#🪔सावन का पवित्र महीना 🙏 #🔱हर हर महादेव #🕉 ओम नमः शिवाय 🔱 #महादेव,नटराज * नटराज स्तोत्रम् * सदंचितमुदंचितनिकुंचितपदं झलझलंचलितमंजुकटकम् पतंजलिदृगंजनमनंजनमचंचलपदं जननभंजनकरम् । कदम्बरुचिमम्बरवसं परमम्बुदकदम्बकविडम्बककगलम् चिदम्बुधिमणिं बुधहृदम्बुजरविं परचिदम्बरनटं हृदि भज ।।१।। हरं त्रिपुरभंजन अनन्तकृतकंकणं अखण्डदयं अन्तरहितम् विरिंचिसुरसंहितिपुरन्धरविचिन्तितपदं तरुणचन्द्रमकुटम् । परं पदविखण्डितयमं भसितमण्डिततनुं मदनवंचनपरम् चिरन्तनममुं प्रणवसंचितनिधिं परचिदम्बरनटं हृदि भज। ।।२।। अवन्तमखिलं जगदभंगगुणतुंगममतं धृतविधुं सुरसरित- -तरंगनिकुरम्बधृतिलम्पटजटं शमनदम्भसुहरं भवहरम्। शिवं दशदिगन्तरविजृम्भितकरं करलसन्मृगशिशुं पशुपतिम् हरं शशिधनंजयपतंगनयनं परचिदम्बरनटं हृदि भज ।।३।। अनन्तनवरत्नविलसत्कटककिंकिणिझलं झलझलं झलरवम् मुकुन्दविधिहस्तगतमद्दललयध्वनिधिमिद्धिमितनर्तनपदम् । शकुन्तरथबर्हिरथनन्दिमुखशृंगिरिटिभृंगिगणसंघनिकटम् सनन्दसनकप्रमुखवन्दितपदं परचिदम्बरनटं हृदि भज ।।४।। अनन्तमहसं त्रिदशवन्द्यचरणं मुनिहृदन्तरवसन्तममलम् कबन्धवियदिन्द्ववनिगन्धवहवह्निमखबन्धुरविमंजुवपुषम्। अनन्तविभवं त्रिजगन्तरमणिं त्रिनयनं त्रिपुरखण्डनपरम् सनन्दमुनिवन्दितपदं सकरुणं परचिदम्बरनटं हृदि भज ।।५।। अचिन्त्यमलिवृन्दरुचिबन्धुरगलं कुरितकुन्दनिकुरम्बधवलम् मुकुन्दसुरवृन्दबलहन्तृकृतवन्दनलसन्तमहिकुण्डलधरम् । अकम्पमनुकम्पितरतिं सुजनमंगलनिधिं गजहरं पशुपतिम् धनंजयनुतं प्रणतरंजनपरं परचिदम्बरनटं हृदि भज ।।६।। परं सुरवरं पुरहरं पशुपतिं जनितदन्तिमुखषण्मुखममुं मृडं कनकपिंगलजटं सनकपंकजरविं सुमनसं हिमरुचिम्। असंगमनसं जलधिजन्मगलंकबलयन्तमतुलं गुणनिधिम् सनन्दवरदं शमितमिन्दुवदनं परचिदम्बरनटं हृदि भज ।।७।। अजं क्षितिरथं भुजगपुंगवगुणं कनकशृंगिधनुषं करलसत्- -कुरंगपृथुटंकपरशुं रुचिरकुंकुमरुचिं डमरुकं च दधतम्। मुकुन्दविशिखं नमदवन्ध्यफलदं निगमवृन्दतुरगं निरुपमम् सचण्डिकममुं झटितिसंहृतपुरं परचिदम्बरनटं हृदि भज ।।८।। अनंगपरिपन्थिनमजं क्षितिधुरन्धरमलं करुणयन्तमखिलम् ज्वलन्तमनलं दधतमन्तकरिपुं सततमिन्द्रसुरवन्दितपदम्। उदंचदरविन्दकुलबन्धुशतबिम्बरुचिसंहतिसुगन्धिवपुषम् पतंजलिनुतं प्रणवपंजरशुकं परचिदम्बरनटं हृदि भज ।।९।। इति स्तवममुं भुजगपुंगवकृतं प्रतिदिनं पठति य: कृतमुख : सद : प्रभुपदद्वितयदर्शनपदं सुललितं चरणशृंगरहितम्। सर: प्रभवसम्भवहरित्पतिहरिप्रमुखदिव्यनुतशंकरपदम् स गच्छति परं न तु जनुर्जलनिधिं परमदु:खजनकं दुरितदम्।।१०।। इति श्रीपतंजलिमुनिप्रणीतं चरणशृंगरहित नटराजस्तोत्रं सम्पूर्णम् ।। ************