ఆదిదేవుని రూపంలో అంతరార్థాలు.........!! శివుడు అంటే శుభం, సౌమ్యం, మంగళకరం అని అర్థం. శివుడు కళంక రహితుడు. అతిశయ రూపుడు. కాలాతీతుడు. సర్వాంతర్యామి. వేదాలు ఆయనను రుద్రుడు అని పిలిచాయి. శివుడినీ, శివతత్వాన్నీ అర్థం చేసుకోవడం చాలా కష్టం. అయితే అతడి అనుగ్రహం చాలా సులభం. అందువల్లనే ఆయన భక్తసులభుడిగా ప్రసిద్ధుడు. ఆయనరూపంలో దాగిన ఎన్నో విషయాలను సంక్షిప్తంగా తెలుపుతూ..... లింగాకారం:...... సకల జీవరాశులూ తనలో లీనమవుతారు అని చూపించడానికి ఆయన లింగాకారాన్ని పొందాడు. ప్రళయకాలంలో సమస్తమూ ఆ లింగంలో లీనమైపోతుంది. విశ్వచైతన్యం అంతా లింగాకారం అని, భూమి పానవట్టం అని చెబుతారు. సదాశివుని నిష్కలరూపమే శివలింగం. శుద్ధ ధవళుడు:...... ఆయన కర్పూరంవలె, హిమంవలె తెల్లటి శరీరవర్ణం కలవాడు. తెలుపురంగు స్వచ్ఛతను, సహనాన్ని, విశాలత్వాన్ని "సూచిస్తుంది. సప్తవర్ణాలు తెలుపులో నుంచే పుడతాయి. చివరికి అందులోనే కలిసిపోతాయి. అందుకే శివుడు శ్వేతవర్ణంలో ప్రకాశిస్తుంటాడు. విభూతిధరుడు:....... శివుడి లలాటంపై విభూతి రేఖలు సదా ప్రకాశిస్తుంటాయి. ఇందులోని అంతరార్థం ఏంటంటే ఏ వస్తువైనా కాలిపోయాక చివరికి బూడిద మాత్రమే మిగులుతుంది. జీవితంలో లౌకికంగా ఎంత వైభవాన్ని పొందినా ఈ దేహం తాత్కాలికమైంది. ఏదో ఒకనాడు కాలి బూడిద. కావలసిందే. కనుక లౌకిక వైభవాలు శాశ్వతం కావనే విషయాన్ని తెలుపుతూ వైరాగ్యాన్ని బోధిస్తున్నాడు. తలపై నెలవంక:....... చంద్రుడు కాలగమనాన్ని సూచించేవాడు. దక్షుడి శాపం వలన రోగాన్ని పొందిన చంద్రున్ని అనుగ్రహించి నెలలో సగం రోజులు వృద్ధిని, మరో సగం రోజులు క్షయం పొందే విధంగా శాపవిమోచన చేశాడు. అతని ఒక కళను తీసుకొని తలపై ధరించాడు. ఆనాటి నుండి శివుణ్ణి చంద్రశేఖరుడు అని పిలిచారు. మూడు కన్నులవాడు:...... రుద్రునికి మూడు నేత్రాలు, అవి సూర్యుడు, చంద్రుడు, అగ్ని, ఈ త్రినేత్రాల వలన ఆయనను కాలనియామకుడిగా తెలుసుకోవచ్చు. మధ్యలో ఉండే అగ్నినేత్రం జ్ఞాననేత్రం. ఈ నేత్రంతోనే ఆయన మన్మథుడిని భస్మం చేశాడు. తలపై గంగమ్మ:....... భగీరథుడి ప్రార్థనవల్ల భువికి దిగి వచ్చిన గంగను తన జటాజూటంలో నిలిపాడు శివుడు. గంగను ధరకు విడిచిపెట్టి లోకానికి ఉపకారం చేశాడు. ఆయన స్వయంగా జలమూర్తి, దానిపై నియంత్రణ కలవాడు కూడా. ఈ సందర్భంలోనే ఆయనకు గంగాధరుడు. అనే పేరు వచ్చింది. కంఠంలో కాలకూట విషం:....... క్షీరసాగరం నుండి ఉద్భవించి జగత్తును దహించే కాలకూట విషాన్ని కంఠంలో నిలుపుకుని లోకాలను రక్షించాడు. కంఠంలో కాలకూట విషం నిలువగానే ఆయన కంఠం నీలంగా మారిపోయింది. నాటినుండి ఆయన నీలకంఠుడయ్యాడు. నాగభూషణుడు:..... విషసర్పాలను కంఠంలో, దేహంపై భూషణాలుగా ధరించాడు. సృష్టిలోని జీవజాలమంతా తనకు సమానమని తెలిపి, గరుడుని వల్ల నాగులకు రక్షణ కల్పించాడు. నాగులు కుండలినీశక్తికి ప్రతీకలు. త్రిశూలధారి:..... సృష్టి, స్థితి,లయాలు మూడు శూలాలై నిలిచి, ఒకే ఆయుధంగా మారి శివుని చేతిలో త్రిశూలంగా నిలిచింది. ఆ మూడు మొనలు సాత్విక, రాజస, తామసాలనే మూడు గుణాలకు ప్రతీకలు. ప్రారబ్ధ, సంచిత, ఆగామి కర్మలు హరించాలన్నా, ఆదిభౌతిక, ఆదిదైవిక, ఆధ్యాత్మిక తాపత్రయాలు పరిహారం అవ్వాలన్నా త్రిశూలమే ముఖ్యసాధనం. డమరుకం:..... శబ్దం, భాష, వ్యాకరణం జ్ఞానానికి ప్రతీకలు. లోపల ఉండే జ్ఞానం బహిర్గతం అయితేనే దానికి విలువ. అదేవిధంగా పరమేశ్వరుడు 14 వ్యాకరణ సూత్రాలను డమరుకనాదంతో ప్రపంచానికి తెలియజేశాడు. ఆ వ్యాకరణమే నేటి మన భాషకు ఆధారం. #తెలుసుకుందాం #హర హర మహాదేవ శంభో శంకర #🕉️హర హర మహాదేవ 🔱 #hara hara mahadeva #🙏ఓం నమః శివాయ🙏ૐ