#అంతర్జాతీయ మాతృ భాష దినోత్సవం✍️ #అంతర్జాతీయ మాతృ భాష దినోత్సవం #ఫిబ్రవరి 21 అంతర్జాతీయ మాతృభాష దినోత్సవ శుభాకాంక్షలు మాతృభాషా దినోత్సవ శుభాకాంక్షలతో..... 💐💐💐 ఒక తెలుగోడి గోడు.... మాతృభాషా దినోత్సవం అనగానే తెలుగు భాషా దినోత్సవం అనుకోవడం పరిపాటి.ఎందుకంటే మనం తెలుగువాళ్ళం , మన భాష తెలుగు భాష. వచ్చిండన్నా ! వచ్చాడన్నా !! వరాల తెలుగు ఒకటే నన్నా అన్నారు కదా సి.నారాయణ రెడ్డి గారు. కానీ నేనిప్పుడు తెలుగు సాహిత్యం గురించి , భాషా విశేషాల గురించి , సౌందర్యం సౌకుమార్యం గురించి రాయ బోవడం లేదు. తెలుగు వారిలో తెలుగు భాష వ్యాప్తి అభివృద్ధి మనుగడ గురించి నావి నాలుగు మాటలు. ప్రపంచంలో దాదాపు 7111 మాట్లాడే భాషలు ఉన్నాయి. ప్రపంచంలో అత్యధికంగా మాట్లాడే భాషలు 20. అందులో తెలుగుది 18 వ స్థానం. క్రితం ఏడాది 16 వ స్థానం ఈ ఏడాది కాలంలో రెండు స్థానాలు కిందికి దిగజారాము. భారత దేశంలో రెండు వందలకు పైగా మాతృభాషలు ఉన్నాయి. మాతృ భాష అంటే అమ్మ భాష. మాట్లాడే భాష. ఒక భాష మాట్లాడడం లో పలకడంలో రక రకాల తేడాలు ఉంటాయి. అవే మాండలికాలు. దేశంలో అత్యధిక సంఖ్యాకులు మాట్లాడే హిందీలో అనేక తేడాలు భేదాలు ఉన్నాయి. తెలుగు భాషలో కూడా మాట్లాడటంలో ప్రాంతీయ భేదాలు ఉంటాయి. రాసే లిపి ఒకటే అయినా ప్రాంతీయమైన పలుకుబడిని అనుసరించి రాసినా మాట్లాడినా అది మాండలికం అవుతుంది. ఈ రోజున అంటే ఇవాళ ఈ మాతృ భాషా దినోత్సవం రోజున నేను పైన చెప్పిన 7111 భాషల వాళ్ళూ వాళ్ళ భాష పుట్టుక గొప్పదనం మనుగడ గురించి ఆలోచిస్తూనే ఉంటారు.అలాగే తెలుగు మాట్లాడే తెలుగు వారము అయిన మనం కూడా ఆలోచించాలి. మన దేశంలో గుర్తింపు పొందిన అధికారిక భాషలు 22. అత్యధిక సంఖ్యలో మాట్లాడే భాషల్లో తెలుగుది నాల్గవ స్థానం. నా చిన్నప్పుడు అంటే ఇంచుమించు 50 ఏళ్ల క్రితం తెలుగు దేశంలో అత్యధికంగా మాట్లాడే భాషల్లో రెండవ స్థానం. మరి నాల్గవ స్థానానికి ఎందుకు పడిపోయాము? దీనికి రెండు రకాల కారణాలు ఉండచ్చు. ఒకటి జనాభా ప్రాతిపదికన మనం అంటే తెలుగు వారము తగ్గిపోవడం కావచ్చు. రెండోది వాడుక భాషగా మనం మన భాషను ఉపయోగించడం తగ్గిపోవడం కావచ్చు. ఒకటి మాత్రం ఇవ్వాళ మనం ఖచ్చితంగా మొహమాటం లేకుండా ఒప్పుకుని చెప్పుకోవాల్సిన సంగతి మనం మన మాతృభాషను ఉపయోగించవలసినంత ఉపయోగించడం లేదు. మాట్లాడడం లేదు.రాయడం లేదు.చదవడం లేదు.ఇది ఆరోపణ కాదు.