महाराज, माफ करा पण ..............????? काही गोष्टी मनाला खटकल्या आणि त्या स्पष्टपणे व्यक्त होणं आज आवश्यक वाटलं…...... तुमच्या मुलीच्या साखरपुडा समारंभावर प्रचंड टीका होऊनही तुमच्या मुलीचं लग्न तुम्ही दणक्यात केलं. अर्थात तो तुमचा पूर्ण अधिकार आहे. अगदी तुमच्याच म्हणण्याप्रमाणे पैसा तुमचा, त्यासाठीचे कष्ट तुमचे त्यामुळे तो कसा, कुठं आणि किती खर्चायचा हा अधिकारही शंभर टक्के तुमचाच आहे. यावर कुणाचाही आक्षेप असण्याचं काहीच कारण नाही. तुम्ही म्हणता, “संतांनी भरभरून दिलं,” हेही तितकंच खरं आहे. कारण प्रत्येक कीर्तनकार संतांचे अभंग, संतांचे विचार याच एकमेव भांडवलावर समाजासमोर उभा राहतो. त्यामुळे तुम्ही किंवा कोणताही कीर्तनकार कीर्तनात उपयोगात आणतो ते भांडवल म्हणजे अभंग, विचार संतांचेच असतात पण त्या बदल्यात मिळणारा पैसा हा जनतेचा असतो हे ही तितकंच खरं आहे. त्यामुळे अशा प्रसंगी एक महत्त्वाची गोष्ट दुर्लक्षित होता कामा नये. तुम्हाला महाराष्ट्रभरातील लोकांनी मान, धन, आदर, प्रतिष्ठा हे सगळं भरभरून दिलं. तुम्हाला मिळालेला मान, पैसा, प्रतिष्ठा, आदर हे केवळ वैयक्तिक कष्टांचं फळ नाही; त्यामागे महाराष्ट्रातील जनतेचं प्रचंड प्रेम, विश्वास आणि सहनशीलता उभी आहे. लोकांनी तुम्हाला केवळ ऐकलं नाही, तर स्वीकारलं, लोकमान्यता दिली. कधी कधी तुमचं बोलणं टोचणारं, कठोर किंवा अप्रस्तुत असलं तरी लोकांनी ते सहन केलं, कारण त्यांना वाटलं—“हे आपल्या भल्यासाठीच बोलत आहेत.” मागच्या तीस पस्तीस वर्षांच्या काळात जेव्हा जेव्हा तुम्ही अडचणीत आले, तुमच्यावर काही संकट आलं अशा अडचणीच्या, संकटाच्या काळातही हाच समाज तुमच्या पाठीशी खंबीरपणे उभा राहिला. हीच ती सहिष्णुता, हीच ती लोकांची उदार वृत्ती ज्यामुळे तुम्ही आज इथपर्यंत पोहोचलात. पण दुर्दैवाने, जेव्हा याच लोकांकडून थोडी टीका झाली, थोडा विरोध झाला—तेव्हा मात्र तुम्ही असहिष्णु झालात. तुमचा संयम सुटायला नको होता तो सुटला. टीका करणाऱ्यांना “हटयोगी”, “नास्तिक”, “कुत्र्याचं शेपूट” अशा शेलक्या शब्दांत हिणवणं, दूषणं लावणं हे तुमच्या उंचीला साजेसं निश्चितच नव्हतं. इथेच मन खिन्न होतं, कारण ज्या लोकांनी एवढ्या वर्ष प्रेम दिलं, त्यांचाच अनादर झाल्यासारखं वाटतं. लोकांनी तुम्हाला जे भरभरून दिलं त्याची अशा प्रकारे परतफेड होणं अपेक्षित नव्हतं. ही कृतघ्नताच नाही तर दुसरं काय आहे ?? इथं तुम्हाला दुर्लक्ष ही करता आलं असतं, कानाडोळा ही करता आला असता किंवा जया अंगी मोठेपण तया यातना कठीण या न्यायाने मनाचा मोठेपणाही दाखवता आला असता पण तसे झालं नाही हे दुर्दैव. कीर्तनकार मग तो कुठलाही असो आणि कोणीही असो जे कीर्तनातून बोलतो ते त्याच्या आचरणात असावं, शंभर टक्के नसलं तरी किमान जवळपास असावं, अशी लोकांची स्वाभाविक अपेक्षा असली तर त्यात गैर असं काय आहे ? कीर्तनकार कीर्तनातून जे शिकवतात ते केवळ शब्दांपुरतं