി യൊന്നു ചിരിച്ചു..... സച്ചുവും ഒരു പുഞ്ചിരി യോടെ നിൽക്കും നേരം ഇടക്കെപ്പോഴോ മാജിയിലേക്ക് അവന്റെ കണ്ണൊന്നു തെന്നി നീങ്ങിയതും ഹൃദയം എന്തിനോ അകാരണമായി പിടച്ചത് ഇഷാനിയറിഞ്ഞു...... ഒരു പുഞ്ചിരിയുടെ കൂട്ടോടെ അവരകത്തേക്കും തങ്ങൾ പുറത്തേക്കും നടക്കുമ്പോൾ ഇഷാനി കണ്ണുകൾ കൂർപ്പിച്ചു അവനെയൊന്ന് നോക്കിയത് അവൻ മനപ്പൂർവം കണ്ടില്ലെന്ന് നടിച്ചിരുന്നു ....... മരുന്ന് വാങ്ങി ക്കഴിഞ്ഞു വീണ്ടും അതേ യാത്ര..... കൂടുതലെന്തൊക്കെയോ അവനോടവൾക്ക് സംസാരിക്കണമായിരുന്നു..... കാരണം.... ഇനിയൊരു പക്ഷേ ഇങ്ങനെ അവനെ തനിച് കിട്ടിയില്ലെങ്കിലോ... തനിക്കിഷ്ടമാണെന്ന് മുഖത്ത് നോക്കി പറയാൻ ഇതിനേക്കാൾ നല്ലൊരു അവസരം ഇനി കിട്ടില്ലായിരിക്കാം..... തിരികെ അവനേന്ത് പറയാനും ആ വീട്ടിലുള്ള പ്രയാസം പുറത്തവനുണ്ടാവില്ല.... പക്ഷെ എങ്ങനെ..... എങ്ങനെ താൻ സംസാരിക്കും..... തന്റെ നോട്ടങ്ങളിൽ നിന്ന് പോലും വിദഗ്ധമായി ഞൊടിയിടയിൽ കടന്ന് കളയുന്ന അവനോട് ഞാനെങ്ങനെ തുറന്ന് സംസാരിക്കും..... അവൾക്കറിയുന്നില്ലായിരുന്നു.... ആലോചനകളെയെല്ലാം ഉള്ളിലൊതുക്കി അവൾ അവന്റെ കൂടെയുള്ള നിമിഷങ്ങളെ ആസ്വദിക്കാൻ ശ്രമിച്ചു........ 🔷🔷🔷🔷🔷🔷🔷🔷🔷🔷🔷🔷🔷🔷🔷🔷🔷ഗായത്രി കാറിൽ നിന്നിറങ്ങിയതും എല്ലാവരുടെയും മുഖത്ത് ഒരു പോലെ വെപ്രാളം പരന്നു.... ഇത് വരെ അവളുടെ വരവന്തിനെന്നുള്ള ചോദ്യമായിരുന്നു വെങ്കിൽ ഇന്നത്തെ വേവലാതിക്ക് കാരണം ഇഷാനിയെ തിരികെ കൊണ്ട് പോകുമോയെന്നത് തന്നെയായിരുന്നു .... ഗായത്രി പതിവ് ഗൗരവത്തോ ടെ തന്നെ അകത്തേക്ക് കയറി........ എല്ലാവരും അവളെ കണ്ടൊരു നിമിഷം നിശ്ചലമായി പോയിരുന്നു.... ഗോപി അവളെ യൊന്നു നോക്കി..... പണ്ട് തന്റെ കൈ വിരലുകളിൽ തൂങ്ങി നടന്നിരുന്ന ആ കുഞ്ഞു പെങ്ങളെ മനസ്സോർമിപ്പിക്കുമ്പോഴും അവളിന്ന് തന്നിൽ നിന്നോത്തിരി ദൂരത്താണെന്ന് ഗായത്രിയുടെ മുഖത്ത് തിങ്ങി നിറഞ്ഞിരുന്ന പുച്ഛം അയാളോട് പറയാതെ പറഞ്ഞിരുന്നു........ നീയെന്താ പെട്ടെന്ന് ഒരു മുന്നറിയിപ്പുമില്ലാതെ....... അകത്തേക്ക് കയറിയ ഗായത്രി യോടത് ചോദിച്ചത് മുത്തശ്ശിയായിരുന്നു...... പെട്ടെന്നൊന്നുമല്ല...... ഇന്ന് വരണമെന്ന് ഞാൻ മുൻകൂട്ടി തീരുമാനിച്ചിരുന്നു...... പറഞ്ഞില്ലെന്നു മാത്രം...... ഗായത്രി അതും പറഞ്ഞു കൊണ്ട് മുത്തശ്ശി ക്കരികിലേക്കിരിക്കുമ്പോൾ ഗോപിയെ അവരൊന്നു നോക്കിയിരുന്നു..... ഗോപിയേട്ടനിപ്പോഴും മരക്കച്ചവടം തന്നെയല്ലേ.... അവൾ ഗോപിയെ നോക്കിയത് ചോദിക്കുമ്പോൾ ഗോപിയുടെ ഉള്ള് എന്തിനോ ഒന്ന് മുറിഞ്ഞു.... ഇത്ര കാലം കൂടി കണ്ട പെങ്ങൾ ഇങ്ങനെയായിരുന്നില്ല തന്നോട് ചോദിക്കേണ്ടിയിരുന്നത്.... ഓടി വന്നു തന്നെയൊന്ന് കെട്ടി പിടിക്കണമായിരുന്നു.... അയാൾ ഏറെ നോവ് നിറച്ചു കൊണ്ടൊന്നു പുഞ്ചിരിച്ചു...... തനിക്ക് എത്ര വില തരണമെന്ന് അറിയാനുള്ള ചോദ്യമായിരിക്കാം അതെന്ന് അയാൾക്ക് തോന്നി..... തനൂജയുടെ മുഖത്തും ഒരു വേദന പരന്നു.... ഗോപിയുടെ ദയനീയമായ മുഖവും ഗായത്രിയുടെ അഹങ്കാരം കൂടി കണ്ട് അമ്മുവിന്റെ മുഖം വലിഞ്ഞു മുറുകി.... അല്ലേടി..... അവനിപ്പോ മരക്കച്ചോടം നിർത്തി ഇവിടുത്തെ പ്രധാന മന്ത്രിയായത് നീയറിഞ്ഞില്ലേ...... പെട്ടെന്ന് മുത്തശ്ശിയുടെ ശബ്ദം അവിടെയുയർന്നപ്പോഴാണ് ഗായത്രി ഗോപിയിൽ നിന്ന് കണ്ണുകളൊന്ന് വെട്ടിച്ചത്... അവർ മുത്തശ്ശി യെ ഒന്ന് ഉറ്റു നോക്കി...... കാലം കൂടി കണ്ട കൂടെ പിറപ്പിനോട് ചോദിക്കേണ്ട ചോദ്യം ഇതാണല്ലോ.... നീയൊക്കെ എന്റെ വയറ്റിൽ തന്നെ കുരുത്തല്ലോടി...... മുത്തശ്ശി അങ്ങേയറ്റം ദേഷ്യത്തോടെ അത്‌ പറയുമ്പോൾ ഗായത്രിയുടെ മുഖവും വലിഞ്ഞു മുറുകി.... അമ്മേ.... പ്ലീസ്‌......എന്റെ ഡ്രൈവർ കേൾക്കും..... അവര് പോലും ഇത്രയും കൾചർ ലെസ്സായി സംസാരിക്കില്ലായിരിക്കും... ഗായത്രി നിറഞ്ഞ ദേഷ്യത്തോടെ അല്പം അടക്കി പ്പിടിച്ച ശബ്ദത്തിൽ അത്‌ പറയുമ്പോൾ മുത്തശ്ശി ഗായത്രി യൊന്നു നോക്കി.... പ്ഫാ......ഈ മുറ്റത്തെ ചെളിയിലൂടെ ഒരു ജെട്ടി മാത്രമിട്ട് മൂക്കും ഒലിപ്പിച്ചു നടന്ന നിനക്കെന്നാടി ഇത്ര കൾചറൊക്കെ കിട്ടിയത്.... ഈ കൾചറില്ലാത്ത വയറ്റിലാ പത്തു മാസം നീ കിടന്നത്.......