ਮਿਆਂਮਾਰ ’ਚ ਵੱਡਾ ਧਮਾਕਾ, 45 ਤੋਂ ਵੱਧ ਮੌਤਾਂ ਉੱਤਰ-ਪੂਰਬੀ ਮਿਆਂਮਾਰ ਦੇ ਨਾਮਖਾਮ ਕਸਬੇ ਦੇ ਕੌਂਗਟੂਪ ਪਿੰਡ ਵਿਚ ਵਾਪਰੇ ਇਕ ਵੱਡੇ ਹਾਦਸੇ ’ਚ 45 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਹੈ। ਖਣਨ ਲਈ ਵਿਸਫੋਟਕ ਸਮੱਗਰੀ ਜਮ੍ਹਾਂ ਰੱਖਣ ਵਾਲੀ ਇਕ ਇਮਾਰਤ ਵਿਚ ਹੋਏ ਜ਼ਬਰਦਸਤ ਧਮਾਕੇ ਕਾਰਨ ਲਗਭਗ 70 ਹੋਰ ਜ਼ਖਮੀ ਵੀ ਹੋ ਗਏ।  ਚੀਨ ਦੀ ਸਰਹੱਦ ਤੋਂ ਲਗਭਗ ਤਿੰਨ ਕਿਲੋਮੀਟਰ ਦੂਰ ਸਥਿਤ ਨਾਮਖਾਮ ਟਾਊਨਸ਼ਿਪ ਦੇ ਕਾਉਂਗਟੂਪ ਪਿੰਡ ਵਿਚ ਦੁਪਹਿਰ ਦੇ ਸਮੇਂ ਹੋਇਆ। ਸਥਾਨਕ ਬਚਾਅ ਕਾਰਕੁਨਾਂ ਮੁਤਾਬਕ ਸਥਿਤੀ ਬਹੁਤ ਹੀ ਖੌਫਨਾਕ ਹੈ। ਮੌਕੇ ’ਤੇ ਪਹੁੰਚੇ ਇਕ ਰਾਹਤ ਕਰਮੀ ਨੇ ਅਪਣੀ ਪਛਾਣ ਗੁਪਤ ਰੱਖਣ ਦੀ ਸ਼ਰਤ ’ਤੇ ਦਸਿਆ ਕਿ ਸ਼ਾਮ ਤਕ 6 ਬੱਚਿਆਂ ਸਮੇਤ 46 ਲਾਸ਼ਾਂ ਨੂੰ ਬਰਾਮਦ ਕਰ ਲਿਆ ਗਿਆ ਸੀ ਅਤੇ ਉਨ੍ਹਾਂ ਨੂੰ ਅੰਤਿਮ ਸੰਸਕਾਰ ਲਈ ਭੇਜ ਦਿਤਾ ਗਿਆ ਹੈ। ਉਸ ਨੇ ਅੱਗੇ ਦਸਿਆ ਕਿ 74 ਜ਼ਖਮੀ ਲੋਕਾਂ ਨੂੰ ਟਾਊਨਸ਼ਿਪ ਹਸਪਤਾਲ ਲਿਜਾਇਆ ਗਿਆ ਹੈ ਅਤੇ ਰਾਹਤ ਕਾਰਜ ਅਜੇ ਵੀ ਲਗਾਤਾਰ ਜਾਰੀ ਹਨ। ਇਕ ਹੋਰ ਸਥਾਨਕ ਬਚਾਅ ਕਰਮੀ ਨੇ ਪੁਸ਼ਟੀ ਕੀਤੀ ਕਿ ਇਸ ਜ਼ੋਰਦਾਰ ਧਮਾਕੇ ਕਾਰਨ ਆਸ-ਪਾਸ ਦੇ 100 ਤੋਂ ਵੱਧ ਘਰਾਂ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਸਥਾਨਕ ਨਿਊਜ਼ ਏਜੰਸੀ ਸਮੇਤ ਮਿਆਂਮਾਰ ਦੇ ਮੀਡੀਆ ਅਦਾਰਿਆਂ ਨੇ ਮਰਨ ਵਾਲਿਆਂ ਦੀ ਗਿਣਤੀ 50 ਤੋਂ 55 ਦੇ ਵਿਚਕਾਰ ਦੱਸੀ ਹੈ।  ਇਹ ਇਲਾਕਾ ਇਸ ਵੇਲੇ ਮਿਆਂਮਾਰ ਦੀ ਸਰਕਾਰ ਵਿਰੁਧ ਲੜ ਰਹੇ ਇਕ ਨਸਲੀ ਹਥਿਆਰਬੰਦ ਸਮੂਹ, ਤਾਅੰਗ ਨੈਸ਼ਨਲ ਲਿਬਰੇਸ਼ਨ ਆਰਮੀ (ਟੀ.ਐਨ.ਐਲ.ਏ.) ਦੇ ਕੰਟਰੋਲ ਹੇਠ ਹੈ। ਟੀ.ਐਨ.ਐਲ.ਏ. ਨੇ ਅਪਣੇ ਟੈਲੀਗ੍ਰਾਮ ਚੈਨਲ ’ਤੇ ਇਕ ਬਿਆਨ ਜਾਰੀ ਕਰਦਿਆਂ ਮੰਨਿਆ ਕਿ ਗੈਲੀਗਨਾਈਟ (ਇਕ ਪ੍ਰਕਾਰ ਦਾ ਵਿਸਫੋਟਕ) ਸਮੂਹ ਦੇ ਆਰਥਕ ਵਿਭਾਗ ਵਲੋਂ ਖਣਨ ਅਤੇ ਪੱਥਰ ਦੀਆਂ ਖਾਣਾਂ ਦੀਆਂ ਥਾਵਾਂ ’ਤੇ ਵਰਤੋਂ ਲਈ ਭੰਡਾਰ ਕੀਤਾ ਗਿਆ ਸੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਧਮਾਕੇ ਦੇ ਅਸਲ ਕਾਰਨਾਂ ਦੀ ਜਾਂਚ ਸ਼ੁਰੂ ਕਰ ਦਿਤੀ ਗਈ ਹੈ। ਮਾਹਰਾਂ ਮੁਤਾਬਕ ਗੈਲੀਗਨਾਈਟ ਦੀ ਵਰਤੋਂ ਪੱਥਰ ਤੋੜਨ ਲਈ ਹੁੰਦੀ ਹੈ, ਪਰ ਜੇਕਰ ਇਸ ਨੂੰ ਸਹੀ ਤਰੀਕੇ ਨਾਲ ਨਾ ਰੱਖਿਆ ਜਾਵੇ, ਤਾਂ ਇਹ ਸਮੇਂ ਦੇ ਨਾਲ ਬਹੁਤ ਅਸਥਿਰ ਅਤੇ ਖਤਰਨਾਕ ਹੋ ਜਾਂਦਾ ਹੈ। ਫਿਲਹਾਲ ਸਥਾਨਕ ਪ੍ਰਸ਼ਾਸਨ ਅਤੇ ਬਚਾਅ ਟੀਮਾਂ ਪ੍ਰਭਾਵਤ ਲੋਕਾਂ ਨੂੰ ਡਾਕਟਰੀ ਸਹਾਇਤਾ ਅਤੇ ਮੁੜ ਵਸੇਬਾ ਪ੍ਰਦਾਨ ਕਰਨ ਵਿਚ ਜੁਟੀਆਂ ਹੋਈਆਂ ਹਨ। #💣ਵੱਡਾ ਧਮਾਕਾ! 45 ਤੋਂ ਵੱਧ ਲੋਕਾਂ ਦੀ ਮੌਤ