#తిరుమల లడ్డు *ఇలాంటి నిర్ణయాలే అనుమానాలు పుట్టిస్తాయి❗* APRIL 3, 2026🎯 తిరుమలలో కల్తీనెయ్యి విషయంలో నిజానిజాల సంగతి ఎటుపోయినా సరే.. వైఎస్సార్ కాంగ్రెస్ పార్టీని బద్నాం చేయడం అనే సింగిల్ పాయింట్ ఎజెండాతోనే కూటమి సర్కారు పావులు కదుపుతున్నదని అంతా అనుకుంటున్నారు. తొలుత విచారణకు సిట్ ఏర్పాటుచేసిన రాష్ట్ర సర్కారు దూకుడుకు సుప్రీం కళ్లెం వేసింది. ఆ సిట్ కాకుండా.. సీబీఐ సారథ్యంలో విచారణ జరిగేలా మరో సిట్ ఏర్పాటుచేసింది. వారు విచారణ పూర్తిచేసి నివేదికలు కూడా ఇచ్చేశారు. కేసు నడుస్తున్న కోర్టుకు చార్జిషీట్లు కూడా వేసేశారు. ఆ నివేదిక పట్ల రాష్ట్రప్రభుత్వం సంతృప్తి చెందలేదు. వారి నివేదికలో జంతువుల కొవ్వులు కలిశాయని ఏ ప్రచారమైతే ప్రభుత్వపెద్దలు సుదీర్ఘకాలం సాగించారో.. అలాంటి మాటలు ఆ నివేదికలో లేవు. దరిమిలా.. విశ్రాంత ఐపీఎస్ అధికారి దినేష్ కుమార్ సారథ్యంలో మరొక ఏకసభ్య కమిషన్ ను నియమించారు. తమాషా ఏమిటంటే.. ఆ ఏకసభ్య కమిటీ విచారణ పూర్తిచేసి నివేదిక సమర్పించడానికి గడువు పూర్తికావస్తోంది. ఇప్పు.. ఆ గడువును పొడిగించారు. ఏప్రిల్ 30వ తేదీ వరకు గడువు పొడిగిస్తూ ఉత్తర్వులు జారీ అయ్యాయి. ఈ పొడిగింపు ఉత్తర్వులే.. ప్రజల్లో కొత్త అనుమానాలకు కారణం అవుతున్నాయి. చూడబోతే.. ఏకసభ్య కమిషన్ ప్రభుత్వం ఆశించే విధంగా తమ నివేదిక తయారు చేయలేకపోయిందేమో అనే అనుమానం ప్రజలకు కలుగుతోంది. ఎందుకంటే.. ఆల్రెడీ ఒకసారి నెలల తరబడి అనేక మంది నిపుణులతో కూడిన సిట్, సీబీఐ ఆధ్వర్యంలో పూర్తిస్థాయిలో విచారం జరిపిన వ్యవహారమే ఇది. అదనపు దర్యాప్తు చేయడానికి మాత్రమే అన్నట్టుగా ఏకసభ్య కమిషన్ ఏర్పాటుచేశారు. ఇప్పుడు వారికి గడువు పొడిగించారు. అయిపోయిన పెళ్లికి మేళమెందుకని సామెత. అయిపోయిన విచారణను మళ్లీ చేయడానికి 45 రోజుల గడువు ఇస్తే.. ఆ గడువు చాలదని మళ్లీ పొడిగించడమే తమాషా. ఇలాంటి నిర్ణయాలు ప్రజల్లో అనుమానాలు కలిగిస్తాయి. సీబీఐ నివేదికే.. ప్రభుత్వానికి చేదుగా అనిపించి ఉండొచ్చు. జంతువులు కొవ్వు ప్రసాతం చేసిన నెయ్యిలో కలిపారంటూ ఎలాంటి అసహ్యమైన ఆరోపణలైతే వారు చేశారో.. ఆ ఊసు కూడా సీబీఐ నివేదికలో లేకపోవడం వారికి కంటగింపే. ఆ పరువు నష్టాన్ని భర్తీ చేసుకోవడానికి వారు ఏకసభ్య కమిషన్ అనే ప్రహసనం తెచ్చారా? అనే అనుమానాలూ ఉన్నాయి. వాటికి బలం చేకూర్చేలా గడువు పొడిగిస్తున్నారంటే.. ఇప్పటికీ వారు కోరుకునే నివేదిక తయారు కాలేదేమో.. వారు కోరుకున్నట్టు నివేదిక తయారయ్యేదాకా గడువులు పొడిగిస్తూ ఉంటారేమో అని ఎవరికైనా అనుమానం పుడితే.. ఎలా తప్పుపట్టగలం?