न राहता आचरणातही दिसायला हवं अशी लोकांची अपेक्षा असण्यातही काही गैर नाही. संत तुकाराम महाराज म्हणतात, “बोले तैसा चाले, त्याची वंदीन मी पाऊले” हीच कसोटी लोकांनी कीर्तनकारांसाठी लावली तर लोकांना चुकीचं कसं ठरवणार ? वारकरी संप्रदायाने कायम सहिष्णुता, संयम, शांतता, परस्परांविषयी प्रेम, आदर आपुलकी अशी महत्वाची शिकवण दिली. संत नामदेव, संत ज्ञानदेवांपासून संत एकनाथ, संत तुकाराम महाराज यांच्यापर्यंत अठरापगड जाती धर्मातील स्त्री-पुरुष वारकरी संतांनी आयुष्यात प्रचंड विरोध सहन केला. अपमान, त्रास, निंदा… सगळं सहन करूनही त्यांनी कधी त्रास देणारांबाबत कटुता दाखवली नाही, संयम ढळू दिला नाही. उलट, अधिक प्रेमाने, अधिक संयमाने त्यांनी समाजाला दिशा दिली. तुमच्याकडूनही हाच संयम अपेक्षित होता. टीकेला उत्तर देणं चुकीचं नाही—परंतु ते देताना शब्दांची मर्यादा, समोरच्याचा सन्मान, समाजातील आपली प्रतिमा आणि आपल्या मुखातून दररोज बाहेर पडणाऱ्या संतांच्या विचारांची उंची जपणं आवश्यक असतं. तुम्ही शांतपणे, संयमाने प्रतिवाद केला असता, तर कदाचित लोकांच्या मनातील तुमच्याविषयीचा आदर आणखी वाढला असता. तुमच्या मुलीच्या कुंकूटिळा कार्यक्रमावर टीका झाली तेव्हाही अनेकांनी तुमच्या बाजूने उभं राहून तुम्हाला समर्थन दिलं. कारण लोकांचं तुमच्यावर प्रेम आहे. आजही ते प्रेम संपलेलं नाही, फक्त त्याला थोडीशी ठेच लागली, धक्का बसला आहे हे मात्र निश्चित. म्हणूनच कालच्या प्रसंगाला अनुसरून थोडसं व्यक्त व्हावं वाटलं बाकी काही नाही, तुमचं परीक्षण करावं किंवा तुम्ही चुकले असं म्हणावं एवढा मोठा मी निश्चितच नाही. हे व्यक्त होणं तुमच्यावर टीका करण्यासाठीही नाही. जेंव्हा तुमच्या मुलीच्या साखरपुडा समारंभावर टीका झाली तेव्हा मी तुमचं जोरदार समर्थनही केलं होतं आणि वर्तमानपत्रांमधून *ज्या झाडाला गोड फळं लागतात त्याच झाडावर लोकं दगड मारतात* या मथळ्याखाली लेखही लिहिले होते आणि ते प्रकाशितही झाले होते. त्याचं कारण असं की तुम्ही फक्त एक व्यक्ती नाही तर चालतं बोलतं विद्यापीठ आहात, मोठी संस्था आहात, लाखो कोट्यावधी लोकांसाठी प्रेरणास्थान आहात. लोक मोठ्या आशेने तुमच्याकडे पाहतात. तुमचं एक वाक्य, एक कृती अनेकांना दिशा देऊ शकते. होकायंत्राने दिशा बरोबरच दाखवायची असते कारण त्यावर विश्वास ठेवून लोक प्रवास करत असतात. थोडासा संयम, थोडीशी सहिष्णुता आणि थोडंसं आत्मपरीक्षण गरजेचंच आहे असं ठामपणे वाटतं ज्यामुळे पुन्हा पूर्वीचा तोच आदर, तीच नाळ आणि तोच विश्वास, तेच प्रेम अधिक दृढ होईल… अशी प्रामाणिक अपेक्षा. #इंदुरीकर #वारकरीसंप्रदाय #कीर्तन #समाजप्रबोधन #समाजप्रबोधनकार #इंदुरीकरमहाराज #हभपनिवृत्तीमहाराजदेशमुखइंदुरीकर #वारकरीसंत #IndurikarMaharaj #विवाह #लग्न #वारकरीकीर्तन #👌हृदयस्पर्शी फोटो #😏मतलबी दुनिया #🔴आजचे ताजे अपडेट्स📰 #🏛️राजकारण #1️⃣महाराष्ट्र अपडेट्स