#తమిళనాడు రాజకీయాలు 🚩🥱 *తలైవా…(నాయకా) Time to Lead…! నాడు జయలలిత గేటు ముందు విజయ్..‼️* May 7, 2026🎯 ఇది సినిమా కథ కాదు… అంతకు మించిన పొలిటికల్ థ్రిల్లర్! అప్పుడు సీఎం ఇంటి గేటు బయట నిలబడ్డాడు… ఇప్పుడు అదే కుర్చీని కైవసం చేసుకునే దిశలో ఉన్నాడు…! నాడు అవమానం… నేడు పట్టాభిషేకం! ‘దళపతి’ విజయ్ రాజకీయ ప్రస్థానంలో ఎవరూ ఊహించని మలుపులు… 13 ఏళ్ల క్రితం జయలలిత అడ్డుకున్న ఆ చిన్న ప్రవాహం… నేడు సునామీలా మారి తమిళ రాజకీయాలను కుదిపేసింది..! తమిళనాడు రాజకీయాల్లో ఇప్పుడు ఒకటే పేరు మారుమోగుతోంది… అదే విజయ్... ఒక నటుడిగా వెండితెరను ఏలిన తను, ఇప్పుడు రాజకీయ తెరపై ‘రియల్’ హీరోగా అవతరించాడు… అయితే ఈ గెలుపు వెనుక ఉన్న గాయం, ఆ గాయం వెనుక ఉన్న అవమానం ఓసారి చెప్పుకోవాలి… చాలా కథల్లో ఏవో అవమానాలే స్పూర్తిని, కసిని రగిలించి… సక్సెస్ వైపు నడిపిస్తాయనేది తెలిసిందే కదా… ఇదీ అదే… 1. ఆ ఒక్క టాగ్ లైన్.. అమ్మ గ్రహించిన ప్రమాదం అది 2013వ సంవత్సరం… విజయ్ కెరీర్ ఊపందుకుని ఉంది… ఆయన నటించిన ‘తలైవా’ సినిమా విడుదలకు సిద్ధమైంది… అయితే ఆ సినిమా పోస్టర్‌పై “Time to Lead” అనే చిన్న ట్యాగ్ లైన్ ఉంది… అదే అప్పటి ముఖ్యమంత్రి జయలలితకు అస్సలు నచ్చలేదు… అది విజయ్ పొలిటికల్ ఎంట్రీకి సంకేతం అనుకుంది… ఆదిలోనే తొక్కాలని అనుకుంది… తనూ రాజకీయవేత్తే కదా మరి… విజయ్ రాజకీయాల్లోకి వస్తే తన కోటకు బీటలు పడతాయని భావించింది… రాజ్యాధికారాన్ని వాడుకుని సినిమాను అడ్డుకుంది… బాంబు బెదిరింపుల సాకుతో థియేటర్ల వద్ద భయాందోళనలు సృష్టించి, సినిమాను రిలీజ్ కాకుండా అడ్డుకున్నారు పోలీసులు… (ఇప్పుడు జననాయగన్ సినిమాను సెన్సార్ దగ్గరే ఆపేశారు, అది వేరే కథ…) 2. కొడనాడ్ ఎస్టేట్ గేటు వద్ద ‘స్టార్ హీరో’ కన్నీళ్లు! సినిమా ఆగిపోవడంతో కోట్ల నష్టాల్లో ఉన్న నిర్మాతలను చూసి విజయ్ తల్లడిల్లిపోయాడు… ఎలాగైనా సమస్యను పరిష్కరించుకుందామని తన తండ్రి ఎస్.ఏ. చంద్రశేఖర్‌తో కలిసి జయలలితను కలిసేందుకు కొడనాడ్ ఎస్టేట్ వెళ్లారు… కానీ అక్కడ ఆయనకు అవమానం ఎదురైంది… జయలలిత ఎంత ఇగోయిస్టో తెలుసు కదా… ఓ స్టార్ హీరో అని చూడకుండా, కనీసం మనిషి అన్న గౌరవం కూడా ఇవ్వకుండా గంటల తరబడి ఎండలో ఆ ఎస్టేట్ గేటు బయటే నిలబెట్టింది… అపాయింట్‌మెంట్ ఇవ్వకపోగా, మాట్లాడటానికి ఒక్క ప్యూన్‌ను కూడా పంపలేదు… అది విజయ్ ఒక్కడికి జరిగిన అవమానం కాదు… యావత్ చిత్ర పరిశ్రమకే జరిగిన అవమానం అనే అభిప్రాయాలు వినవచ్చాయి… బట్, జయలలిత ఆమె… నెవర్ కేర్స్… 3. కన్నీటి వీడియో… కదిలిన తమిళనాడు! జయలలిత అక్కడితో ఆగలేదు… సినిమాకు ట్యాక్స్ మినహాయింపులు నిరాకరించి ఆర్థికంగా దెబ్బకొట్టింది… పొరుగు రాష్ట్రాల్లో సినిమా ఆడుతున్నా, సొంత గడ్డపై మాత్రం అడుగుపెట్టనివ్వలేదు… గత్యంతరం లేని స్థితిలో విజయ్ కళ్ళల్లో నీళ్లు పెట్టుకుని ఒక వీడియో విడుదల చేశాడు… “నేను ప్రభుత్వానికి వ్యతిరేకిని కాను… దయచేసి మా సినిమాను ఆడనివ్వండి” అని వేడుకున్నాడు… ఒక మాస్ హీరో అలా దీనస్థితిలో కనిపించడం తమిళనాడు ప్రజలను కలచివేసింది… 4. పదమూడేళ్ల నిరీక్షణ… కాలం తీర్చిన తీర్పు! కాలం ఎప్పుడూ ఒకేలా ఉండదు… జయలలిత మరణం తర్వాత తమిళ రాజకీయం మలుపు తిరిగింది… నాడు ఏ గేటు బయట అయితే విజయ్ అవమాన భారంతో నిలబడ్డాడో, నేడు ఆ ఎస్టేట్ ఉన్న తమిళనాడు ప్రజలు అసెంబ్లీ గేట్లు తెరిచి ఆయనను ఆహ్వానిస్తున్నారు… (నిజానికి ఇప్పుడు ఆ ఎస్టేట్ పరిస్థితి, జయలలిత మరణం తరువాత అదెలా కుక్కలు చింపిన విస్తరి అయ్యిందో పెద్ద స్టోరీ)… 2026 ఎన్నికల ఫలితాల్లో విజయ్ నేతృత్వంలోని టీవీకే (TVK) ప్రభంజనం సృష్టించింది… 108 స్థానాలు గెలిచి… కింగ్ మేకర్ లా కాదు… ‘కింగ్’లా ఎదిగాడు… ఒక రజినీకాంత్ పిరికిగా భయపడినచోట… ఒక కమలహాసన్‌ను జనం తిరస్కరించినచోట… విజయ్ విజయధ్వజం ఎగరేశాడు… జయలలిత వారసత్వ పార్టీ ఏఐఏడీఎంకే (AIADMK)ను మూడో స్థానానికి నెట్టేశాడు… ఇక దళపతి శకం మొదలైందా…! విజయం వరకూ వోకే, కానీ కొన్ని అడుగుల దూరం వరకే… అవి తమిళ పాలిటిక్స్ కదా… అంత సాఫీగా ఉండవు… విజయ్ సీఎం అవుతాడా లేదా త్వరలో తేలుతుంది… కానీ తను పాలిటిక్స్‌లోనే ఉంటాడు… అది మాత్రం పక్కా..!!