#చంద్రబాబు #🟡తెలుగుదేశం పార్టీ #పొలిటికల్ సెటైర్స్ 😂
*30 ఏళ్లుగా అలుపెరగని మహానటన❗*
MAY 29, 2026🎯
మన దేశంలో భారత రత్న అత్యున్నత పురస్కారం. ప్రతి మహానాడు సందర్భంలోనూ భారత రత్న పురస్కార అంశం చర్చకు వస్తుంటుంది. తెలుగు సమాజం ఏమైనా అనుకుంటుందనే వెరపు కూడా లేకుండా, ఎన్టీఆర్కు ఆ అత్యున్నత పురస్కారం ఇవ్వాలని మహానాడులో తీర్మానిస్తుంటారు.
వెండితెరపై ఎన్టీఆర్ గొప్ప నటుడు. ఆయన నటన గురించి ఎంత చెప్పినా తక్కువే. అయితే ఎన్టీఆర్కు భారత రత్న కోసం ప్రయత్నిస్తున్నామంటూ, ఆయన ఫొటోలు, విగ్రహాలతో రాజకీయాలు చేస్తున్న వారి నటన అమోఘం, అద్భుతమనే విమర్శలున్నాయి. సినిమాల్లో నటించడం మాత్రమే ఎన్టీఆర్కి తెలుసు. రాజకీయాల్లో నటించడం తెలియదు.
అందుకే ఏ నాయకుడికి లేని చేదు అనుభవాలు ఎన్టీఆర్ రాజకీయ జీవితంలో ఉన్నాయి. ఒకే నాయకుడు రెండుసార్లు వెన్నుపోటుకు గురి కావడం బహుశా దేశ రాజకీయ చరిత్రలో వుండదేమో. కానీ ఎన్టీఆర్ రెండుసార్లు వంచనకు గురయ్యారు. తన అనుకున్న వాళ్లను ఎంతగా నమ్ముతారో, రెండుసార్లు వెన్నుపోటుకు గురి కావడమే నిదర్శనం.
ఎక్కడైతే నమ్మకం, అంధ విశ్వాసం వుంటుందో, అక్కడే వంచన, దుర్మార్గం నీడలా వుంటాయి. అదును చూసి చావు దెబ్బ కొడుతుంటాయి. వ్యక్తిగత, రాజకీయ జీవితాల్లో మోసానికి గురైన వారిని తీసుకోండి. బాగా నమ్మినోళ్ల చేతుల్లోనే వంచనకు గురై వుంటారు.
దురదృష్టవశాత్తు ఎన్టీఆర్ చనిపోయిన తర్వాత కూడా వంచనకు గురవుతున్నారు. ఎన్టీఆర్కు భారత రత్న ఇవ్వాలనే
డిమాండ్ 30 ఏళ్లుగా వినిపిస్తోంది. ముఖ్యంగా ఆయన జయంతిని పురస్కరించుకుని మహానాడు నిర్వహిస్తుంటారు. ఆ సభల్లో చేసే తీర్మానాల్లో ఎన్టీఆర్కు భారత రత్న ఇవ్వాలనేది తప్పనిసరిగా వుంటుంది
ఇంతకూ ఎన్టీఆర్కు భారతరత్న ఇవ్వాల్సింది మన జాతీయ ప్రభుత్వమేనా? లేక ఇతర దేశాల ప్రభుత్వాలా? అనే అనుమానం వస్తుంది. భారత ప్రభుత్వమే భారత రత్న, పద్మశ్రీ, పద్మ విభూషణ్ తదిరత అత్యున్నల పురస్కారాల్ని ప్రతి ఏడాది ప్రకటించి, అందజేస్తుంటాయి.
ప్రస్తుతం మోదీ ప్రభుత్వం ఎవరి మద్దతుతో ఏర్పడిందో అందరికీ తెలుసు. టీడీపీ అత్యంత క్రియాశీలక భాగస్వామి. పురస్కారాల్ని ఇచ్చే అధికారాన్ని చేతిలో పెట్టుకుని, మహానాడులో డిమాండ్ చేస్తుండడం జనానికి విడ్డూరంగా తోస్తోంది. 30 ఏళ్లుగా ఒకే డిమాండ్పై అలుపెరగని నటనా కౌశలాన్ని ప్రదర్శిస్తుండడం సామాన్య విషయం కాదు. వెండితెరపై ఎన్టీఆర్ నటనకు ముగ్ధులయ్యే సంగతిని కాసేపు పక్కన పెడదాం. ఎన్టీఆర్కు భారతరత్న పురస్కారం పేరుతో రాజకీయ తెరపై అద్భుతంగా నటిస్తున్న వారికి నటించే వాళ్లకు ఏదైనా విశిష్టత బహుమతి ఇస్తే బాగుంటుందనే చర్చ జరుగుతోంది.
