#తమిళనాడు రాజకీయాలు 🚩🥱
*స్టాలిన్ సై అంటే.. తమిళ రాజకీయాల్లో సంచలనమే..❗*
07 05.2026🎯
*పద్ధతి ప్రకారం తొలుత విజయ్కే ఆహ్వానం!?
* బల నిరూపణలో విఫలమయ్యేలా పావులు
* ఆపై డీఎంకే, అన్నాడీఎంకే ఉమ్మడి సర్కార్!
* డీఎంకేతో జట్టుకు అన్నాడీఎంకే రెడీ!?
* స్టాలిన్ను ఒప్పించేందుకు
ప్రయత్నాలు!
* కొన్ని కీలక నిర్ణయాలు.. కట్టుబడాల్సిందే
* పార్టీ ఎమ్మెల్యేలతో స్టాలిన్ కీలక వ్యాఖ్యలు
* అన్నాడీఎంకేకు మద్దతివ్వాలని
* స్టాలిన్ నిర్ణయిస్తే ఓకే: ఇళంగోవన్
(చెన్నై - ఆంధ్రజ్యోతి): రోజులు గడుస్తున్నాయి. కానీ... లెక్కలు తేలడంలేదు! తమిళనాడు రాజకీయాల్లో అనిశ్చితి కొనసాగుతూనే ఉంది. కాంగ్రెస్ మినహా ఇతర పార్టీల మద్దతు కూడగట్టలేని అసహాయ స్థితిలో తమిళగ వెట్రి కళగం (టీవీకే) అధిపతి విజయ్! ఒక్కరంటే ఒక్క ఎమ్మెల్యే కూడా కట్టుదాటకుండా గట్టిగా పట్టు బిగించిన డీఎంకే, అన్నా డీఎంకే! మనసులో ఏమున్నా 'పెద్ద పార్టీల' నీడ నుంచి బయటికి రాలేని సీపీఐ, సీపీఎం, వీసీకే వంటి చిన్న పార్టీలు! దీంతో 'త్రిశంకు' ముడి వీడటంలేదు. ఇదే నేపథ్యంలో... ద్రవిడ సిద్ధాంత మూలాలున్న డీఎంకే, అన్నా డీఎంకేలు కలిసి... చిన్న పార్టీలతో కలిసి ప్రభుత్వం ఏర్పాటు చేసే అవకాశముందని 'ఆంధ్రజ్యోతి' ప్రచురించిన కథనం పెను సంచలనం సృష్టించింది. తెరవెనుక ఈ దిశగా అడుగులు పడుతూనే ఉన్నాయి. డీఎంకే, అన్నాడీఎంకేకు చెందిన కొందరు నేతలు చేస్తున్న వ్యాఖ్యలు దీనికి బలం చేకూరుస్తున్నాయి. డీఎంకేతో కలిసి ప్రభుత్వాన్ని ఏర్పాటు చేసేందుకు అన్నాడీఎంకే సంసిద్ధంగానే ఉంది. రెండు కూటముల్లోని చిన్న పార్టీలూ దీనికి సమ్మతంగానే ఉన్నాయి. అన్నాడీఎంకే పుదుచ్చేరి కార్యదర్శి అన్బళగన్, డీఎంకే అధికార ప్రతినిధి టీకేఎస్ ఇళంగోవన్ చేసిన వ్యాఖ్యలే ఇందుకు నిదర్శనం. డీఎంకేతో పొత్తు ఉండదని, కానీ, 118 మంది ఎమ్మెల్యేల మద్దతుతో పళనిస్వామి త్వరలోనే గవర్నర్ను కలవబోతున్నారని అన్బళగన్ వ్యాఖ్యానించారు.
