माझ्या आईचं आणि माझं नातं अगदी टॉम अँड जेरीसारखं आहे. दिवसभर आमचं काही ना काही सुरूच असतं. तुझं माझं जमेना आणि तुझ्यावाचून करमेना हे आमच्यावर अगदी फिट बसतं. आमचं मत बर्‍याचदा सारखंच असतं, पण ते करण्याची पद्धत मात्र पूर्ण विरुद्ध. मी शांत, कमी बोलणारा… आणि आई म्हणजे चालता-बोलता लाऊडस्पीकर. ती घरात असली की शेजाऱ्यांनाही कळतं. कधी कधी ती मोठ्या आवाजात बोलायला लागली की माझं डोकंच फिरतं आणि मी मनात म्हणतो, गेले माझे कान आता! तीचं काम करण्याचं स्पीड वेगळ्याच लेव्हलचं आहे. ती एखादं काम पाच मिनिटात उरकून टाकेल. पण एक गोष्ट मान्य करावी लागेल माझी आई म्हणजे मेहनतीचं दुसरं नाव आहे. काम करण्याचा कंटाळा तिला आयुष्यात कधी आलाच नाही बहुतेक. दिवसभर काम करूनही तिच्या चेहऱ्यावर थकवा दिसत नाही. ती इतकी extrovert आहे की समोरून कोण ओळखीचं गेलं तर ती आवाज देणारच. आणि माझं असतं, आई राहू दे ना, सरळ जाऊ दे. पण ती थांबणार नाही. उलट त्या माणसाला हाक मारून बोलवेल. मला त्यावेळी खूप awkward वाटतं, पण खरं सांगायचं तर तीच बरोबर असते. तिचं कायमचं वाक्य आहे काय येतं माणसासोबत शेवटी? आपुलकीचे शब्दच ना! ती फार शिकलेली नाही, पण आयुष्याने तिला इतकं शिकवलंय की मोठमोठे शिकलेले लोकही तिच्यासमोर फिके पडतील. मी तिला नेहमी म्हणतो, आई तू शिकली असतीस ना, तर एखाद्या कंपनीची CEO झाली असतीस. लोकांना handle करणं, परिस्थिती सांभाळणं, निर्णय घेणं… हे तिच्याकडून शिकावं. आमच्या नातेवाईकांत आजवर जितकी लग्नं झाली, त्यात सगळीकडे माझी आई पुढे. कोणाला काय हवं, कुठे काय कमी आहे, कोण रुसलंय, कोणाला समजावायचंय सगळं तिच्या डोक्यात फिट बसलेलं असतं. मुलं सहसा आईला घाबरत नाहीत, मीही घाबरत नाही. पण तिच्याबद्दलचा आदर वेगळाच आहे. इतका की तिच्यावर कोणी आवाज चढवलेला मला सहन होत नाही. अगदी पप्पांनीसुद्धा तिच्यावर ओरडलेलं मला आवडत नाही. कारण आई म्हणजे घराचा आत्मा असते. तिच्यामुळे घराला घरपण असतं. ती घरात असेल तर घर जिवंत वाटतं. आणि ती दोन दिवस गावाला गेली की घरात एकदम शांतता पसरते. आम्ही तिघं घरात असतो, पण तरी घर रिकामं वाटतं. खरं सांगायचं तर आईबद्दल लिहायला बसलो ना, तर एक ग्रंथ लिहूनही शब्द कमी पडतील. कारण आई ही फक्त नातं नसतं . ती आपल्या आयुष्याचा आवाज असते, सवय असते, आणि जगण्यामागचं कारणही. Happy mother's day #MothersDay #MothersDayCelebration #1️⃣महाराष्ट्र अपडेट्स #🔴आजचे ताजे अपडेट्स📰 #👌प्रेरणादायी स्टेट्स #👌हृदयस्पर्शी फोटो #😊Feeling happy