അത്‌ മറക്കേണ്ട.... ത്ഫൂ..... മുത്തശ്ശി ഉയർന്ന ശബ്ദത്തിൽ അതും പറഞ്ഞു കൊണ്ട് മുറ്റത്തേക്ക് നീട്ടി തുപ്പിയതും വെള്ള ഷർട്ടും പാന്റ്റും കറുപ്പ് തൊപ്പിയുമിട്ട ഗായത്രിയുടെ ഡ്രൈവർ ഇടം കണ്ണാലെ നോക്കുന്നത് ഗായത്രിക്ക് സഹിക്കാൻ പറ്റുന്നതിലും അപ്പുറമായിരുന്നു...... അവർ ദേഷ്യത്തോടെ പല്ലിറുമ്മി... എന്താ അമ്മേ ഇത്..... എന്തിനാ അവളോടിങ്ങനെയൊക്കെ പറയുന്നത്..... തനൂജേ.... നീ പോയി അവൾക്ക് കുടിക്കാനെന്തെങ്കിലും എടുത്ത് കൊണ്ട് വാ..... ഇടക്ക് കയറി ഗോപിയത് പറയുമ്പോൾ ഗായത്രി ഗോപിയെ ദേഷ്യത്തോടെ യൊന്നു നോക്കി..... തനിക്ക് പണമുണ്ടല്ലോ... അപ്പൊ പിന്നേ തന്നെ സുഗിപ്പിച്ചു നിൽക്കാൻ ശ്രമിക്കുന്ന ഗോപിയോട് അവൾക്ക് നിറഞ്ഞ പുച്ഛം തോന്നിയിരുന്നു..... ഇത് തന്നെയാ ഞാനിങ്ങോട്ട് വരാത്തത്...... പണ്ട് മുതലേ അങ്ങനെയാണല്ലോ..... ഏട്ടൻ എന്ത് പറഞ്ഞാലും അമ്മക്ക് ശെരിയാ... ഞാനെന്ത് പറഞ്ഞാലും ഇത് പോലെ എന്റെ മെക്കിട്ട് കയറും...... ഗായത്രി നിറഞ്ഞു വന്ന അമർഷം ഉള്ളിലൊതുക്കി അത്‌ പറയുമ്പോൾ അമ്മയും അനിയത്തിയും വഴക്കുണ്ടാക്കുമ്പോഴും അവളെ ഒന്നും പറയാൻ സമ്മതിക്കാതെ പരിച പോലെ അവർക്കിടയിൽ നിന്നിരുന്ന ചേട്ടനെ ഗായത്രിയുടെ മനസ്സ് മറന്നു പോയെങ്കിലും തനൂജയുടെ മനസ്സ് വ്യക്തമായി ഓർത്തെടുത്തിരുന്നു..... എല്ലാം മറവിക്ക് വിട്ട് കൊടുത്ത് പുതിയൊരാളായി ജീവിക്കാൻ അവൾക്കെങ്ങനെ കഴിയുന്നു വെന്നോർത്ത് അവർക്ക് അത്ഭുതം തോന്നി....... പണം...... എല്ലാ അർത്ഥത്തിലും ഒരാളെ മാറ്റാൻ കഴിയുന്ന ഒന്നാണെന്ന് അവർ സ്വയം മനസ്സിലാക്കുകയായിരുന്നു.. വരാൻ ഇഷ്ടമില്ലെങ്കിൽ പിന്നെന്തിനാണെടി നിന്നെയിപ്ലോ ഇങ്ങോട്ട് കെട്ടിയെടുത്തത്....... ഞാൻ വന്നത് എന്റെ മോളെ കൊണ്ട് പോകാനാണ്....... മുത്തശ്ശി വീണ്ടും ദേഷ്യത്തോടെ അത്‌ ചോദിച്ചതിന് ഗായത്രി പെട്ടെന്ന് മറുപടി പറയുമ്പോൾ ഒരു നിമിഷം എല്ലാവരും ഒന്ന് ഞെട്ടിയിരുന്നു..... നിഷ്കളങ്ക മായി ചിരിക്കുന്ന ഇഷാനിയുടെ മുഖം എല്ലാവരുടേ മനസ്സും ഓർമിപ്പിച്ചു...... ഇനിയൊരു പോക്ക് പോയാലൊരു പക്ഷേ അവൾ തിരിച്ചു വരികയേ ചെയ്യില്ലായിരിക്കുമെന്ന് എല്ലാവർക്കും ഒരു പോലെ അറിയാമായിരുന്നു....... (തുടരും) Aysha Akbar #📔 കഥ