తమిళనాడులో అద్భుతం జరగబోతోందనీ చెప్పారు. ఇక, అన్నాడీఎంకేకు మద్దతు ఇచ్చే విషయంపై ఇప్ప టి వరకూ ఎలాంటి నిర్ణయం తీసుకోలేదని, ఒకవేళ పార్టీ అధ్యక్షుడు స్టాలిన్ నిర్ణయం అదే అయితే తా మంతా అంగీకరిస్తామని డీఎంకే శాసనసభాపక్ష సమావేశం తర్వాత ఇళంగోవన్ ప్రకటించారు. అయితే, అన్నాడీఎంకేతో కలిసి ప్రభుత్వాన్ని ఏర్పాటు చేసేందుకు డీఎంకే అధిపతి స్టాలిన్ సుముఖత వ్యక్తం చేయడం లేదని డీఎంకే వర్గాలు చెబుతున్నా యి. ఆయనను ఒప్పించేందుకు ప్రయత్నాలు జరుగుతున్నాయని వివరించాయి. అత్యధిక స్థానాలు గెలుచుకున్న టీవీకేను కాదని 'ద్రవిడ' పార్టీలు అధికారం చేపడితే ప్రజల్లో వ్యతిరేకత వచ్చే ప్రమాదముందని, విజయ్పై సానుభూతీ పెరుగుతుందని, స్టాలిన్ శషభిషలకు ఇదే కారణమని ఆ పార్టీ వర్గా లు విశ్లేషిస్తున్నాయి. ఈ నేపథ్యంలో డీఎంకే లేదా అన్నా డీఎంకేల తరఫున ఎవ్వరూ తొలుత ప్రభుత్వ ఏర్పాటుకు ముందుకు వచ్చే అవకాశం ఉండదు. ప్రభుత్వ ఏర్పాటుకు విజయ్ను పిలవాలంటూ ఇప్పటికే గవర్నర్పై ఒత్తిడి పెరుగుతోందని, ఈ నేపథ్యంలో ఒకటిరెండు రోజులు ఆలస్యమైనా.. ప్రభుత్వ ఏర్పాటుకు విజయ్కే గవర్నర్ ఆహ్వానం పంపించే అవకాశముందని, ఆ తర్వాత సభలో విజయ్ బలం నిరూపించుకోలేక చతికిలపడడం అనివార్యమని ఆ రెండు పార్టీల వర్గాలు విశ్లేషించాయి. అప్పుడు డీఎం కే, అన్నా డీఎంకే, ఇతర చిన్నపార్టీలన్నీ కలిసి 'పోస్ట్ ఎలక్షన్ అలయన్స్' (ఎన్నికల తర్వాత కూటమి)గా ఏర్పడి.. ప్రభుత్వ ఏర్పాటుకు తమను ఆహ్వానించాల ని గవర్నర్ను కోరే అవకాశముందని వివరించాయి.
కట్టుదిట్టం..
ఇప్పటికేతై డీఎంకే, అన్నాడీఎంకే నుంచి ఒక్క ఎమ్మెల్యే కూడా జారిపోయే అవకాశం కనిపించడం లేదు. ఆ కూటముల్లోని చిన్న పార్టీలు స్వతంత్రంగా నిర్ణయాలు తీసుకునేందుకు వెనుకంజ వేస్తున్నాయి. ఇదే పరిస్థితి కొనసాగితే.. ప్రభుత్వ ఏర్పాటుకు అవసరమైన బలాన్ని సమీకరించడం విజయ్కి దాదాపు అసాధ్యం! వామపక్షాలు విజయ్వైపు వెళ్లాలనే ఆసక్తి ప్రదర్శిస్తున్నప్పటికీ.. 'భవిష్యత్నూ దృష్టిలో పెట్టుకోండి' అని స్టాలిన్ వారికి సూటిగానే చెప్పినట్లు సమాచారం. ఇదే క్రమంలో... అన్నాడీఎంకే సారథి ఎడప్పాడి పళనిస్వామి (ఈపీఎస్) శుక్రవారం గవర్నర్ను కలిసి తమ 'సంఖ్యాబలం' వివరించే అవకాశమున్నట్లు ఆ పార్టీ వర్గాలు పేర్కొంటున్నాయి.
ఎలాంటి నిర్ణయం తీసుకున్నా..: స్టాలిన్
'హంగ్'తో నెలకొన్న అనిశ్చితి కొనసాగుతున్న వేళ డీఎంకే అధినేత ఎంకే స్టాలిన్ నర్మగర్భ వ్యాఖ్యలు చేశారు. గురువారం సాయంత్రం జరిగిన డీఎంకే శాసనసభాపక్ష సమావేశంలో ఆయన ప్రసంగించారు. పార్టీ శ్రేయస్సు దృష్ట్యా తాను తీసుకోబోయే కొన్ని కీలక నిర్ణయాలకు ఎమ్మెల్యేలంతా కట్టుబడాలని స్పష్టం చేశారు. ప్రస్తుత రాజకీయ పరిస్థితుల్లో తాను ఎలాంటి నిర్ణయం తీసుకున్నా శిరసావహించాల్సిందేనని ఆయన స్పష్టం చేశారు.
