യുഡിഎഫ്‌ സർക്കാർ ഭരണത്തിലേറി മൂന്നാംനാൾ തന്നെ പട്ടികജാതി കുടുംബങ്ങൾക്കെതിരെ പൊലീസ്‌ നരനായാട്ട് നടത്തി. മുഖ്യമന്ത്രിയുടെ ജില്ലയായ എറണാകുളത്ത്‌ കുന്നത്തുനാട്‌ മണ്ഡലത്തിലെ മലയിടംതുരുത്ത്‌ പാരിയത്തുകാവ്‌ പട്ടികജാതി ഉന്നതിയിലാണ്‌ പൊലീസ്‌ തേർവാഴ്‌ച. പട്ടികജാതി കുടുംബങ്ങളിലെ സ്‌ത്രീകളും കുട്ടികളുമടക്കമുള്ളവരെ വീടുകളിൽനിന്ന്‌ വലിച്ചിഴച്ച്‌ തെരുവിലിട്ട്‌ തല്ലി. അർബുദബാധിതനും ഹൃദ്‌രോഗിയുമടക്കം 12 പേർക്ക്‌ പരിക്കേറ്റു. സിപിഐ എം നേതൃത്വത്തിൽ ശക്തമായ പ്രതിഷേധമുയർന്നതോടെ പൊലീസ്‌ പിൻവാങ്ങി. എൽഡിഎഫ് സർക്കാരിന്റെ കാലത്ത്, നേരത്തേ 14 തവണ അഭിഭാഷക കമീഷൻ നടപടിക്കെത്തിയപ്പോഴെല്ലാം പ്രതിഷേധത്തെത്തുടർന്ന്‌ പിൻവാങ്ങിയതല്ലാതെ പൊലീസ്‌ അതിക്രമമുണ്ടായിരുന്നില്ല. പ്രതിഷേധിച്ചവർക്കുനേരെ ജലപീരങ്കി പ്രയോഗിച്ചു. സ്‌ത്രീകളെ ചവിട്ടിവീഴ്‌ത്തി ലാത്തികൊണ്ട് തലയ്‌ക്കടിച്ചു. വീണുപോയവരെ ബൂട്ടുകൊണ്ട്‌ ചവിട്ടി. കുട്ടികളെയും വെറുതെവിട്ടില്ല. വിവരമറിഞ്ഞ്‌ കൂടുതൽ സിപിഐ എം പ്രവർത്തകർ സ്ഥലത്തെത്തുകയും പ്രതിഷേധം ശക്തമാക്കുകയും ചെയ്‌തതോടെയാണ്‌ പൊലീസ്‌ പിന്തിരിഞ്ഞത്‌. സിപിഐ എം ജില്ലാസെക്രട്ടറി സ. എസ്‌ സതീഷ്‌, മുൻ എംഎൽഎ സ. പി വി ശ്രീനിജിൻ എന്നിവർ സ്ഥലത്തെത്തി. പൊലീസ് അക്രമത്തെ പ്രതിരോധിച്ച സിപിഐ എം ഏരിയ സെക്രട്ടറി സ. സി എം അബ്‌ദുൽകരീം ഉൾപ്പെടെ എട്ട്‌ പ്രവർത്തകരെ പൊലീസ്‌ അറസ്റ്റ്‌ ചെയ്‌തു. #🆕 ലേറ്റസ്റ്റ് അപ്ഡേറ്റ്