#తమిళనాడు రాజకీయాలు 🚩🥱 *విజయ్ రాజకీయ జీవితం.. ప్రతిరోజూ కత్తిమీద సాము❗* MAY 10, 2026🎯 విజయ్ అనే నేను……… అంటూ మరికొన్ని గంటల్లో తమిళనాడు ముఖ్యమంత్రిగా ప్రమాణ స్వీకారం చేయబోతున్నారు విజయ్. ఆయన స్థాపించిన టీవీకే పార్టీ, తమిళనాట ఎన్నికల్లో అతిపెద్ద పార్టీగా అవతరించడం, కాంగ్రెస్ తో పాటు మరికొన్ని చిన్న పార్టీలు మద్దతివ్వడంతో, ఆయన మేజిక్ ఫిగర్ చేరుకున్నారు. వరుసగా గవర్నర్ తో భేటీలు జరిగిన అనంతరం, మరికొన్ని గంటల్లో సీఎంగా విజయ్ అధికారం చేపట్టబోతున్నారు. ఆయన సీఎం అయిపోతున్నారు, ఆయన అభిమానులు సంబరపడుతున్నారు. అంతా బాగానే ఉంది కానీ, రాబోయే ఐదేళ్లు విజయ్ రాజకీయ జీవితం కత్తి మీద సాము. తన హామీల్ని ఎలా అమలు చేస్తారు.. ఎలాంటి పాలన అందిస్తారు.. సంక్షేమ పథకాల్ని ఎలా అమలు చేస్తారు.. ఇది కాదు ఇక్కడ సమస్య. ఈ ఐదేళ్లు తన ప్రభుత్వం కూలకుండా కాపాడుకోవడం ఆయనకు పెద్ద సమస్య. ఇలాంటి క్లిష్ట పరిస్థితుల్లో ముఖ్యమంత్రి పదవిలోకి వస్తున్నారు విజయ్. మేజిక్ ఫిగర్ కోసం విజయ్ కు కాంగ్రెస్ భేషరతుగా మద్దతు ప్రకటించింది. ఆ పార్టీకి చెందిన ఐదుగురు ఎమ్మెల్యేలు విజయ్ తోనే ఉంటారు. ఈ పార్టీతో విజయ్ కు సమస్య లేదు. మిగతా పార్టీలతోనే ఎప్పటికైనా ముప్పు. విజయ్ కు సీపీఐ (2), సీపీఎం (2), వీసీకే (2), ఐయూఎంఎల్ (2) బయట నుంచి మద్దతిచ్చాయి. ఈ పార్టీలన్నీ విజయ్ కు కేవలం బయట నుంచి మద్దతిస్తున్నాయంతే. ప్రభుత్వంలో ఎలాంటి పదవులు తీసుకోవడం లేదు. పైపెచ్చు డీఎంకే కూటమిలోనే కొనసాగుతున్నాయి. అంటే దీనర్థం.. విజయ్ ముఖ్యమంత్రి స్థానంలోనే ఉంటాడు. కానీ తెరవెనక ఈ పార్టీలు నిత్యం విజయ్ ను భయపెడుతూనే ఉంటాయన్నమాట. ఏమాత్రం తేడాకొట్టినా అసెంబ్లీలో అవిశ్వాస తీర్మానం తప్పదు. పైన చెప్పుకున్న పార్టీల్లో కనీసం 2 పార్టీలు వెనక్కు తగ్గినా విజయ్ ప్రభుత్వం కూలిపోతుంది. ఇదీ విజయ్ పరిస్థితి. పేరుకు ముఖ్యమంత్రి అయినప్పటికీ, తన పదవిని, ప్రభుత్వాన్ని కాపాడుకోవడం కోసం ఆయన ఈ పార్టీలతో అణగిమణిగి ఉండాలి. అంటే, పరోక్షంగా డీఎంకే చెప్పినట్టు వినాలన్నమాట. విజయ్ రాజీనామా చేయాలనుకుంటున్న తిరుచ్చి స్థానం నుంచే అతడికి తొలి సవాల్ ఎదురుకావొచ్చు.