ఆవేదన. మన తెలుగు వారు అందుకు కారణాలు ఎవరికి వారు ఏం చెప్పినా ఎన్ని చెప్పినా అవేవీ పూర్తి నిజాలు కావు. కుంటి సాకులు అంటారే అలాంటివి. భాష బతికేది ప్రజల నాలుకల మీద. చదువులు పేరుతో మనం భాషకు దూరం కావడం అర్థం కాని ఆశ్చర్యకరమైన విషయం. రాయడం చదవడం వచ్చిన తర్వాత మనం మన చదువులు మన భాషలో చదవాల్సిన రాయాల్సిన అవసరం లేదు. వేరే భాషలో చదువుకున్నా పరీక్షలు రాసినా మాతృభాషను మరచిపోవాల్సిన , వదిలెయ్యాల్సిన అవసరం లేదు. మాతృభాష అయిన తెలుగు మాట్లాడుతూ చదువుతూ రాస్తూ ఉండచ్చు. తెలుగులో శారద అని కలం పేరుతో కథలు నవలలు రాసిన ఒక గొప్ప రచయిత ఉన్నారు.ఆయన జన్మతః తమిళుడు. స్కూల్ కి వెళ్లి చదువుకోలేదు. కుటుంబ పరిస్థితులు అనుకూలించక పదేళ్ల వయస్సులో తమిళనాడు నుండి ఆంధ్రదేశంలోని తెనాలి వచ్చి హోటల్ లో సర్వర్ గా పనిచేస్తూ తెలుగు నేర్చుకుని తెలుగులో అద్భుతమైన రచనలు చేసాడు. భాష పట్ల మమకారం ముఖ్యం. తెలుగు పుస్తకాలు చదవాలి. తెలుగులో పెద్దలు మాట్లాడాలి.పిల్లల చేత మాట్లాడించాలి. సాహిత్య సభలు కానివి ఇతర సభలు సమావేశాల్లో కూడా ఉదాహరణకు ఉద్యోగస్తులు ఆఫీసుల్లో బదిలీ పదవీ విరమణ సందర్భంగా జరిగే సమావేశాల్లో , ఇతరేతర సభల్లో కూడా తెలుగులోనే మాట్లాడాలి. అందరూ తెలుగు వారే అయినా సందర్భాన్ని బట్టి అక్కడి అధికారుల ఉద్యోగుల హోదాను బట్టి తెలుగులో మాట్లాడితే బావుండదు అనుకోవద్దు. పట్టి పట్టి మాట్లాడే పరాయి భాషకన్నా మాటలకు వెతుక్కోవాల్సిన అవసరం లేని మాతృభాషలో మాట్లాడడం చాలా మంచి పద్దతి. అలాగే ప్రతివారూ ఆసక్తి కలిగించుకుని క్రమం తప్పకుండా సాహిత్యం చదువుతూ ఉండడం వల్ల ఆలోచనలు భాష రెండూ మంచి క్రమంలో వృద్ధి చెందుతాయి. మనో వికాసానికి భావ వికాసానికి భాష తో అనుబంధం గొప్పగా ఉపకరిస్తుంది. ప్రభుత్వాలు చెయ్యాలి అనడం, ప్రభుత్వాలు చెయ్యడం కోసం ఎదురు చూడడం మానేసి ప్రభుత్వాలు ప్రజలు కోరుకునే మాతృ భాషలోకి మారిపోయేలా భాషను గాలిలోకి మాటల రూపంలో వ్యాప్తి చెయ్యాలి. పొరుగు రాష్ట్రంలో ఉన్నా పొరుగు దేశంలో ఉన్నా కుటుంబ సభ్యులతో బంధువులతో స్నేహితులతో మామూలు కబుర్లు తెలుగులోనే చెప్పండి. వారికి అర్థం కాదు అనో, వారు ఉన్న ప్రదేశాన్ని బట్టి తెలుగులో మాట్లాడడం ఎందుకులే అనుకోవద్దు. "తానా" అంటే తెలుగు...Association of North America. ప్రసిద్ధి చెందిన ఈ సంఘం తెలుగు భాష ప్రాతిపదికగా ఏర్పడిందే కదా ! మిగతా సంఘాలు అన్నీ కూడా ఏ దేశంలో ఏ రాష్ట్రంలో అయినా తెలుగు భాష మూలంగా అందరినీ ఒక చోట చేర్చే సంఘాలు. ప్రాంతానికి , కులానికి మతానికి అతీతం అయినది భాష. ప్రపంచ వ్యాప్తంగా ఉన్న తెలుగు వారు అందరూ తెలుగులో మాట్లాడుకుని, తెలుగు చదువుతూ, తెలుగు రాస్తూ ఉండాలి. ఈ మాతృభాషా దినోత్సవం రోజు తెలుగు వారు అందరికీ తెలుగు భాష శ్వాసగా మారాలి అని కోరుకుంటున్నాను. శుభాకాంక్షలతో 💐💐🙏 కొప్పర్తి రాంబాబు విశ్రాంత ఉద్యోగి ఇండియన్ బ్యాంక్ విజయవాడ.